Tẽeb a yopoe n soaba, sẽn yi “Nin-kẽemba masaalla” pʋgẽ

Tẽeb a yopoe n soaba

sẽn be “Nin-kẽemba Masaalla” pʋgẽ

Raar a yembre, mam nin-kẽoongã sɩngr wakato, wakat ning Sa’iid kʋdgã laad sẽn wa n lebgd Sa’iid paalgã kʋkʋm, yaa wakat kãng la dũni-pʋgdbã sẽn be Ãnkara wã bool maam beenẽ, n tẽed tɩ mam ket n yaa Sa’iid kʋdgã, tɩ mam kẽnge. La tɩ-vãad sʋʋgr sasa-yaoog wakato, mam rʋya Ãnkara tãn-kʋdg ning sẽn yɩɩda maam ne nin-kẽoongã zu-zʋʋsẽ, t’a vẽneg mam nengẽ wala yԑl sẽn maan pĩnd sʋʋrgo.

Yʋʋmdã nin-kẽoonga, la mam mẽnga nin-kẽoonga, la tãnga nin-kẽoonga, la nebã nin-kẽoonga, la Daola Ʋsmaaniya wã nin-kẽoongã, la lislaoonga naam saaba, la dũni wã kʋdgrã, yel-kãnsã fãa gill kɩtame tɩ mam be tãn-zãndg kãngã zug ne sũ-sãang meng-meng sẽn tar yel-solemde, n get zãmaan sẽn loog ko-soodo, la zãmaan sẽn wat tãmese. Mam gesame la m gẽes nuura la nen-yubsg la sũ-maagr la tẽeb sẽn be nin-kẽoong a naasã bɩ a nu wã sẽn kẽ taaba liks pʋgẽ, la sẽn gũbga maama pʋgẽ, wakat kãng la mam mik tɩ mam menga bee alhaal sẽn ya lik pʋgẽ, Ãnkara pʋgẽ.

Wakat ning mam sẽn wa n get nug-rɩtg wԑԑngẽ, sẽn yaa zãmaan sẽn loogã, n gẽesd nen-yubsgã la sũ-maagrã, mam mikame tɩ zãmaan sẽn loogã yaa  wala mam saambã la mam yaab-rãmbã la mam buugã sẽn yaa ninsaal buudã fãa yaad zĩiga, t’a sẽn da sõmb n maag mam sũurã, a lebg n kẽesa maam rabeem.

Tɩ mam ges m goabg wԑԑngẽ sẽn yaa zãmaan sẽn watã, n na n bao yellã tɩɩm, n mik tɩ yẽ me yaa wala maam la mam taaba la zãma sẽn watã yaad zĩ-bedr sẽn tar lika, tɩ yẽ me sẽn da sõmb n yubs mam nengã, a lebg n kẽesa maam yԑԑsgo.

Rɩtgã la goabgã sẽn kẽes maam rabeemã poore, mam gesa raar ning mam sẽn be a soab pʋga, tɩ daarã sẽn yaa wala ɩstoaarã vẽneg a mengã mam yam-yaal-yaal nifã  pʋgẽ wala koglg sẽn zãad mam yĩnga pʋɩ-sʋka sẽn ki wã kũuma, t’a tẽbd wala bũmb b sẽn kodge.

Mam sẽn wãag m tẽeb ne nen-kãnga wã poore, mam zẽka m neng n ges mam vɩɩmã tɩɩgã yĩngrã, n yãnd tɩ tɩ-bil a yembr tãa n be tɩɩgã zugu, yẽ me la mam kũuma. Tɩ tɩ-bi-kãng be tɩɩga zug n get maam. Tɩ nen-kãngã me le kẽes maam rabeem. 

Tɩ mam sulg m neng n ges mam vɩɩmã tɩɩg tẽngre, rat n yeel t’a yẽgã, n mik tɩ tomã sẽn be tẽngrã, yaa wala mam kõba tom la mam naanega sɩngr tom gẽdga taab a pʋgẽ, tɩ b tabd-b nao tẽngre. Yɩɩ woto tɩ yẽ me ka kõ mam yɩɩrã tɩɩm ye, ayo, a pʋs n paasa mam yɩɩrã pãnga.

Rẽ poorẽ tɩ lebg tɩlԑ ne maam tɩ m ges m poorẽ. La mam sẽn wẽnems n ges m poorẽ wã, mam mikame tɩ dũni wã sẽn yaa sat n ka tar yẽgrã bee kaalem la saab ko-sood liks pʋgẽ n leebdẽ. Tɩ nen-kãngã paas mam yɩɩrã zẽnem, mam yaool n ra gẽesda pomate[1]. La m ka paam bõn-sõng nen-kãngã me pʋgẽ ye.

Tɩ mam roog n ges m neng-taoor wԑԑngẽ, n togl m nifã n ges taoore, n yãnd tɩ yaoogã rignoor yaa wala pakame, n be mam sorã zug tã, n pak a noora n get maam bala. La yaoogã poore, sor n vẽneg mam gesgã pʋgẽ, so-kẽeng sẽn tees n ka tar tԑka, tɩ kẽn-kẽndb be a zug n kẽnda. La bũmb yaool n ka be m nugẽ, yԑԑsgã la rabeem kãnsa fãa taoor sẽn yit ween-vɩɩs a yooba pʋg ye, rɩlla yam-yãk-gɩrgã, yẽ bal n yaa wala tikr zĩiga, la zab-teoog mam sẽn na n tall n gũ m mengã.

La ka be ne yam-yãk-gɩr-kãnga sẽn yaa zab-teoog a yembr ninsaala sẽn tar n na n teeg bԑԑb kãnsã sẽn ka tar tԑka, la te-namsds sẽn ka tõe n bãng n sõda, rɩlla tʋm n bao. Bala, a yaa bũmb sẽn yaa sãoog la tudgd la koamsa. A ka tõe n maan bũmb ye. A le ka tõe n lebg n leb zãmaan sẽn loogã pʋgẽ n tɩ yãk sũ-sãang ning sẽn yit  beenẽ n wat mam nengẽ wã ye. A ka tõe n sãag n kẽng zãmaan sẽn watã pʋgẽ n tɩ gɩdg yԑԑsg ning sẽn na n yi beenẽ n wa mam nengẽ wã ye. Wakat-kãng  la mam bãng tɩ mam ka tar tõog ne mam saagrã la m zablem nins sẽn yit zãmaan sẽn loogã la sẽn watã pʋga ye.

[1] Raaba ka pomatã meng ye, yaa bũmb sẽn na n tɩlg-a t’a yi a yɩɩra la sũ-sãanga pʋgẽ. (lԑbgdã)

La mam sẽn wa n be rabeem ning ween-vɩɩs a yoobã sẽn kẽes maama pʋga, sẽn yaa yirbg la yԑԑsg la lik la tẽeb-wãagrã, zĩig pʋg la liimaoongã nuurã sẽn be Alkʋr’aana sẽn yaa yel-soalem vẽeneg soaba saag pʋgẽ n yãgda tak maam la a nuur ween-vɩ-kãnsa, la a widg bugum hal tɩ ta zĩig zãng la-bala. Ba tɩ yԑԑs kãnsã la liks kãnsã fãa sã n fão n yɩlem noor koԑbga, nuurã kãngã na vẽneg a fãa gill tɩ seke, la a wẽnems yirbgã fãa, yembr-yembre, tɩ lebg sũ-maagre. La a wẽnems yԑԑsgã me yembr-yembr tɩ lebg nin-yubsgu. La woto: bala liimaoongã pãrsa zãmaan sẽn loogã yalɩ ning sẽn ra vẽneg q meng mam nengẽ wala yaad zĩ-kẽeng sẽn kẽesd rabeema, la a maneg n vẽneg-a ne bãng-n-wãak nifr la bãng-n-wãak sɩda, t’a yaa zo-rãmb tiging zĩig sẽn tar nuura la nin-yubsgu.

Rẽ poorẽ, ad zãmaan sẽn wat ning sẽn vẽnegd a meng yam-yaal-yaalã nif gesg pʋgẽ wala yaad zĩ-kẽenga, liimaoonga vẽneg-a-la ne bãng-n-wãak minim n wilg t’a yaa yolsg sãand reegr zĩiga, sẽn be zu-noog etaas pʋgẽ.

Rẽ poore, bãng tɩ liimaoongã bõgsa zãmaan kãnga, sẽn yaa wala kees yam-yaal-yaal nif gesg[1] pʋga, la a bõgs tõnd sẽn be daar ning pʋga keesã sʋʋrgã, n vẽneg n wilg ne kaseto, tɩ daarã  yaa laahrã tolb zĩiga, la yolsg sãand reegr zĩig sẽn me tɩ be neere.

Rẽ poore, bãng tɩ liimaoongã vẽnegame n wilg ne bãng-n-wãak minim tɩ ad tɩ-bilã, sẽn yaa wala kũum yam-yaal-yaalã nif gesg pʋga, sẽn be vɩɩma tɩɩgã zuga pa kũum ye, ayo, ad a yaa yõor ning sẽn sõmb ne vɩɩm sẽn duumda, la b sẽn n tũus-a soab zu-no-ruumdg yĩnga, sẽn na n yi a tʋk ning sẽn sãama pʋgẽ n kẽng vʋʋsg zĩig a to sẽn be ãdsã sʋka.

Rẽ poore, bãng tɩ liimaoongã vẽnegame n wilg ne a yel-solgdga, tɩ mam kõba la m naanegã sɩngr toma, ka kõb sẽn sãam n ka tar yõod tɩ b tabd ne no-kadem ye, a vẽneg n wilgame tɩ tom-kãngã yaa yolsgã rignoor la Arzãn zõng rido.

Rẽ poore, bãng tɩ liimaoongã vẽnega dũni wã hakɩɩk ning sẽn be mam poorẽ wã, kaalmã la kaalmã liksã pʋgẽ n leebdẽ wã n wilg ne Alkʋr’aana hɩkma, tɩ dũni kãngã sẽn be liksã pʋgẽ n leebdẽ wã, hakɩɩk pʋga, yaa Tikr-naab gaf-rãmb pʋgẽ gaf a yembre, la Yɩlgemd-naaba tagemsã seb-vãado, t’a tʋʋmdã sa, t’a maana wã me nafe, la a bas a yõod dũni pʋgẽ, n ledg a menga zĩiga. Yaa woto la liimaoongã wilg dũni wã hakɩɩkã meng ne bãng-n-wãak minim.

[1] Yaa ned sẽn ka get ne liimaoongo, rat n yeel t’a ka tagsd Wẽnnaam yell a gesgã pʋgẽ ye.

Rẽ poore, bãng tɩ liimaoongã vẽnegame n wilg ne Alkʋr’aan nuurã, tɩ yaoog ning sẽn na n gũbg maam zãmaan sẽn watã pʋga, la sor-kẽeng ning sẽn tẽegd n yit yaooga poor n tall n tees abada wã, pa bulg noor ye, ayo, a yaa nuurã dũni rignoore. La a wilg tɩ sor-kẽengã pa sor sẽn tar n dabd kaalmẽ[1] la kaalem dũni pʋgẽ ye, ayo, ad-a yaa sor sẽn tʋgd belmã pʋgẽ, la nuura dũni pʋgẽ, la zu-noog sẽn duumd pʋgẽ.

Mam yetame: Tɩ bãng tɩ liimaoongã –a sẽn vẽneg hakɩɩk-kãnsã ne yalɩ sẽn wat ne sek-m-meng sẽn pida- a lebga sũ-maagd la tɩɩm ne mam yɩɩra la m sũ-sãamsã.

Rẽ poore, ad liimaoongã sagenda roadg yam-yãk-gɩr-kãngã nugẽ -yam-yãk gɩr-kɩdg paoon-gɩrga baoob zĩigẽ- a sẽn na n tik n paam pãng sẽn ka tar saabo, la a sẽn na n tik paam tõkr ne yolsg sẽn ka tar tԑka, bԑԑbã la liksã sẽn ka tar tԑka taoore, pa rẽ bɩ sɩd-kũunã pʋs n lebgda roadg yam-yãk gɩrgã yĩnga.

Rẽ poore, bãng tɩ ninsaal zab-teo-kãngã, sẽn yaa yam-yãk-gɩrga -tɩ hakɩɩk pʋgẽ, a yaa koams la koԑԑgd la sãooga- a bilgr yaa wala sodaag bilgri, sẽn yalsd ne tʋʋm sẽn yɩɩd a pãngã noor tũsa, t’a sã n dɩk a pãn-kɩdgã n tʋm ne tẽnga yʋʋre. Woto bala, b sã n tʋm ne yam-yãk-gɩr-kãngã ne Sɩd-na-kẽengã yʋʋr yĩnga, la A sora yĩnga, ne liimaoongã pãn-solgdgã, a tõe n paama Arzãn yalem sẽn ta yʋʋm kobs-nu.

Rẽ poore, bãng tɩ liimaoongã reegda yam-yãk-gɩrgã salbrã -sẽn ka le tõe n pãrga n kẽng zãmaan sẽn loogã la sẽn watã- n yi mam nugẽ, n dɩk-a n kõt sũurã la yõorã, tɩ yɩ sabab tɩ yam-yãk-gɩrã yi gɩrlmẽ wã, n paam pidbu. La woto, yaa tɩ sũurã la yõorã vɩɩma zĩig gũbga yʋʋm wʋsg sẽn loog la sẽn  wate, bala a ka tek rũnda wakatã bal wala yĩn-tãndã ye.

La yam-yãk-girgã rʋʋda, ne liimaoongã nuurã, zãmaan sẽn wat tãn-zãnds zu-zʋʋsẽ, la a yãkd yԑԑsga, wala a sẽn le tõe n pãrg ne liimaoongã pãng n kẽng zãmaan dãmb sẽn loogã ko-sood zulums pʋga, la a pãrgd yԑԑsg sũ-sãams liksã.

[1] Kaalmã raaba ka kũuma ye, yaa belem sẽn ka be zĩig ninga.

Yaa yãmb a nin-kẽems la pʋg-yãamse, neb nins sẽn namsd ne nin-kẽoonga musakã wala maama!

Sẽn mik tɩ tõnd yaa liimaoongã rãmba – D pʋʋsda Wẽnnaam bark ne rẽ- la sẽn mik tɩ sãnem-boy sẽn be neer n yaa noog n tar nonglem n yaa bʋgsg n tɩ tãag darage kãngã n be liimaoongã pʋga, la sẽn mik tɩ tõnd nin-kẽoongã peegda tõnd n tʋgd sãnem-bao-kãngã sʋk wʋsg wʋsga, sik ka be tɩ sõmbame tɩ d ra wa taalg nin-kẽoongã sẽn yaa muumina ye, ayo, d segd n pʋʋs-a-la bark noor tusa.                                                           

 Sa’iid Al-nursi