Sʋkr sẽn yi nuur karem-biisã nengẽ sẽn kẽed ne dũni gill zabra yell leokre

SƲKR SẼN YI NUUR KAREM-BIISÃ[1] NENGẼ LEOKRE.

Tõnd sʋka d karen-saambã tɩ: yʋʋm a yiib la woto fo sẽn pa sʋkd tõndo (la mosa woto yaa bũmb sẽn pẽneg yuum piiga ) la ba vugr tãa fo pa sʋk a Amiin sẽn sõngda foo daar fãaga, dũni gill zabrã yell ye, bũmb ning sẽn tar tõk-kԑgeng ne lislaoongã beoogã, hal ba a rasem-damb nins sẽn yɩɩd keelem la rabeem la yԑԑsga pʋga. Fo pʋs n pa ningd-toog ne-a ye. Yalla woto wã, yaa yell a to n be t’a bedlem yɩɩd yel-kẽeng kãnga n maan foo soagl t’a sabab kɩt tɩ zabrã yell lebg yel-bil fo nengẽ bɩ? Bɩ f sã n maan soagl ne-a yaa bũmb sẽn tar naongo?

T’a yeele: yaa sɩda, ad yell n be t’a bedlma yɩɩd dũni gill zabrã, la yell n be t’a zɩslma yɩɩd-a n maand maam soagla, tɩ dũni gill zabrã yaa yel-yaalg a taoore.

Bal b dɩgla yell ned fãa taoore, sẽn tɩ yɩɩd lislaambã, t’a bedlma yɩɩd dũni gill zabrã, t’a yõoda me yɩɩd tẽn-gõngã gill soogre. Hal tɩ ned sã n be b sʋk n tar Ãngletԑԑr la Almay loagã la b arzԑkã buudu, t’a soab yaa ned sẽn tar yam, a na rɩk a fãa gill n bao yel-kãng a yembra tãa, tɩ ka yɩ ne rabeem ye.

Yellã la woto: Yaa tɩ zãmaan kãnga pʋgẽ, b rɩgla muumin fãa taoore, pa rẽ bɩ ned fãa taoore, pʋʋg sẽn pa sat paoong bɩ a kongr yelle, t’a yalma yaa wala tẽnga yalem. Rat n yeel tɩ yaa naam sẽn duumd la sẽn nags paoongo, sẽn be Arzãna pʋgẽ la etaas-rãmba pʋgẽ, pa rẽ bɩ a kongr yelle.

Rat n yeel tɩ b rɩgla yell ned fãa taoore, t’a sã n da tarẽ loag la pãng wala Ãngletԑԑr la Almay loagã la a pãnga bilgri, t’a yaa ned sẽn tar yam, a na kẽes-a fãa gill sẽn na yɩl n paam yel-kãng a yembrã.

La sik ka be tɩ ned ning sẽn ningd a toog ne yԑl a taaba, taoor t’a a nan ka paam yel-kãnga yaa gãeeng la ned yam sẽn ki ye. Pa rẽ meng ye, ad yellã meng tara rabeem, bal ahlʋl kasfa[2] ned a yembr n maan kaset tɩ tẽnga yembr pʋgẽ, ned a yembr tãa n paam-a neb pis-naas sʋka, sẽn deeg b tʋʋm saab biye lagԑla saab wakato, tɩ pis-tã la a wԑ wã fãa kong-a.

[1] Yaa Rasaa’ɩlʋn Nuura karem-biisa

[2] Yaa neb nins Wẽnnaam sẽn mi n vẽneg yel-soalem sãnda n wilga. (lebgdã).

Ad pʋtẽer-beegr-sõngd sã n be n tõe n kɩt tɩ f paam yel-kẽeng kãnga sẽn yaa zɩsga, pa rẽ bɩ mams-n-ges pʋgẽ la b mik t’a pʋs n paam-a lame n kõ neb a nii sẽn yi neb piig fãa pʋgẽ, hal sẽn ta yʋʋm pisi. Sik ka be tɩ ned sẽn tar yam fãa na n nidga pãng tɩ yɩɩd a sẽn nidgd-pãng ne bũmb fãa gillã, ne tʋʋmd ning fãa sẽn na n kɩt t’a tõog n dɩk pʋtẽer-beegr-sõngd kãnga bilgr tʋʋma, sẽn na n kɩt t’a paam yel-kãnga ye.

Neb tusa sẽn paam yel-kãnga ne Rasaa’ɩlʋn Nuura sabab maana kaseto, tɩ pʋtẽer-beegr-sõngd kãnga yaa Rasaa’ɩlʋn Nuurã, sẽn bunda n yit Alkur’aana yel-soalmã pʋga.

Woto bala, ad b sɩdga sɩdgr meng-menga, tɩ ninsaal buuda fãa b tums-a-la tẽng-gãonga zug t’a yaa wala tʋʋm-tʋmda, b sẽn sagl-a soaba. N le yaa sãan sẽn na n loog n bas-a, la a yalɩ wã meng rata vɩɩm sẽn ka saabo.

Ad ninsaal buudo fãa na n basa a dũni wã, la a zoa-rãmb nins fãag a sẽn tar tõkr ne-b rãmb dũni wã pʋga, basg zãng-zãnga, ne sẽn mik tɩ zũndgr la komsg n kẽ gũudum ning sẽn tɩlgd ninssal vɩ-ruumdgã zãmaan kãnga pʋga. La ne rẽ fãa, ad b lugla ned fãa taoore, naam kongr bɩ a paoong yelle, naam ning sẽn ka tar saab t’a neerem yɩɩd dũni kãnga noor tusra.

A sã n pa tar liimaoong kaset sebre, la a ka modg n paam loԑԑg ning sẽn ya a kaset la a bʋʋma, ad a na n konga yel-kãnga. Bɩ f togsem wԑ, yaa bũmb bõe n tõe n ledg bõn-kãnga zĩiga?

Ne hakɩɩk kãnga yĩnga, ba tɩ maam ne m ma-biisã fãa yam sã n paas noor koabga, a ka sekd dɩk n tʋm tʋʋmd a to n zʋʋg tʋʋm-yɩleng kãnga sẽn yaa zɩsgã sõgneg bal ye. Rɩk yԑl a taabã n loe zugã lebga tʋʋm-yaalse. La Rasaa’ɩlʋn Nuur karem-biisa sãnda sẽn be yԑla taaba pʋgẽ yĩnga, mi n kɩtame tɩ b ningd toog ne yԑl a taaba, sẽn zems daruur tԑka, tɩ ka yɩ ne b yamleoog ye. Pa rẽ bɩ wakat ning yalembã sẽn wat n maan-n-zʋʋg tõnd zug tɩ pa yɩ ne daruur la sababa.

Rẽ poore, ad bas yel-kãnga sẽn yaa hakɩɩk n le yaa zɩsg wʋsga, n tɩ kẽ yԑl a taabã la zabã pʋga, n dɩk b yellã n loe f zug n kẽnd n tagsd a yell wakat fãa tɩ yaa yẽ bal n be f yamẽ wã, yaa bũmb sẽn namsd neda. Bal ned ning sẽn nidgd pãng ne polentikã yԑla sẽn tar pãng n takd neba -wala yel-kãnsa bilgri- n maan-soagl ne-a wã, nin-kãngã soab pa na n le tõog n yals ne lislaoongã sõgneg la tʋʋm nins sẽn yaa tɩlԑ ne-a wã ye, tʋʋm nins b sẽn dogl-a tɩ be zĩ-bilã[1] pʋga, t’a nidg-pãngã sa, t’a dĩinã nonglema sẽege.

Rẽ poore, ad ned ning sẽn rɩk polentikã la zabã yԑla sẽn tar pãng n takd neba n loe a zugu, ad wakat sãnda, a na n saadame tɩ yaa yel-kãnsã bal la a pʋgda, n pa le tõe n yals ne a tʋʋma ye. Sẽn le paasde, b le tõe n wa rõd-a lame t’a yaa ned sẽn ka tar sũ-yɩleng la niya-sõng la tags-tɩrg la niya-yɩleng a daawa wã pʋgẽ, ba t’a sã n ket n tar-ba.

ba ne mam menga, wakat ning b sẽn wa n wa mam nengẽ bʋ-kaood-roogã pʋgẽ ne yel-kãnga wã, mam yeel-b lame: Ad wala sẽn mik tɩ liimaoongã la Alkʋr’aana hakɩɩk ning sẽn yaa vẽeneg wala wĩntoogã, n ka satelit[2] la a pa bũmb sẽn deegd vẽenma n yit bũmb a to nengẽ wakat zall pʋgẽ tẽngã zuga, woto bala ad ned ning sẽn mi hakɩɩk kãnga minim tԑk-tԑk pa tõe n dɩk-a n maan bũmb bɩ teog sẽn na n tall n sõgen yԑl nins sẽn be tẽn-gõngã pʋga ye, pa rẽ bɩ sẽn na n tall n sõgen dũni-kẽengã fãa gill ye, tɩ gom-kãngã kɩt tɩ b pa sɩɩ.

D karen-saambã leokrã saa zĩ-kãnga, la tõnd me sɩdga ne d pãng tԑka.

Rasaa’ɩlʋn Nuura karem-biisã.

[1] sũurã

[2] B boond-a-la ne Farend tɩ « satellite »