“Huwa” masaal-zulunga

“Huwa” masaal-zulungã

باسمه سبحانه، وإن من شيء إلا يسبح بحمده

السلام عليكم و رحمة الله و بركاته أبدا دائما

D na n sɩnga ne Wẽnnaam yʋʋre, A naam yɩ yɩlenga

Bũmb ka be rɩllame t’a yɩlgda Wẽnnaam yʋʋra n lagem ne a pẽgre

Asalaamu aleykũm warahmatʋl laahɩ wa barakaatʋhuu Abadan daa’ɩman

Ya m ma-bi-zɩsd sẽn yaa sɩd rãmbã!

Yaa yãmb m ma-biisi, tagsg la bʋgsg gõob wakato, “huwa” gom-bila pʋg sẽn be “laa ɩlaaha ɩllal laahʋ” wã la “kul huwallaahʋ” wã pʋga, mam yãnda wẽn-yembg masaal-bʋgsg pʋgẽ, tɩ vẽneg mam nengẽ wakat-bilf pʋgẽ, sebgã sebr kaoreng pʋgẽ, tɩ sɩd-kũuna sora yaa nana wʋsgo, n le yaa yolyole, tɩ kɩt t’a lebg waagiba. La yԑl tusa sẽn ka tõe n yɩ, n yaa yԑl sẽn tar zu-loees n be lagem-n-taarã la menengã sora pʋgẽ. La m na n vẽnega masaal-zulung kãngã sẽn yaa yaoleng n yaa woka, ne nug-tԑԑsg koԑԑg-koԑԑga.

Yaa sɩda, wala nug-noor tom sẽn be laag pʋgẽ sẽn yaa tɩ-puud kõbg toor-toor bõeeb-zĩiga, tɩ tɩ-puudã ledsd taab a pʋgẽ wã, ad b sã n dɩk a yella n bas ne natiirã la sabab-rãmba, ad na n lebga tɩlԑ tɩ masĩn-damb la lozĩnd bõones sẽn solg kobse, pa rẽ bɩ b sõora ta tɩ-puudã sõor zĩnd a pʋgẽ. pa rẽ bɩ zarat-bil a yembr fãa sẽn be nug-noorã tomã pʋgẽ na n zãmsa tɩ-puudã fãa gill kõbga sẽn yõs-taab toor-toora la masĩn-vɩtsã maanego. Tɩ yẽ me lebg wala soab sẽn tar bãngr sẽn ka sate, la tõog sẽn ka tar tԑka.

Sẽn le paasde, yaa tɩlԑ tɩ sãntr-rãmb sẽn deegd la b lebsd telfõn-damb la telgarem-damb la raadɩyo-rãmb la gomd-n-taar ka-tԑk sẽn yõs-taab n be dũni wã gill pʋga be sebgã la pemsmã sẽn yaa saglgã la tʋlsmã yẽgra pʋgẽ. La b le be pemsem ning sẽn zems vʋʋsem pemsem la nug-bi-sũka sẽn be “huwa” wã yeelga pʋgẽ, sẽn na yɩl tɩ pemsmã tõog n yals ne yel-kãnsã fãa gill n lagem taab wakat a yembr pʋgẽ.

Pa rẽ bɩ yaa tɩlԑ tɩ zarat buud fãa sẽn be “huwa” wã seb-kɩdgã pʋga, pa rẽ bɩ zarat buud fãa sẽn be sebgã bila pʋga tall neb sẽn solge, la reegdb tɩ b sõora ta portaabl-rãmbã zãadbã la telegarmã pʋgẽ tʋmdbã la neb nins sẽn gomd raadyo wã pʋga sõore. Le yaa tɩlԑ yԑs t’a wʋmd ned fãa buud-gomde, la a bãngd-b n welgd ne taaba, la a sẽegd-b zarat-rãmb a taab nengẽ, wakat yԑng pʋgẽ. Bal tʋʋm-kãnsã tʋmda sebgã pʋgẽ, la sebg-gɩrg fãa me zãad tõ-kãngã.

Ad kɩfendã rãmb la natiralɩst-rãmbã[1] la materɩyalɩst-rãmbã[2] sora pʋga, pa sẽn-ka-tõe-n-yɩ a yembr bal la sẽn be beenẽ wã ye, ayo, ad yԑl sẽn-ka-tõe-n-yɩ la gɩdgr-rãmb la musaks sõor sẽn ta zarat-rãmbã sõor n be a pʋgẽ vẽeneg-vẽenega.

La b sã n dɩk sebgã yellã n kõ Naanda sẽn yaa Na-wagellã, sebgã ne a zarat-rãmbã fãa gill lebgda sodaag sẽn yas a nao-bogd zug ne Wẽnnaam sẽn yaa na-wagellã saglsã tʋʋma, n tõe n yals ne a tʋʋma fãa gill sẽn ka-tԑka nana-nana, wala zarat a yembr sẽn tʋmd a tʋʋmd ne kʋmbgo, ne a Naanda yard la A pãnga, la ne a Naanda tõkr la a tikr la A pãnga vẽnegr wakat a yembr pʋgẽ, ne tʋʋlem wala sa-yãgre, la yolyol wala “huwa” wã yeelga la sebgã fugba. Rat n yeel tɩ sebgã lebgda seb-vã-neng a yembr sẽn be tõogã kaal-moogã gaf-rãmb ka-tԑka sẽn gʋls n tũnug-taaba pʋgẽ, t’a zarat-rãmbã lebg kaal-mo-kãngã noya, tɩ zarat-rãmbã tʋʋm yaa tõogã kaal-moogã tẽgsga, t’a tʋmd nana-nana wala zarat a yembr tʋʋmde.

La wakat ning mam sẽn wa n get sebgã dũni wã, la m karemd sebgã bilã seb-vã-nengã m gõobã pʋgẽ ne tagsg “Laa ɩlaaha ɩllal laahʋ” la “Kul huwallaahʋ” wã pʋga, mam yãnda hakɩɩk-kãngã sẽn yaa mumda ne vẽeneg la welsg la bãng-n-wãaka.

[1] Neb nins sẽn gad tɩ yaa bõn-naandsã n naand taaba (lebgdã)

[2] Neb nins sẽn kõt-sɩd ne bũmb ning bãmb sẽn ne la b tõe n sɩɩsa bala. (lebgdã)

La sẽn mik tɩ daliil-vẽeneg kãngã buud sẽn pɩnda, la bõn-pɩnd kãngã sẽn wilgd Naanda yemblma[1] n be “huwa” wã la a sebgã pʋga, ad woto bala, Ahdɩya[2] wã sẽn tar nuura la wẽn-yembg daliil sẽn tar pãng me n be a maana wã la nug-tԑԑsgã pʋgẽ, tɩ mam bãng bãng-n-wãak tɩ Alkʋr’aan-wagellã la Wẽnnaam yʋʋra tẽegdbã yɩlemda gom-kãnga sẽn yaa yɩlenga wẽn-yembgã zĩigẽ wʋsgo, ne a sẽn tar tik-vẽeneg yel-kãnga pʋga.

sʋkre: yaa ãnda la “huwa” wã nug-tԑԑsg kãnga sẽn ka welg n yaa mumda teesda?

Yaa sɩda, ad ba ne sẽn mik tɩ b sã n tẽk tẽks a yiib bɩ tãab zĩ-yԑng seb-peell pʋgẽ b yãgemda taab gilla, la ba ne sẽn mik tɩ nin-yԑng sã n tʋm tʋʋm wʋsg sẽn yõs-taab wʋsgo yԑlã yãgemda taab a zuga, la ba ne sẽn mik tɩ b sã n zɩlg bõn-vɩɩg sẽn yaa kɩdg zɩɩb sẽn yaa wʋsgo, a na n yaame n lʋɩ tɩ zɩɩba rĩy-a wã, la ba ne sẽn mik tɩ gom-biis ka-tԑk sã n yi zɩlemd a yembr pʋgẽ n kẽ tʋbr a yembr pʋgẽ wakat a yembr pʋgẽ tũnugra na n sãamame tɩ yãgem taaba, ad ba ne woto fãa gilli, ad mam yãnda ne bãng-n-wãaka, tɩ b tẽksame, pa rẽ bɩ b tõe n tẽka tẽks tusa la gʋls-biis la gom-biis toor-toor sebgã bilã gɩrg a yembr fãa pʋgẽ, mam sẽn gilg a soab pʋgẽ ne tagsg ne “huwa” kʋlem-bil la a busoalla, pa rẽ bal ye, hal ba ne zarat a yembr fãa pʋgẽ, zẽng tɩ b ka yãgem taaba, pa rẽ bɩ a tũnugra ka sãam ye.

La ba ne sẽn mik tɩ gɩrg fãa la zarat fãa yalsda ne tʋʋm wʋsga, ad a tʋmda a tʋʋmdã tɩ tudgr la yĩm ka kẽ a pʋgẽ ye. La ba ne sẽn mik tɩ b zɩlgda zɩ-zɩsd wʋsg gɩr-kãngã la zarat kãngã zuga, ad b tʋkda zɩɩba ne tũnugr la manegr tɩ valemsg pa kẽ a pʋgẽ ye, tɩ ka yɩ ne no-maasem ye.

La ba ne sẽn mik tɩ gom-biis tusa n kẽed tʋb-kɩds-kãnsã pʋga, la b yit zɩlem-kɩds-kãnsã pʋg ne tũnugr tԑk-tԑka, la kõbg la maana-rãmb sẽn yõs-taab tɩ gẽdg-taab la sãang ka kẽ a pʋga, la ba ne sẽn mik tɩ zarat-kãnsã la gɩr-kãnsã yembr fãa yalsda ne tʋʋm sẽn tar yel-solemda, la b gilgd ne soog-m-meng tԑk-tԑk tɩ b yaa sẽn yet naswa la gԑzba pʋgẽ ne alhaal zɩlemd la hakɩɩkã b sẽn togsa zɩlemda, la b kaseta tɩ: “Laa ɩlaaha ɩllal laahu” la “Kul huwallaahʋ” wã, seb-bԑdã la sa-yãga la sa-tãsa la ko-wĩya sẽn kɩtd tɩ pemsmã lengdẽ wã pʋga, ad b tũnugra ka sãamd ye, la sãang me ka kẽed b tʋʋma pʋgẽ abada, la a ka gɩdgd-b n yi b tʋʋm a taaba tʋʋm ye, la yaa woto la mam seet yel-kãnsa ne bãng-n-wãaka.

[1]  Yaa Wẽnnaam tõog sẽn be bõn-naandsã zug n wilgd tɩ naanda ya a yembre.

[2] Yaa Wẽnnaam tõogã sẽn be yembr fãa zug tɩ ka wẽnd a to ye.

Woto wilgdame tɩ sõmbame tɩ pemsmã zarat a yembr fãa la pemsmã gɩrg a yembr fãa tall bʋʋd-minim sẽn ka tar tԑka, la bãngr la tʋlsem sẽn ka tar tԑka, la pãng la tõog sẽn ka tar tԑka, la yalɩ sẽn tõe n bʋ zarat-rãmb a taaba fãa gill ne bʋʋd sẽn gũbgi, sẽn na yɩl t’a tõog n yals n ges yel-kãnsã yelle, la woto me yaool n yaa yell sẽn ka tõe n yɩ, la zɩlem-beedo, ne zarat-rãmbã sõore, pa rẽ bɩ soԑtãan ba a yembr pʋs n ka tõe n tags a zug ye.

Sã n yaa woto, yaa vẽenem wala sɩd bãng-n-wãak la nenem bãng-n-wãak la minim bãng-n-wãaka, tɩ pemsem kãngã seb-vã-nengã yaa seb-vã-neng sẽn tedgd ne tõogã la kordgã kaal-moog ning Naanda sẽn tar n tʋmd ne minim la bʋʋd-minim sẽn ka tar tԑka. A le yaa wala “yẽesgã la tabendgã walga” sẽn be laohʋl mahfʋʋz walga pʋga, dũni-tedgdgã pʋg la yel-teemdsã pʋga.

La wala pemsmã bilã sẽn vẽnegd n wilgd Wẽnnaam yemblmã la A yel-soalmã b sẽn togsa, bʋrgã rɩkra pʋgẽ bal tãa wã, la a vẽnegd n wilgd tɩ menengã sẽn ka tar tԑka yaa bũmb sẽn ka tõe n yɩ wã, ad pemsmã bilã tʋʋm-kẽeng a to me ya a sẽn na n yals ne tʋʋm a taaba. La tʋʋm-bãmb la woto: A yalsda ne yԑl a taaba rɩkre, wala kʋʋra wã la pãn-takdgã la pãn-tusdgã la vẽenmã, ne manegr la tũnugr tɩ ka yɩ ne tudgr ye. Wala a sẽn le yas wakat-kãng pʋgẽ ne a tʋʋmdã, pemsmã rɩkr pʋgẽ n lagem ne tʋʋm-kãnsã. N rɩkd teed nins sẽn yaa darʋʋr tɩɩsã la rũmsã vɩɩm yĩnga ne tũnugr tԑk-tԑka, wala vʋʋsmã la rog-biisã, la a tabend n wilgdẽ t’a yaa Wẽnnaam sagellã la a raabã yẽgre.

La mam seka m meng sɩd-sɩda, tɩ yel-kãngã tabendame n wilgd ne nenem bãng-n-wãak daragԑ, tɩ ba sẽn ya neng ning fãa, tõeem la mamsg ka be sẽn tõe n mams tɩ maan-yaar-tɩ-zemsã la pãn-zoangã la natiir-wʋngã la sabab-liibdsã sẽn ka tar tԑka, la te-koeemsã sẽn yaa valems n yaa zɩtb n be pemsmã seb-vã-nengã pʋga, la a tʋʋma pʋga tõe n kẽesa b toog yel-kãngã pʋgẽ ye.

Tɩ mam bãng tɩ zarat a yembr fãa la gɩrg buud fãa yeta ne a alhaalã zɩlemd tɩ “Laa ɩlaaha ɩllaa huwa” la “Kul huwallaahʋ ahdʋn”, la wala mam sẽn yãnd yel-soalem-kãnsã sebgã pʋgẽ ne “huwa” wã kʋlem-bilã b sẽn togsa, pemsmã bilã me lebga dũni soalgdgã kʋlem-bil wala “huwa” wã.

La b nan ka karem gɩr-kellã n wilg-m ye.

Asalaamu aleykũm wa rahmatʋl laahɩ.

Y MA-BIIGA

SA’IID AL-NURSI