Gomd a naas n soabã

Gomd a naas n soaba

بِسْمِ اللهِ الرَّحْمنِ الرَّحِيمِ

﴿الصَّلاَةُ عِمَادُ الدِّينِ﴾

(pʋʋsgã yaa dĩinã zeng-raoogo)

F sã n dat n bãng vẽeneg -wala yiib sẽn yɩlem yiib yaa naase– tɩ pʋʋsgã tara daragɛ sẽn zẽke, la yõod sẽn bedme. Fo sã n le rat n bãng vẽeneg tɩ pʋʋsgã kũun yaa yolyol t’a zɩɩbã me le paoodẽ. Fo sã n le rat n bãng tɩ pʋʋs-basd yaa gãeeng la koangda, bɩ f maag f yyĩng n ges bilg-koɛ-kãnga, la f tagse:

Wakat a yembr la na-bedr tʋms a sõgen-koamb a yiib tɩ b kẽng yẽ meng pʋ-neerẽ wã, la pʋʋgã zãrem taa kiuug a yiib kẽnde, n tɩ zĩnd beenẽ, wakat-kãng t’a kõ b ned fãa sãnem wakɩr pisi la a naase. La a sagl-b tɩ b rɩk ligdã n kẽes sorã soagl la a biye raab pʋgẽ, la b ra teed nins b sẽn na n wa rat ne tɩlɛ wã. La bũm-zoambdgã rɩkr zĩig zãrem yaa raar a yembr kẽnde, mobills la kogls la tẽr-rãmb la sɩls n be beenẽ, ned fãa rɩkda bõn-zoamdg ning sẽn zemsd a ligda alkadre.

La sõgen-koamb a yiibã sẽn deeg koԑԑgã poora, b sɩd viigame n looge. la ned a yembra yɩɩ zu-no-neda, bal a yiisa ligd bilf bal n tol n ta bõn-zoamdgã rɩkr-zĩiga, la a le tol n paam yõod wʋsgo. Wakɩr fãa zugu, yõodã sɩnga ne yembr n tɩ tãag tusri, hal t’a  zu-soabã sũur yɩ noog ne-a.

La sõgen-biig a to wã yɩɩ zu-be-ned sẽn yaa koangda, ne a na n ta bõn-zoambdgã rɩkr-zĩiga t’a yiisa pisi la a tãabo, n rɩk n tão tɛntɛɛg la reem-zaala, n yeeb ligda zãnga, n kell wakɩr a yembr tãa, zĩ-kãng la a tũud-n-taagã yeel-a:

Yaa foo, rɩk f sãnem wakɩr a yembrã sẽn keta n ra f so-toakã biye, sẽn na yɩl n ra wa pa so-wok-kãnga pʋgẽ, n kẽnd ne nao ne kom a ko-yũud ye. Tõnd zu-soaba yaa nin-wagelle, tõe t'a yols-f la a maan sugr n yaaf n bas beegr ning fo sẽn beega, la a kẽes-f sɩlgã tɩ d paam n ta d zĩndgã zĩig raar a yembr pʋgẽ. Fo sã n tõdg rẽ, fo na n pasga we-raoogã f yembr ne nao kiuug a yiib tõr ne kom.

Togs-m wɛ nin-sõngo! Lat tɩ rnin-kãnga sã n tõdg n pa rɩk a sãnem wakɩr a yembrã sẽn yaa wala sãnem-baoor kʋɩlen-bila n ra biye wã, n bas n rɩk-a n yeeb ne yalemdo, wʋm-no-bilf yĩnga, yalla hal ba neba fãa sẽn yɩɩda ne yalemd pa na n bãng  tɩ nin-kãngã bee yalemd sẽn ta tɛk pʋgẽ?!

Yaa foo pʋʋs-basda, la yaa fo m yõore, pʋʋsgã sẽn namsd-a soaba! Ad naabã yaa tõnd Soabã la tõnd Naandã.

La sõgen-koamb a yiibã sẽn yaa so-togdbã: A yembra yaa wẽn-tũuda, n kõt a pʋʋsga ne nonglem-kɛgenga. La a to wã rɩkda yam-yaal-yaal rãmba sẽn yaa pʋʋs-basdba zĩigã.

Ãmmaa sãnem wakɩr pisi la a naasã: Rẽ yaa vɩɩmã pʋgẽ raar fãa lԑԑr pisi la a naasã.

Ãmmaa naaba pʋʋgã, ad yaa Arzãna.

La bõn-zoambdgã rɩkra zĩigã: Yẽ yaa yaoogã.

Ãmmaa so-toakã: Yẽ yaa neba so-toak ning b sẽn kẽnd n tʋgd yaadẽ wã, n sãagd n rabd dũni-yikr daara. N na n tɩ sãag vɩɩm sẽn ka saab zĩiga. La ned buud fãa pasgda so-wok kãnga ne daragԑ-rãmb sẽn yõs taaba, sẽn zemsd ne a tʋʋma la a wẽn-zoɛɛg pãng alkadr tɛka. Wẽn-zoɛtb sãndã kẽnda yʋʋm tusr kẽnd raar a yembr pʋgẽ wala sa-yãgre. Tɩ zãma sãnda kẽnd yʋʋm tus-pis-nũ kẽnd raar a yembr pʋgẽ wala zãmsdo. La Alkʋr'aan-zɩsga wilga hakɩɩk-kanga, aaya a yiib pʋsẽ.

Ãmmaa biye wã: Yẽ la pʋʋsgã. Bal wakat a yembr sekda wakat a nu wã pʋʋsg  ne a koomã yõkr gilli. Bõe kongr la bõe wẽg-m-meng n le yɩɩd ned ning sẽn rɩk a wakat pisi la a tãab n kõ dũni wã sẽn yaa vɩ-koɛɛga, n yaool n ka tõe n rɩk wakat a yembr tãa n tʋm a vɩ-ruumdgã yĩnga?! Bõe tʋʋmd n yõsgd ne yam wala woto?! Sã n sakda ne yam t'a rɩk a ligd pʋɩ-sʋk n kẽes tɛntɛɛg pʋgẽ, neb tusr sẽn lagem a soab pʋgẽ, tɩ yõod paoong tẽeb sẽn be a pʋgẽ yaa yembr tusr pʋgẽ.

Woto sã n sakda ne yam soaba, ad bũmb ka be sẽn yõsgd ne yam la bãngr wala nin-kãnga soab tʋʋmdã ye, t'a sã n ka tõog n rɩk wakɩr a yembr a pisi la a naasã pʋgẽ n ning sãnem-baoor sẽn ka saaba pʋgẽ ye, tẽeb pʋgẽ neb pis-wɛ la a wɛ koabg pʋgẽ sẽn sɩdgd a paoongã! Bõe n le zãr ne yam wala woto? Yalla ned ning sẽn yet t'a yaa yam soab pa tagsd n ges woto? Sẽn le paasde, bãng tɩ pʋʋsgã tara vʋʋs-kẽeng n kõt yõorã, la sũurã la yamã. sẽn le paasd yɛsa, a pa tʋʋm-zɩsg ne yĩnga ye. Fo sã n le tall niyã sõngo, dũni tʋʋm nins sẽn segda fãa gill lebgda tũudum, ne ned ning sẽn kõt pʋʋsgã. Woto yĩng tõe n kɩtame t’a vɩɩmã gill lebg laahrã baoobo. Sẽn le paasde, a kɩtdame t’a  yõ-satgã lebg yõ-ruumdga.