Gomd a ni n soabã

Yaa fo m yõor sẽn yaa kʋɩɩmã:

Fo yamã  sã n nan ka menme, fo na n bãngame tɩ bũmb ka be t’a yolyol la a peemsg la a faaslem le ta pʋʋsgã nu wã kũun la zãag-m-meng ne zũnuub-bɛd a yopoe wã ye. La bũmb me le ka be t’a yõod la a zɩslem le ta bãmba b yiibã biisã la b yõodã ye. La f yeel raoã ne soԑtãanã sẽn sʋɩɩsdb foo ne dĩin-yiibã la yalem-tʋʋmã tɩ: Sɩlem sã n be sẽn tõe n kʋ kũumã, la a zẽk dũni wã saabã, la a zẽk talemdã la pãn-komsmã n bas nebã, la a tõe n pag yaoogã noorã, bɩ y togs tɩ d kelge. Sã n pa rẽ, bɩ y mum y noora. Bala fo bee dũni-bedrã misr pʋgẽ tɩ Alkʋr’aan karemd a pʋgẽ, tɩ d paam n kelg-a la d nuurd mens ne nuurã kãnga, la d tʋm ne a kãndgrã, la d maan-a d wẽnd-yʋʋr-tẽegre, d zɩlmã wã zugu.

Yaa sɩda, ad yaa yẽ la goamã, yẽ me la sɩda, sẽn yit Sɩd-naabã nengẽ, la a sẽegd nuurã alfayda.

اللَّهُمَّ نَوِّرْ قُلُوبَنَا بِنُورِ الإِيمَانِ وَالقُرْآنِ، اللَّهُمَّ أَغْنِنَا بِالاِفْتِقَارِ إِلَيْكَ وَلاَ تُفْقِرْنَا بِالاِسْتِغْنَاءِ عَنْكَ، تَبَرَّأْنَا إِلَيْكَ مِنْ حَوْلِنَا وَقُوَّتِنَا، وَالْتَجَأْنَا إِلىَ حَوْلِكَ وَقُوَّتِكَ، فَاجْعَلْنَا مِنَ المُتَوَكِّلِينَ عَلَيْكَ، وَلاَ تَكِلْنَا إِلىَ أَنْفُسِنَا، وَاحْفَظْنَا بِحِفْظِكَ وَارْحَمْنَا وَارْحَمِ المُؤْمِنِينَ وَالمُؤْمِنَاتِ.

وَصَلِّ وَسَلِّمْ عَلَى سَيِّدِنَا مُحَمَّدٍ عَبْدِكَ وَنَبِيِّكَ وَصَفِيِّكَ وَخَلِيلِكَ، وَجَمَالِ مُلْكِكَ وَمَلِيكِ صُنْعِكَ، وَعَيْنِ عِنَايَتِكَ وَشَمْسِ هِدَايَتِكَ، وَلِسَانِ حُجَّتِكَ وَمِثَالِ رَحْمَتِكَ، وَنُورِ خَلْقِكَ وَشَرَفِ مَوْجُودَاتِكَ، وَسِرَاجِ وَحْدَتِكَ فِي كَثْرَةِ مَخْلُوقَاتِكَ، وَكَاشِفِ طَلْسَمِ كَائِنَاتِكَ وَدَلاَّلِ سَلْطَنَةِ رُبُوبِيَّتِكَ، وَمُبَلِّغِ مَرْضِيَّاتِكَ وَمُعَرِّفِ كُنُوزِ أَسْمَائِكَ، وَمُعَلِّمِ عِبَادِكَ وَتَرْجُمَانِ آيَاتِكَ، وَمِرْآةِ جَمَالِ رُبُوبِيَّتِكَ وَمَدَارِ شُهُودِكَ وَإِشْهَادِكَ، وَحَبِيبِكَ وَرَسُولِكَ الَّذِي أَرْسَلْتَهُ رَحْمَةً لِلْعَالمَينَ، وَعَلَى آلِهِ وَصَحْبِهِ أَجْمَعِينَ، وَعَلىَ إِخْوَانِهِ مِنَ النَّبِيِّينَ وَالمُرْسَلِينَ، وَعَلَى مَلاَئِكَتِكَ المُقَرَّبِينَ، وَعَلَى عِبَادِكَ الصَّالِحِينَ. آمِين.

B sẽn wʋm koԑԑgã poore, ned ning sẽn yaa zʋg-yɩleng soaba rɩka rɩtg sorã la a yetẽ: “Mam bobla m meng ne Wẽnde”. La a sak nao-kẽndrã tũubu.

La ned a to  wã sẽn yaa zʋg-wẽng soabã, sẽn pa tagsda wã, a yãka goabg sorã, soog-n-mengã yĩng bala.

Bɩ d pʋg ne tags n ges ned ning sẽn kẽnd t’a yaa faaseng nif-gesg pʋga, tɩ hakɩɩk pʋgẽ bɩ a yaool n yaa zɩɩb soaba.

A loogame n rɩk a sor n tar kẽn n rʋʋgd tãms la a sigda,  hal n tɩ kẽ ween-vɩ-raoogo.

La ne lingri, a wʋma bʋrg sẽn tar rabeem, t’a wẽnems n gese. La zĩig pʋgẽ bala, a yãnda bõyẽeg sẽn gãdg n yit weoogã pʋgẽ n pigd-a. T’a loog n wudgi, a talla zoees hal n wa tɩ paam bul-koɛɛng zulum sẽn ta kãntɩɩg pis-yoobe. La a yɛɛsgã yĩnga a yɩk n lʋɩɩ bulgã pʋgẽ. La a paama tɩɩg bulgã sʋk n gade. La tɩɩgã ra tara yẽg a yiibu, tɩ yõens a yiib zao b zug n wãbd-ba, yõngr a yembrã yaa pԑԑlg t’a yembrã sablga. Tɩ raoã roog n ges yĩngrã n mik tɩ bõyẽegã yasa bulgã noor wala gagdyẽ n kolld-a. T’a sulg a zug n ges tẽngrã, n mik tɩ wag-kẽenf sẽn tar rabeem n be beenẽ n roog a zugu, tɩ yẽ ne-a ka le yɩɩd kãntɩɩs pis-tã ye, t’a noorã yaa yaleng wala bulgã noora. T’a ges bulgã kɩrems n mik tɩ bõn-yãnemdɩ sẽn namsd neb la rũmdẽ n gũbgã. T’a roog n ges tɩɩgã zug n mik tɩ yaa kankanga, la pa wala raasẽnkama ye, bal a woma tɩɩs toor-toor sẽn ka-tԑk tɩ-biisi, sẽn sɩng ne kaok n tɩ tãag rʋmmaan.

La raoã fasem-yookã la a yalemdã yĩnga, a ka bãng tɩ yel-kãnga pa rog-n-mik ye, yel-kãnsa me ka tõe n wa maand yaar ye. A le ka bãng tɩ yel-soaandɩ sẽn tar yel-soalem n be yel-soalem-kãnsa pʋgẽ ye. A le ka mi tɩ yel-kẽnesd sẽn yaa zɩsg n be n kẽnesd yel-kãnsa ye. La mosa, ba ne raoã sũurã la a sɩɩga la a yamã wiisgã la b kelengã, alhaal-zabds kãnsa pʋga, ad a yõorã sẽn yaa sagl-wẽng soabã sɩnga tɩ-biisã sẽn be tɩɩgã zugã rɩɩbo, tɩ yaa wala a bee yãgr pʋgẽ, t’a yaa sẽn yĩm bũmb ning sẽn maand a kɩrengã, tɩ yaa wala bũmb ka maan ye, n yẽd a tʋb n yi sɩɩgã la sũura kʋmkʋma, n belgd a meng ne a mengã. la tɩ-biisã sãnda yaool n tara zẽnem sẽn namsde. La waa Hadiisʋl-kudsɩ pʋgẽ, tɩ Sɩd-naaba sẽn yaa na-wagella yeelame:

 [أَنَا عِنْدَ ظَنِّ عَبْدِي بِي]  (Mam be m yambã sẽn tar tẽeb ning ne Maana pʋgẽ). A moore: mam tʋmda ne m yambã wala m yambã sẽn mi maam la a tẽed mam nengẽ wã to-to. La yaa woto bala, la rao-kãnga sẽn yaa zu-be-neda tẽ-wẽngã la yalemdã yĩng kɩt t’a tẽed tɩ bũmb ning yẽ sẽn yã wã pa yel-sãang ye, n tẽed tɩ rẽ n yaa yella meng hakɩɩka. Rẽ n so tɩ b tʋm ne-a, la b tʋmd ne-a la b na n wa tʋmd ne-a, a tẽeba zugu. Ad-a sẽn pa ki n na n tɩlg n yi a sẽn be alhaal ninga pʋga, ad-a sẽn le pa vɩ me n na n maan wʋm-noog ne a vɩɩmã. Yaa woto bal t’a be namsgã pʋgẽ n leebdẽ.

Bɩ d bas tẽ-wẽngã soab a namsgã pʋgẽ, la d kẽng n tɩ ges ned a to wã alhaala.

Ad rao-kãnga sẽn tar albark n yaa yam-soaba, a kẽndame tɩ weoogr ka be ne-a wala a ma-biigã ye. Bala a yaa zʋg-sõng soaba, n tar tags-sõng yell fãa pʋgẽ, n vɩ  ne tẽ-sõngo, a tagsã la a saag-sõmsã pʋgẽ, la a yubsd a neng ne a mengã. Yaams la mosɩɩb pa namsd-a wala a ma-bi-taagã ye. Bala a mii nao-kẽndrã, la a sak-a, la a tũud-a. Tɩ rẽ yɩ sabab t’a paamd yiib zĩisi, n kẽnd ne soog-m-menga, gũudum la bas-m-yam pʋgẽ.

La yɩɩ woto, hal t’a wa tɩ paam yãgr tɩ tɩ-puud la tɩ-biis sẽn yaa neeb n yaa sõma be a pʋgẽ, la sẽn paas ne rẽ, te-rẽgd la te-yood n be a pʋgẽ, kogl-sõng kaalem yĩnga. A ma-bi-taagã me ra kẽe yãg-kãng pʋgẽ pĩnda, la a gesa te-rẽgdã sẽn yaa yoodã bala, n maan a menga soagl ne rẽ, n sãam a pʋ-roogã, n yals bilf la a loog n ka vʋʋs baa bilf ye. La rao-kãngã, yẽ tʋma wala gom-bũndã sẽn yeela: “Ges sẽn yɩɩda ne sõmblmã bũmb fãa pʋgẽ” n pa tol n ges te-rẽgdã sẽn yaa yoodã ye. Ayo, a paama nafa sẽn be neer te-sõma wã pʋgẽ, la a vʋʋs sõma, la a yi n sãag a so-toakã.  

Rẽ poorẽ, a sãaga ne a kẽnã bilf-bilfu, hal n wa tɩ kẽ we-rao-kẽeng wala a ma-bi-taagã. La zĩig pʋgẽ bala, a wʋma bõyẽeg kʋkʋm, tɩ bõyẽegã wat n na n pig-a t’a yɛɛse, la a yɛɛsgã pa ta wala a ma-bi-taagã yɛɛsgã ye, bala a tẽ-sõngã la a tags-neerã yĩng kɩtame t’a paam sũ-maagre, ne a sẽn ning a yamẽ tɩ we-rao-kãnga tara naaba, la tõe tɩ bõye-kãnga tũuda weoogã naabã saglga. La ne rẽ fãa, a zoeame hal n wa tɩ paam bul-koɛɛng zulum sẽn yaa kãntɩɩg pis-yoobe, t’a yɩk n lʋɩ a pʋgẽ. La wala a ma-bi-taagã nengẽ sẽn yɩ to wã bala, yẽ me  paama tɩɩg bulgã sʋk n gad n luundẽ.

La zĩig pʋgẽ bala, a yãnda rũms a yiib sẽn wãbd tɩɩgã yẽg a yiibã t’a roog a zug n ges yĩngrã n yãnd bõyẽegã. T’a le sulg a zug n ges tẽngrã n yãnd wag-kẽenfo. La wala ma-bi-taagã me sẽn yɩ to wã bal kɛpɩ, a yãnda yel-solemde, tɩ kẽes-a rabeem la a ma-bi-taagã rabeemã yɩɩga yẽ noor tusri. Bala a zʋg-sõngã lɛɛms-a-la tags-sõngo, t’a tags-sõngã wilg-a zĩ-neebã bũmb fãa pʋgẽ. La sabab kãnga yĩngã, a tagsame tɩ tõkr n be yel-soalem-kãnsã ne taab sʋka. Le wilgdame yɛs tɩ b tʋmda ne saglg a yembre. Sã n yaa woto yel-solgdg n be yel-kãnsa pʋgẽ.

Yaa sɩda, ad yel-kãnsa fãa tʋmda ne na-solgdg saglga. Sã n yaa woto, ad mam pa m yembr ye, ad na-solgdg kãnga geta maam la a gũusd maam la a zarbd maam, la a boond maam n tʋgd zĩig ni, ne a raabo. La rabe-noogã la tags-sõng kãnga waa ne bao-n-bãng nonglem. La yẽ me la woto: Togs-m wɛ nin-sõngo, yaa ãnda la soab ning sẽn zarbd maama, n rat n wilg maam a menga, la a peegd maam ne a tʋlsem zalla, ne nao-kẽnd-kãnga sẽn tar yel-solemda?

Rẽ poore, bao-n-bãngã nonglmã yɩɩ sabab n wa ne yel-solgdgã soab nonglem. Rẽ poore, nonglem-kãngã me yɩɩ sabab n wa ne  yel-solgdã bãngra yamleoogo. Tɩ yamleo-kãngã me wa ne nao-kẽnd-sõng rɩkre, sẽn yard yel-solgdgã soaba, la a le tat a yam.

Rẽ poorẽ, a rooga a zug n ges tɩɩgã yĩngr n mik tɩ yaa kankanga, la tɩɩs tus ka tɛk tɩ-biis la a zãada a zugẽ. La wakat kãnga, a yɛɛsgã looga zãng n bas-a. Bala a bãngame n wãag tɩ sik ka be tɩ tɩɩga yaa yʋy sebr la seb-buk la teed wilgr zĩig ye. la a bãng tɩ na-solgdgã rɩka tɩ-biis nins sẽn be a Arzãna yãga pʋgẽ n maan wala bũmb sẽn pit yubla, ne yel-solgdg la yel-solemde, n dɩk-a n yagl tɩ-kãnga zugu. Le wilgdame yɛs t’a nagsa tɩ-kãnga n na n wilg rɩ-rãmb ning a sẽn segl n bĩng a sãamba yĩnga. Sã n pa rẽ, tɩɩg a yembr pa womd tɩɩs toor-toor tus ka tɛk tɩ-biis ye. Rẽ poorẽ, t’a sɩng kosg ne gãneg-m-menga, hal tɩ b wa lɛɛms-a yel-solgdgã kʋɩlen-bila, t’a kelme, t’a yaa sẽn yete:

Yaa foo tẽn-kãnsa soaba, m kogsa fo lagnoorã, n kẽ fo gũudum pʋgẽ, la m yaa fo sõgen-biiga, n baood fo yard la m gẽesd-fo, la m baood-fo.

La kos-kãnga poore, zĩig pʋgẽ bal la bulgã kɩrengã sẽn pãrg tɩ lagnoor pak n tees yãg-neer sẽn yaa sõma, tɩ sãang ka be a pʋgẽ ye. Pa rẽ ye, ad yaa wag-kẽenfã noor la sẽn lebg lagnoorã. Tɩ bõyẽegã la wag-kẽenfã lebg wala sõgen-koamb a yiibu, n bool-a t’a wa kẽ, hal tɩ bõyẽegã lebg wed-moaag b sẽn nom a yĩnga.

Yaa foo m yõor sẽn yaa kʋɩɩmã, la yaa foo m tũud-n-taag tagsã pʋgẽ, wa-y tɩ d mak nebã a yiiba alhaal-rãmba ne taab n gese, sẽn na yɩl tɩ d yãnd la d bãng yalɩ ning sõma wã sẽn wat ne sõma, tɩ wẽngã me wat ne wẽnga:

Bɩ y ges yaa wãn-wãn la zu-be-nedã sẽn yaa goabg so-tũudã be kollg pʋgẽ  wakat fãa ne rabeem n na n kẽ wag-kẽenfã noorẽ.

Tɩ b yaool n boond zu-no-nedã t’a wa kẽ yãg-neer sẽn yaa vʋʋsg zĩiga, sẽn pid ne tɩ-biisi.

La wãn to-to, la yɛɛs-kẽeng la rabeem-zabdgã namsd zu-be-nedã sũuri, wakat-kãng tɩ zu-no-nedã geta teed sẽn yaa yel-sãang sẽn tar yel-solemde, ne tagsg la yɛɛsg sẽn noome, la bãngr b sẽn maand nonglem. 

La wãn to-to, la zu-be-nedã be yɛɛsg la tẽeb wãagr la yemblem pʋgẽ n namsdẽ, tɩ zu-no-nedã yaool n dɩkd wʋm-noogo, nin-yubsg la tẽeb la nonglem pʋgẽ.

la wãn to-to, la zu-be-nedã ne a menga t’a yaa wala b sẽn pag n dɩgl we-rũm-wãbds yĩnga, wakat kãng tɩ zu-no-nedã yaool n yaa sã an-zɩsg sẽn kɩdemd la a yubsd a neng ne sõgendba sẽn yaa yel-solemdã, ne gãa-soabã sẽn yaa wagellã, b sẽn sig a soab nengẽ wã.

La wãn to-to, la zu-be-nedã yãgd ne a mengã namsgo, ne a sẽn dɩ tɩ-biis sẽn noom vẽeneg pʋgẽ, t’a hakɩɩka yaool n yaa zẽnem. Bal tɩ-bi-kãnsa pa yɩ rɩlla bilgr b sẽn kõ ninsaal t’a tõe n lemb n gese, sẽn na yɩl t’a bao a yẽgã la a bulbã zĩisi, la a yɩ a raadenga. B ka kõ sor t’a vel-a wala rũng ye.

La ãmmaa zu-no-nedã, a lemd-a lame, la a yalsd sɩda zug la a yaoond a rɩɩba, n maand wʋm-noog ne kollgã.

La wãn to-to, la zu-be-nedã yam kaoolgã yĩng kɩt t’a wẽga a meng ne a mengã, la a tedg hakɩɩkã sẽn yaa vẽeneg wala wĩntoogã, la alhaal sẽn pɩnda, tɩ lebg saag-rãmb la gɛhãnem sẽn yaa lik tuu. Ad-a sẽn pa sõmb ne nimbãan-zoeere, ad-a sẽn pa tar sor n tõe n wilg a sũ-pa-noong ne neda.

Makre: Ned sã n pa sek a meng ne sãand sẽn tar waoor wʋm-noogo, yãg-neer pʋgẽ, a zo-rãmb sʋka, sig-noor wakato, n tɩ rɩk bõn-suudɩ sẽn yaa wẽng n su, la a tagsd t’a yaa beel n yaa koamdga, n be waood yãoogẽ, we-rũm-wãbds sʋka, n bas n sɩng kɛleng la a kʋmdẽ, nin-kãng soab pa sõmb ne nimbãan-zoeer ye. Bala yẽ n wẽg a mengã ne a menga, la a get a zo-rãmbã tɩ b yaa we-rũm-wãbdse, la a paoog-ba. Ad rao ning sẽn yaa zu-be-nedã bilgr yaa wala rao-kanga.

La ãmmaa zu-no-nedã, yẽ nee hakɩɩka. La hakɩɩkã a mengã yaa neere. La hakɩɩkã sõmblmã bãngr yĩnga, a waoogda hakɩɩka soaba, tɩ rẽ yĩng kɩt t’a sõmb ne a yolsgã. Zĩ-kãng la Alkʋr’aan aaya-kãngã maana-soalgdgã na n vẽnege:

﴿مَا أَصَابَكَ مِنْ حَسَنَةٍ فَمِنَ اللهِ وَمَا أَصَابَكَ مِن سَيِّئَةٍ فَمِنْ نَفْسِكَ﴾ (سورة النساء: ٤-٧٩)

(Bũmb ning fãa sẽn paam foo sẽn yaa sõma yii Wẽnnaam nengẽ, la bũmb ning fãa sẽn paam foo sẽn yaa mosɩɩba yii fo mengã nengẽ).

Fo sã n mak rap a yiibã ne taaba, n maag f yĩng n tags-n-ges welgr ning sẽn be sʋka, la zẽng sẽn pa rẽ, fo na bãng tɩ pipi raoã yõorã sẽn ya wẽng-sagendã, hakɩɩk pʋgẽ, a segla gɛhãnem n bĩng a yĩnga, wakat-kãng tɩ rao a yembrã niya-sõngã la a zʋg-sõngã la a tags-sõngã yĩnga, wã fãa kɩtame t’a paam maan-neer sẽn bedem, la zu-noog sẽn zɩse, la yɩɩdlem sẽn be neere.

 Yaa foo yõore, la yaa foo ned ning sẽn lagem mam yõorã n kelgd kibarã, y sã n rat n yɩ wala zu-no-nedã, n pa rat n yɩ wala zu-be-nedã, bɩ y kɩll y tʋbr n kelg Alkʋr’aan-wagellã, la y tũ a bʋʋdã, la y gãd-a, la y tʋm ne a bʋʋdã.

Ad yãmb sã n fasem hakɩɩk-rãmb nins sẽn be yẽos-kãngã pʋga, ad y na n tõog n rɩk-a lame n tʋm dĩinã la dũni wã la ninsaal ã la liimaoongã hakɩɩka zugu. La mam na n togsa yãmb a zu-raadã, bɩ yãmb me rɩk-a n wegs y toore:

Ad ma-biis a yiibã: a yembrã yaa muumin yõorã la nin-sõng sũurã. La a to wã yaa kɩfr yõorã, la dĩin-yit sũurã.

La ãmmaa soy a yiibã: Rɩtg soaba yaa Alkʋr’aana la liimaoongã sorã. La goabg soaba yaa kɩɩsgã la kɩflmã sorã.

La yãgr ning sẽn be so-kãng zuga: Ad yaa ninbuiidã zĩid-n-taar vɩɩmã sẽn tar tɛka, la nedemd nin-pukrã, ne a sẽn tar yel-sõma la yel-wẽnã, la sõngã la yookã, la yɩlemdã la rẽgdã tɩ lagem-taab yɛla pʋga. Ad yam-soab la ned ning sẽn tʋmda ne koɛɛg sẽn yeel tɩ:

 [خُذْ ما صَفَا وَدَعْ ما كَدَرَ]  (rɩk sẽn yɩlga, la f bas sẽn gudga) la a kẽnd ne sũur laafɩ.

La ãmmaa we-raoogã, yẽ yaa tẽngã la dũni-kãngã.

La ãmmaa bõyẽegã: yẽ yaa kũumã la lagɛlã. 

La ãmmaa bulgã: yẽ la ninsaal yĩngã la vɩɩmã.

La ãmmaa zulmã sẽn ta kãntɩɩg pis-yooba: yẽ wilgda yʋʋm pis-yoob ning sẽn yaa ninsaal yʋʋma.

La ãmmaa tɩɩgã, yẽ yaa vɩɩmã wakatã la vɩɩmã yẽgra.

La ãmmaa rũms a yiibã, sablgã la pɛɛlgã, yaa yʋngã la wĩntoogã.

La ãmmaa wag-kẽenfã, yẽ yaa barzah sorã, la laahr zakã lagnoorã, zak ning noor sẽn yaa yaoogã. La lagno-kãng muumin yĩnga, yaa lagnoor sẽn pakd n yit bans-roogẽ n dabd Arzãn bãtẽ.

Ãmmaa bõn-yãnemdɩ wã sẽn yaa namsdbã, yẽ yaa dũni mosɩɩb-rãmbã. La muumin nengẽ, b yaa Wẽnaam bugs-rãmba, la Yolsg-naaba waoore, sẽn na n yɩl t’a ra bõr yam-yaal-yaal gõeem pʋgẽ ye.

Ãmmaa tɩ-biisã sẽn be tɩɩgã zugã, yẽ yaa dũni neema wã Kõt-yaoleng naabã sẽn yaa na-wagella sẽn maan-a t’a yaa laahr neema wã yʋy sebre. la A maan-a t’a wõnd-a la a wilgd-a, la a maan-a t’a yaa bilgr sẽn takd raadensã n tʋgd Arzãn tɩ-biisẽ,

La ãmmaa tɩɩgã sẽn womd tɩ-biis kõbg toor-toorã, ba ne a sẽn yaa tɩɩg a yembra, yẽ yaa sẽn wilgd Pãng-naaba tõoga tagemse, la Wẽnnaam tãmpõ, la Wẽnnaam naama tagemse. bal [rɩk bũmb a yembr n naan bũmb fãa gilla] a moore, rɩk tãnd a yembr n naan bõn-bundɩ wã la tɩ-biisã fãa gilla. la rɩk koom a yembr n naan rũmsã fãa gilla. La rɩk rɩɩb a yembr n naan bõn-vɩɩg yĩn-wila fãa gilla. sẽn le paasde, ad [rɩk bũmb fãa gill n maan bũmb a yembra] A moore, rɩk rɩɩb kõbg toor-toor bõn-vɩɩg sẽn rɩta n naan a nemdã sẽn yõs-taabã la a gõnga, ad naan-kansã la bãng-kãnsã yaa Kʋdlem-naaba la Ruumg-naaba sẽn yaa Yemblem-naab la Tikr-naaba tõogã tagms la a tãmpõ, la A tagems ning sẽn pa tõe n togs n maana.

Yaa sɩda, ad rɩk  bũmb a yembr n maan bũmb fãa wã, la rɩk bũmb fãa n maan bũmb a yembrã, ad-a yaa bũmb fãa naandã la bũmb fãa tõodã a yembr tãa tagemse.

La ãmmaa bõn-solgdgã, yẽ yaa raab ning sẽn solg naanegã pʋga, sẽn vẽnegda la a yodgd ne liimaoongã sababa.

La ãmmaa kʋɩlen-bilã, yaa:

 " يَا اَللهُ { لاَ إِلٰهَ إِلاَّ اللهُ  { اللهُ لاَ إِلٰهَ إِلاَّ هُوَ الحَيُّ القَيُّومُ."

« Yaa allaahʋ, Laa ɩlaaha ɩllallaahʋ, Allaahʋ laa ɩlaaha ɩllaa huwal hayyʋl kayyʋʋm ».

La ãmmaa wag-kẽenfã noorã sẽn lebg bãoog lagnoorã, wilgdame tɩ yaoogã, ba ne a sẽn yaa sẽk la namsd nebã wala bãns-ro-sẽka, yɛɛsg la yĩmb pʋgẽ ne menengã la maan-n-zʋʋk rãmbã yĩnga, la lagnoor sẽn pakd n rabd bok-sẽkẽ wala wag-kẽenfã pʋga, ad-a yaa noor sẽn pakd n yit dũni bãns-roogẽ n tʋgd ruumg yãgrẽ. La rignoor sẽn yit zarbg zĩisẽ n tʋgd Arzãn bãtẽ, la sẽn yit vɩɩm yaamsẽ n tʋgd Yolsg-naab yolsgẽ, ne Alkʋr’aana la liimaoongã rãmbã.

La ãmmaa bõyẽegã sẽn lebg sõgen sẽn yaa nen-yubsda, la a sẽn lebg wed-moaag sẽn noma, wilgdame tɩ kũumã, ba ne menemdbã nengẽ a sẽn yaa bũmb sẽn welgd nebã ne b nong-n-taasã welg-ruumdg sẽn zabda, la a yiisd-b dũni arzãn sẽn sakd gesga pʋga, n kẽesd-b yaoogã bãns-ro-sẽka pʋgẽ ne yɛɛsg la yemblem la welgra, ad-a ne kãndgrã la Alkʋr’aana rãmba, a yaa seg-taab zĩig ne zo-kʋd nins sẽn da loog n kẽng dũni a to. A le yaa sabab tɩ b na n paam b tẽngã meng la b zu-no-ruumdgã pʋgẽ n kẽ.  N le yaa booll sẽn yit dũni bãns-roogẽ n tʋg Arzãn yãgrẽ. la tʋʋma keoor sẽn yit dũni Yolsdã la laahr Yolsd yɩɩdlmẽ rɩkr kollgo. la dũni tʋʋm naong saab la sodaar-tʋʋm la zãmsg basbo, la zarbg saabo.

Gomdã gilbu: Ad ned ning sẽn rɩka vɩ-satgã n maan a bõn-baoodg zu-raoogo, a soab bee gɛhãnem sẽn solg pʋgẽ, ba t’a sã n be dũni arzãn pʋgẽ. La ned ning sẽn baood vɩ-ruumdgã ne nidg-pãnga, a soab na n paama dũni la laahr zu-noogo, ba a dũni vɩɩmã sẽn weoog to-to, a sakd n deeg-a-la a zugẽ, la a pʋʋsd Wẽnnaam bark ne sugri, bala a miime tɩ dũni wã yaa Arzãna kollg zĩigã.

اللَّهُمَّ اجْعَلْنَا مِنْ أَهْلِ السَّعَادَةِ وَالسَّلاَمَةِ وَالقُرْآنِ وَالإِيمَانِ آمين.

اللَّهُمَّ صَلِّ وَسَلِّمْ عَلَى سَيِّدِنَا مُحَمَّدٍ وَعَلَى آلِهِ وَصَحْبِهِ بِعَدَدِ جَمِيعِ الحُرُوفِ المُتَشَكِّلَةِ فِي جَمِيعِ الكَلِمَاتِ المُتَمَثِّلَةِ بِإِذْنِ الرَّحْمَنِ فِي مَرَايَا تَمَوُّجَاتِ الهَوَاءِ عِنْدَ قِرَاءَةِ كُلِّ كَلِمَةٍ مِنْ القُرْآنِ مِنْ كُلِّ قَارِئٍ مِنْ أَوَّلِ النُّزُولِ إِلىَ آخِرِ الزَّمَانِ، وَارْحَمْنَا وَوَالِدَيْنَا وَارْحَمِ المُؤْمِنِينَ بِعَدَدِهَا بِرَحْمَتِكَ يَا أَرْحَمَ الرَّاحِمِينَ آمِين. وَالْحَمْدُ لِلهِ رَبِّ العَالَمِينَ.