Gomd a yiib n soabã

Gomd a yiib n soaba

بسم الله الرحمن الرحيم

﴿الَّذِينَ يُؤْمِنُونَ بِالْغَيْبِ﴾

 (سورة البقرة: ٢-٣)

« Neb nins sẽn kõt-sɩd ne sẽn solgã »

(Bakara : 2/3)

F sã n dat n bãng zu-no-kẽeng la neema bedr ning sẽn be liimaoongã pʋga, la wʋm-no-kẽeng  la vʋʋs-bedr ning sẽn be a pʋga, bɩ f ges bilg-koɛ-kãnga la f yok f tʋbr n kelg-a:

Rap a yiib n yi raar a yembr n na n gilg wʋm-noog maaneg la tolb yĩnga. La ned a yembra yaa nin-mengd n yaa zu-be-neda, n rɩk a sor n looge. La a yembra yaa wẽnd-tũuda, n yaa zu-no-neda, yẽ me rɩka a sor n looge. tɩ neba a yiibã fãa rɩk b sor n loogdẽ.

La nin-mengdã, a sẽn maand yel-solemd ne a meng la a nong a menga yĩnga, n le yaa tẽ-wẽng soaba yĩnga, a tɩ kẽe tẽn-wẽng meng-meng pʋgẽ -yẽ nif yãab pʋgẽ- a tẽ-wẽngã yĩnga. A pa be a sẽn na n ges zĩiga, rɩllame t’a yãnd koms-rãmb sẽn yaa nin-valemse, n ka mi b sẽn na n maaneg ye, n wiisdẽ, la b kʋmdẽ, maan-n-zʋʋk rãmba sẽn yaa wẽgdba wẽnga la b tʋʋm-yoodã yĩnga. A yãnda sũ-sãang sẽn zabde, wala alhaal kãnga, zĩis nins a sẽn gilga fãa pʋgẽ. Tɩ tẽnga gill lebg wala kʋ-yiri. La a ka paam bũmb sẽn na n zẽk alhaal zabdg kãnga sẽn yaa lika n bas-a, rɩlla tɩ yũ n su. Bal yẽ getame tɩ neba fãa yaa bɛɛb la sãamba. Woto bala, a le nee zĩig fãa pʋgẽ, kũ-rãmb sẽn tar rabeem la kɩɩbs sẽn kũmdi, kong-pãng yĩnga, tɩ namsd a sũurã naong buud toor-toore.

La ned a to wã sẽn yaa wẽnd-mit n yaa wẽnd-tũud la sɩd-baooda, yẽ yɩɩ zʋg-sõng soaba. A tɩ kẽe tẽn-yɩlemd sẽn tar rasãnd tɛka -a nif gesg pʋgẽ- tɩ nin-yɩlemd kãnga ne neerem sẽn gũbg tẽngã.

T’a yãt sũ-noog la tig la wẽnd-yʋʋr-tẽegr zĩis zĩig fãa, tɩ b be gezba la naswa[1] pʋgẽ. La a getẽ tɩ neba fãa yaa zo-rãmb la rog-pẽtse, tɩ tʋʋm basg tig be tẽngã ween-vɩʋʋsã fãa pʋgẽ, tɩ sũ-noog kԑleng la pẽgr koees zẽkd a pʋgẽ. La a wʋmd wam wẽeb la yɩɩl rãamre, sẽn lagem ne takbɩɩr[2] la tahliil maanego, sodaar zãmsg saab tigr pʋgẽ, tɩ b be kɩdeng la sũ-noog pʋgẽ.

Wakat ning pipi raoã sẽn yaa zu-be-neda sẽn wa n be a zablma la neba fãa zablma pʋga, wakat kãng tɩ yiib n soaba sẽn yaa zu-no-nedã bee sũ-noog pʋgẽ, ne a alhaala la neba fãa gill sũ-noogã. La a le paam yõod a tolba pʋgẽ, n pʋʋsd Wẽnnaam barka. Rẽ poore, a lebg n tɩ sega rao a to wã, n bãng bũmb ning sẽn be ne-a wã, n yeel-a:

Yaa foo raoa, ad fo lebga yalma. Tags-wẽng ning sẽn be fo pʋgẽ wã la sẽn vẽneg fo zuga. Bal fo rɩka laadã n maan kʋkʋm, n rɩk tʋʋma saab tɩ lebg zɛɛb la fãabo. Leb sɩdã zugu, la f yɩlg f sũura, sẽn na yɩl tɩ bõn-wẽng ning sẽn lud fo ninã lak n bas-f tɩ f tõog n yãnd sɩdã.

Bal rĩm sẽn yaa tẽeg-tɩrg soab la yolsd la gɩbend la nao-kẽndr gũusd la nin-bãan-zoet rĩng sẽn tar pidb la zẽkr sɩf-rãmb sẽn ta alkadr kãnsa ka tõe n wa yɩ wala sʋʋrg ning fo sẽn ne wã ye.

Rẽ poore, nin-kãnga sẽn yaa zu-be-neda sɩd lebg n wa a sɩda la a tẽeg-tɩrga zugu, n maanda a bãngẽ la a yetẽ:

Yaa sɩda, rãamã la yel-yaalsã yũ-n-su wã kɩtame tɩ mam lebg yam-kaalg soaba, Wẽnd na yar-fo! Fo tɩlga maam n yi alhaal wẽnga sẽn yaa bugum koamb tʋʋma.

Yaa foo yõore, bãng tɩ pipi raoã yaa wẽnd-kɩɩsa, bɩ yam-yaalyaal soaba, sẽn yaa dĩin-yita. Dũni kãnga gill yaa wala kʋ-yiri yẽ gesg pʋgẽ, tɩ bõn-vɩɩsã fãa gill yaa kɩɩbse, tɩ welgrã la kũumã pegs kɩt tɩ b kʋmdẽ.

Ãmmaa rũmsã la ninbuiidã, b yaa bõn-naands sẽn rɛɛd yaare, tɩ kũum nao-yẽes pãrsd-ba.

[1] Ned sẽn tẽeg Wẽnnaam yʋʋr n yĩm dũni yelle.

[2] Allaahʋ akbarʋ

La bõn-naands bɛda, wala tãmsã la mogã, yẽ gesg pʋgẽ, bãmb yaa wala kũ-rãmb sẽn tar rabeem, la bʋgs-rãmb a taab sẽn yaa wʋsg sẽn zabd sũur la a yirbd yam. Woto fãa yita yẽ kɩfenda la a menenga pʋgẽ, tɩ namsd-a, hakɩɩk pʋgẽ.

Ãmmaa rao a to wã, yẽ yaa sɩd-kɩt sẽn mi a naanda, a naam yɩ wagell n zẽke, la a kõt-A sɩda. Dũni-kãnga yẽ gesg pʋgẽ, yaa Yolsg-naab yʋʋr-tẽegr zĩiga, la bãngr baoob zĩiga, la neba la rũmsa zãmsg zĩiga, la nebã la zĩn-dambã zarb-n-gesg zĩiga.

Ãmmaa ninbuiidã la rũmsã kũ-rãmba sẽn reng taoora fãa gilli, yaa neb sẽn paam b mense, la neb sẽn sa b tʋʋmd b vɩɩma pʋgẽ, n yi n bas zak-kãngã sẽn sata, n kẽng zĩig a to sẽn ya zĩ-yõgnega, sẽn na yɩl n bas weer n kõ tʋʋm-tʋmd paalã sẽn na wata, tɩ bãmb me wa tʋme.

La ãmmaa rũmsã la nebã kom-rogdsã, bãmb yaa neb sẽn nan wat n na n reeg zab-teed n sɩng tʋʋm sodaarã pʋgẽ. Bõn-vɩɩsã fãa yaa sodaas sẽn yaa tʋʋm-tʋmdba, n yaa sũ-noog rãmba la b sẽn sagl-b rãmba, sẽn yaa tẽeg-tɩrg rãmba.

Ãmmaa bʋrgã fãa gilli, ĩmmaa tɩ yaa wẽnd-yʋʋr tẽegr la a yɩlgre, tʋʋmda sɩngr wakato, pa rẽ bɩ a yaa wẽnd-bark-pʋʋsg la kɩdenga, tʋʋmdã saab yĩnga, pa rẽ bɩ yaa yɩɩl sẽn yit tʋʋmdã noosem pʋgẽ.

La bõn-naandsã fãa gilli, sɩd-kɩtã gesg pʋgẽ, b yaa sõgen-damb sẽn yaa nin-yubsdba, la tʋʋm-tʋmdb sẽn yaa zo-rãmba, la gaf-rãmb sẽn tar gom-zulumsi, sẽn wilgd a zu-soaba sẽn yaa wagella, la a soaada sẽn yaa yolsg-naaba, la yel-vẽens a taab sẽn tar maana zulums sẽn bedem n noogo, n vẽnegd ne a liimaoongã sababo.

Sã n mikame tɩ yaa woto, hakɩɩk pʋgẽ, ad liimaoongã zɩta tuubaa  tɩ-bil yamre. Tɩ kɩflemã me zãad gahãnem taksẽneg-tɩɩgã tɩ-bil yambre.

Sã n yaa woto, ad tɩlgrã la basem-yamã bee lislaoongã la liimaoongã pʋgẽ bal tãa, a ka be zĩig a to ye.

Sã n mikame tɩ yellã ya a woto, tõnd segd n yeta wakat fãa tɩ

الحمد لله على دين الإسلام وكمال الإيمان

(d pẽgda Wẽnnaam ne A sẽn kõ-d lislaoongã dĩinã la sɩd-kũun sẽn pida)