Gomd a yoob n soabã

GOMD A YOOB N SOABA

بِسْمِ اللهِ الرَّحْمنِ الرَّحِيم

﴿إِنَّ اللهَ اشْتَرَىٰ مِنَ الْمُؤْمِنِينَ أَنْفُسَهُمْ وَأَمْوَٰلَهُمْ بِأَنَّ لَهُمُ الجَنَّةَ﴾

 (سورة التوبة: ٩-١١١)

“Ad Wẽnnaam raa muumin-rãmbã yõyã la b arzԑkã ne Arzãna”

(Taoba: 9/111)

Ad tolb ka be t’a yõod la a daragɛ la a zɩslem yɩɩd rɩk yõorã la arzɛkã n koos ne Sɩd-naaba sẽn yaa na-wagella ye, la Wẽnnaam tũudmã la A sõgenegã ye. Fo sã n dat n bãng yel-kãngã võor bɩ f kelg bilg-koɛ-kãnga :

Raar a yembr la Naab rɩk pʋʋg n bobl a sõgen-koamb a yiibu, ned fãa ne a rẽ. La bũmb buuda fãa bee pʋʋgã pʋgẽ, wala lozĩnds la masĩn-damb la wed-moos la zab-teedo. La yɩɩ zab-kɛgeng wakato, tɩ kɩt tɩ bũmb fãa ka tõe n tabend a zĩigẽ ye. Ĩmmaa t’a loog ka rẽ bɩ a tedge.

La naabã sẽn yaa yoalsd yĩnga, a tʋmsa nin-wagell sẽn yi a tʋʋm-koambã pʋgẽ, neb a yiibã nengẽ, t’a tɩ taas-b naaba sẽn yaa yoalsdã koeese. Naabã koԑԑgã me la woto:

“Rɩk-y mam bobl ning sẽn be yãmb nusẽ wã n koos ne maam, tɩ m bĩng-a n kõ-yã, sẽn na yɩl t’a ra wa menem zaalem wala sebg ye. Tɩ zabrã sã n wa sa bɩ m rɩk-a n lebs-yã, t’a sõmlem yɩɩd a pĩnda, tɩ boablã ket n yaa wala yãmb soolem. M na n le yao-y-la yaood sẽn bedme, la masĩn-damba la teed nins fãa sẽn be lozĩndẽ wã na n tʋma mam tʋʋmã zĩigẽ ne mam yʋʋre. La a keoorã la a yõodã na n paasame n tɩ tãag tusri. La m na n le rɩka a yõodã fãa gill n kõ-yã. Yãmb yaa koms-rãmb la talse, y pa na n tõog n yals ne tʋʋm-bɛd-kãnsa depãns-rãmbã ye. La mam n na n yalsa ne b depãns-rãmbã la b bõn-baoodsã fãa gilli, la m na n rɩka a yõodã la a nafa wã fãa gill n kõ-yã. La m na n kell n bas-b-la ne yãmba, hal n tɩ tãag yellã saabo. bɩ y reeg yõod sẽn fão n yιlem zĩis a nu tõre.

Y sã n tõdg tɩ y kõn rɩk-a n koos ne maam, a na n loog n bas-y-la wala a sẽn loogd n basd ned buud fãa wã. yãmb ned fãa la sẽn mi vẽeneg tɩ ned pa tõe n gũ bũmb tɩ pa a nugẽ wã. A na n looga zaalem wa sebgo, b na n le mong-y-la ligd-kẽengã. La y bãng tɩ tẽng-loagã la tʋʋm-tɩrsã kaalem yĩnga, masĩn-dambã la baskɩll-bԑdã ziira na n lʋɩɩ gilli. La tʋʋmã remsgã la a depãnsã la a gũusgã roga yãmba, b na n le nams-y-la ned sẽn zãmb bobl namsgo. Ad woto yaa bõn sẽn fão n yɩlem noor a nu.

La sẽn yeel tɩ yãmb koos ne maama, rat n yeelame, tɩ y sak n tʋm wala mam sodaase, la y tʋmd ne mam yʋʋre. Sã n yɩ a woto, y sẽn naan n yɩ nin-zaal tɩ b yõk-y n sẽb tɩ ned ka gomd y goamã, tɩ y ka mi y sẽn rabdẽ wã, y na n lebga burkĩn-damb sẽn yaa na-kẽengã pẽt-n-taase”.

B sẽn wʋm naam-koɛɛgã sẽn tar waoor ne-ba poore, la b yam-zulunga soab sẽn yeele : “m wʋm yã, m sak yã, m na n koosa ne sũ-noog tɛkẽ, la m pʋʋsd-y bark noor bʋg-bʋgo”.

 Ãmmaa yembra, sẽn yaa belg-m-meng sooba, n yaa waog-m-meng soab wala a Fɩr’aona, ned ning sẽn yaa nin-mengd la yam-kaoolg soaba, yaa wala a na n ruuma pʋʋga pʋʋgẽ abada, a yĩma dũni wã gudgrã la a rãmbgã yell la a yetẽ:  “ayo, yaa na-bʋg la yẽ”? “Mam pa na n tol n Koos m soolmã lay. mam ka na n sãam m naarã la m zu-noogã me ye”.

La wakat bilf poor bala, rao a yembrã daragɛ wã zẽkame n tɩ ta zĩig ning neba fãa sẽn dat n yɩ wala yẽ. A paama naaba yolsg n vʋɩ zu-noog pugẽ naaba meng etaasẽ wã.

Ãmmaa yembr soaba, zarbg n paam-a, tɩ neba kũmd a ninbãanega, la b yetẽ tɩ woto n sõmb ne-a, bal ya a tʋʋm-yoodã yĩnga la a zu-noogã la a naamã sẽn sa n bas-a t’a be naogã la farã pʋga.

Yaa foo yõor sẽn yaa saag-wogd la yamleoog wʋsg soaba, rɩk bilg-kãnga n ges hakɩɩk ning sẽn wata.

Ad naabã, yaa fo Soaba la fo Naand ning sẽn yaa Na-kʋdg sẽn ka tar saaba.

Ãmmaa pʋʋgã, la masĩn-dambã, la tʋʋm-teedã, la baskɩllsã, yaa bũmb ning fãa fo sẽn tar f vɩɩmã pʋga, la bũmb ning sẽn be fo soolmã pʋga, wala yĩngã la yõorã la sũurã. La bũmb ning sẽn be a pʋgẽ wala yĩn-wʋmds sẽn solg la sẽn vẽnege, wala nifrã la zɩlemdã la yamã la tagsgã.

Ãmmaa nin-wagellã, yẽ yaa Tẽn-tʋʋm-wagellã.

Ãla naabã –koeesã sẽn be neera, yẽ yaa Alkʋr’aan-wagellã, ne a sẽn gomd tol-kẽeng ning tõnd sẽn be a soab zuga, ne aaya-kẽeng kãnga:

 بِسْمِ اللهِ الرَّحْمنِ الرَّحِيم

﴿إِنَّ اللهَ اشْتَرَىٰ مِنَ الْمُؤْمِنِينَ أَنْفُسَهُمْ وَأَمْوَٰلَهُمْ بِأَنَّ لَهُمُ الجَنَّةَ﴾(سورة التوبة: ٩-١١١)

“Ad Wẽnnaam raa muumin-dambã yõyã la b arzԑkã ne Arzãna” (Taoba: 9/111)

Ãmmaa zab-laagã sẽn dĩmsd n wisdẽ wã, yẽ yaa dũni-kãnga sẽn rãmbd n ka tar yalsg zĩiga. Pa rẽ bal ye, a pʋs n leebdame la a tedgd n tar sãang n dabda, n kɩt tɩ yam-soab fãa sokd a meng sogs-kãnsã:

Sẽn mik tɩ bũmb ning sẽn be tõnd nugẽ wã fãa na n saame n loog n bas tõnda, bɩ f togs-m wɛ, yalla sor ya n ka be sẽn tõe n kɩt t’a kell n pa n ra sa?

Wakat ning a sẽn wat n sokd a meng la a tagsd a woto wã, la a sẽn wʋm Alkʋr’aan koɛɛg sẽn yit saasẽ n yetẽ: Nye, beeme, hal n yaa so-yɩleng sẽn tar laafɩ la yõod zĩis a nu.

Sʋkre:

So-Kãng la bʋgo?

LeoKre:

Sor-kãng yaa fo sẽn na n rɩk bobellã n Koos ne a soaadã mengã. Bal yõod sẽn fão n yɩlem noor a nu n be beenẽ.

pipi yõoda: Arzɛk-satgã ka na n le sa ye. Bal b sã n dɩk vɩ-satgã n tʋm Vɩɩm-naaba sẽn yaa Yalsg-na-wagellã yʋʋr yĩnga, a lebgda vɩ-ruumdga, n womd biis sẽn ka tar saabo. Wakat kãnga, vɩɩma wakat-damb fãa satame, t’a bilgr yaa wala bõn-buud la tɩ-biis-yam, tɩ fo get-a t’a sãamame, t’a yaool n tobd zu-noog tɩ-puud la a womd biisi, vɩ-ruumdgã pʋgẽ, t’a gesg tar nuura sẽn yubsd yam barzah vɩɩma pʋgẽ.

Yõod a yiib n saoba: Yaa tɩ Arzãna la a rolbo.

Yõod a tãab n soaba: Yĩn-will fãa daragɛ na n zẽkame n tɩ tãag tusri. Makre: Yamã yaa geelg-teoogo. Fo sã n dɩk-a n tʋm yõorã yĩnga, n ka rɩk-a n koos ne Wẽnnaam, wakat-kãnga, a daragɛ wã na n lʋɩɩme t’a lebg koams la zu-be-teoog n namsd-fo, n kẽesd-f sũ-sãams sẽn da loog la rabeem sẽn wat zabdem. Yaa rẽ n so tɩ wakat wʋsgo, ned ning sẽn yaa dĩin-yitã mi n tɩ yũ n suli, bɩ a zoe n kẽng reemẽ, sẽn na yɩl n põs yamã namsgã la a komsgã.

La a sã n rɩk-a n koos ne a Soabã menga, n tʋm ne-a a Soaba yʋʋr yĩngã, a na n lebga kʋɩlem-bil sẽn tar yel-solemde, n paksd yolsg la alfayd sãnem-boy sẽn ka tar tɛka, dũni-kãngã pʋgẽ. Tɩ rẽ yɩ sabab t’a soaba daragɛ zẽk n tɩ ta wẽn-tũud sẽn yaa kãndgd daragɛ zĩigẽ, n sogend zu-noog sẽn ruumd n bĩngd a soaba.

Bilgr sẽn paasde, ad nifrã yaa võor tɩ yõorã tũud beenẽ n get dũni wã. Fo sã n rɩk-a n tʋm yõorã yĩnga, n ka rɩk-a n koos ne Wẽnnaam sẽn yaa na-kẽenga, ad nifrã sẽn get neermã la yel-satsã, a na n lebga yõorã sõgna, t’a daragɛ wã lʋɩ n lebg wala pʋg-koaasa. La fo sã n rɩk nifrã n koos ne Nenem-naab ning sẽn naan nifrã, n rɩk-a n tʋm Naabã sorã yĩngã, la A sẽn saglã pʋgẽ, wakat-kãnga, nifrã daragɛ na n zẽkame n tɩ ta dũni wã gaf-kẽengã karemd daragɛ, n get Wẽnnaam naanegã yel-soalmã dũni-kãngã zugu, la a le lebg albark-sĩinf sẽn fõogd a tɩ-pu-koomã Yolsg-naab tẽn-gãongã yãgr pʋgẽ.

Bilgr sẽn paasd tãabo:

Fo sã n ka rɩk zɩlemdã lembgã pãngã (القُوَّةَ الذَّائِقَةَ للِّسان) n koos ne a naandã sẽn yaa Bʋ-mitã, n rɩk-a n tʋm yõorã la pʋgã yĩngã, a daragɛ wã na n lʋyame n lebg wala pʋ-roogã gũuda. La fo sã n rɩk-a n koos ne Rɩlgr-naabã sẽn yaa na-wagellã, zɩlemdã daragɛ na n zẽkame t’a lebg wala Yolsg-naab rɩtlã sãnem-baoor gũuda, n yaa Pãng-naaba ragendã yel-get sẽn ya bark-pʋʋsda.

Yaa foo yam! maan gũusgu, zu-be-teoog ziir bee yԑ dũni wã kʋɩlem-bil ziir taoore ?

Yaa foo nifri, maneg gesgã, pʋg-koaas ziir bee yԑ Wẽnnaam gaf-rãmbã gɛt ziir taoore?

Yaa foo zɩlemde, maneg lembgã, pʋ-roog gũud ziir bee yԑ Yolsg-naab rɩtlã sãnem-baoor gɛt daragɛ taoore?

Fo sã n rɩk yĩn-wil a taabã sẽn kellã n mak ne woto, fo na bãng tɩ muumin tʋmda tʋʋm sẽn sɩd segd ne arzãn kõom, tɩ kɩfr me tʋmd tʋʋm sẽn sɩd segd ne bugum kõom. La f bãng tɩ muumin Arzãna paoongã sababa, yaa liimaoongã sẽn kɩt t’a rɩk a naandã sẽn yaa na-wagella bobellã n tʋm A yʋʋra yĩnga, la bũmb ning A sẽn yarda pʋga. La kɩfr me sẽn na n kẽ bugmã sababa, ya a yõorã sẽn ya sagl wẽng soaba sẽn kɩt t’a zãmb a naanda bobellã.

Yõod a naas n soaba : Ad ninsaal yaa valengã, t’a zarb-rãmbã yaool n yaa wʋsgo. A le yaa talg t’a tʋlsma yaool n yaa wʋsgo. N le yaa koamsã, t’a vɩɩmã zɩɩb yaool n yaa zɩsg wʋsgo. A sã n pa tik Tõog-naaba sẽn yaa wagellã, la a pa bobl a meng ne-A, n tõdg t’a kõn teeg na-kãnga, la a pa rɩk a meng n kõ soab-kãngã, a yõorã na n paa naong sẽn duumd pʋgẽ, tɩ mosɩɩb la zablem la nims la sũ-sãams sẽn ka tar yõod paam-a, n kɩt t’a lebg yalem sẽn yaa sulaare, pa rẽ bɩ we-rũng sẽn yõgd neba.

Yõod a nu n soaba: Hakɩɩka, yel-soaandɩ vẽnegdbã la bãngrã la kasetã rãmb fãa sega taab tɩ yĩn-wilã tũudmã fãa la b sʋbhaanallaahɩ wã maanegã, la b yõoda fãa gilli, b na n maan-a lame t’a lebg Arzãn n kõ-fo, wakat ning fo sẽn wat n tar tʋls-kɛgen ne-a wã.

Yaa woto bala, a sã n pa tol tol-kãnga sẽn tar yõod zĩis a nu wã, a na n lʋya bõn a nu pʋgẽ. Sẽn paasde, a na n konga yõod kãnsa.

 Pipi bõnã: Arzɛkã la koambã, la bũmb ning fã fo sẽn nong ne f sũurã fãaga, la yõorã la a yam-leoogã fo sẽn nong wala f na n tũ-a lame wã, la rasãndã la vɩɩmã fo sẽn nong ne f sũurã faaga, woto fãa gill na n sa n basa foogo. La b zũnuubã la b zablmã na n paa fo zugu, n zɩlg f zugu.

Bõn a yiib n soaba: Fo na n paama bobellã-yeebg namsgo. Bal fo wẽga f menga, ne fo sẽn dɩk yĩn-wilã sẽn tar ziirã n tʋm yel-yaals la yel-yooda.

Bõn a tãab n soabã : Fo yagsa Wẽnnaam minmã la f wẽg-a, ne fo sẽn lub nedengã yĩn-wilã sẽn tar ziira fãa gilla, n ning-a rũmdlmã tẽngre.

 Bõn a naas n soabã: Kũumã nen-soabgã la welgrã na n kɩtame tɩ fo wiisdẽ la f kelemd wakat fãa, ne foog a nin-valengã sẽn tʋk vɩɩmã zɩ-zɩsdã ne f pãn-komsmã la f talemdã.

Bõn a nu n soaba: Yaa yolsgã kũunã, wala yamã la sũurã la nifrã la zɩlemdã b sẽn kõ foo tɩ f tall n bao vɩ-ruumdgã yel-yẽgã, la laahr zu-noogã yel-baoodsã, sẽn wẽnems tɩ lebg yel-yood n pakd gɛhãnem lagnoor fo yĩnga.

Mosã… d ges Koosmã wɛ! togs-m wɛ, yalla a ya n yaa zɩsg la toog n tɩ ta daragɛ ning sẽn sek nebã wʋsg na n zoet n basd-a? Ayo, a pa tar zɩslem la toolem zĩig ba a yembre. Bal halaalã zĩigã yaa yaoleng n sek peemsgã la yam-leoodã paoongo, pa sek f tɩ lʋɩ haraam pʋgẽ ye.

La ãmmaa Wẽnnaam farid-dambã, b yaa faag n yaa bilfu. La ãmmaa sodaarã la tũudmã Wẽnnaam yĩnga, a yaa ziir sẽn tar wʋm-noog sẽn ka tõe n sɩfe.

La ãmmaa tʋʋmdã, sõmbame tɩ ninsaal sɩng a tʋʋma ne Wẽnnaam yʋʋr wala sodaag bala. La a kõ la a reeg ne Wẽnnaam yʋʋre. La a kẽn la a yals Wẽnnaam raabã todsẽ la A lallʋwoa wã zugu. A sã n tudg me bɩ a kos yaafa, la a gãneg a meng ne Wẽnnaam, n kos-a ne koe-kãngã: Yaa fo m soaba, maan-d yaafa ne bũmb ning d sẽn tudga, la f reeg-d n lagem F yemb-sõmsã, la F maan-d tɩ d yɩ bas-m-yam rãmb fo bobellã zũgu, n tɩ tãag a reegrã wakato.

Aamiin.