Tɩʋʋsg sẽn gomd dũni-yikr yelle (Sʋaa’a wԑ soaba)

Tɩʋʋsg sẽn gomd dũni-yikr yelle.

Sʋaa’a wԑ soaba.

﴿فَسُبْحَانَ اللَّهِ حِينَ تُمْسُونَ وَحِينَ تُصْبِحُونَ {17} وَلَهُ الْحَمْدُ فِي السَّمَاوَاتِ وَالْأَرْضِ وَعَشِيّاً وَحِينَ تُظْهِرُونَ {18} يُخْرِجُ الْحَيَّ مِنَ الْمَيِّتِ وَيُخْرِجُ الْمَيِّتَ مِنَ الْحَيِّ وَيُحْيِي الْأَرْضَ بَعْدَ مَوْتِهَا وَكَذَلِكَ تُخْرَجُونَ {19} وَمِنْ آيَاتِهِ أَنْ خَلَقَكُم مِّن تُرَابٍ ثُمَّ إِذَا أَنتُم بَشَرٌ تَنتَشِرُونَ {20} وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجاً لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً إِنَّ فِي ذَلِكَ لَآيَاتٍ لِّقَوْمٍ يَتَفَكَّرُونَ {21} وَمِنْ آيَاتِهِ خَلْقُ السَّمَاوَاتِ وَالْأَرْضِ وَاخْتِلَافُ أَلْسِنَتِكُمْ وَأَلْوَانِكُمْ إِنَّ فِي ذَلِكَ لَآيَاتٍ لِّلْعَالِمِينَ {22} وَمِنْ آيَاتِهِ مَنَامُكُم بِاللَّيْلِ وَالنَّهَارِ وَابْتِغَاؤُكُم مِّن فَضْلِهِ إِنَّ فِي ذَلِكَ لَآيَاتٍ لِّقَوْمٍ يَسْمَعُونَ {23} وَمِنْ آيَاتِهِ يُرِيكُمُ الْبَرْقَ خَوْفاً وَطَمَعاً وَيُنَزِّلُ مِنَ السَّمَاءِ مَاءً فَيُحْيِي بِهِ الْأَرْضَ بَعْدَ مَوْتِهَا إِنَّ فِي ذَلِكَ لَآيَاتٍ لِّقَوْمٍ يَعْقِلُونَ {24} وَمِنْ آيَاتِهِ أَن تَقُومَ السَّمَاء وَالْأَرْضُ بِأَمْرِهِ ثُمَّ إِذَا دَعَاكُمْ دَعْوَةً مِّنَ الْأَرْضِ إِذَا أَنتُمْ تَخْرُجُونَ {25} وَلَهُ مَن فِي السَّمَاوَاتِ وَالْأَرْضِ كُلٌّ لَّهُ قَانِتُونَ {26} وَهُوَ الَّذِي يَبْدَأُ الْخَلْقَ ثُمَّ يُعِيدُهُ وَهُوَ أَهْوَنُ عَلَيْهِ وَلَهُ الْمَثَلُ الْأَعْلَى فِي السَّمَاوَاتِ وَالْأَرْضِ وَهُوَ الْعَزِيزُ الْحَكِيمُ﴾ (سورة الروم: 30/17-27)

“yɩlgemd be ne Wẽnnaam, wakat ning yãmb sẽn wat n kẽed zaabr la y sẽn wat n vẽegd beoogo, la pẽgrã be ne-A sãasẽ la tẽngã poor zugu, zaaba la y wĩnto-zibill wakato, yẽ n yiisd vʋɩɩg kɩɩng pʋgẽ la a yiisd kɩɩng vʋɩɩg pʋgẽ, la a vʋʋgd tẽngã a sẽn ki poore, la yaa woto bal la b na n yiis yãmb me, la be sẽn yi Wẽnnaam aaya-rãmba pʋgẽ, A sẽn naan yãmb n yi tãnd pʋgẽ, rẽ poor tɩ yãmb lebg neb n sẽegdẽ, la be sẽn yi A aaya-rãmba pʋgẽ, A sẽn naan pagb n yi yãmb mensa pʋgẽ n kõ-yã, sẽn na yɩl tɩ yãmb yõgen y yĩis b nengẽ, la A ning nonglem la yols-taab yãmb sʋka, ad yel-soalem be woto pʋgẽ ne neb nins sẽn tagsdba, la be sẽn yi A aaya-rãmba pʋgẽ, saasã la tẽngã naanegã la yãmb zɩlma wã la y kõbga yõs-taaba, ad yel-soalem be woto pʋgẽ ne bõn-naandsã, la be A aaya-rãmba pʋgẽ, yãmb gõeema yʋngã pʋgẽ la y sẽn baood A yɩɩdlma wĩntoogã, ad yel-soalem be woto pʋgẽ ne neb nins sẽn yaa wʋmdba, la be sẽn yi A aaya-rãmba pʋgẽ, A sẽn wilgd yãmb sa-yãgrã ne yԑԑsg la yamleooga, la a sikd sa-koom n yit saagẽ wã, n talld-a vʋʋgd tẽngã a sẽn ki poora, ad yel-soalem be woto pʋgẽ ne neb nins sẽn ya b yam rãmba, la be sẽn yi A aaya-rãmba pʋgẽ, ne saagã la tẽngã sẽn na n yik ne A saglga, rẽ poor t’A sã n bool yãmb bool-vugr n yi tẽngã pʋgẽ la yãmb sẽn tar yiib zĩig pʋgẽ, la Yẽ n so bũmb buud fãa sẽn be saasẽ la sẽn be tẽngã pʋgẽ, b fãa gill yaa sak-n-tũ-rãmb ne-A, Yẽ la soab ning sẽn sɩngd naanegã rẽ poorẽ t’a lebsd-a, tɩ rẽ yaa yolyol ne-A, bilgr sẽn zẽk be ne-A saasẽ la tẽngẽ, Yẽ la Wilb-naab la Bʋʋd-minim-naaba” (sʋʋrat al-rʋʋm: 30\17-27).

Sʋ’aa’ a wԑ n soaba pʋgẽ, d na n vẽnega masaal-bԑd la daliil-bԑd sẽn be aaya-bԑd kãnsa pʋgẽ, sẽn wilgd liimaoonga kõbg a yembre, la sẽn be daliil-bԑd kãnsã sẽn yaa yɩlenga pʋga, sẽn sɩdgd Dũni-yikr daarã yella.

Wẽnnam sõngr sẽn bʋgsa: Ad yʋʋm pis-tã sẽn looge, a Sa’iid kʋdga ra goma « Alkʋr’aan bõn-baoodg a yiib n soabã » pʋgẽ, sẽn be gaf ning b sẽn boond tɩ “muhaakamaata” baasgẽ wã, gaf ning a sẽn gʋls tɩ yaa tafsɩɩrã tɩʋʋsga: “D na n welsame la d vẽneg aaya a yiibã sẽn gomd Dũni-yikr daarã yella. A yeela gafã sɩngrẽ wã tɩ “Bɩsmillaahɩr rahmaanir rahɩɩmi” n yals n ka tõog n kẽng taoor ne gʋlsgã ye.  Sã n yaa woto, pẽgr la bark-pʋʋsg be ne m Naanda sẽn yaa Yolsg-naaba, pẽgr la bark-pʋʋsg sẽn ta Dũni-yikr daarã daliil-rãmbã la a tagemsã sõore, ne A sẽn maan maam neer la A maan-m segl-sõng yʋʋm pis-tã poora.

Yaa sɩda, ad Wẽnnaam sẽn yaa Na-wagella maana maam neema yʋʋm a wԑ bɩ piig sẽn looge, ne “gomd piig n soaba” la “gomd pisi la a wԑ n soaba” goam nins sẽn tar daliil-vẽens sẽn yãgd n le tar pãng wʋsga, sẽn be aaya a yiibã yembr pʋga, sẽn be Wẽnnaam gafã la a welsga pʋga, yẽ me la woto :

 ﴿فَانظُرْ إِلَى آثَارِ رَحْمَتِ اللَّه كَيْفَ يُحْيِي الْأَرْضَ بَعْدَ مَوْتِهَا إِنَّ ذَلِكَ لَمُحْيِي الْمَوْتَى وَهُوَ عَلَى كُلِّ شَيْءٍ قَدِيرٌ﴾‏ (سورة الروم: 30/50 (

 “ges Wẽnnaam yolsgã tagemsa, yalɩ ning A sẽn vʋʋgd tẽngã a sẽn ki poora, ad soab ning sẽn maana woto wã la kũ-rãmba vʋʋgda, A yaa Tõog-naab bũmb fãa gill zugu” (sʋʋrat Al-rʋʋm: 30\50)

 Tɩ kɩt tɩ tõdgdbã sĩndi.

A le waooga maam yʋʋma wԑ bɩ piig poore, ne masaall kãnga, sẽn yi tãn-kegems a yiiba[1] sẽn kengd sɩd-kũunã ne Dũni-yikr daarã, tɩ yaa welsg ne aaya-kẽeng a yiib n soabã b sẽn togs yĩngra.

Ad “Sʋ’aa’ a wԑ n soabã” yaa bũmb sẽn gomd zĩ-bԑd a wԑ yelle, la tɩʋʋsg sẽn tar pãnga, tɩ b gom a yell aaya nins b sẽn togsa pʋgẽ.

[1] Yaa “gomd piig n soabã” la “gomd pisi la a wԑ n soabã”

Tɩʋʋsgo: Yaa yԑl a yiib sẽn na n vẽneg sɩd-kũuna ne Alkɩyaoom daarã sẽn tar nafa wʋsg ning ne ninsaalã, la sẽn na n vẽneg yõod ning a sẽn tar  vɩɩma pʋga yembr  koԑԑg-koԑԑga. B le vẽnegda bũmb ning sẽn wilgd tɩ sɩd-kũunã ne Dũni-yikrã yaa bũmb sẽn yaa tɩlԑ ninsaal vɩɩmã pʋgẽ, sẽn tɩ yɩɩda zĩid-n-taar vɩɩmã pʋgẽ. B le vẽnegda sɩd-kũun ne Alkɩyaoom daarã daliil-bedr a yembre. La b wilgd sɩd-kũunã ne Alkɩyaoom daarã sẽn yaa vẽeneg tɩ sik ka be a pʋgẽ wã sẽn ta to-to.

Pipi yellã: D na n kẽe daliil-rãmb kobs pʋgẽ sẽn wilgd tɩ sɩd-kũunã ne Laahra yaa zĩid-n-taar vɩɩma yẽgre, la ninsaal mengẽ vɩɩma yẽgre, n le yaa ninsaal zu-nooga la a pidba yẽga, n yãk daliils a naas d sẽn tõe n tar n magd n wilgi.

Pipi daliilã: Kom-bõonegã sẽn pẽneg ninbuiidã pʋɩ-sʋka, b ka tõe n keng b sũur n yals kũ-rãmbã la kũumã sẽn vẽnegd a meng la a wilgd a meng b nengẽ wala bũmb sẽn kẽesd rabeem la a wat ne kʋkʋma taoore,  rɩlla ne Arzãna yell tagsgo. La ba ne b sẽn yaa valems n yaa bõones wʋsga, b sã n tagsd Arzãnã yelle b paamda pãn-soalgdga. B le tõe n paama saagr la tẽebo, ne Arzãna yell tagsgo, b yõyã sẽn yaa valems wʋsga, la sẽn kumda tʋʋll ne bũmb bilf yĩnga pʋgẽ, tɩ rẽ sabab tɩ b tõe n vɩɩmd ne kɩdeng la sũ-noogo.

Bilgri: A tagsda Arzãna yell n yetẽ: Mam yaoã pa rẽ bɩ m noangã leba m soabẽ, n lebg Arzãn liuul n gilgd Arzãna pʋgẽ, la a vɩ beenẽ, n noogd a yõor la a paamd wʋm-noog n yɩɩd tõnd. Sã n pa b sẽn tagsd Arzãna yella, ad b rog-taasã la kãsem-damba kũuma b sẽn ne wã, namsda nin-kãnsã sẽn yaa miskɩɩmb n yaa valemsa vɩɩma, sẽn yaa pelen-yɩk vɩɩma, la a komsd b keglma la b pãn-soalgdga, t’a yĩn-wʋmdsa fãa gill wala a yõorã la a sũurã la a yamã lagem a ninã n kũmdẽ. Kom-bõonegã wakat-kãngã, ĩmmaa tɩ b yeebe, pa rẽ bɩ b lebg wala rũm-muks n yaa zu-beed rãmb la tẽeb-wãagdb la bõn-rԑԑdse.

Daliil a yiib n soaba: Nin-kẽembã la pʋg-yãamsã me sõor sẽn ta ninbuiidã pʋɩ-sʋka, ad yaa Laahr vɩɩmã yell tags tãa, n tõe n keng b sũur tɩ b yals yaoogã sẽn be b taoorã noore. La ba ne b dũni vɩɩmã b sẽn nong wʋsg-wʋsga sẽn kolg saaba, ad b sã n tagsd Laahrã yelle, b tõe n paama sũ-maagre. La b dũni neerã sẽn kolg saaba, ad b sã n tagsd vɩ-ruumdgã yell la b tẽed-a, b tõe n kenga b pԑlg n yals b sẽn wãag b tẽeb ne dũni-vɩɩmã taoore, tẽ-wãak ning kũumã la saabã sẽn kẽes b yõyã la b yalɩ wã sẽn yaa valenga pʋga, sẽn yaa wala bi-pԑԑlg tɩ bũmb bilf fãa namsd-a wã. 

Sã n pa rẽ, ad nin-kãnsã sẽn tar ziir la waoor n sõmb tɩ b tall nin-bãan-zoeer ne-ba, la saam-dambã la ma-rãmbã sẽn be rabeem pʋga, n maand sũ-sãang ne sẽn loogã, neb nins sẽn tar tʋlsem wʋsg ne sũ-yõgnegã la peemsgã, sã n pa Arzãna yell tagsgo, nin-kãnsã na wʋm b yõyã kԑleng la sũyã yɩɩre. Tɩ dũni wã lebg bãns-ro-sẽk b yĩnga, tɩ b vɩɩmã lebg naon-kԑgenga. 

Daliil a tãab n soaba: Rasãmbã la pʋg-sãdbã sẽn yaa zĩid-n-taar vɩɩmã tikr-zĩig sẽn tar pãnga, ad bũmb ning sẽn tõe n yõk b wʋm-noogã sẽn fudgda, la b yõyã la b yõor yamleoogã sẽn sãaga, n kɩt tɩ b bas maan-n-zʋʋkã la wẽgdã la sãangã, la bũmb ning sẽn tõe n kɩt tɩ zĩid-n-taar vɩɩmã kẽn a sor-sõng zugu, yaa Gԑhanem bugmã yell tẽegr bal tãa. Sã n pa rẽ, ad Gԑhanem yԑԑsg sã n da ka beẽ, kom-bɩɩsã sẽn yaa suudbã, la sẽn zoet n pʋgdb b yõyã yamleoogã la b dũni wã raaba, b naan n wẽnemsa dũni wã tɩ lebg gԑhanem bugmã, miskɩɩmbã la koms-rãmbã zugu, wala gom-bũndã sẽn yeel tɩ: “Pãng-soab n so a bʋʋm”. B naan n le wẽnemsa nedengã sẽn tar ziirã tɩ lebg rũmblem sẽn yaa yel-yaalg tԑk-tԑka.

Daliil a naas n soaba: Ad ninbuiidã zĩig sẽn yɩɩd ne tigingu, la sɩngr zĩig yẽgr sẽn yɩɩd ne pãnga, la b arzãn la b lԑbeng-zĩiga, la b dũni zu-noogã zĩiga, dũni-kãngã vɩɩmã pʋgẽ, ad yaa zak-pʋgẽ-vɩɩmã. Ad ned fãa zak ya a dũni-bila, la zakã rãmb vɩɩmã la b zu-noogã bee pelg-pʋg n waoo-taabã pʋgẽ, ne ned fãa sẽn na n pids a pʋleng ne a to, la yols-taab yolsg sɩd-sɩd sẽn tar nin-bãan-zoeera pʋgẽ, ne ned fãa sẽn na n kʋ a mengã a to wã yĩnga. La pelg-pʋg n waoog-taabã la sɩd-sɩd yols-taabã paamda ne zĩid-n-taar sẽn duumdi, la tũud-n-taar sẽn duumdi, la naag-taab sẽn duumdi, la ne loԑԑg la b sẽn na n tẽegd saambdmã la biilmã la ma-biirã la tũud-n-raarã sẽn be bãmb ne taaba sʋka. B sẽn na n tẽegd a yell wakat fãa la b mi tɩ yaa bũmb sẽn be vɩɩm sẽn ka tar tԑk pʋgẽ.

A yetame, bilgri: Mam pagã yaa mam tũud-n-taag mam vɩ-ruumdgã pʋgẽ, dũni ruumdga pʋgẽ. Ba t’a sã n lebg pʋg-yãang t’a neermã sa mas-masa, yell ka be ye, bal a tara neerem sẽn duumd sẽn wate. 

Nin-kãngã tõeame n zĩnd ne a pagã sẽn yaa pʋg-yãangã ne nonglem la nin-bãan-zoeer la yolsgo, tɩ yaa wala a yaa pʋg-neer t’a nin ya bԑd n peelẽ, n yetẽ: ad yaa zĩid-n-taar sẽn duumd wala woto buud yĩnga, la mam kʋʋd m mengã la m yolsdẽ, sã n pa rẽ, ad zĩid-n-taar ning welg-taabã la welg-ruumdgã sẽn paamd-a soaba, tũud-n-ta-koԑԑgã sẽn yaa faoog n be wakat bilf pʋga, sik ka be t’a tõeame n wa ne yols-belgem-belgem la bels-taab waoogr ye, sẽn zãad ninsaalem yolsg tԑk maana, sẽn yaa wakat koԑԑg n pʋs n ka tar yẽgre, wala sẽn be rũmsã pʋga.

Wakat-kãngã, nafa-rãmb a taaba la wʋm-nood sẽn kellã na n wila waoogrã la yolsgã, wala sẽn be rũmsã pʋga, tɩ dũni arzãna lebg gԑhanem.

Ad woto yaa yõod a yembr sẽn yi sɩd-kũunã ne Alkɩyaoom daara yõod kobsã pʋgẽ, sẽn tar tõkr ne ninsaalã zĩid-n-taar vɩɩmã. B sã n na n geel yõod a taaba sẽn be yõod kãngã a yembrã nafa ka-tԑka pʋgẽ ne daliil-kãnsa b naasã, b na bãng tɩ Alkɩyaoom daara sɩdgra la a waoongã yaa bũmb sẽn yaa vẽenega, wala ninsaalã ziira sẽn yaa hakɩɩk to-to wã, la a tʋlsma sẽn gũbga. Pa rẽ meng ye, ad Alkɩyaoom daara daliila vẽenem pãng yɩɩda kom sẽn wilgd rɩɩbã belmã, la a togsd a sɩdgra ne kibay sẽn tar pãng sõma.

La a sɩdgdame n wilgdẽ tɩ Alkɩyaoom daara yõoda sã n lak n bas nedengã, nedengã yalɩ wã sẽn tar yõod la ziir la vɩɩma na lʋɩ n lebg wala bõn-kɩɩng sẽn põoge, n yaa viris-rãmb wãmneg la b wubr zĩiga.

Sã n yaa woto bɩ zĩid-n-taar vɩɩmã bãngdbã la polentik bãngdbã la sẽn getb ninsaal wubrã yella, neb nins nin-buiidã dersg la b zʋglg la b zĩid-n-taar vɩɩma yell sẽn dog-b rãmb zuga tʋb yɩɩle, la b togs yaa bõe la bãmb tõe n tall n yẽd võ-kãngã, la yaa bõe la b tõe n tall n tɩbs sãmpog-kԑgeng kãnga.

Masaall a yiib n soaba: Masaal-kãngã vẽnegda daliil a yembr sẽn yi Alkɩyaoom daara daliilsã sẽn ka-tԑka pʋgẽ, sẽn yit sɩd-kũuna zeng-raad a taaba kaset rãmba sɩɩlem pʋgẽ.

La woto yaa tɩ bala, tõnd zug-soab a Mohammad yel-soalmã fãa gilli -Wẽnnaam yolsg la A tɩlgr be a yĩnga- sẽn wilgd a tẽn-tʋʋmdmã la a nabiyaamdmã daliil-rãmba fãa, la daliil-rãmb nins fãa sẽn wilgd a sɩdã la a hakɩɩmdã fãa, b fãa gill seetame tɩ Alkɩyaoom daara yaa sɩda, la b sɩdgd-a. Bala tẽn-tʋʋm kãnga yԑlã fãa gill a vɩɩmã pʋga tigimda Alkɩyaoom daara yell zugu, wẽn-yembgã loogr poore. La a yel-soalmã la a daliil-rãmb nins sẽn sɩdgd nabiyaam-dambã fãa gilla, la a kɩt tɩ nebã sɩdgd-ba, maanda kaset ne yel-kãngã.

La a sẽn maand kaset ne “Wa kutubihii” (A gaf-rãmba) sẽn paasda kaset-rãmb nins sẽn wat “wa rʋsʋlɩhɩɩ” (la a tẽn-tʋʋmbã) poora pãng tɩ b lebg vẽenega maanda kaset ne yell-kãngã. La woto yaa tɩ bala, Alkʋr’aana sẽn yaa yel-soalem vẽeneg soaba muugiza-rãmbã fãa gilli, la a hakɩɩk-rãmbã la a daliil-damb nins sẽn sɩdgd a sɩdã fãa gill seeta Alkɩyaoom daarã hakɩɩkã sɩdgrã la a waoongã, la a tabend-a. Bal Alkʋr’aana pʋɩɩr a tãab yembr gomda Alkɩyaoom daarã yelle. La a yɩlemd sʋʋr koeesã wʋsg fãa sɩngrẽ, Alkɩyaoom daarã aaya-rãmbã sẽn tar pãng wʋsga. La Alkʋr’aana ne a aaya tusa togsda vẽeneg-vẽeneg la a teesd yel-kãngã la a tabend-a la a vẽnegd-a.

Bilgri: a teesdame n wilgd ne a daliil sẽn bʋ-n-manege, sʋʋr rãmb pis-tã bɩ pis-naas sɩngrẽ, tɩ Alkɩyaoom daarã yellã yaa yell sẽn yɩɩd bedlem dũni wã pʋgẽ, la a le yaa hakɩɩk sẽn yaa waagiba, la woto yaa wala sʋʋr kãnsa bilgri,

﴿ إِذَا الشَّمْسُ كُوِّرَتْ ﴾ “wĩntoogã sã n wa sobge”

﴿ يَا أَيُّهَا النَّاسُ اتَّقُوا رَبَّكُمْ إِنَّ زَلْزَلَةَ السَّاعَةِ شَيْءٌ عَظِيمٌ﴾  “yaa yãmba nebã, zoe y Soaba tɩ ad Alkɩyaom rigemsga yaa yel-bedre”

﴿ إِذَا زُلْزِلَتِ الأَرْضُ زِلْزَالَهَا﴾  “Tẽngã sã n wa rigims a rigimsgã”

﴿ إِذَا السَّمَاءُ انْفَطَرَتْ﴾  “Saagã sã n wa pãrge”

﴿ إِذَا السَّمَاءُ انْشَقَّتْ﴾    “Saagã sã n wa pãrge”

﴿ عَمَّ يَتَسَاءَلُونَ﴾  “Yaa bõe yell la b sẽn sʋkda”

﴿هَلْ أَتَاكَ حَدِيثُ الغَاشِيَةِ﴾ “Yalla nen-soabg daara kibar waa fo nengẽ bɩɩ”

La a vẽnegd daliil-damb toor-toor hakɩɩk-kãngã zug aaya a taaba pʋgẽ la a sekd ne-a.

Togs-m wԑ nin-sõngo! Yalla tõog le beeme, a sẽn wa n yaa neng ning fãa, n tõe n kɩt tɩ sɩd-kũuna ne Alkɩyaoom daarã yɩ ziri?! Daar ning sẽn yaa vẽeneg wala wĩntoogã, ne kaset-rãmb tusa sẽn be gafa pʋga, wala sẽn togs tɩ loogã, tɩ nug-tԑԑsg a yembr sẽn yi gafã aayar a yembr pʋgẽ yaool n gomd bãngr hakɩɩk-rãmb la naanegã hakɩɩk-rãmb sẽn ka tar tԑk lislaoongã bãngrã pʋg sẽn be tõnd neng-taoora.

Yalla woto ka na n yɩ wala ned sẽn tõdg tɩ wĩntoogã ka be­? Pa rẽ bɩ wala b sẽn na n yeel tɩ dũni wã ka be? Yalla woto ka na n yɩ yell sẽn ka tõe n yɩ, la ziri noor koabga?

Togs-m wԑ nin-sõngo! Yalla yaa bũmb sẽn tõe, a sẽn wa n yaa neng ning fãa, tɩ b yags naab sẽn tar waoor la zɩslem tԑk koees la a pʋlem-sõms la a pʋlem-wẽns tusa, tɩ sodaasã gill yaool n rãmbdame la b zabd wakat ninga, sẽn na yɩl tɩ naabã nug-tԑԑsg a yembr ra yɩ ziri? La yalla a koeesã la a pʋlemsã la a nug-sõogr tusa tõe n ka yɩ sɩda?

La Na-soalgdg kãnga sẽn yaa ziir soaba, sẽn soa yõyã la yamã la sũyã la yõ-vʋʋsds sõor sẽn ka-tԑka, sɩdã la hakɩɩkã pʋga, la a wub-b la a ders-b sԑkl[1] piig la a tãab pʋgẽ n tong-taaba, a nug-tԑԑsg a yembr sã n sekd hakɩɩk wala yãanda sɩdgre, bɩ f togs-m wԑ! yalla Na-kãnga sẽn vẽneg hakɩɩkã la a tabend-a ne koees tusa poora, yalla b ka segd n nams yalem sẽn yaa zɩt n ka mi hakɩɩk-kãngã ne Gԑhanem bugum? Yalla woto ka tẽeg-tɩrgã menga?

Rẽ poore, bãng tɩ saasẽ gaf-rãmba, la gaf-yɩlma, b sẽn tall-b n bʋ zãmaan-damb sẽn looga pʋga, la wakat-damb sẽn looga pʋga, sẽn zemsd ne a sasa wã la a zãmaanã, n lagem ne hakɩɩk-kãnga sakra ne sakr sẽn tar pãnga, ad gaf bãmba fãa sẽn vẽnegd Alkɩyaoom daara yella, bũmb ning Alkʋr’aana -sẽn lika n ne zãmaan sẽn wata la zãmaan-damba fãa gilla- sẽn vẽneg-a soab la a sɩdg-a ne  welsg la vẽnegr la yɩlemga, tõnd yetame tɩ b boolgã la b sɩdgrã ne hakɩɩk-kãnsã fãa ne sɩdgr sẽn tar pãnga, n lagem ne b vẽnegra koԑԑg-koԑԑga, n gom a yell mumd-mumd tɩ pa yɩ ne welsg wʋsga, sɩd-la-hakɩɩka a sɩdgda Alkʋr’aana boolgã ne nug-tigsg tusa.

[1] Sԑkl a yembr yaa yʋʋm koabga

La yel-kãngã yĩnga, b kẽesda zeng-raad a taabã kaseta ka yԑsa, sẽn tɩ yɩɩda b kẽesda “sɩd-kũunã ne tẽn-tʋʋmba la gaf-rãmba” zeng-raooga “sɩd-kũuna ne Laahr daara” zeng-raooga pʋgẽ, b sẽn togs-a soab “rɩsaalat Al-munaagԑԑta” baasgẽ wã, la sẽn le yaa daliil sẽn yi Alkɩyaoom daara daliil-damba pʋga, b sẽn gom-a soab yell ne yẽosga. A yaa bũmb sẽn tar pãng wʋsg n le yaa bilfu, la a yẽesda siksã gilli. B kẽes-a-la ka wala a sẽn yaa soaba.

Sɩd la hakɩɩka a yeela yẽosgã pʋgẽ:

Yaa fo m Soab sẽn yaa Yolsg-naaba, sɩd la hakɩɩka, mam fasma ne tẽn-tʋʋm wagellã wilgrã la Alkʋr’aana sẽn bʋ-n-manega kaorengã, tɩ gaf-yɩlmã la nabiyaam-damba fãa gill, sẽn sɩng ne tẽn-tʋʋm wagell a Mohammad sẽn ya b taoor soabã, yolsg la tɩlgr be a yĩnga,  la Alkʋr’aana, b fãa gill maanda kaset la b wilgdẽ la b teesd ne naag-taab la seg-taab tɩ Wẽnnaam yʋy-bԑdã la yʋy-neebã maana wã vẽnegrã, b sẽn ne-b rãmb bilgra vẽeneg-vẽeneg dũni kãnga ween-vɩɩsã fãa pʋga, na n kell n paa abada-bada, n vẽnegdẽ la a pɩnd n yɩɩd sẽn looge.

La b wilgdẽ tɩ fo maan-neerã b sẽn seet a vẽnegra la a bilgra sẽn pid ne yolsga dũni kãnga sẽn yaa satã pʋga, yaa bũmb sẽn na n pa n kẽng taoore, zu-noog zakã pʋgẽ, t’a neerem yɩɩd woto.

La b wilgdẽ tɩ ka-yã-to-kõn-gũsã rãmba, sẽn seet maan-neer kãnga ne wʋm-noog la b yãagd-a ne nonglem dũni koԑԑg kãngã vɩɩmã pʋga, b na n le yãag-a-la dũni sẽn ka saab pʋgẽ, b na n zĩnda ne-a me.

Rẽ poore, ad nabiyaam-dambã sẽn ya b yõy sẽn tar nuura rãmbã, sẽn sɩng ne a Mohammad sẽn ya b taoor-soabã, yolsg la tɩlgr be a yĩnga, la Fo Alkʋr’aana sẽn bʋ-n-manega,  sẽn tik-b yel-soalem-vẽenes kobsa, la aaya-rãmb sẽn tar pãnga, la ad nabiyaam-dambã sẽn ya-b sũy sẽn tar nuura rãmbã fãa gilli, la ad sɩdã rãmb fãa gill sẽn ya-b yam-bԑd rãmbã, la pʋtẽer sẽn wit n tar nuura rãmbã, bãmbã fãa gill noogda nebã sũur ne zu-noog sẽn duumdi, tɩ b yaa sẽn tik Fo pʋlem-sõnga la Fo pʋlem-wẽng ning Fo sẽn togsd n yɩlemd noor wʋsg saasẽ gaf-rãmbã la gaf-yɩlmã fãa pʋga.

La b tik Fo sɩf-rãmba la Fo zaatã sẽn ya yɩlengã sẽn wilgd tɩ Laahra beeme wã, wala tõogã la yolsgã la gũusgã la bʋʋda minmã la naama bedlmã la neermã. La b tik Fo naama la Fo pãnga la Fo sobenda zɩslma. La b tik b daliil-dambã la b kaset-rãmbã sẽn ka-tԑka, sẽn vẽneg Laahra tagemsã la a vũunã. La b tik b loԑԑgã la b sɩd-kũunã sẽn ta bãng-n-wãak la bãng-vẽeneg zĩiga. La b togsdẽ la b moond n wilgdẽ tɩ Gԑhanem bugum n be menemdbã yĩnga, tɩ Arzãn me be neb nins sẽn paam kãndgrã yĩnga. La b kõt-sɩd ne b yiiba belma ne sɩd-kũun sẽn tar pãnga, la b maand kaset sẽn tar pãng ne woto.

Yaa Foo Tõog-naaba, yaa Foo Bʋʋd-minim-naaba, yaa Foo dũni Yolsg-naaba, yaa Foo laahr Yolsg-naaba, yaa Foo Pʋlem-sɩd-naaba, yaa Foo Kõt-wagell-naaba, yaa Foo Modgr-naaba, sẽn yaa zẽkr la ziir la zɩslem soaba, ad Fo yaa naab sẽn yɩlg noor tus-kobse, la naab sẽn yɩlg la a zẽk ne yɩlgr la zẽkr sẽn ka sat sẽn ta daragԑ kãngã, n yi zɩlem-beed la yagsgo, Fo waliimbã sẽn yaa sɩd rãmbã nengẽ, la Fo pʋlengã pʋgẽ, la Fo sɩf-rãmbã la Fo zaatã pʋgẽ.

Fo yaa soab sẽn yɩlg n yi sobenda naama yԑlã sẽn yaa sɩda kɩɩsgo, la Fo yɩlgame n yi yel-kãnsa basbo. Fo yɩlg n yi doos sẽn ka tԑk sẽn togl n dat Laahra lebsg la b bas n ka kelge, doos nins Fo yembs nins sẽn paam-b sakr Fo nengẽ wã, la neb nins Fo sẽn nonga, tɩ b rãmba me maand b mensa nonglem Fo nengẽ ne sɩd-kũun ne Foog la Fo tũuba, sẽn ka-tԑka sẽn kota.

Fo yɩlg n yi menengã la kɩfendã rãmb sɩdgre, neb nins sẽn wẽngd Fo bedlma zɩslma, la b maand wẽng ne Fo zẽkra zɩslem, la b wẽngd Fo wẽnnaamdma zɩslem, la b namsd Fo sobenda nin-bãan-zoeera, la nin-kãnsa rãmb sẽn kell n be dũni yikrã kɩɩsga pʋga, ne b sẽn kɩfend la kɩɩsd Fooga, la b yagsd Fo pʋlengã.

Tõnd yɩlgda Fo tẽeg-tɩrgã la Fo neermã la Fo yolsgã sẽn ka-tԑka, ne yɩlgr sẽn ka-tԑka, n yi wẽgd sẽn ka tԑk wala woto, la yook sẽn ka tar tԑk wala woto. 

La d kõt-sɩd ne d pãnga fãa gilli, tɩ tẽn-tʋʋmbã sẽn yaa sɩd rãmbã, la nabiyaam-dambã la nin-yɩlmã la waliimbã tus-kobsa sẽn ka tar sõora, sẽn yaa boaandb n tʋgd sɩd-kũun ne Fo naama, ad b kasetã ne sɩd-bãng-n-wãak la minim-bãng-n-wãak la nenem-bãng-n-wãaka, Fo laahr yolsgã mangas-rãmbã zuga, la Fo maan-neerã sãnem-boayã zuga, kellg dũni wã pʋga, la Fo yʋya sẽn manega vẽnegrã sẽn be neer n yaa sõma wã zuga, yʋy nins sẽn vẽnegd zu-noogã zak pʋgẽ ne vẽnegr sẽn pida, yaa sɩd n yaa hakɩɩka, la b nug-teesesa me yaa sɩda, la yaa bũmb sẽn zemsde, la b sẽn noogd neba sũy ne bũmb ninga me yaa sɩd n yaa bũmb sẽn be.

La bãmba kõta sɩda, tɩ Wẽnnnaam yʋʋr sẽn boond tɩ Sɩd-naaba nug-tԑԑsg sẽn yɩɩd bedlem –yʋʋr ning sẽn yaa hakɩɩk-rãmbã fãa gill lԑbeng zĩiga la a wĩntooga la a gũuda- yaa dũni yik-kẽeng kãnga yellã, la b wilgd Fo yembsã yel-kãngã ne Fo sagella, sɩd pʋgẽ, la b wilgd-b yellã wala yella meng hakɩɩka.

فيا رب، ارزقنا وارزق طلاب رسائل النور الإيمان الأكمل، وحسن الخاتمة بحق وحرمة دروس وتعاليم أولئك، وارزقنا شفاعتهم، آمين.

(Yaa fo m soaba, kõ tõnd ne Rasaa’ɩlʋn Nuur karem-biisã sɩd-kũun sẽn yɩɩd ne pidbu, la baas-neere, ne nin-kãnsa rãmb koarengã la b wilgrã hakԑ la a lohorem, la F maan-d segl-sõng tɩ d paam b sugsgã, aamiina).

Wala daliil-damb nins fãa sẽn sɩdgd Alkʋr’aana sɩda, pa rẽ bɩ saasẽ gaf-rãmbã fãa gill sɩda, la yel-soalmã la daliil-vẽenes fãa gill nins sẽn sɩdgd Wẽnnaam noangã nabiyaamdmã, pa rẽ bɩ nabiyaam-dambã fãa gill nabiyaamdmã, sẽn le yaa daliil n wilgdẽ tɩ Laahra sẽn ya b zu-loe-kẽenga yaa sɩda, ad woto bala, daliil-damb wʋsg nins sẽn maand kaset ne belem-sẽn-yaa-waagiba-soab belmã la A yemblmã maanda kaset zĩ-kãnga ne zu-noogã zak la kellgã zak belem la a pakra, zags nins sẽn yaa Wẽnnaam sobendã zĩig sẽn yɩɩd ne bedlem la A wẽnnaamdmã vẽnegr zĩig sẽn yɩɩd ne bedlma.

Bal belem-sẽn-yaa-waagib-soaba zaatã belmã la a sɩf-rãmbã fãa gilli, wala d sẽn na n vẽneg la d sɩdg zĩis nins sẽn watã pʋgẽ wã, la A yʋyã wʋsga la b kõbg toor-toora la A yalɩ-rãmbã, wala sobendã la wẽnnaamdmã la yolsgã la gũudmã la bʋʋd-minmã la tẽeg-tɩrgã, yel-kãnsã fãa gill kɩtdame tɩ Laahra belem yaa tɩlԑ, la b kɩtdẽ tɩ dũni-ruumdg belem yaa tɩlԑ, la b kɩtdẽ tɩ dũni yikrã la tʋʋm-karas pʋɩɩb yaa darʋʋre, sõm-rolb la sɩbgr yĩnga.

Yaa sɩda, sẽn mik tɩ Wẽnnaam sẽn yaa na-kʋdgã beeme wã, ad sik ka tɩ Laahra sẽn ya A sobendã naam ruumg zĩiga me beeme ye.

La sẽn mik tɩ sobend sẽn ka tar tԑk n be n tar zɩslem la bʋʋd-minim la nin-bãan-zoeer tԑk-tԑk tɩ b seet dũni-kẽeng kãngã pʋgẽ la bõn-vɩɩsã pʋga, ad sik ka be tɩ zu-noog zak sẽn duumd n na n zĩnd n fãag sobend-kãngã zɩslmã n yi lʋɩɩs ye, la a tɩlg a bʋʋd-minma n yi reem ye, la a tɩlg a nin-bãan-zoeera n yi zãmb ye. Ad yaa be la kõomã zĩiga.

La sẽn mik tɩ neema-rãmbã la maan-neerã la lomsgã la kũunã la gũudmã la yolsgã kõbg toor-toora sẽn ka tar tԑka, b sẽn seet ne ninã, wilgda yam-soab la sũ-vɩɩg soab Rahmaan-naaba sẽn yaa Laahr Yolsg-naaba belma, yel-soaandɩ wã ludg poora, ad sik ka be tɩ vɩ-ruumdg n na n zĩnd dũni-ruumdg pʋgẽ n tɩlg neema wã n yi yaalg ye, la a tɩlg maan-neerã n yi belgre, la a tɩlg gũudmã n yi beem, la a tɩlg yolsgã n yi namsgo, la a tɩlg lomsgã la kũunã n yi yaalgo, la a kɩt tɩ maan-neerã yɩ maan-neere, tɩ neema wã yɩ neema.

La sẽn mik tɩ tõogã kaal-moogã sẽn gʋlsa gaf-rãmb tus-koabg sẽn kẽ-taab tɩ tudgr ka be a pʋgẽ tẽngã nen-la-sẽka zug sig-noorã sasa wã, tʋmda tõnd neng taoor tɩ yaams ka be wã. La sẽn mik tɩ kaal-moogã Soab rɩkda alkaool la a pʋlemd noor tus-koabg n yetẽ tɩ ad mam na n gʋlsa gaf sẽn be neer n duumd n kõ yãmb zĩig sẽn yalem pʋga, t’a gʋlsgã yolyol yɩɩd sig-noorã gafã sẽn gʋls ne yãgem-taab la kẽ-taab zĩ-sẽk-kãngã pʋga, la M na n karm-a-la yãmba, la a gomd gaf-kãngã yell A gaf-rãmbã fãa pʋga, sik la sãmbs ka be tɩ gaf-kãngã yẽgra zoe n gʋlsame ye, la b na n gʋlsa a welsgã la a maana-rãmbã ne dũni yikrã la tʋʋm-karasã pʋɩɩbo, la b na n gʋlsa nebã fãa gill tʋʋmã karas a pʋgẽ.

La sẽn mik tɩ tẽn-gõngã, bõn-naandsã waooglma a pʋgẽ wã, la a sẽn yaa zĩndg-zĩig ne vɩɩm damb la yõy rãmb kõbg toor-toor tus-kobs sẽn palemd wakat fãaga, la b yikr-zĩig la b naaneg zĩig la b vẽnegr zĩig la b tiging ziiga, la yẽ n le yaa dũni-kẽengã sũurã la a yẽgrã la a gilbã la a yõodã la a naanega sababa, ad woto yĩng n kɩt t’a yellã bedma. Hal ba ne a sẽn paooda, b rɩgl-a lame n togl saasã sẽn yaa bedra, tɩ b yet saasẽ gaf-rãmbã pʋgẽ wakat fãa tɩ

“Saasã la tẽngã soaba”  ﴿رَّبُّ السَّمَاوَاتِ وَالأَرْضِ﴾.

La sẽn mik tɩ ãdem-biig n be n bʋʋd tẽngã ween-vɩɩsã fãaga, bũmb ning sẽn be yalɩ kãnga zuga, la a tʋmd a bõn-naandsã wʋsg fãa pʋga, la a nomd bõn-vɩɩs wʋsg sẽn be a pʋga, la a kɩt tɩ b pʋgd-a wã, la a manegd bõn-naandsã wʋsg sẽn be a pʋga n kʋmdẽ wã, la a nagsd-b n wilgdẽ wã, sõmblem la neerem tԑk-tԑk pʋga, ne a yamleoogã la a tʋlsmã bãngra, la a tʋlsmã baoob nao-kẽnda wã, la a tigimd b bõn-kʋd sẽn tar ziir kõbg toor-toor sẽn ka wԑ n be zĩis sãnda pʋga, tɩ yaa wala a tigimd-b-la yʋy-sebr pʋgẽ la a nagsd-ba, a sẽn paamd yõod la ziir sẽn yaa bedr wʋsga, pa sẽn na n tak nebã la zĩn-damba gesga bal ye, ayo, ad yaa sẽn na tak saasẽ dambã la dũni-kẽeng kãngã rãmbã gesgã la b waoorã, la sẽn na tak dũni-kẽengã soab maan-neerã gesgã. A vẽnegda woto n wilgdẽ, ne a bãngra la tʋʋm-minma, t’a yaa dũni-kẽengã naanegã hɩkma, la a yõod kẽenga, la a tɩ-bila sẽn tar voalԑԑra. la a le wilgdẽ t’a yaa tẽngã ledsda. Tɩ rẽ yĩng tɩ b yaoond-a dũni wã pʋgẽ, la b yaoond a namsgã, ba ne a wẽn-kɩɩsgã la a kɩflmã fãa gilli. Bal dũni wã wԑԑngẽ, a tũnugdame la a vẽnegd dũni wã Naand bõn-naandsã ne vẽnegr la tũnugr sẽn be neere. La b yaoond-a-la a sõgen-kãngã yĩnga, tɩ rẽ sabab t’a paamd segl-sõngo.

La sẽn mik tɩ yel-kẽnesd sẽn yaa tõog la bʋʋd-minim la nin-bãan-zoeer sẽn ka-tԑk soaba n be wã, n naan tẽn-gõngã sẽn yaa bedra n kõ ãdem-biisã tɩ yɩɩd b pãnga la b yam-yãkra -la woto me la b yalɩ wã- la ba ne a sẽn yaa valeng n yaa koams wʋsga, a rog-ne wã la a naanega wԑԑngẽ wã, la a tar tʋlsem-damb la zablem-damb sẽn ka tar tԑk n lagem ne a komsmã la a talemdã... Mam yetame t’A maana tẽn-gõngã sẽn yaa bedra tɩ yaa wala loag kõbg toor-toor sẽn yaa darʋʋra mangas n kõ ninsaalã, la rɩɩbã kõbg buud fãa bĩngr zĩiga, la butik sẽn tigim teed kõbg toor-toor sẽn noom ninsaalã. N gũud ninsaalã buuga a woto, la a rɩlgd-b la a kõt-b bũmb ning b sẽn data.

La sẽn mik tɩ soab sẽn tar hakɩɩk kãnga n nong ninsaalã, la A maand A mengã nonglem ninsaalã nengẽ wã, la sẽn mik t’A yaa ruumd la A tar dũni-rãmb sẽn paada, la A maand bũmb buud fãa ne tẽeg-tɩrgã, la A tʋmd A tʋʋma fãa gill ne bʋʋd-minma.

La sẽn mik tɩ dũni kãngã vɩɩmã sẽn yaa koԑԑgã, la nebã yõya sẽn yaa koees wʋsga, la tẽn-gõng kãnga sẽn tar tԑk n yaa sata, ka yalem n sekd Naaba sẽn yaa kʋdga naama zɩslma, la a bʋʋd-minma ruumga. 

La sẽn mik tɩ wẽgdã la wẽn-kɩɩsgã sẽn yaa bedra nebã la zĩn-dambã sẽn maanda, la bũmb ning sẽn sãamd la a yõsgd ne dũni-kẽengã kʋmbgã la a tẽeg-tɩrgã la a geelgã la neermã sõmblmã, la ninsaalã sẽn yaand la a tõdgd la a kɩfend ne a neema wã soab ning sẽn dɩlgd-a ne nin-bãan-zoeera, sẽn mik tɩ woto fãa gill paadame tɩ namsg ka zĩnd dũni kãngã pʋga, tɩ wẽgdã sẽn yaa zãmb-soaba vɩɩmd a vɩɩmã vʋʋsem pʋga, tɩ b sẽn wẽg-a-soaba sẽn yaa miskɩɩna me vɩɩmd a vɩɩmã mosɩɩb-rãmb pʋga, tɩ tẽeg-tɩrgã sẽn ka tԑka menga, b sẽn ne-a soab vũun dũni-kẽengã fãa gill pʋga, yaa bũmb sẽn sãamd gill kԑpɩ ne wẽgdbã sẽn yaa zãmb rãmba la b sẽn wẽg-b rãmba sẽn ya b tẽeb-wãagd-ba sẽn zemsd taab kũumã pʋga, tɩ yikr a to ka le zĩnda, t’a ka tõe n maan-sugr n zã-a, la a ka kõt-a sor me wã.

La sẽn mik tɩ dũni-kẽeng kãngã soaba, wala a sẽn tũus tẽngã n yi dũni-kẽengã pʋga, la A tũus ninsaalã n yi tẽn-gõngã pʋga, n kõ-a yalsg-zĩig sẽn yaa zɩsga, la a rogl-a zu-loԑԑg sẽn yaa bedr wʋsga, ad woto bala, A tũusa nabiyaam-dambã la waliimbã la nin-yɩlmã, sẽn yaa sɩd rãmb ninbuiidã sʋka, la neb nins sẽn sakd A sobendã bõn-baoodsã, la b maand b mensã nonglem ne-A ne sɩd-kũunã la sak-n-tũ wã, t’a maan-b tɩ b ya A waliimb la A gomd-n-taase, la A waoog-b ne yel-soalem la segl-sõngo, la A namsd b bԑԑbã ne saasẽ pegse, la A tũus n yi A waliimbã sẽn yaa nin-zɩsd n ya b sẽn nong-b rãmba pʋgẽ, a Mohammad, yolsg la tɩlgr be a yĩnga, ned ning sẽn ya b taoor-soab la b pugda, la a tall a nuura wã –yolsg la tɩlgr be a yĩnga- n nuur tẽn-gõngã sẽn yaa yõod soaba pʋɩ-sʋk yʋʋm wook pʋgẽ, la a nuur ninsaalba sẽn yaa yõod rãmba pʋɩɩr a nu yebmre, bal bõn-baoodsã fãa vẽnegda ne-a, la ne a dĩina la a Alkʋr’aana, tɩ yaa wala b naana dũni-kẽengã a yĩnga, la sɩd la hakɩɩka b kõ-a-la yʋʋm sẽn yaa koԑԑga, musaks la tʋʋm tood pʋgẽ, n kord-a yʋʋm pis-yoob la a tãab pʋgẽ, la a yaool n ra segda ne keo-bedr sẽn ka tar tԑk reegr a sõgenegã zugu, ne alkadr sẽn ta yʋʋm minyõ-rãmba, zãmaan sẽn ka tԑk pʋgẽ.

Togs-m wԑ, yalla tõog bɩ mamsg be b sẽn tõe n mamse, a sẽn wa n yaa neng ning fãa, tɩ b ka na n yik tẽn-tʋʋm-kãngã –yolsg la tɩlgr be a yĩnga- n lagem ne a taabã la a zo-rãmba? La yalla tõog bɩ mamsg be b sẽn tõe n mamse, t’a ka ket n yaa vɩɩm soab la yõor soabã? La yalla tõog bɩ mamsg be b sẽn tõe n mams tɩ yẽ ne a taabã na n saa ne kaalem sẽn duumdi? Woto yaa bũmb sẽn ka tõe n yɩ noor tus-koabga, woto sɩd  yaa bũmb sẽn ka tõe n yɩ.

Yaa sɩda, ad dũni-kẽengã fãa gill la dũni wã hakɩɩkã rata dũni-yikra, la b rat tɩ dũni-kẽengã soab vʋʋg-a.

La sẽn mik tɩ masaal pis-tã la a tãab n sɩdg ne seg-taab sẽn tar pãnga –t’a yembr fãa tar pãng sẽn ta tãnga- « aaya-kẽengã » pʋga, sẽn be “Sʋ’aa’ a yopoe n soaba” pʋga, tɩ dũni-kẽeng kãngã yii nug a yembr pʋgẽ wã, n yaa soben-yԑng soolma, la a vẽneg Wẽnnaam wahda[1] wã la a Ahdɩya[2] wã sẽn yaa yԑl sẽn wilgd A sobenda pidba vẽeneg-vẽenega, tɩ ahdɩya wã la wahda wã yĩnga, yaa wala dũni-kẽengã fãa gill lebga soben-yԑng kãng pãnga la a tõoga, tɩ bõn-naandsã fãa gill lebg soben-yԑng kãngã sodaas sẽn tʋmd A saglsa, la tʋʋm-tʋmdb sẽn yaa sak-n-tũ rãmb ne-A, la b sɩdg n wilg tɩ Laahra belem yĩng na n kɩtame tɩ Wẽnnaam naama pidb tɩlg n yi lʋɩɩse, t’A tẽeg-tɩrgã sẽn ka-tԑka tɩlg n yi wẽgdã sẽn ka-tԑk yaalgo, t’A bʋʋd-minmã tɩlg n yi yaarã yalemdo, t’A yols-yaolengã tɩlg n yi reemã namsgã pʋgẽ, t’A tõogã tɩlg n yi komsem yaalgo, tɩ b fãa gill paam tɩlgre. Sik la sãmbs ka be tɩ yaa tɩlԑ tɩ dũni yik ye, ne yԑl nins b sẽn togs « sẽn mika » a nii wã sẽn looga pʋga, sẽn yi sɩd-kũunã masaal-zulums kobs pʋga. La sik la sãmbs ka be tɩ dũni yikrã la tʋʋm-karasã pʋɩɩb na n yɩɩme ye. La sik la sãmbs ka be tɩ b na n paka zak sɩbgrã la sõm-rolbã yĩng ye. Hal tɩ tẽngã yõodã la tẽng-n-sʋglma, la ninsaalã yõoda la a ziirã b sẽn togsa paam pidsgu, tɩ yel-kẽnesda, sẽn yaa Bʋʋd-minim-naab n yaa tẽn-gõngã la ninsaalã naand la b soaba tẽeg-tɩrgã la A bʋʋd-minmã la A yolsgã la A naamã b sẽn da togsa paam tabendgo. Tɩ yãmb soab-kãngã sẽn yaa Kellg-naaba waliimbã sẽn tar-b nonglem wʋsg ne-A wã, b sẽn gom-b rãmb yell tɩ b yaa sɩd rãmba me tɩlg n yi kaalem sẽn duumdi. Tɩ waliimb kãnsã sẽn yɩɩda ne zɩslem la yõoda me paam a sõgen-yɩlenga sẽn yard dũni-kẽengã gillã sõm-rolbo, la a maan-a t’a yaa bark-pʋʋsd la sõm-mita, tɩ naaba sẽn yaa ruumdã pidbã paam tɩlgre, la A zãag n yi boogr la koeegre, t’a tõogã me tɩlg n yi komsgo, t’a bʋʋda minim tɩlg n yi yalemdo, t’a tẽeg-tɩrgã me tɩlg n yi wẽgdo.

[1] Yaa Wẽnnaam tõog sẽn be bõn-naandsã zug n wilgd tɩ naanda ya a yembre.

[2] Yaa Wẽnnaam tõog sẽn be yembr fãa zug tɩ ka wẽnd a to ye.

Goamã kõogre: Sẽn mik tɩ Wẽnnaam beeme wã, sik ka be tɩ Laahra me beeme ye.

La wala sɩd-kũunã zeng-raadã a tãabã b sẽn togsa sẽn maand kaset ne dũni yikrã, ad woto bala, ad sɩd-kũunã zeng-raad a yiib nins sẽn yaa “sɩd-kũunã ne a malԑksa la a kordga, a sõng la a wẽng fãa yii wẽnnaam nengẽ” wã kɩtdame tɩ dũni yikrã yaa tɩlԑ, la b maand kaset la b ya daliil-kԑgeng sẽn wilgd dũni-ruumdg belem wala sẽn wata:

Ad daliil-dambã la kaset-dambã la goamã fãa gill sẽn ka tar tԑka sẽn sɩdgd malԑksã belmã la b tũudmã tʋʋma, yaa daliil sẽn le wilgd yõy-dũni la dũni-soalgdg la kellg-dũni la Laahr-dũni la zu-noog zak la Arzãnã la bugmã belem, nebã la zĩn-dambã sẽn na n wa zĩnd b rãmb pʋga. Bal malԑksã tõe n yãnda dũni-kãnsã ne Wẽnnaam yarda, la b kẽed a pʋgẽ. La malԑksã fãa sẽn yaa wẽn-pẽtbã, sẽn segdb nebã, wala Gibriil, tɩlgr be a yĩnga, b fãa gill kõta kibar ne dũni-rãmb nins b sẽn togsa belem, tɩ la bãmb gilgda dũni-kãns pʋgẽ. La wala tõnd sẽn mi vẽeneg tɩ Amerik tẽngã beeme la d yaool n nan ka yãnd-a wã, tɩ yaa sẽn yitb beenẽ wã n wa n togsa, ad woto bala, yaa tɩlԑ tɩ d kõ-sɩda –ne sɩd-kãnga buudu- ne kellg zakã la Laahra zakã la Arzãna la Bugmã belmã, ne malԑksã sẽn kõ kibay nins t’a sɩda pãng ta tawaatʋr[1] koabg pãnga, la yaa woto me la tõnd me kõt-sɩda.

Rẽ poore, ad daliil-rãmb nins fãa sẽn sɩdgd “sɩd-kũunã ne kordgã” zeng-raoogã, sẽn be “kordgã masaallã” pʋga, sẽn yaa “gomd pisi la a yoob n soaba” yaa daliil sẽn wilgd dũni wã yikr la tʋʋm-karasã pʋɩɩb la tʋʋmã geelgo, geel-kẽengã zĩigẽ. Bala, bũmb buud fãa yԑla loeesa la a gʋlsga tõnd neng taoora, tũnugrã la geelgã walg pʋga, la bũmb buud fãa sẽn maan bõn-vɩɩg buud fãa vɩɩmã pʋga b sẽn gʋlsd n bĩngd b pʋtẽyã la b yamrã pʋga, la wals a taab sẽn wẽnd-b rẽ wã fãa pʋga, la b sẽn gʋlsd bõn-vɩɩg buud fãa tʋʋma –sẽn tɩ yɩɩda ninsaalã- la b sẽn bĩng-b Laohʋl Mahfʋʋz walgã pʋga, sik ka be tɩ kordg sẽn gũbg wala woto, la kordg sẽn bʋ n maneg la sẽn loe sõma, la gʋlsem b sẽn gũusi, woto fãa gill ka tõe n yɩ rɩllame tɩ yaa sõm-rolb yĩnga, la rolb sẽn duumd yĩnga, bʋʋda kaoob sẽn gũbga bʋ-kaod-ro-kẽengã pʋga poore. Sã n ka rẽ, loe-kãnsa sẽn yaa sõma n yaa sẽn gũbga, la gũusg kãnga na n paa woto n ka tall maana la yõod ye. a na n yɩɩ bũmb sẽn sãamd bʋʋd-minmã la hakɩɩkã gilli. Dũni yikrã sã n ka yɩ, naanegã gafã maana-rãmba fãa gill na n sãamame, b sẽn gʋls-a soab ne kordgã kaal-moogã. Dũni yikrã vaalg yaa bũmb sẽn ka tõe n yɩ, a sẽn wa n yaa neng ning fãa.

[1] Yaa zãma ka tԑk sẽn na n wa ne kibar tɩ yõs-taab ka be a pʋgẽ.

La tẽeb kãnga yaa bũmb sẽn ka tõe n yɩ, a pʋs n yaa zʋbsgo, wala ned sẽn tõdgd naaneg kãnga belmã.

Goamã kõogre: Ad sɩd-kũunã zeng-raad a nu wã ne b daliil-dambã fãa gill wilgda dũni-yikrã la tʋʋm-karasã pʋɩɩbã belma, la b woaanga, la Laahra zaka belem la a pakra, la b rat-ba, la b maand kaset b zug la b baood-ba.

La sẽn mik tɩ dũni-yikrã hakɩɩkã tara daliil-kegems kãnsã la daliil-vẽenes kãnsã sẽn tar pãng n ka vigsdẽ wã, la sẽn zemsd sõma ne dũni-yikrã zɩslma, ad Alkʋr’aana sẽn yaa yel-soalem-vẽeneg soaba pʋɩɩr a tãab yembr gomda dũni-yikrã la Laahra yelle, n kɩt tɩ b yiib lebg a hakɩɩk-rãmba yẽgr la a kug-yẽbgdgã, tɩ b met bũmb fãa gill b zugu.

(Sɩd la hakɩɩka tɩʋʋsgã paama saab kaanẽ)