Gomd a tãab n soabã

Gomd a tãab n soaba

بِسْمِ اللهِ الرَّحْمنِ الرَّحِيمِ

﴿يَٰا أَيُّهَا النَّاسُ اعبُدُواْ رَبَّكُم....﴾

(سورة البقرة: ٢-٢١)

“Yaa yãmb a nebã, tũ y soabã…”

(Bakara 2/21)

Fo sã n dat n bãng tɩ tũudmã yaa tolb la zu-no-bedre, la f rat n bãng tɩ dĩin-munaafiglmã la yam-kaoolgã yaa kongr la halak-bedre, bɩ f ges bilg-koɛ-kãnga la f kelg-a

Raar a yembr la sodaas a yiib reeg saglg n na n kẽng tẽn-zãrgo. B naaga taab n looge, hal n wa tɩ ta so-wԑlga, n mik rao so-wԑlgã zugu, tɩ nedã yeel-ba:

Ad naong ka be nug-rɩtg-sorã pʋgẽ ye. Sẽn le paasde, neb piig sã n rɩk so-kãngã, wԑ wã fãa paamda yõod la vʋʋsg sẽn bedme. La goab-sorã, neb piig sã n rɩk-a, wԑ wã fãa paamda naongo, yõod me le ka be.

La soy a yiiba fãa zema taab ne woglem la koeelem. La welgr a yembr bal n be b yiiba sʋka, welg-kãng me la woto:

Ad ned ning sẽn rɩka goabg-sorã, nao-kẽndr la goosneem sẽn ka be a soab pʋga, a pa zãad korg la zab-teog ye, a paamda peemsg vẽeneg-vẽenega, la zɩlem-be-vʋʋsgo.

Ãmmaa ned ning sẽn rɩk rɩtg-sorã, sor ning sẽn tara sodaar nao-kẽndrã, yaa tɩlɛ ne-a t'a zã korg sẽn pid ne rɩ-kẽtem sẽn ta kɩlʋ a naase, la a zã zab-teed goosneema sẽn mi-tiiri, t'a zɩslem ta kɩlʋ a yiibu, sẽn tõe n tall n wil bɛ buud fãa la a modg-a.

La soda-kãnsa b yiiba sẽn kelg nin-kãngã sẽn yaa wilgdã poore, sodaag ning sẽn yaa zu-no-nedã rɩka rɩtg-sorã, la a zɩlg zɩɩb sẽn ta Ratl a yembr a poorẽ la a zẽkẽ, tɩ rẽ yɩ sabab t'a sũura ne a yõora paam tɩlgr n yi tãasg la yɛɛsg sẽn ka tɛka.

Ãmmaa sodaag ning sẽn yaa zu-be-nedã, a basa sodaarã, la a tõdg t'a ka na n tũ nao-kẽndrã ye, n rɩk goabg-sorã, n tɩlg a yĩisa n yi Ratl a yembr zɩɩbo, t’a sũurã yaool n pid ne yɩɩr tɩ namsd-a, tãaseg Ratl tus ka-tɛka yĩnga. T'a yõorã me be rabeem sẽn ka-tɛk pʋga, t'a rɩk a sorã n bõosd ned bũud fãa, tɩ bũmb buud fãa la rãamr bũud fãa kɩt t'a rigda. A talla woto hal n wa tɩ ta zĩig ning a sẽn data. La a sẽn ta be wã b nams-a-la kɩɩsdb la zoetb namsgo.

Ãmmaa sodaag ning sẽn nonga sodaarã nao-kẽndrã, la a gũusd a korgã la a zab-teedã, ned ning sẽn rɩk rɩtg-sorã, a kẽndame t'a sũurã tar laafɩ t'a pɛleng gãe, tɩ ned ba a yembr ka tãas-a, a ka yɛɛs ned ba a ye me. Yɩɩ woto hal t'a wa tɩ ta tẽng ning a sẽn data. la a sẽn ta wã a paama soda-tɩrg rolbo, sodaag ning sen tʋmd a tʋʋmã wala sẽn segda.

Yaa foo yõor sẽn yaa kɩɩsdã, ad kẽn-kendb a yiibã, b yembra rɩkda wẽnd-tũudbã zĩiga, la a to wã rɩkda wẽnd-kɩɩsdb nins sẽn pʋgd b yõyã yam-leoogã zĩiga.

Ãmmaa sorã, yaa vɩɩmã sora, sẽn sɩng yõy zãmaanẽ, n pɩʋʋgd yaadẽ n tar n rabd laahre.

Ãmmaa korgã la zab-teoogã, bãmb yaa tũudmã la wẽnd-zoɛɛgã. Ad ba tɩ tũudmã sã n tara zɩɩb vẽenega, ad vʋʋsem la faaslem sẽn ka tõe n sɩf n be a pʋgẽ. Bal tũudã yeta a pʋʋsgã pʋgẽ tɩ ( As’hadʋ allaa ɩlaaha ɩllallaahʋ) a moore: naand ka be, rɩlgd me ka be, rɩlla Wẽnde. Namsgã la nafa wã fãa bee wẽnnnaam nugẽ. Ad Wẽnnaam yaa bʋ-mitã, a pa tʋmd yaar ye. A le yaa yolsg-naaba, sẽn yaa maan-neer wʋsgda, la yolsda. A sẽn tabend woto a sũurẽ wã kɩtdame t'a paam yolsgã sãnem-boayã lagnoor bũmb fãa pʋgẽ, n kogsd-a ne doaaga. La a le ne tɩ bũmb fãa gill tũuda a soaba saglgã. Tɩ rẽ yĩng kɩt t’a lebsd a menga a soabã nengẽ, la a tikd Wẽnnaam n baood gũudum n yit mosɩɩb buuda fãa, n bobend a meng ne-A, t'a sɩd-kũunã kõt-a bas-m-yam sẽn pidi.

Yaa sɩd, ad raood yẽgr yaa sɩd-kũunã la Wẽnnaam tũudmã, wala sẽn be tʋʋm-sõma wã hakɩɩka pʋga. La rabeemã me yẽgr yaa menengã, wala sẽn be tʋʋm-wẽnsã fãa pʋga.                                                                       

Yaa sɩda, bãng tɩ wẽnd-tũudã, ned ning sũur sẽn tar nuura sẽn pidã, ba tɩ dũni wã fãa gill sã n lebg bũm-pusdg n pusgi, a tõeeme n pa yɛɛs ye. Ayo, a na pʋs n tũnuga ne rẽ n yãnd Tikr-naaba tõoga yel-soalem sẽn yaa vẽenega. Tɩ filozofɩ bãngdã yaool n rigda, b sẽn yet-a soab t'a yaa yam-witg soaba, t'a yaool n ka wẽnd-tũud n yaa sũ-kɩɩng soaba, t'a sã n be tẽngã zug n yãnd ãd-kaoodg saasẽ wã, la a sẽn sokd a meng la a yetẽ: togs-m wɛ, yalla ãd-yeebdg kãnga pa na n lʋɩ n zab tõnd tẽn-gõngã, t'a be yɩɩr pʋgẽ. (Sɩda, ad ãd-kãnga buud yɩɩ sabab tɩ Amerik rãmb yɛɛs wakat a yembre, tɩ b wʋsg bas b zaks yʋngã pʋgẽ).

Yaa sɩda, ad ba ne ninsaal sẽn tar tʋlsem ne yɛl ka-tɛka, ad a ligd-zugã, gesg pʋgẽ, pa baa fʋɩ ye. La ba ne a sẽn be mosɩɩb sẽn ka tɛk pʋga, ad a tõogã alkadr pa zem baa fʋɩ ye. Tɩ yaa wala a ligd-zugã la a tõogã tɛk zemsa a nuga sẽn tat bũmb ninga tԑka, t'a saagrã la a tʋlsmã la a zabsmã la a ballaogã alkadr yaool n yaa yaoleng wala a nifã la a saagrã yaadem tɛka.

Woto bala, ad ned ning sẽn pa zoang la pʋtẽ-kɩɩng soaba, a neeme la a mi tɩ tũudmã la bobl-m-mengã la wẽnd-yembgã, la rɩk-f-meng-n-kõ-Wẽndã, yẽ la yõod sẽn yɩɩd bedlem, la zu-noog la neema ne adem-biig yõorã, sẽn yaa tʋlsem soaba, n yaa komsã, n yaa valeng n yaa talgã, hal n tɩ tãag alkadr kãnga.

La yaa vẽeneg tɩ sor ning sẽn tar bas-m-yamã, b yãkda yẽ n basd so-wẽnga, ba d sã n saagdame tɩ naongã sẽn be so-wẽngã zuga yaa yembr piig pʋgẽ. Ad tũudmã sorã –sẽn yaa tõnd zu-loɛɛga– sẽn paasd ne a pa tar naongã, ad zu-noog sanem-baoor sẽn ka tar tɛk n be a pʋgẽ, ne sõor sẽn ta wɛ piig pʋgẽ. La ãmma dĩin-munaafɩglma la yam-kaoolgã sorã, ad yõod ka be a pʋgẽ ye, ne dĩin-munaafɩka meng sẽn sak a zug n deeg tɩ yaa woto, tɩ zu-beed halakr sẽn ka tɛka be a pʋgẽ, sẽn t'a wala wɛ piig pʋgẽ, ne neba fãa sẽn seg taab a zugu, la zãma sẽn ka tõe n bãng n sõd sẽn maan kaseto, sẽn yaa bãngdb la kaset-maandba, n le yaa sɩd meng-menga, ne pʋtẽerã rãmba la masaal-yokdb sẽn kõ kibare.

Gomdã gilbu: Ad dũni zu-noogã bee tũudmã la Wẽnnam dĩina sõgnegã pʋgẽ. Woto bala, a le yaa laahr zu-noogo. Sã n yaa woto, sõmba ne tõnd tɩ d yɩlmed wakat fãa tɩ

الحمد لله على الطاعة والتوفيق

(D pẽgda Wẽnnaam ne A sẽn maan-d segl-sõng ne tũudmã la segl-sõngã)

La d segd n pʋʋsa Wẽnnaam bark wakat fãa ne A sẽn maan-d tɩ d yaa lislaamba.