A imaam Sa’iid An-nursi lԑtrã, sẽn wilgd lislaoongã sẽn na n le paam a meng Turki wã

D sɩngda ne Wẽnnaam yʋʋre, A naam yɩ yɩlenga

Bũmb ka be rɩllame t’a yɩlgda Wẽnnaam yʋʋra n lagem ne a pẽgre

Asalaamu aleykũm warahmatʋl laahɩ wa barakaatʋhuu Abadan daa’ɩman

Ya m ma-bi-zɩsd sẽn yaa sɩd rãmba

Pipi: Ad tig-kãnga noogda tõnd sũura –albark-tigrã taab-pʋʋsg pʋgẽ ne nuura wã la nuur karen-biisa, higiim-kẽengã pʋga- ne lislaoongã soolma tig-kẽengã sɩngra taab-pʋʋsgo, ne sẽn mik tɩ lislaoongã soolma tẽn-bԑdã wala Ẽnd la laarb-tẽmsã -sẽn zĩnd-b yembdã pʋgẽ hal zãmaan wok n kong b soog-m-menga- lebga lislaam-tẽms sẽn soog b menga. Rat n yeel tɩ lislaam-tẽng n lugl Ẽnd pʋgẽ ne neb sõor sẽn ta minyõ koabga, la Gԑwa pʋga me yԑsa, ne neb sõor sẽn yɩɩd minyõ pis-nu. Sẽn le paasde, laarb-tẽms a naas bɩ nu goosneem-rãmb n naag taab n maan laarb-tẽms sull n lagem ne lislaoongã lagem-taab sullã tɩ yaa wala tẽms sẽn naag taaba.

Yiib n soaba: Sã n yaa ne a seyd Ra’fat la a seyd Mustafa Urg sẽn be Ɩstanbulla sẽn gʋlsa, wilgdame tɩ b ra gʋlsa yõ-koglgã la sodaar yell gesg ministԑԑra ro-kẽengã nengẽ wã –sẽn da geta lislaoongã sodaas yell hal zãmaan woka, rẽ poor tɩ b wẽnems-a tɩ lebg karem-bi-bԑd karen-dooga- Alkʋr’aan aaya-rãmb sẽn tar maana-zulunga, ne Alkʋr’aana gʋlsem, aayar kãnsã:

﴿إِنَّا فَتَحْنَا لَكَ فَتْحًا مُبِينًا﴾

“Ad tõnd Wẽnnaam paka pak-vẽeneg fo yĩnga”

 ﴿وَيَنْصُرَكَ اللهُ نَصْرًا عَزِيزًا﴾

“La Wẽnnaan sõngda foo sõngr sẽn bԑdma”

La aaya-kãnsã b ra lud-b-la ne kug-wʋnse, tɩ nuura kãnsã ra lilli.

La aaya-kãngã vẽnegra yaa nug-tԑԑsg sẽn wilgd tɩ gʋlsga ne Alkʋr’aana gʋls-biisa na n le paama sor yԑsa, la sor sẽn tʋgd bõn-baoodg ning Rasaa’ɩlʋn Nuura sẽn pʋgda, la a wilgd tɩ karem-bi-bԑdã karen-doogã na n lebga nuura karen-doogo, zãmaan sẽn wat pʋgẽ.

Fakra[1] ning pʋgẽ Ahmad rãmb a yiib nins sẽn yi Rasaa’ɩlʋn Nuura karem-biisa sẽn be Danizile pʋga sẽn mok a Bismark gafa pʋga, sẽn yaa bãngd sẽn tar piuuga, la nin-bedra, sԑkl[2] piig la a wԑ wã sasa wã, yama wԑԑngẽ wã, la filozofɩ-bãngdb nins sẽn ya b zĩid-n-taar-vɩɩm bãngdba taoor-soaba, a Bismark sẽn yaa nin-bedrã yeela a gafa pʋgẽ: « Ad mam maaga m yĩng n ges Alkʋr’aana ween-vɩɩsa fãa gilli, n yãnd hɩkma-kẽeng a gom-biisã fãa gill pʋgẽ, a ka tar mak-n-taag ye, la gaf zẽng ka be sẽn tõe n ges nin-buiidã yell tɩ pa yẽ ye, a pʋs n ka tõe n yɩ me ».

La a bas n yeel t’a yaa sẽn gomd ne tẽn-tʋʋmã, yolsg la tɩlgr be a yĩnga: « yaa foog a Mohammado, ad mam sũur sãamda wʋsg ne mam sẽn ka zĩnd ne fooga, ad nin-buiidã yãnda tõog sẽn yaa sõma wala fo bilgr vugr-tãa, b ka na n le yãnd a to ye, rẽ yĩng la m rõbended fo taoor ne waoor tԑk-tԑka » la a tik-nug a goama zug ne [Bismark][3].

La mam teesa nug n wilg tɩ sõmbame tɩ b ra gʋls gom-kãnsa ye, bala a boogda gaf-sikds nins sẽn tedgã la sẽn yẽesbã ziira wʋsg fakra kãng pʋgẽ.

Ad yaa zu-zẽkr tɩ rao-kãnga lebg filozofɩ-bãngdbã yam-soaba la b taoor-soab sԑkl piig la a wԑ wã sasa, la polentikã la zĩid-n-taar-vɩɩmã bãngdba nin-bԑda yembre, la zu-zẽkr tɩ lislaoongã soolem paama a soog-m-menga bilfu, tɩ goosneem sãames[4] pẽesd n baood Alkʋr’aana hakɩɩk-rãmbã. La yaa zu-zẽkr tɩ sull-kẽeng wa be wĩndg-sẽn-lʋtɩ boabg la wĩndg-sẽn-lʋtɩ goabg boabg n tʋmd Alkʋr’aana yĩnga.

La a Mistԑԑr Karlayl[5] sẽn yaa Amerik filozofɩ-bãngdba taoor-soab la b piuug-soaba bʋʋ bʋʋd sẽn tar pãnga[6], wala a Bismark sẽn yeela, (ad sẽn ya neng ning fãa, gaf-rãmb a taaba ka ta Alkʋr’aana ye, a koԑԑgã la sɩdã koԑԑga, la yaa tɩlԑ tɩ d kelg-a). La Rasaa’ɩlʋn Nuura kõoma la a sẽegra zĩig zãng fãa pʋga, woto fãa gill tara tẽ-sõngo, bal a Bismark ne a Mistԑԑr Karlayl taab wʋsg n na n yi Eroap filozofɩ-bãngdbã pʋgẽ, la tagems n be n wilgd rẽ, rẽ yĩng la d vẽnegd woto sẽn na yɩl n pʋʋs Rasaa’ɩlʋn Nuur pʋgdba ne b zu-noogo, la d na n tool a Bismark paragarfa n lagem d lԑtra.

D pʋʋsem be ne y fãa gilli.

Kelleg-naaba la kellda

Y ma-biiga

Sa’iid Al-nursi

[1] Gom-sulli (phrase)

[2] Sԑkl a yembr yaa yʋʋm koabga

[3] Fakra kãng tõe n kẽe gafa buk pʋg n lagem mam masaal kãnga wala m sẽn tees-a Ahmad rãmb a yiiba goama pʋga, la yãmb tõe n yãka gom-biis nins sẽn ka zemsa n yi mam lԑtra pʋgẽ.

[4] Yaa goosneem nins sẽn ka bʋʋd ne lislaoongã goosneema wã. (lԑbgdã)

[5] Tomas Karɩlayl: yaa gʋlsd sẽn yaa Ãngletԑԑr tẽng-biig sẽn taa piuugu, a gal-walldsa sẽn yɩɩd ne zeong yaa: (raodã rãmba), la a yãka zĩig a pʋgẽ n wels nabiyaamã yell sõma, yolsg la tɩlgr be a yĩnga.

[6] “AL ɩsaaraatʋl ɩ’gԑԑza” welsga sẽn gʋls ne laarabiimdã sẽn be Rasaa’ɩlʋn Nuura pʋga, teesa a bʋ-yɩlenga sẽn yaa sɩd-baoda hal yʋʋm pis-tã sẽn looge.