Yel-bedr b sẽn leems maam kuidga raar yʋngo “ Zĩiga yiib n soaba” pʋgdg sẽn be “Gomd piig la a tãab n soaba” pʋgẽ

Yel-bedr b sẽn leems maam kuidgã raar yʋngo

“Makaam a yiib n soabã” pʋgdg sẽn be “Gomd piig la a tãab n soaba”pʋgẽ

D na n kõo vẽenem bilf sẽn kẽed ne hakɩɩk-bedr sẽn wa mam yamẽ wã kuidga daar yʋngo. La yellã yaa wala sẽn wata:

Ad dũni gill zab-yaooga wẽgdã la a nin-kʋʋrã la a sãangã sẽn ka tar yolsga, la a sẽn tʋm wẽng la a nams neb kobs sẽn ka beega, ne bԑ a yembr sababa, sẽn wa ne sũ-sãang ninga, la b sẽn wil neb ninsa tẽ-wãagrã sẽn wa ne sũ-sãang ninga, la windba me yԑԑsga la b pelen-yɩka, ne b sẽn ka tõog n kogl b naama la b pãngã, la b le ka tõog n maneg sãang-kẽenga sẽn paam-ba sẽn wa ne sũ-sãang ninga  sabab yĩnga,

La b sẽn vẽneg n wilg nebã gill tɩ dũni vɩɩma yaa koԑԑg n na n sa zãnga, la b sẽn le vẽneg n wilg tɩ rũnda zãmaana belg-m-men-nin-pukrã yaa ziri n yaa gũsgda sabab yĩnga,

La yalɩ pãn-kẽengã la nedengã hakɩɩka sẽn paam sãmpog-kԑgeng sẽn gũbga sabab yinga,

La Alkʋr’aana sãnem-pԑԑlg sʋʋga sẽn ke yam-yaal-yaalã la mẽnenga la natiir-wʋngã n pasa sabab yĩnga,

La polentikã nen-yookã sẽn yaa wẽgdã, sẽn yɩɩda ne wẽng la zãmba, la sẽn yɩɩda ne yam-yaal-yaal la meneng tẽnga nen-laagã zuga vẽnegra sabab yĩnga,

La dũni wã vɩɩm ning nebã sẽn maand bels-bels-nonglem[1] ne-a soaba sẽn yaa yook n yaa sat la loaagda sabab yĩnga,

[1] Nonglma yaa neng a yiibu 1- yaa nonglem sɩd-sɩda, nonglem sẽn ka sate, yẽ me la Wẽnnaam la a tẽn-tʋʋm nonglma 2- yaa nonglem-sulunsuku, nonglem sẽn sate, yẽ yaa nonglem maaneg ne bõn-naadg zẽng sẽn ka Wẽnnaam ne a tẽn-tʋʋma, bal nonglem kãnga na n saa ne bõn-naandg kãng kũum.

Mam yetame tɩ sik la sãmbs ka be –ne tagems nins sẽn vẽneg dũni wã goabg la a wĩndg sẽn lʋɩtẽ boabg la Namerk pʋga yĩnga- tɩ nin-buiidã na n nidga pãng b tõog tԑk n bao vɩ-ruumdgã ye, vɩɩm ning b sẽn nong ne nonglem hakɩɩka, la b baod-a ne b rog-ne-yamã[1]

Sik la sãmbs ka be me tɩ Alkʋr’aana sẽn yaa yel-soalem-vẽeneg soaba, gaf ning sẽn tara karem-biis minyõ kobs-tã la pis-nu wakat fãa pʋgẽ, sẽn ta yʋʋm tusr la kobs-tã la pis-yooba. La gaf ning sẽn ning a nug-tikr a bʋʋd fãa la yell fãa zuga, ne hakɩɩk bãngdb minyõ-rãmb sẽn sɩdga. Yẽ me la gaf ning b sẽn tõogd wakat fãa n gũusd-a ne yɩlgr sũy miniyõ rãmb pʋga, la b karemd-a nebã b zɩlma zugu. La gaf ning sẽn noogd nebã sũy ne vɩɩm la zu-noog sẽn kelld n duumdẽ, ne nao-kẽndr sẽn ka be gaf a to pʋga, la a tɩbsd b sãmpoagã. Mam yetame tɩ: Sik ka be tɩ d sã n ges Alkʋr’aana sẽn yaa yel-soalem-vẽeneg soaba koe-moonega la a kibaya, ne aaya tusa sẽn yi a aaya-rãmba pʋg sẽn tar pãng n ya kԑgemsã sẽn yɩlemda, pa rẽ bɩ ne a kibay tus piig-piigã sẽn yɩlemd vẽeneg-vẽeneg la nug-tԑԑsga, la a sẽn noogd sũya ne vɩɩm sẽn kellda, la a sẽn leemsd zu-noog sẽn duumdã, ne daliil-rãmb ka-tԑk sẽn tar pãng tɩ yõs-taab la sãmbs ka be a pʋgẽ wã, tɩ nebã sã n nan ka kong b yama gilli, tɩ pãn-vẽenega la pãn-soalgdgã me nan ka sa b zugu- sik ka be tɩ tẽn-bԑda sẽn be tẽn-gõngã zuga, la b goosneem-bԑda fãa gill na n baoo ne vẽenem la b gẽes Alkʋr’aana sẽn yaa yel-soalem-vẽeneg soaba ye. Wala b koe-rɩkdbã, b sẽn mi-b rãmba, sẽn be Sʋԑԑd la Norweeg la Finlanda la Angletԑԑr pʋgẽ sẽn mamsd n na n sak Alkʋr’aana, la wala Amerk sull-kẽengã sẽn gẽesd dĩin-sɩda, la b sã n  fasem a hakɩɩk-rãmba, b na gãd-a ne b yõya la b sũya fãa gilli. Bala a ka tar bilg-n-taar wԑԑng fãa pʋgẽ ye, sã n ya ne sẽn be yel-kãnga b sẽn togsa pʋgẽ, la a pʋs n ka tõe n tall bilg-n-taar ye, la bũmb me ka tõe n dɩk a yel-solem-kẽeng kãnga zĩig ye.

[1] Yaa yam-yɩleng ning ninsaalã sẽn dog-ne wã.

Yiib n soaba: Sẽn mik tɩ Rasaa’ɩlʋn Nuurã  vẽnega a daawa wã tʋʋmã wala sãnem-pԑԑlg sʋʋga sẽn be yel-solem-kẽeng[1] kãnga nuga pʋga, la a modg a bԑԑbã sẽn tɩ yɩɩd ne tõdgra tɩ b sak n kõ b mensa. La sẽn mik tɩ Rasaa’ɩlʋn Nuurã yasa a nao-bogd zug n boond nebã n tʋgd Alkʋr’aana sãnem-boyã pʋga, ne no-kẽndr sẽn nuurd sũurã la yõorã la yĩn-wʋmdsã[2] ne nuura sẽn pida, la a kõt a yembr fãa tɩɩm sẽn zemsd ne a yĩnga. La a sẽn yaa gaf sẽn pa tar yẽgr la lԑbeng zĩig a to zẽng sẽn pa Alkʋr’aan wagellã, n le yaa bũmb ning sẽn yaa Alkʋr’aana yel-solemd sẽn solga, n yalsd ne tʋʋm kãnga ne yals-sõnga. la a le wil zɩlem-beed sẽn tar rabeem sẽn teegd ne-a wã, la munaafɩgsã sẽn ya b tõtb sẽn yɩɩd ne tõdgrã, ne wilb tԑk-tԑka. La a bõgs natiirã’[3] sẽn yaa menengã tãng sẽn yɩɩd ne pãng la keglem ne “natiirã masaallã”. La a yẽes yam-yaal-yaalã sẽn be ween-vɩʋʋgã zĩ-yalemsã la zĩ-sẽgsã pʋga, la bãng-yaooga bog-yalemsã pʋga, ne masaall a yoob n soaba, sẽn be Tɩ-bil masaalla pʋgẽ sẽn be gaf ning sẽn boond tɩ  “ Musa rasaara” pʋga, la ne a pipi daliila, la yiib n soaba la tãab n soaba la nii n soaba, sẽn wels la a vẽneg wẽn-yembgã nuura wã. Sik ka be tɩ yaa tɩlԑ ne tõnd Rasaa’ɩlʋn Nuura karam-biisã –sẽn tɩ yɩɩda lislaamba zãma wã- tɩ d pags nuura karen-do-bõones zĩisa fãa pʋgẽ ye, goosneema wã sẽn kõ sor yĩng tɩ d pags karen-dot zall dĩina koareng yĩnga.

La hakɩɩk pʋgẽ, ad ned buud fãa tõe n nafa ne Rasaa’ɩlʋn Nuurã a tore. La ka ned buud fãa n tõe n fasem masaal buud fãag a pʋgẽ, faseng sẽn pid ye. La a sẽn yaa bũmb sẽn vẽnegd liimaoongã hakɩɩk-rãmb yĩnga, ad-a yaa bãngr la wẽnnaam minim, la ne wakat kãng bala, a le yaa wẽnnaam yell tagsg la a tũudum.

Karem-bok-kʋdã[4] ra yɩɩme n kõt kaoren-kãnsa la bãng-kãnsa la hakɩɩk-kãnsa yʋʋm a nu bi piig pʋgẽ, la Rasaa’ɩlʋn nuura karen-dotã na n paam-a-la semend a nu bɩ piig pʋgẽ tɩ wẽnnaam sã n sake. A pʋs n paamd-a-la yʋʋm pisi sẽn loog pʋgẽ.

Rẽ poore, bãng tɩ yaa tɩlԑ ne goosneema wã t’a yik ne tʋʋlem n moon la a sẽeg Rasaa’ɩlʋn Nuura sẽn yaa Alkʋr’aana nuura wã, la gaf sẽn boond n tʋgd Alkʋr’aana pʋga, la a ra wa saag n sɩɩs-a ne wẽng ye, sẽn na yɩl tɩ yɩ zunuub-yaafg ne a zunuumb-rãmb nins a sẽn tʋma. Sẽn paasde, sẽn na yɩl tɩ Rasaa’ɩlʋn Nuurã  yɩ lalg sẽn gɩdgde, ballaog-rãmbã sẽn sigda la tãn-soben-soodsã[5] taoore.

Sa’iid An-Nursi

[1] Yaa Alkʋr’aana.

[2]Yaa yĩnga teed nins a sẽn tar n bãngd bũmb ning sẽn maand a kɩrenga bãmb me la woto: yãabo, wʋmbo, yõbsgo, lembgo, la sɩɩsgo. La teed a taab me n be n yaa yĩn-wʋmds sẽn solge, tɩ ka bãmba ye, wala rabeem maaneg ne beog yell tagsgo.

[3] Yaa pãn-soalgdg ning filozofɩ bãngdba sẽn yet tɩ yẽ n naan bũmb bõn-naandsã.

[4]   Yaa Turki karem-bogdo, lislaoonga pãng sẽn wa n be beenẽ wã wakato.

[5] La a yõsga ne rũnda tãn-soben-soodsa sẽn yaa soaba, bal rũnda wã b rɩk-a lame n sãamd lislaoongã yʋʋre.