Nekr la kaoreng la tẽegre, b sẽn wilg kom-bɩɩs sãnda sẽn yaa miskɩɩmba

NEKR LA KAORENG LA TẼEGRE, B SẼN WILG KOM-BƖƖS SÃNDA SẼN YAA MISKƖƖMBA

Kom-bɩɩs sãnda sẽn tarb yam sẽn puka waa mam nengẽ raar a yembre, n wa bao nekr la saglg sẽn tar pãng mam nengẽ, sẽn na yɩl n kogl b mens n yi vɩɩmã la rasãndã la tʋlsmã la yõor yamleedã wẽnga.

Tɩ mam yeel-b wala m sẽn yeel kom-bɩɩs nins sẽn da bao sõngr ne Rasaa’ɩlʋn Nuura sen loogã: Bãng-y tɩ yãmb rasãndã, hakɩɩka na n sqame. Lat tɩ yãmb sã n ka kell n pa n yals  bũmb ning sãri wã sẽn kõ-sora zugu, ad y rasãndã na n yeebame, la a na n le rogl-y-la ballaog-rãmb la namsg n yɩɩd a wʋm-nooga noor wʋsgo, dũni kãnga pʋgẽ, la yaoogã pʋgẽ, la laahre. La y sã n dɩk rasãndã n tʋm yõk-m-meng la yãn-zoԑԑg la tũudum pʋgẽ, tɩ yaa bark-pʋʋsg ne rasãnda neema wã, a na n lebga bũmb sẽn kellde, a na n le yɩɩ sabab tɩ y paam rasãnd sẽn duumdi.

Ãmmaa vɩɩma, liimaoong sã n ka be a pʋgẽ, pa rẽ bɩ wẽn-kɩɩsgã sã n kɩt tɩ liimaoogã ka tall vũun a pʋgẽ, wakat kãnga, ad vɩɩmã ba ne a  sẽn wat ne wʋm-nood la yamleood gesg pʋgẽ wã, ad-a yaa koԑԑg wʋsgo. A na n le waa ne zablem la sũ-sãams la yɩɩre, tɩ yɩɩd a wʋm-no-teedã la wʋm-noogã noor tusa. Bal ninsaalã ninsaalmã yĩnga, a pa wala rũm-muk ye, a tara tõkr ne zãmaan sẽn loog la sẽn wate, sẽn paas ne zãmaan ning pʋg a sẽn be wã. Bala a tara yam la tagsa, la a tõe n wʋm zablem la a wʋm-noog ne zãmaan kãnsa fãa.

La rum-mukã ka tar tagsg ye, rẽ n so tɩ zãmaan sẽn loog sũ-sãams la zãmaan sẽn wat rabeem la a rigb pa gɩdgd a rũndã wʋm-noogã maaneg ye.

La ãmmaa ninsaalã, ba t’a sã n lʋɩ menengã la yam-yaal-yaalã pʋgẽ, ad sũ-sãams sẽn loogã la zãmaan sẽn watã rabeemã la a rigbã sãamda a rũnda wʋm-no-gɩrgã, n kɩt t’a lebg toog wʋsgo, sẽn tɩ yɩɩda a sã n mik tɩ wʋm-noogã yaa bũmb sãri sẽn ka kõ sore. Yẽ bilgr yaa wala sɩɩd sẽn ning zẽnem bala. Woto wilgdame tɩ vɩɩmã wʋm-noogã maaneg wԑԑngẽ, rũm-mukã yɩɩd-a-la noor koabga. Ayo, ad menemdbã la yam-yaal-yaalã rãmb vɩɩmã, pa rẽ bɩ b belmã, pa rẽ bɩ b dũni wã la b vɩɩmã, yaa raar ning b sẽn vɩ a soab pʋga bala. Bãmb menengã yĩng kɩtame tɩ Zãmaan-dambã la yԑlã sẽn looga fãa yaa bũmb sẽn ka be, la bũmb sẽn ki, t’a yaool n kõt-b liks sẽn tar pãnga, yamã sẽn kɩt tɩ b tar tõkr ne-a wã yĩnga. La ãmmaa sẽn watã, yẽ me yaa bũmb sẽn ka be, b loԑԑgã kaalem yĩnga. La kũumã sẽn wat ne welg-ruumdg kõbg toor-toor ninga kõt-b-la liks wakat fãag b vɩɩma pʋgẽ, tagsgã yĩnga.

Ad liimaoongã sã n lebg vɩɩm vɩɩmã yĩnga, a na n nuura zãmaan sẽn loogã la sẽn watã, ne liimaoongã nuurã, tɩ b paam belem. Tɩ liimaoongã kɩt tɩ zãmaan sẽn loogã la sẽn watã kõt ninsaal yõorã la a sũurã noosem sẽn solge, la b kõt a vɩɩmã nuurã, wala rũndã zãmaanã sẽn kõt-a wã. La hakɩɩk kãnga venegrã waa “Ragԑԑ’ a yopoe n soaba” pʋgẽ sẽn be “nin-kẽembã masaallã” pʋga, modg-y n leb-y beenẽ n tɩ gese.

Yaa woto la vɩɩmã, y sã n dat n maan wũm-noog ne vɩɩmã wʋm-nood la a noosem, bɩ y vɩɩms y vɩɩmã ne liimaoongo, la y nags-a ne farid-rãmbã, la y gũus-a ne zũnuub-rãmbã zãagre.

La ãmmaa kũumã hakɩɩkã sẽn tara rabeemã, tɩ kũ-rãmbã[1] vẽnegd a yell daar fãa, la zĩig fãa, la wakat fãa wã, mam na n vẽneg-a lame n wilg-y ne bilgri, wala m sẽn veneg-a n wilg kom-bɩɩs a taaba.

Bilgri: Ad b vigla luulg-zĩig tõnd neng taoora, tɩ reem zĩig be a kɩrengã sẽn tõe n kɩt tɩ f paam kũun-bԑd wʋsg tike, la tõnd piiga sẽn be ka wã, d rat tɩ d ka rat me, sik la sãmbs ka be tɩ b na n boola tõnd ye, sẽn wa n yaa soab fãa.

La tõnd sẽn wa n be kollega zug wakat fãa pʋga  -tõnd sẽn ka mi boollã wakata yĩnga- tɩ b yeel tɩ: wa reeg kʋʋb tike, n rʋ luulgã zĩiga, pa rẽ bɩ f paama kũun tike, sẽn na n kɩt tɩ f paam leera[2] minyõ-rãmb sẽn yaa sãnem, la f wa reeg-a. Zĩig pʋgẽ la neb a yiib wa rignoorẽ wã, b yembrã yaa pʋg-neere, n yaa wala a yaa zaala, n yaa sɩlem-wẽng soaba, n zãad bõmbõ. Gesg pʋgẽ yaa bõmbõ sẽn noom sõma, la hakɩɩk pʋgẽ a tara zẽnem. N dat n kõ tõnd bõmbõmã tɩ d moge.

[1] Yaa bõn-naandg buuda fãa kũum

[2] Yaa Turki ligdã yʋʋre

La ned a to wã yaa rao sẽn yaa nedeng soaba, a ka belgd nada, a belgr me yaa toogo. Pagã sẽn looga la yẽ me sẽn pʋgl n kẽ, n yeele: mam waa yãmb nengẽ ne kaoreng la yel-solgdga, y sã n karem wãnda la y bas bõmbõmã n ka moge, y paam y meng n yi kʋʋbã zĩiga, la y paam kũun-bԑd sẽn ka tar bilgr tike, la yãmb me la sẽn ne luulgã zĩig ne y nifa, la y mi tɩ ned ning sẽn dɩya sɩɩdã na n rʋ a zuga. La taoor tɩ b nan ka rʋ a zugu, bõmbõmã zẽnem na n nams-b-la ne pʋ-zab-kԑgengã, la ba ne neb nins sẽn paam kũun-bedr kãnga tike wã yellã sẽn pa vẽeneg tɩ b neẽ wã, tɩ ges pʋgẽ bɩ yaa wala b rʋʋda luulga zĩiga, ad kaset-maand minyõ-rãmb n kõt kibar tɩ b ka luund-b ye. Ad b rɩkda luulgã zĩig tɩ yaa roadg sẽn rʋʋsd-b ne yolyol n tʋgd kũunã zĩigẽ. Bɩ y wa n lɩk-y pesem-leesẽ wã n gese, ad tʋʋm-tʋmd-bԑdã la nin-bԑd nins sẽn tar tõkr ne yel kãnga wã, ad b togsdame la b kõt kibar ne koees sẽn zẽke, tɩ y bãng bãng-n-wãaka, la ne sik la sãmbs sẽn ka be wala wĩntoog vẽenem -wala yãmb sẽn ne neb nins sẽn dabd luulgã zĩigẽ vẽeneg ne y ninã- tɩ neb nins sẽn paam kũuna tike wã yaa neb nins sen tarb yel-solgdgã[1].

La wala sẽn be bilgrã pʋga bala, bãng tɩ rasãndã yalemd wʋm-nood nins sẽn be yԑl nins sãri wã sẽn harma tiir pʋga, sẽn yaa wala sɩɩd sẽn tar zẽnmã, la a sẽn yaa sabab tɩ f kong liimaoongã, la zu-noog sẽn duumda tike wã, sã n yaa woto, ad-a lebgda kũumã sẽn yaa wala luulg-zĩigã mosɩɩbo, la yaooga sẽn yaa liks sẽn duumda rignoore, wala d fãa sẽn ne vẽenega. La kũuma wakat sẽn solga yĩnga, ad kũumã sʋʋg tõe n wa kʋʋsa zutã wakat buud fãa pʋgẽ. La a ka welgd bi-bɩɩg la nin-kẽem ye. Waliimb la hakɩɩk-rãmb sẽn ka tar tԑk sẽn seg-taab noor a yembre, n lagem ne nabiyaam-damb tus-koabg la pisi la naase, tɩlgr be b yĩnga, n kõ kibar tɩ ninsaalã sã n bas a yõorã yamleoodã sãri sẽn ka kõ sora, bũmb ning sẽn yaa wala sɩɩd sẽn tar zẽnmã, la a bao n paam liimaoongã la farid-dambã sẽn yaa Alkʋr’aana yel-solgdsa, a na n paama zu-noog sẽn duumd sãnem-baoor sẽn tar yõod la yel-solemd sẽn ka tõe n bilg tike, a baoobã pʋgẽ. B kõo yel-kãngã kibar ne daliil-rãmb sẽn tar pãnga, la b vẽnegd a vũuna n wilgdẽ.

[1] Raabã ne yel-soalgdga ka wã yaa “liimaoongã”

GILBU:

Ad sik ka be tɩ rasãndã yaa bũmb sẽn loogd ye. La y sã n dat n bãng la y fasem tɩ rasãnda sã n sa yalemda tʋʋm sor zugu, a na n basa zarb la zablem tusa a soaba zug dũni la laahre. La a kɩt tɩ kom-bɩɩsã wʋsg fãa kẽ logto-yiya ne bãas sẽn yaa yɩɩr bãase, b tʋʋm yoodã la b sãangã yĩnga, pa rẽ bɩ bãns-roto, la ro-wẽns la zu-beed-roto b tõdgrã yĩnga, pa rẽ bɩ b na n kẽe baar-rãmbẽ, weoogrã la pakr ning sẽn be zablem sẽn solga pug sababo, y sã n dat n bãng la y fasem yel-kãnga, bɩ y sʋk logto-yiyã, la bãnsã rotẽ, la yaadã. Sik ka be tɩ logto-yiyã pʋgẽ, y na n wʋma fĩinigu la nims maanego ne bãas nins sãangã sẽn wa ne wã, la bãas nins yãadra la rasãnda sẽn kɩt tɩ kom-bɩɩsã ka tʋm ne b rasãndã sõma wã sẽn wa ne wã ye. Wala y sẽn na n le wʋm bãnsa rot pʋgẽ noor wʋsgo, kom-bɩɩsã sẽn yaa zu-be-neba nims-maaneg la b sũ-sãanga, neb nins rasãndã sẽn kɩt tɩ b reeg pԑgs sẽn yi tʋʋm nins sãri sẽn ka kõ sora pʋga. Y na n le bãngame tɩ bũmb ning sẽn wat ne namsgã noor wʋsga, yaoogã la barzah[1] vɩɩma pʋga, sẽn pakda la pagd wakat fãag kẽedba yĩnga, yaa yãadrã la rasãndã sẽn tall n tʋm tʋʋm yooka yĩnga. La woto yaa bũmb ahlʋl kasfa[2] sẽn maan kaset yaadã pʋgẽ. La hakɩɩkã rãmba fãa gill sẽn sɩdg la b maan kaseto.

Rẽ poore, bɩ y sʋk nin-kẽembã la bãad-rãmba, neb nins sẽn yɩɩd ne waooglem nin-buiidã pʋga, sik ka be tɩ b wʋsg na yeel ne sũ-sãang la nims tԑk tԑk tɩ “õh’ ad yaa sũ-sãang la nims menga, ad tõnd yeeba d rasãnda zaalem, ayo, d yeeb-a-la ne bõn la naongo, la yãmb me gũus y mens n da wa yɩ wala tõnd ye” Bal yɩɩr ning sẽn be rɩk rasãndã sẽn ka na n zʋʋg yʋʋm a nu bɩ piig teka n maan wʋm-noog ne bũmb  ning sãri sẽn ka kõ sora, namsda a soab dũni wã pʋga, la a kõt-a namsga la naonga barzaha[3] pʋga, la Gԑhanam la Sakar bugma zarbg laahr daare. Nin-kãngã soab pa segd ne yolsg abada, wala koԑԑg sẽn yeel tɩ: “ned ning sẽn yarda ne naongã, pa sõmb tɩ b ges-a ye” ba ne a sẽn be alhaal kԑgenga pʋgẽ tɩ sõmb tɩ b yols-a la b zoe a nim-bãanega. Bal ned sẽn yard ne a namsgo, pa sõmb tɩ b yols-a ye. A pʋs n pa segd ne yolsg paamg meng ye.

Wẽnd na tɩlg tõnd la yãmb n yi zãmaan-yaoogã sẽn tar pãnga mosɩɩba, aamiina.

[1] Yaa vɩɩm ning sẽn be kũumã ne dũnin yikrã sʋka.

[2] Yaa waliimbã

[3] Yaadã pʋgẽ vɩɩma.