Masaal-bedr b sẽn leems maam zĩig pʋgẽ

MASAAL BEDR B SẼN LEEMS MAAM ZĨIG PƲGẼ

D fasemda toagsg nins sẽn wa Hadiis-rãmba pʋgẽ, tɩ ned ning sẽn na n tʋm tʋʋm-wẽng n tɩ yɩɩd yaoolem zãmaana fɩtna pʋgẽ, yaa pagbã zãma wã, la b zarba wã[1].

Yaa sɩda, wala b sẽn togsd hɩstoaarã[2] pʋgẽ tɩ soda-pogs sull n da zĩnd zãmaan sẽn looge, n da mi zab-teed wẽeb sõma, tɩ b boond-b tɩ “Amazoon pagba”[3] n zabd zab-kegemse. Woto bala, zãmaan kãnga pʋgẽ, ad pagbã sẽn yer fut n yaool n yaa zaala, bãmb la zãma sẽn tɩ yɩɩd ne wẽnga, wẽnd-ka-be wã[4] ne lislaoongã zabra pʋgẽ. sull-kãngã yaa sull sẽn dɩk a tabkaoor n kõ a Soԑtãana, ne yõor sẽn yaa sagl-wẽng soaba sɩlem. Bala b zabda ne liimaoongã rãmb la b pigd-b ne b karsã sẽn ka luda, tɩ b karsa bilgr yaa wala sʋʋs noor sẽn noome, n yõgd nebã wʋsga nif-kamsg pʋgẽ, la b kõsd b sũyã la b yõyã ne zũnuub bԑdã, n nidgd-pãng sẽn na yɩl n pag furã rignoore, la b yalg koos-m-mengã la sãangã zagse. Ayo, ad b pʋs n kʋʋda sũy-kãnsa sãnda. Rẽ yĩnga, ad “kar-kãnsa sẽn yaa wala sʋʋsã na n lebga Gԑhãnem ra-giidu, n deng n yõogdẽ, tɩ yaa rolb sẽn zems ne b sẽn da rɩk yʋʋm wʋsg n basd b karsã n ka lutẽ wã, neb sẽn ka bãmb rog-pẽts taoora, b sẽn yeeb kɩs-sɩdã la sɩdã la pʋ-peelmã dũni kãnga pʋga yĩnga. B kõ n tol paam roog ning b sẽn dat ne b sũura fãaga ye, la b tar tʋls-kԑgeng ne-a ne b rog-ne yama ye. Ba tɩ b sã n paam-a me, b paama mosɩɩba.

[1] Waa Sahɩɩhʋ Muslim pʋgẽ 4/2098, nummoro 2742, tɩ Tẽn-tʋʋma, Wẽnnaam pʋʋsg la a tɩlgr be a yĩnga, yeelame: “Ad dũni wã yaa kẽeg n yaa noogo, la ad Wẽnnaam ledsa yãmb a pʋgẽ n na n ges yãmb sẽn na n tʋm to-to, sã n yaa woto bɩ y zoe dũni wã la pagbã, tɩ ad Ɩsrayԑl koam pipi fɩtna yɩɩ pagbã sababo”.

[2] Kʋdemr bãngre

[3] Pag sẽn yaa zab-zabd Yʋʋnaan pʋga b boond-a lame tɩ Amazoon, la waya togsg pʋgẽ tɩ pagb sẽn yaa zab-zabdb sull n zĩnd tɩ b boond-b tɩ Amazoon pagba, b ra yɩɩme n zãad zab-teed kõbg toor-toor b zaba pʋgẽ, tɩ pagbã sull kãnga yʋʋr yit sõma Yʋʋnaan zab-bԑda pʋgẽ, la b zabra ne Grԑk, yel-pẽesdba sãnda wilgame tɩ yaa pʋg kãnsa yʋʋra la b sẽn dɩk n pʋd Amazoon mogrã.

[4] Yaa tũudum sor sẽn kɩɩsd Wẽnnaam belma, n solgd kɩfend la a vẽnegd liimaoongã. (lԑbgdã)

D le fasemda Hadiis-rãmba pʋgẽ, tɩ alhaal kãnga yĩnga, ad pʋg-kãnsa na n lebga neb sẽn pa tar yõodo, n ka tar gũuda, n ka tar soaba, n ka tar ziir me. Hal tɩ zĩis sãnda pʋgẽ, pagb pis-naas na n wa pʋgda rao a yembre, yaoolem zãmaan pʋgẽ, furã tʋlsem kaalem yĩnga, la ning-m-toog ne furã kaalem yĩnga[1].

La sẽn mik tɩ yaa woto la hakɩɩkã, la sẽn mik tɩ bõn-neer fãa nonga a neermã, la a nidgd-pãng a pãng-tõog tԑk sẽn na yɩl n gũus-a t’a ra sa wã, la sẽn mik tɩ neermã yaa neema wã, ad yam pʋgẽ, neemã wã ka bakd n paasdẽ, tɩ bark-pʋʋsg sã n ka bak n beẽ ye. Bark-pʋʋsg sã n ka be, ad neema wã na n tedgame n lebg yel-yooko.

Ad pʋg-neer sã n yaa yam soaba, sik ka be t’a na n zoe n zãaga, ne a pãnga fãa, n bas sõmblmã la neermã rɩk n tʋm yel-wẽnsa pʋgẽ, la a yɩ sabab tɩ neb a taaba me tʋm yel-wẽnsa ye. La sik ka be t’a na n le zoe n zãaga rɩk sõmblmã la neermã n maan tɩ lebg yook la zẽnem ye. A na n le zoe n zãaga sõm-zɩɩlma maaneg ne neema wã, bũmb ning sẽn na n yɩ sabab tɩ sõmblmã la neermã lebg namsg a zuga. A na n pʋʋsa bark neema kãnga yĩnga, ne a sẽn na n dɩk neerem-satgã sẽn ka na n zʋʋg yʋʋm a nu bɩ piig tԑka, n tall n tʋm bũmb ning sẽn sakde, hal n maan-a t’a lebg neerem sẽn ka sate. Sã n pa rẽ, ad a na n tʋka nebã kisg wakat wook a kʋʋlem wakato, a na n le kũma tẽ-wãagdb kʋkʋm.

La a sã n nags neermã ne Alkʋr’aan zʋgdo, lislaoongã wubr zak pʋgẽ, ad neerem-satgã na n lebga neerem sẽn ka sate. B na n le kõ a soaba neerem la sõmblem Arzãna pʋgẽ tɩ yɩɩd Arzãn pagba ne bʋgsem la pɩlbo. Woto yaa bũmb sẽn yaa sɩd sẽn tab hadiis zɩsda pʋgẽ.

Ad pʋg-ne-kãng sã n da tarẽ-la yam, ba sẽn zems zarat bilgri, a ka na n tol n bas tɩ-bi-kãngã sẽn yaa neer n pɩnd n yaa bʋgsg n duumdẽ wã, tɩ loog n bas-a ye.

[1] Waya Sahɩɩhʋ Bʋhaarɩ pʋgẽ 1/43 rignoor ning sẽn gomd bãngrã loogrã la zɩɩlmã vẽnegrã yell pʋgẽ, tɩ tẽn-tʋʋma, Wẽnnaam yolsg la a tɩlgr be a yĩnga, “Ad sẽn yi dũni wã yikr tagems-rãmba pʋgẽ: yaa bãngrã sẽn na n wa boog tɩ zɩɩlma paase, tɩ yoobã wʋsge, tɩ pabgã sõor paas tɩ rapã sõor boogẽ, hal tɩ pagb pis-nu wa pʋgd rao a yembre”.