Liimaoong daliil piig soaba

Maktʋʋb pisi wã rẽenem makaama

Liimaoongã daliil piig n soaba

Sẽn be “Musa rasaara” pʋgẽ (tɩlgr be a yĩnga)

بسم الله الرحمن الرحيم

لاَ إِلَهَ إِلاَّ اللهُ وَحْدَهُ لاَ شَرِيكَ لَهُ لَهُ المُلْكُ وَلَهُ الحَمْدُ يُحْيِي وَيُمِيتُ وَهُوَ حَيٌّ لاَ يَمُوتُ بِيَدِهِ الخَيْرُ وَهُوَ عَلَى كُلِّ شَيْءٍ قَدِيرٌ وَإِلَيْهِ المَصِيرُ

(Soab ka be rɩlla Wẽnnaam, A ya a yembre, lagem-n-taar ka be ne-A ye, naam yaa Wẽnde, la pẽgrã bee ne Wẽnde, Wẽnnaam n vɩɩmsde, la A kʋʋda, la Wẽnnaam la Vɩɩm-naaba, A ka kiid ye, sõngã be A nugẽ, A yaa Tõog-naab bũmb fãa gill zugu, la Yẽ nengẽ la bũmb fãa gill lԑbeng-zĩiga)

Ad wẽn-yembgã gomdã b sẽn yɩlemd Fagirã la magribã pʋʋsgã poor wakat fãaga tara yõod wʋsgo, la a zãada Wẽnnaam yʋ-zɩsga daragԑ wala sẽn wa toagsg sẽn maneg pʋga. La gom-biis piig la a yembr n be a pʋgẽ, la a gom-bil a yembr fãa tara sũ-noogr-koԑԑg la sobendã yembg daragԑ. A le gomda Yemblem-naabã waoorã la A pidbã yelle, ne Wẽnnaam yʋ-zɩsga sẽn be a pʋgẽ wã.

La d sẽn da rɩk pʋlengã yĩnga, d na n dɩgla buk-koԑԑg sẽn tar zĩis a yiib la tɩʋʋsgo, la d bas a hakɩɩk-bԑdã vẽnegra n kõ “Rasaa’ɩlʋn Nuura” masaala a taabã:

TƖƲƲSGÃ:

Yaa foo ninsaala, bãng vẽeneg tɩ naanegã bõn-baoodg sẽn yɩɩd ne bedlem, la rog-ne-yamã yõod sẽn yɩɩd ne bedlem, yaa sɩd-kũuna ne Wẽnnaama.

La nedengã ziir sẽn tɩ yɩɩd ne daragԑ, la ninbuiidã ziir sẽn yɩɩd ne zɩslem, yaa Wẽnnaama minmã sẽn be sɩd-kũuna ne Wẽnnaama pʋga.

La ad zu-noog sẽn yɩɩd ne bedlem la neema sẽn yɩɩd ne noosem ne nebã la zĩn-dambã, yaa Wẽnnaama nonglmã sẽn solg n be Wẽnnaama minmã pʋga.

La ad sũ-noog sẽn yɩɩd ne yɩleng ne ninsaal yõorã, la sũ-noog sẽn yɩɩd ne yɩleng ne ninsaal sũurã, yaa yõyã wʋm-noog ning sẽn be Wẽnnaam nonglmã pʋga.

Yaa sɩda, ad sɩd-sɩd zu-noogã fãa gilli, la sũ-no-yɩlengã, la neemã sẽn nooma, la wʋm-no-yɩlenga, ad sik ka be tɩ yaa Wẽnnaam minmã la Wẽnnaam nonglmã pʋgẽ bal tãa la a be ye. La zu-noog la sũ-noog la neema la wʋm-noog ka tõe n paam tɩ Wẽnnaam minmã la A nonglmã sã n ka be ye. Ad ned ning sẽn mi Wẽnnaam la a nong-A, a paamda zu-noog la sũ-noog la nuura la yel-soaandɩ sẽn ka-tԑka, ĩmmaa tɩ yɩ ne pãnga pa rẽ bɩ tʋʋma, la ned ning sẽn ka mi Wẽnnaam minim sɩd-sɩda, la a ka nong-A nonglem hakɩɩka, zu-beed la zablem la yɩɩr sẽn solg la sẽn vẽneg sẽn ka tԑk n na n paam-a.

Yaa sɩda, ned sẽn yaa valeng n yaa miskɩɩn n ka tar soab la gũuda, ba t’a sã n lebg dũni wã fãa gill naaba, yaa bõe la a zem dũni-kãnga pʋg sẽn yaa yaams zĩiga, la nin-kãnsã mosɩɩb la yɩɩr sẽn paam-b rãmba sʋka, vɩɩm sẽn ka tar yõod pʋga?

La yaa woto la nebã fãa gill fasemda, tɩ ninsaalã ka tõe n ka yɩ tal-bengr la nin-yaalg dũni kãnga sẽn yaa yaams-zĩig la sata pʋgẽ, la ninbuiidã kõbg toor-toora sẽn rԑԑd yaara pʋga, t’a sã n ka bãng a Soaba la a ka paam Soaada ye.

La a sã n paam a Soaba la a bãng a Soaada, wakat kãnga a na n lebsa a menga a yolsga pʋgẽ, la a bobl a meng ne A tõoga, tɩ dũni kãnga sẽn tar rabeema lebg vʋʋsem zĩiga, la a tolb zĩiga.

Pipi makaama:

Ad wẽn-yembgã gom-biis piig la a yembrã yembr fãa tara sũ-noogr-koԑԑga, la tɩp-tɩɩm n be sũ-noogrã koԑԑgã pʋgẽ, la wʋm-noog sẽn solg me n be tɩp-tɩɩmã pʋgẽ.

Pipi gom-bilã: Ad sũ-noogr-koԑԑg n be “Soab ka be rɩlla Wẽnnaam” (لا إله إلا الله) wã  pʋgẽ wala sẽn wata:

Ad ninsaalã yõora sẽn tar tʋlsem sẽn ka-tԑka, tɩ bԑԑb sẽn ka tar sõor dat n pig-a wã, a paamda tikr zĩig gom-bil kãnga pʋgẽ, tɩ b pakd rignoy sẽn tʋgd yolsg sãnem-boy pʋgẽ a yĩnga, t’a paamd a tʋlsmã fãa gilli, la a le paamd tikr zĩig gom-bi-kãngã pʋgẽ, sẽn wilgd-a a Naandã la a Soab ning sẽn sõmb ne tũubã, sẽn yaa tõog sẽn ka tar tԑka soaba, Soab ning sẽn gũud-a n yi a bԑԑbã fãa gill wẽnga, la a togend-a a Soaba, la a wilgd-a a Soaba sẽn yaa to-to. Wilg-kãngã tɩlgda sũurã n yi rabeem sẽn ka-tԑka, la a tɩlgd yõorã n yi sũ-sãang sẽn zabde, la a pʋlemd-a kɩdeng la sũ-noog sẽn duumdi.

Gom-bil a yiib n soaba: “وحده” (A yaa yembre). Sũ-noogr sẽn pid ne tɩbsg la zu-noog n be gom-bi-kãngã pʋgẽ, la rẽ yaa tɩ ninsaal yõorã la a sũurã, sẽn tar tõkr sõma ne bõn-naandsã kõbg toor-toor sẽn yaa wʋsga, la yõorã la sũur nins tõkra ne bõn-naandsã sabab sẽn kɩt tɩ b tar keelmã la yam-yuus-yuusã pʋgẽ bõrba, b paamda lԑbeng zĩig la wũundg zĩig gom-bi-kãngã pʋgẽ (wahdahuu), sẽn na n tɩlg-b n yi keelmã la yam-yuus-yuusã pʋgẽ.

 Rat yeele tɩ (wahdahuu) wã yeta yam pʋgẽ tɩ: Ad Wẽnnaam ya a yembre, ra wa yaams f meng soaben-damb a taab gẽesg pʋgẽ ye. La f ra kõ bũmb ba a yembr soolem fo zug ne yaalem-m-meng maaneg b nengẽ ye. La f ra sik f menga, la f ra zõneg f zug b nonglem la b yard baoob yĩng ye. La f ra yaams f menga ne zoe-n-pʋg-b ye, la f ra yԑԑs-b ye. Bal dũni-kẽengã Naaba ya a yembre. A le tara bũmb fãa gill kʋlen-biisi, la yell fãa gill salbr be A nugẽ. Yaa ne A saglgã la bũmb fãa gill paamd pidbu, la b welgd yell buud fãaga. Fo sã n paam-A f paama bõn-baoodɩ wã fãa gilli, la f tɩlg n yi tãasg la yԑԑsg sẽn ka-tԑka.

Gom-bil a tãab n soaba: “لا شريك له” (A ka tar lagem-n-taag ye) a moore: Wala sẽn mik t’a ka tar lagem-n-taag A wẽnnaamdmã la A naamã pʋga, la A sẽn ya A yembr t’a sõora ka tõe n paasa, ad woto bala, lagem-n-taag ka be ne-A A sobendã la A tʋʋmã la A naanegã pʋgẽ ye.

La sasa ninga, naab tõeme n ya a yembr n ka tar lagem-n-taag a naama pʋgẽ ye, la a tara tʋʋm-tʋmdb tɩ yaa lagem-n-taas a tʋʋmã pʋgẽ, la b ka kõt nebã fãa gill sor tɩ b kẽ a nengẽ ye, ayo b yet-b lame, wa-y n yã-y tõnd bala.

La Sɩd-naaba, A naam yɩ wagell n zẽke, sẽn yaa Na-kʋdgã la Na-ruumdgã, wala A sẽn ka tar lagem-n-taag A naamã pʋga, ad woto bala, A ka tar tʋlsem ne sõngdb ye, A ka tar tʋlsem ne lagem-n-taas me A sobendã tʋʋm pʋgẽ ye. Bũmb ba a yembr me ka tõe n kẽes a nug bũmbr pʋgẽ tɩ ka yɩ ne A saglg la A raab la A tõog la A pãng ye. La bũmb fãa gill me tõe n goma ne-A a tore. La b ka yet ned ning sẽn dat n gom ne-A wã tɩ: “gɩdgame! fo ka tõe n kẽ a nengẽ ye”, bala A ka tar lagem-n-taaga, a ka tar sõngda.

La woto bala, ad gom-bi-kãngã kõta ninsaal yõorã sũ-noog n yetẽ: Ad ninsaal yõora, sẽn paama liimaoongã tõe n kẽe Neerem-naaba sẽn yaa wagella nengẽ, la Tõog-naaba sẽn yaa pidb soaba, sẽn yaa Na-kʋdgã la Na-ruumdgã nengẽ, la yolsgã kʋlen-biisa soaada, la zu-noogã sãnem-boyã soaba nengẽ, tɩ pa yɩ ne ned sõngr la gɩdr la gɩdg-taab ye. A tõe n kẽ A nengẽ a alhaal-rãmba fãa gill pʋgẽ, la a tʋlsma fãa gill wakato, la wakat buud fãa pʋgẽ, la a sẽn be zĩig ning fãa pʋgẽ, la a tõe n vẽnega a yԑla fãa gill n wilg-A, la a tõeme n le paam kɩdeng la sũ-noog sẽn pidi, ne a sẽn na n kẽ A yolsgã pʋga, la a sẽn na n bobl a meng ne A tõoga.

Gam-bil a naas n soaba: “له الملك” (Naamã bee ne Yẽ). A moore: Ad naamã fãa gill yaa yẽ n so, fo menga me ya A soolem la A bõn-soaadga, la fo le tʋmda a soolem pʋgẽ. La gom-bi-kãngã me kõta sũ-noog sẽn tar tɩbsg n yetẽ:

Yaa foo ninsaala, ra wa saag n tẽ tɩ fo menga yaa fo soolem ye, bal fo ka tõe n kẽnes f menga yԑl f toor ye. Ad fo ka tõe zɩ-kẽeng kãngã f yembr ye, la f le ka tõe n zoe n zãag mosɩɩb-rãmbã la balloag-rãmbã ye, fo le ka tõe n paam f tʋlsmã me ye. Sã n yaa woto, bɩ f ra bao naong la zablem n kõ f menga zaalem ye. Ad naamã yaa naab sẽn ka foog n so, la Yẽ la Naaba sẽn yaa Tõog-naaba la Yolsg-naaba. Bɩ f bobl f meng ne A tõoga la f ra rõd A yolsgã ye. La f bas yɩɩrã la f maan-wʋm-noog la f noog f sũuri, la f bas yaamsã la naongã, la f reeg zu-noog la sũ-noogo.

La a yetẽ: Ad dũni-kẽeng kãngã fo sẽn nong la f maand-tõkr ne-a ne solgra, t’a zu-beedã la a wẽngã namsd fooga, tɩ fo yaool n ka tõe n maneg-a wã, yaa Tõog-naaba la Yolsg-naab soolem, bɩ f dɩk naamã n kõ a Soaada, la f bobl f menga ne-A, la f ra rɩk a yaamsã la a zu-beedã n rogl f meng ye. Maan wʋm-noog ne a yel-sõmsã la a yel-noodã, tɩ ad Yẽ (Wẽnnaam) yaa Bʋʋd-minim-naab la Yolsg-naaba, n tʋmd A naama pʋgẽ la A kẽnesd-a wala A sẽn date. Yԑԑsg sã n paam-f bɩ f yeel wala a ɩbraahɩɩm Hakɩ sẽn yeela: “D ges bũmb ning Lallg-naaba sẽn korda la A sẽn maanda, ad A sẽn kord bũmb ning n yɩɩd ne sõmblem la neere”.

Bɩ f lɩk pesem-leesẽ wã n ges dũni-kẽengã yԑlã la pelen-yɩgsã la f ra kẽ a pʋgẽ ye.

Gom-bil a nu n soaba: “وله الحمد” (Pẽgrã bee ne-A). A moore, ad pẽgrã la soeesgã la pẽgbã la kũunã yaa Wẽnnaam a yembr n so, le segda ne-A a yembre. Rat n yeel tɩ neema wã fãa gill yita A nengẽ, neema wã fãa gill yita A sãnem-boya pʋgẽ, la sãnem-boy kãnsã me yaa sẽn ruumdi.

Ad gom-bi-kãngã kõta sũ-noogr n yetẽ: Yaa foo ninsaala! ra sãam f sũur ne neema wã loogrã ye, bal neema wã sãnem-boyã ka sat ye. La f ra wa tags neema wã loogra yell tɩ nams-f tɩ f wẽ no-beong ye, bal neema wã tɩ-bilã yaa yolsg sẽn ka tar saab tɩ-bila, t’a tɩɩga ruumdẽ, ba tɩ tɩ-bilã sã n sa n loog me, b paamda bũmb sẽn na n ledg a zĩiga. Neema wã wʋm-noogã tõeme n paas sẽn sɩng ne daragԑ a rembr n tɩ tãag daragԑ koabga. La woto yaa fo sẽn na n tagsd yolsgã sẽn be neema wã noosmã pʋga yell la f pẽgd Wẽnnaam, yolsg ning wʋm-noog sẽn yɩɩda wʋm-noogã menga noor koabga.

Wala na-kẽeng sẽn na n kõ foo tɩ-bil t’a noosmã kɩt tɩ fo paamd naaba yolsgã wʋm-noogã n yɩɩd tɩ-biis koabg pa rẽ bɩ tusr noosma, ad woto bala, gom-bi-kãngã (lahul hamdʋ) pakda noosem sẽn solg rignoor fo yĩnga, t’a noosma yɩɩd neema wã noor tusri. La woto yɩta ne Wẽnnaam pẽgbã la bark-pʋʋsgã sababo. Rat n yeel tɩ yaa fo sẽn na n tũnug neema wã n wʋm-noog ne neemã wã kũunã, rat n yeel tɩ neemdã bãngre, la a neemgã yell tagsgo, rat n yeel t’A yolsgã la A nin-bãan-zoeerã la A neemgã sẽn duumda yell tagsg tɩ-bilã pʋgẽ.

Gom-bil a yoob n soaba: “يحيي” (Yẽ n vɩɩmsde). S moore: yaa Yẽ la sẽn kõt foo vɩɩmã, la A ruumd vɩɩmã ne rɩlgrã, la Yẽ n le naand vɩɩmã yel-baoodsã. Ad vɩɩmã sẽn rat yel-bԑd ninsa fãa be A nengẽ. la vɩɩmã yõod sẽn yɩɩda ne sõmblma tʋgda A nengẽ, la vɩɩmã tɩ-biisã koabg pʋgẽ, pis-wԑ la a wԑ wã fãa yaa Yẽ n so.

Ad gom-bi-kãngã gomda ne ninsaalã sẽn yaa sat n yaa koamsã, la a kõt-a sũ-noogr n yetẽ: Yaa foo ninsaala! Ra yaams f mengã ne vɩɩmã zɩɩba tʋkr ye, la f ra sãam f sũur ne dũni wã saaba yell tagsg ye, la fo sẽn maagd f yĩng n getẽ tɩ dũni vɩɩmã tɩ-bilã sẽn ka tar yõoda ra wa kɩt tɩ fo maand nims ne fo dũni wã waoonga ye. Ayo, ad vɩɩmã masĩnã sẽn solg n be yĩngã pʋga yaa Vɩɩm-naaba la Ruumg-naaba soolem. Yẽ n kõt-a a tʋʋma teed la a yel-baoodsã. Ad vɩ-kãngã me tara bõn-baoods la yõod wʋsgo, a fãa gill yaa Yẽ a yembra soolem. Koglg-kãngã (Tẽng-gõngã) pʋgẽ, fo yaa tʋʋm-tʋmd bala, bɩ f yik n yals ne f tʋʋmdã a nen-sõng zugu, la f reeg f keoora, la f maan wʋm-noog ne f vɩɩmã, la f tags vɩɩmã koglgã yelle. Bõe ziir n le ta-a! bõe yel-sõmd yõod n le ta-a! la ãnda kũun la a yolsg n ta kogl-kãngã Soaba! La f noog f sũur ne woto, la f pʋʋs-barka, la f bãng tɩ wakat ning fãa fo sẽn wat n yals ne f tʋʋmdã ne tẽeg-tɩrga, ad a yõod ning fãa sẽn be kogl-kãngã pʋga b na n gʋls-a-la fo tʋʋma karas pʋgẽ, n kɩt tɩ f paam vɩɩm sẽn ka sate, la A le vɩɩmd-f vɩɩm sẽn duumdi.

Gom-bil a yopoe n soaba: “ويميت” (Yẽ n le reegd yõorã). A moore: Yaa Yẽ n naand kũumã. Rat n yeel tɩ Yẽ n saasd dũni tʋʋmda la A tedg fo zĩiga n kɩt tɩ f bas dũni-kãngã sẽn yaa satã n kẽng dũni-bedr a to sẽn duumdi pʋgẽ. La A rokd sõgnegã naongã la a zɩɩbã n basd ninsaalã.  Rat n yeel t’A na n yiisa foo dũni-satgẽ wã n kẽng dũni-ruumdgã pʋgẽ.

Ad gom-bi-kãngã moond n boonda zĩn-dambã la nebã n yetẽ: Noog-y y sũuri! Ad kũumã ka kʋʋb la yeebg la saab la kiisg la welgr sẽn duumd ye, a le pa kaalem la yaar la kʋʋb tɩ tʋʋm-tʋmd ka be ye. Ayo, ad a yaa tʋʋm-saab sẽn yi tʋʋmdã soab sẽn yaa Bʋʋd-mita la Yolsg-naaba nengẽ, la zĩig tedgr la peegr n tʋgd zu-noog sẽn duumd pʋgẽ, sẽn be tõnd ba-yirã meng-mengã pʋga, la kollg rignoor sẽn rabd Barzah dũni pʋgẽ, sẽn yaa zo-rãmb pis-wԑ la a wԑ koabg pʋgẽ wã segb zĩiga.

Gom-bil a nii saoba: “وهو حي لا يموت” (Yẽ la Vɩɩm-naab sẽn ka kiidi). A moore: Ad neermã la pidbã la maan-neerã soaba, soab ning pidb la a neerem la a maan-neer sẽn yɩɩd pidb la neerem la maan-neer ning sẽn be dũni-kẽengã bõn-naandsã pʋgẽ gill sõma wã, la yẽ me la nonglmã sabab-rãmba.

La bãng tɩ soab ning bõn-naandsã fãa sẽn tũuda, soab ning sẽn ka bakda, la soab ning bõn-naandsã fãa gill sẽn nong t’A ka bakdẽ wã, la soab ning neermã bilf sẽn sekd noang buud fãaga, A tara vɩ-kʋdg sẽn duumdi, n yɩlg n yi loogrã la saabã mosɩɩb-rãmbã, la a zãag n yi tudgr la yõsgre.

Ad gom-bi-kãngã moond n wilgda zĩn-dambã la nebã la yĩn-wʋmdsã rãmb fãa gilli, la nonglmã la ka-yã-to-kõn-gũsã rãmb n yet-b: Noog-y y sũuri! ad yãmb tara noang sẽn ruumdi, n tɩbsd yãmb ne y noang-n-taasã welg-taab ning sẽn ka-tԑka sãmpoagã, n ningd-a tɩɩm, a sẽn ka bak n beẽ la a ketẽ wã, bɩ y ra maan pelen-yɩk ye, la y ra maan rabeem ne y vɩɩmã ye, ba a sẽn wa n maan neb a taaba bũmb-ninga, ayo, ad yel-sõngã la maan-neerã la yɩɩdlmã la pidbã sẽn be yԑl nins yãmb sẽn nonga pʋga –sẽn ya b nonglmã sababa- yaa noang-ruumdgã neerem-ruumdgã vẽnegra maas-sul-kɩdg bal tãa, sẽn poog gɩds la luds wʋsg n yi, sã n yaa woto bɩ y ra sãam y sũur ne y noang-n-taasã welgrã ye, bala b yaa wala minwoaare, la minwoaar tedgrã la a teemgã palemdame n a paasd neermã neerem, a sã n ka bak n beẽ, bũmb fãa gill ket n beeme.

Gom-bil a wԑ n soaba: “بيده الخير” (neer buuda fãa gill be a nugẽ) A moore: Ad sõngã buud fãa gill be A nugẽ, la yãmb tʋʋm-sõma wã fãa yãmb sẽn tʋmda yita A nengẽ, lebda A nengẽ, la tʋʋm-sõmsã fãa gill yãmb sẽn tʋmda bĩngda A nengẽ. Ad gom-bi-kãngã boonda zĩn-dambã la nebã n noogd b sũura n yetẽ:

Yaa yãmb neb nins sẽn wãag y tẽeb n ka le mi y sẽn na n maane, y sã n wa loogd n tʋgd y yaadẽ wã, bɩ y ra wa saag n yeel tɩ: “Yaa d sũ-sãanga! Tõnd arzԑka saame n kell a vũuna, tɩ tõnd tʋʋma lebg sebg sẽn fugsi. Tõnd basa dũni-kẽeng kãngã sẽn be neerã n kẽed bog-sẽk pʋga”. Ra yeel-y tɩ wɩɩbd be ne tõnd ye, la y ra kelem-y tɩ yaa sẽn wãag y tẽeb ye. Bal yãmb yԑlã la y yalɩ-rãmbã fãa gill bĩngame, la yãmb tʋʋmã la y sõgenegã fãa gill yaa bũmb sẽn gʋls n bĩngi.

Bãng tɩ Wẽnnaam zaata, A naam yɩ wagelle, soab ning sẽn na n rola yãmb y sõgenega keoorã, la soab ning neerã fãa gill sẽn be a soab nugẽ wã, soab ning sẽn tõe neerã fãa gilla maanega, A wata ne yãmb tẽng-gõngã tẽngr n kɩt tɩ y zĩnd beenẽ n koll bilfu, rẽ poorẽ t’A tall-y n wa A nengẽ. Ad Arzãn tɩɩgã sẽn boond tɩ Tuubaa wã bee ne yãmba! Hakɩɩka yãmb sa y sõgenegã la y tʋʋmã. 

Hakɩɩka yãmb naongã la y yaamsã saame, la yãmb yaa kẽndb la loogdb n tʋgd vʋʋsmã la yolsgã pʋgẽ. Ad sõgnegã naongã saame tɩ yãmb loogd n tʋgd keoorã reegr zĩigẽ.

Yaa sɩda, ad Tõog-naaba sẽn yaa  Na-wagella, sẽn gũuda tɩ-bil-yamrã la tɩ-biisã sẽn yaa sig-noor sẽn looga tʋʋm-sԑb seb-vã-nensa, la a tʋʋmã tʋg-bõonesa, A bĩngd-b lame la a sẽegd-b sig-noor ning sẽn pʋgda pʋg ne alhaal sẽn be neera, pa rẽ bɩ ne nagsg t’a neerem la a sõmblem yɩɩd a menga. Yaa sɩda, ad woto bala, yãmb Tõog-naaba sẽn yaa Na-wagella gũuda yãmb vɩɩmã tɩ-biisã gũub tԑk-tԑka, la a na n kõo yãmb keoor wʋsg yãmb tʋʋma yĩnga.

Gom-bil piig n soaba: “وهو على كل شيء قدير” (a yaa bũmb fãa gill tõoda). A moore: Ad-A ya a yembr tãa, n yaa tõog soab bũmb fãa gill zugu. Yaams ka paamd-A A tʋʋmã pʋgẽ ye. Sig-noorã fãa gill naaneg yaa yolyol ne-A wala tɩ-puug a yembr naanego. La Arzãna naaneg yaa faag la yolyol ne-A wala sig-noorã naanego. Ad A bõn-naandsã sẽn ka tar tԑka A sẽn naan la A lebgd n palemd b naanegã daar fãa la yʋʋmd fãa la sasa fãa pʋga, a fãa gill maanda kaset ne A tõoga sẽn ka tar tԑka ne zɩlma sẽn ka-tԑka.

Ad gom-bi-kãnga me kõta sũ-noogr-koԑԑg n yetẽ:

Yaa foo ninsaalã, ad tʋʋm nins fo sẽn tʋmda, la tũudum ning fo sẽn tũuda ka loogd zaalem ye. Hakɩɩka b segla keor-yaood zak la zu-noog zĩig fo yĩnga, tɩ Arzãn sẽn ruumd kolld foogo, n ledgd fo dũni-kãnga sẽn yaa sata, bɩ f kõ-sɩd la f maan basem-yam ne Naanda sẽn yaa wagella pʋlengã, soab ning fo sẽn tũud-A la f mi-A wã, la f bobl f meng ne-A. Bal A pʋleng a yembr meng yidgr yaa bũmb sẽn ka tõe n yɩ. Pãn-komsem ka be A tõogã pʋgẽ ye, a sẽn wa n yaa neng ning fãa, pãn-komsg me ka tõe n kẽ A yԑla pʋgẽ ye. A tara tõog n tõe n naan Arzãna n kõ-fo, wala A sẽn naan fo sadĩn-bilã n kõ fooga. Pa rẽ meng ye, hakɩɩka A pʋs n naan-a lame la A rɩk  pʋleng ne-f t’A na n kẽes-f-la a pʋgẽ, la A sẽn pʋlem-a ne fooga yĩnga, sɩd-sɩda A na n sɩd kẽes-f-la a pʋgẽ. La sẽn mik tɩ tõnd nee ne kaset-vẽeneg t’A vʋʋgdame la A naand rums la tɩɩs kõbg toor-toor sẽn yɩɩd tus-kobs-tã yʋʋmd fãa pʋgẽ tẽn-gõngã zug ne tũnugr la geelg sẽn pida, la tʋʋlem la yolyol tԑk-tԑka, ad sik ka be tɩ yãmb Tõog-naab kãnga sẽn yaa Na-wagella tara tõog n na n pids A pʋlenga ye.

A sẽn ka bak n yaa tõog sẽn ka tԑk soaba, n naand dũni-yikrã la Arzãna bilgr yʋʋmd fãa pʋgẽ ne kõbg toor-toor tusa. La A sẽn ka bak n pʋlemd nebã ne zu-noog sẽn duumda, la A noogd nebã sũy ne Arzãna, A naama goama sẽn yaa saasẽ goama fãa gill pʋga. La A tʋʋma la A yԑla fãa gill sẽn ka bak n yaa sɩd la hakɩɩka, n paamd pidsg ne sɩda. La bõn-pitsã fãa sẽn ka bak n maand kaset A pidbã sẽn ka tԑka zug ne b sẽn maand a vũuna kaseta, la bõn-pitsã sẽn maand kaset tɩ boogr la yõsgr ka be A zĩig ba a yembr pʋga. La sẽn mik tɩ pʋlengã yidgrã la zɩlem-beedã la zãmbã ka bak n yaa sɩf-yood la pãn-komsem la koeegr sɩf-rãmb tԑk-tԑka. Ad sik ka be tɩ yãmb Tõog-naaba sẽn yaa Na-wagella, la yãmb Bʋ-mit kãngã sẽn yaa pidb soaba, la yãmb Yolsg-naab kãngã sẽn yaa neerem soaba, sik ka be t’A na n pidsa A pʋlengã la A pak zu-no-ruumdgã rignoy ye. Yaa yãmb a liimaoongã rãmba, sik ka be t’A na n kẽesa yãmb Arzãn ning sẽn yaa y yaab a Aadam -tɩlgr be a yĩnga- ba-zakã meng-mengã pʋgẽ ye.

Gom-bil piig la a yembr n soaba: “وإليه المصير” (Yẽ nengẽ la lԑbengã zĩiga). A mooe: Ad neb nins b sẽn tʋms tũudmã la tolbã yĩng ne tʋʋm-bԑda dũni kãngã sẽn yaa zarb-n-ges zaka pʋga, b sã n yals ne b tolbã la b tʋʋmã la b sõgenegã n sa, b na n lebg n kẽnga b Naand-wagell ning sẽn tʋms-ba nengẽ. B na n tɩ sega b Lallda sẽn yaa wagella. Rat n yeel tɩ b sã n wa loog n bas dũni-kãngã sẽn yaa sata, b na n tɩ paama ziir ne Wẽnnaam sẽn yaa Waoor-naab la Na-wagella taoor yalsgo, zak-ruumdgã pʋgẽ. Rat n yeel tɩ b na n sega b soaba sẽn yaa Yolsg-naab A na-ruumdgã zak pʋgẽ, tɩ pa yɩ ne ludg la gɩdr ye, b sẽn paam tɩlgr n yi sabab-rãmbã yaarã la b ludgã likã poore, la keta bilf tɩ ned buud fãa bãng la a paam a naandã la a tũudã la a soabã la a zug-soabã la a soaadã a toor t’a ka tik bũmb ye.

Ad gom-bi-kãnga kõta sũ-noogr sẽn yɩɩd sũ-noogr-rãmbã fãa gill n yetẽ: Yaa foo ninsaalã! Yalla fo mi f sẽn dabdẽ wã? La b sẽn peegd-fo n dabdẽ wã? Wala b sẽn yeel “gomd pis-tã la a yiib n soaba” baasgẽ wã:

Ad fo yaa loogd n rabd yolsg zĩigẽ, la Neerem-na-wagella waoor zĩigẽ, soab ning neermã lԑԑr a yembr gesg sẽn ka tõe n rɩk n mak ne Arzãn pʋgẽ yʋʋm tusr vɩɩma. Fo le rabda Arzãn-kãnga pʋga, Arzãn ning pʋgẽ lԑԑr a yembr vɩɩm sẽn ka tõe n rɩk n mak ne dũni vɩ-noogã pʋgẽ yʋʋm tusr vɩɩma.

Ad yãmb loogd n rabda soab-n-ruumdg ning bõn-naandsã fãa sẽn tũuda zakẽ, la noang ning sẽn duumda wã nengẽ, la soab ninga dũni wã bõn-naandsã la nong-n-ta-bɩndem fãa neerem ning sẽn maand yãmb soagla sẽn ka yɩ rɩlla A neermã la A yʋyã tagems-kɩdg bala, la soab ning Arzãna ne a wʋm-noodã fãa gill sẽn ka yɩ rɩlla A yolsgã vẽnegr a yembr bal tãa wã, la soab ninga yamleoogã kõbg toor-toora la nonglmã fãa gill sẽn ka yɩ rɩlla A nonglmã tagems a yembr bal tãa wã. B boond yãmb n tʋgd Arzãn ning sẽn ya A sãambã reegr zĩ-ruumdga. Sã n yaa woto bɩ y kẽ yaoogã ne laad la y bas kʋnkʋma.

La woto bala, gom-bi-kãngã kõta sũ-noogr-koԑԑg n yetẽ: Yaa yãmb a nebã, ra tol n mams-y pa rẽ bɩ tẽed tɩ yãmb loogd n rabda saabẽ la kaalmẽ la yeebgẽ la liksẽ la yĩmbẽ la sãangẽ la yĩn-nemd saab la waooglmã[1] pʋgẽ bõrb ye. Ad pa saab zĩigẽ la yãmb sẽn loogd n rabda ye, ayo, yaa ruumg zĩiga. Pa kaalem pʋgẽ le b sẽn peegd yãmb n rabda ye, ayo, yaa belem-ruumdg pʋga. Pa liks pʋgẽ la yãmb sẽn kẽeda ye, ayo, yaa nuura dũni pʋgẽ. Yãmb rabda Soaba la Soaada meng nengẽ. Yãmb lebgdame n rabd naama sẽn yaa kʋdgã zakẽ. Yãmb sũy la y yĩn-wil na n paama vʋʋsem yemblmã[2] zĩigẽ. Yãmb ka na n bõr waooglmã pʋg ye. Ad yãmb loogd n na n tɩ sega taaba, pa welgr ye.

[1] Waooglmã yaa bõn-naandsã

[2] Yemblmã yaa Wẽnnaam