Pipi pʋgdgã, sẽn yi a Mohammad yel-soamã pʋgẽ

Pipi pʋgdgã sẽn be “muugizaatʋl Ahmadiya”wã pʋga

Gomd piig la a wԑ soaba

Sẽn gomd

A Mohammad tẽn-tʋʋmdmã yelle

بسم الله الرحمن الرحيم

Lam’a piig la a naas n soaba tara ras’ha’[1] piig la a naase:

Pipi ras’ha’: Ad yԑl a tãab n be n wilgd tõnd d Soaba:

Pipi soaba: Yaa dũni-kẽengã gafã, ne tõnd sẽn kelg a kaset-rãmba bilf “Lam’a piig la a tãab n soabã” pʋga, sẽn be “kaoreng piig la a tãab n soaba”[2] pʋga, sẽn be Rasaa’ɩlʋn Nuura pʋga.

Yiib n soaba: Ya a Mohammad sẽn yaa nabiyaam-dambã pidsdã, yolsg la tɩlgr be a yĩnga, ned ning sẽn yaa dũni-kẽengã gaf-bedrã aaya-kẽengã.

Tãab n soaba: yaa Alkʋr’aan-zɩsgã.

La mosa d segd n bãnga daliil-goamdg a yiib n soab ning sẽn yaa nabiyaam-dambã pidsdã, yolsg la tɩlgr be a yĩnga, la d kelg-a.

Yaa sɩda, ges daliil-vẽeneg kãngã nedengã, fo na n mikame tɩ tẽngã lebga misr a yĩnga, tɩ Mak lebg a tũudum zĩiga, tɩ Mandĩin lebg a minbare. Ad daliil-vẽeneg kãngã sẽn yaa tõnd nabiyaama, yolsg la tɩlgr be a yĩnga, yaa yẽ la sɩd-kɩtbã fãa gill limaam, la nebã fãa gill koe-rɩkda, la nabiyaam-damba fãa gill taoor-soaba, la waliimbã fãa gill zu-soaba, la zɩkr maaneg zĩig sẽn tigim nabiyaam-dambã la waliimbã taoor-soaba. Yẽ la ned ning nedengã sẽn lebg nuura tɩɩga, tɩ tɩɩgã yẽg-vɩɩsã ya nabiyaam-dambã fãa gilla, t’a tɩ-bi-maasa ya waliimbã fãa gilla, ne sẽn mik tɩ nabiyaam-dambã fãa gill sẽn tik b muugiza-rãmbã, la waliimbã fãa gill sẽn tik b karaamaatã[3] sɩdgd-a lame, la b tikd nug b sɩdgra zuga.

[1] Yaa bũmb belem tagems la a yõodo.

[2] Ad b tẽeg-a-la “almadhalʋl  aalami al-nuur” pʋgẽ.

[3] Yaa yel-solemd Wẽnnaam sẽn rɩkd n waoogd neb nins sẽn nidgd pãng ne a tũudmã, nabiyaam-dambã toog sẽn ka naagẽ. Bal nabiyaam-dambã nengẽ wã b boondame tɩ muugiza. Yẽ me yaa yel-solemd Wẽnnaam sẽn kõt nabiyaam-dambã, tɩ ned ka tõe n togs n maan ye, sẽn na yɩl n sɩdg b nabiyaamdmã. (lebgdã) 

Sã n yaa woto, ad tõnd nabiyaam kãnga –yolsg la tɩlgr be a yĩnga- yetame tɩ “laa ɩlaaha ɩlla laahʋ” (soab sẽn na tũ n tɩlg ka be rɩlla Wẽnnaam), tɩ Wẽnnaam yʋʋr tẽegdb kãnsa fãa gill sẽn ya b nuura rãmbã, neb nins sẽn maan saf goabgã la rɩtgã wԑԑngẽ wã, rat n yeel tɩ zãmaan sẽn loogã la sẽn watã, tũnusd-a n maand “laa ɩlaaha ɩllal laahʋ”. La b naag taab n yet hakɩɩk pʋgẽ tɩ: “Fo togsa sɩda, la f goma ne sɩda”, wãn-wãn la yel-gẽdem na n kẽ, pa rẽ bɩ a kẽes a nug-bil yel-kãngã buud pʋgẽ, yell sẽn paam sɩdgr ne nug-tiksa ka-tԑka.

Ras’ha’ a yiib n soaba: Ad daliil-vẽeneg kãnga sẽn yaa wẽn-yembg daliil sẽn tar nuura wã, wala a sẽn paam neng a yiiba fãa igmaa’a la b tawaatʋra sõngra, ad woto bala, a paama sõngr ne saasẽ gaf-rãmba, wala Taoraat la Lingiil daliil-rãmb[1] kobs kengr la b sɩdgre. La a paam sõngr ne ɩrhaasaat[2] tagems-rãmb tusa, la hawaatɩf-rãmbã[3] daliil-rãmba, la bagbʋgdbã kaset-damb sẽn pʋg taab ne tawaatʋra sɩdgre. La a le paam sɩdgr ne a muugiza-rãmb tusa daliil-damba, wala kiuugã pãrgrã. La a paam sɩdgr ne a sãri wã sɩda, n le paas a zʋg-sõmsa sẽn pida, la a sɩf-sõmsã sẽn pid a tʋʋmda tʋʋm wakata, la a wẽn-zoԑԑgã la a tũudmã la a nidg-pãnga la a keglma sẽn tar yel-solemda, sẽn wilgd a keglma pidba, la a sɩd-kũunã pãnga, la a yĩn-yõgenega sẽn pida, la a bas-m-yamã sẽn pida, la daliil-rãmb nins sẽn wilgd woto wã.

Woto fãa gill wilgda vẽeneg wala wĩntoog t’a yaa sɩd-soab a boolga pʋgẽ.

Ras’ha’ a tãab n soaba: Fo sã n dat bɩ f wa tɩ d kẽng mak zãmaanẽ wã, la zu-noog zãmaanẽ wã, ba na yɩ ne tagsgo, n tɩ kaag tẽn-tʋʋm-wagellã, yolsg la tɩlgr be a yĩnga, la d ges a sẽn tʋmd to-to.

[1] A Huseyn Algɩsrɩ vẽnega daliil-rãmb koabg la piig la a naas sẽn be gaf-kãnsa pʋga a gaf ning sẽn boond tɩ “Rɩsaalatʋl Hamiidiya” wã pʋga, ad daliil-rãmb sẽn ta woto sã n ket n be gaf-kãnsã pʋgẽ tedgrã poore, ad sik ka be tɩ daliil-vẽenes wʋsg n da be beenẽ ye.

[2] Yaa nabiyaam nabiyaamdmã tagems-rãmb nins sẽn vẽneg taoor t’a nan ka lebg nabiyaama(lebgdã)

[3] Yaa koees b sẽn wʋmd la b yaool n ka ne b rãmba ye.

Bɩ f wa gese, ad ned ning sẽn yɩɩda ne vɩ-sõng la sʋʋrg neerma sẽn yas tõnd taoora, n zãad muugiza gaf a nugẽ wã, t’a zɩlemda gomd goam t’a fãa gill yaa hakɩɩk-rãmba, n taasd adem-biisa fãa gill gom-kʋdga. Pa nebã bal ye, a pʋs n taasda zĩn-dambã la ninbuiidã la malԑgsã gilli, pʋs n yaa bõn-naandsã fãa gilli. La a leokd sʋks-bԑd a tãab nins sẽn tar rabeema ne leoksg sẽn sakd ne yam. Sʋks-kãnsa me la woto: Foo la ãnda? Fo yita yԑԑnẽ? Fo rabda yԑԑnẽ?  Sʋksg nins bõn-naandsã fãa gill sẽn sʋkd b mensa, la sʋksg nins sẽn maana yamã soagl n kẽes-a yirbg pʋga, n wels la a vẽneg zɩɩlem-ludg ning sẽn da be dũni wã naanegã yõodã pʋga, la a pak la a vẽneg yel-soalgdg ning sẽn da lud dũni-kẽengã yõodã.

Ras’ha’ a naas n soaba: Ges hakɩɩkã vẽenem ning a sẽn sẽegda, fo sã n bas a kãndgrã nuura wã la f ges dũni-kẽengã, fo na n mikame tɩ dũni-kẽengã yaa wala kʋ-yiri, tɩ bõn-naandsã yaa sãamb n ka mi taab ye, pa rẽ bɩ b yaa bԑԑb ne taaba, tɩ bõn-koeemsã yaa kũ-rãmb sẽn tar rabeem, tɩ bõn-vɩɩsã fãa gill yaa wala kɩɩbs n kʋmdẽ, welgrã la loogrã nen-soabgã yĩnga.

Rẽ poor bɩ f le gese, ad nuura ning nin-wagell kãnga sẽn sẽega yɩɩ sabab tɩ kũ-yir kãngã sẽn gũbgã lebg zɩkr maaneg zĩig sẽn tar yamleoog la noosem, tɩ bõn-naands nins sẽn yaa wala bԑԑb la sãamb ne taaba lebg wala zo-rãmb la ma-biis ne taaba, tɩ bõn-koeems kãnsa sẽn yaa kɩɩms n ka gomda lebg wala tʋʋm-tʋmdb sẽn yaa nen-yubsdba, la sõgen-damb b sẽn nome, tɩ kɩɩb-kãnsã sẽn ya b sãamb n kʋmdẽ la b kʋmd-n-taandẽ wã lebg wala zɩkr maandb la sʋbhaanal laahɩ maandba, pa rẽ bɩ bark-pʋʋsdb sẽn sa b tʋʋma.

Ras’ha’ a nu n soaba: Ad nuura kãngã sabab kɩtame tɩ tʋʋmã la tedgrã la teemgã sẽn be dũni-kẽengã pʋga daragԑ wã paase, tɩ b lebg gaf-rãmb sẽn gomd Wẽnnaam yelle, la dũni wã aaya-rãmba seb-nenga, la Wẽnnaam yʋya minwaar-rãmba, a sẽn lak n bas yaalgã la reemã poore, la a sẽn ka le yaa reem bũmb sẽn maan-yaar-tɩ-zemsa. Nuura kãngã le kɩtame tɩ dũni wã me daragԑ paas t’a lebg Tõog-naabã hɩkma gafo.

Rẽ poore, ad ninsaalã valemsgã la a pãn-komsmã la a talemdã la a tʋlsma ka-tԑk ning sẽn kɩt tɩ rũm-muksã fãa gill são-a wã, la a yam ning sẽn kɩt t’a lebg rũmsã fãa zu-be-neda, n yaa sabab tɩ sũ-sãamsã la zablmã la yɩɩrã paamd-a wã sã n paam nuura kãnga, ad ninsaalã daragԑ wã na n yɩɩga rũmsã fãa gilli, pa rẽ bɩ bõn-naandsã fãa gilli, la ne gãneg-m-mengã, ninsaalã na n lebga naab sẽn tar waoore, la ne Wẽnnaam kosgã, a na n lebga tẽngã ledsd sẽn yaa ziir la waoor-soaba, a pãn-komsmã la a talemdã la a yamã sẽn paam nuura kãnga wã poore.

Sã n yaa woto, ad nuura kãnga sã n da ka be, ad bũmb buud fãa daragԑ naan n lʋɩ, hal ba dũni-kẽengã la ninsaalã, n lebg reem-te-yaalga.

Yaa sɩda, ad yaa tɩlԑ tɩ nin-zɩsg wala nin-kãngã zĩnd dũni-kẽeng sẽn be neer wala dũni-kãngã pʋgẽ, sã n ka rẽ na n lebga tɩlԑ tɩ dũni-kẽengã la ãd-bԑdã ra zĩnd ye.

Ras’ha’ a yoob n soaba: Ad nin-wagell kãnga, a sẽn kõt zu-no-duumdgã kibar la a noogd nebã sũur ne-a wã yĩnga, la a vẽnegd yolsg sẽn ka-tԑk n wilgdẽ wã, la a boond n tʋgd sobendã naamẽ la a kaset maanega, la a sẽn vẽnegd Wẽnnaam yʋyã sãnem-boyã n wilgdẽ wã, fo sã n ges-a ne nen-kãnga, rat n yeel t’a tũudmã wԑԑngẽ, fo na n mikame t’a yaa nonglmã bilgri, la yolsgã bilgr sẽn tar yĩnga, n le yaa ziir ne nedengã, n yaa naanegã tɩ-biis sẽn yɩɩd ne nuura.

La fo sã n ges-a ne neng a to, rat n yeel t’a tẽn-tʋʋmdmã wԑԑngẽ, fo na n mikame t’a yaa sɩdã daliil-vẽenega, la hakɩɩka fɩtla, la kãndgrã wĩntoogo, la zu-noogã sababo, bɩ f ges wãn-to-to la a nuura wã gũbg wĩndg-sẽn-yitɩ la wĩndg-sẽn-kẽedɩ wala sa-yãgre, tɩ tẽngã pʋɩ-sʋka, la nebã pʋɩɩr a nu yembr sak a kãndgra, ne sẽn mik tɩ yõyã la sũyã kʋ b mens a yĩnga. La yaa bõe yĩng tɩ tõnd yõyã la tõnd soԑtãambã ka sakd “laa ɩlaaha ɩllal laahʋ” wã, ne a daragԑ-rãmbã fãa gilli, bũmb ning sẽn yaa yãmb nin-kãngã yԑla fãa yẽgra?

Ras’h’a yopoe n soaba: bɩ f wa ges wãn-to-to la nin-kãnga tõog n yẽes vugr-yell ne tʋʋlem, kʋdem-wẽns nins nin-wẽns kãnsã sẽn yaa tõtb la bu-welsdba sẽn da tar tẽng-kãngã pʋga, la a zʋgl-b zʋg-sõng buuda fãaga, n kɩt tɩ b lebg dũni wã karen-saamb-damba, la tẽn-bԑdã karen-saam-bԑda.

Wa gese, ad a ka modg-b n paam woto ye, ayo, ad a pakame la a nom yamã la yõyã la sũyã la yõyã yamleedã, n lebg sũyã noanga, la yamã karen-saamba, la yõyã yamleedã wubda, la yõyã naaba.

Ras’ha a ni n soaba: Ad fo meng miime tɩ zãma-bil sã n tar tʋʋm-minimdg-kɩdga, wala sɩgaara yũuba bilgri, ned ka tõe n wa saas-a zãng kԑpɩ sã n pa na-bedr la ne raab-kԑgeng ye. La nin-kãngã soaba yaool n wa saasa tʋʋm-minimdɩ-bԑd sẽn yaa wʋsgo, tõtb la bu-welsdb wʋsg sẽn da tar faag-faag wakat-bif pʋgẽ, la a lebs zʋg-sõms sẽn ruumd tʋʋm-minimdɩ b zĩisẽ wã, tɩ be b zɩɩmẽ wã, la a yals ne tʋʋm-bԑd wʋsg wala woto.

Bɩ f wa tɩ d rɩk Mak soolmã n kẽes neb nins sẽn ka ne tɩ sasa kãnga la zu-noog sasa wã ninẽ! B rɩk fɩlozofɩ bãngdb kobs n kẽng beenẽ, n tɩ tʋm yʋʋm koabg tɩ d gese, yalla b tõe n tʋma tʋʋm nins nin-kãngã sẽn tʋm yʋʋmd a yembr pʋga koabg pʋgẽ yembre, tɩ d sã n na n ges zãmaan kãng sasa wã?

Ras’ha a wԑ n soaba: Rẽ poore, fo meng miime tɩ ned sẽn pa nin-bedr n be zãma-bil pʋgẽ ka tõe n yag-ziri pa rẽ bɩ a wa ne paoor-gomd masaal-kɩdg pʋgẽ bɩ tak-n-taar yell pʋgẽ, a bԑԑbã taoor tɩ lill ka be, tɩ rabeem me ka tar-a ye, hal tɩ b ka tol n yãnd yԑԑsg la rigb tagems a zug ye.

Bɩ f ges nin-wagell kãnga, yalla zɩlem-beed tõe n kẽ a gom-biisã pʋga, gom-biis nins a sẽn yiisd ne koe-kԑgeng n yikd a bԑԑba sũyã, wala tʋʋm-bedr soab sẽn be tʋʋm-kẽeng la zĩ-bedr pʋga, t’a yaa sẽn tar tʋls-kԑgeng ne koglg la gɩblg tɩrga, zãma-bedr pʋgẽ, la masaal-bԑd pʋgẽ, la beem-kegems la yel-bԑd pʋgẽ, la kɩs-sɩd ne-m-meng la soog-m-meng sẽn bedem pʋgẽ, tɩ ka yɩ ne yԑԑsg la tar-n-leb-poorẽ la gɩdgr la yirbgu, la ne sũ-yɩleng sẽn yaa sɩd-soab la nidg-pãng sẽn bedme? La yalla sɩlem-wẽng la belgr tõe n kẽ yel-kãngã pʋgẽ? Ayo, (A ka gomd tɩ ka b sẽn maan wahɩ tɩ wa a nengẽ ye) ﴿إِنْ هُوَ إِلاَّ وَحْيٌ يُوحَى﴾ (سورة النجم ٥٣/٤)  .

Yaa sɩda, ad sɩda ka belgd ye. Ned ning sẽn ne la a get hakɩɩkã me b ka tõe n belg-a ye. Nabiyaam –yolsg la tɩlgr be a yĩnga- sora me sẽn yaa sɩda toog ka be ne sɩlem-wẽng la belgr ye.

Wãn-wãn la zãmsd tõe n vẽneg a meng wala hakɩɩk n belg ned ning sẽn ne hakɩɩkã?

Ras’ha piig n soaba: Ges wãn-wãn la a vẽnegd la a sɩdgd hakɩɩk-rãmb la masaal-bԑd sẽn yaa tɩlԑ n yaa darʋʋra, n le takd nebã la a kẽesd nonglem ne bao-n-bãngã! Fo le miime yԑs tɩ yell ning sẽn yẽegd ninsaalã n tɩ yɩɩd yaa bao-n-bãngã nonglmã, hal tɩ ned sã n yeel foo tɩ fo sã n kõ f yõorã pʋɩ-sʋk la f arzԑka pʋɩ-sʋka, ned n na n yi kiuugẽ wã la Mustara[1] wã pʋgẽ n wa kõ-f kibar ne yԑl nins sẽn be beenẽ wã, la a kõ-f kibar yԑs ne bũmb ning sẽn na n maan fo vɩɩmã pʋg yʋʋm sẽn wat pʋga, la a kõ-f kibar ne bũmb ning sẽn na n paam fooga ne sɩda, fo sã n yaa ned sẽn nong bao-n-bãnge, hakɩɩka fo na rɩk f yõorã pʋɩ-sʋkã la f arzԑka pʋɩ-sʋkã n kõ-a.

La alhaalã yaool n yaa tɩ nin-kãnga kõta kibar sẽn yi Na-kẽeng nengẽ, soab ning kiuugã sẽn be a soolmẽ wã n gilgd wala zõaag sẽn gilgd pulumpiuku, tɩ pulumpiukã sẽn yaa tẽngã yɩgd n gilgd fɩtli, tɩ fɩtlã sẽn yaa wĩntoogã pa yɩ rɩlla Na-kãnga zaks tusa wã pʋgẽ sãamb zak a yembr pʋgẽ fɩtl-rãmb tusa yembre.

Rẽ poore, ad a gomda dũni sẽn tar yel-solemd yell ne sɩda, la a kõt kibar ne tedg-kẽenga, ne sẽn mik tɩ ba tɩ tẽn-gõngã bilgr noor tusa sã n lebg bõn-pusdɩ n pusgi, a ka na n yɩ yel-solemd wala dũni kãnga la tedg-kãnga ye. Bɩ f kelg nin-wagell kãnga sẽn karemd sʋʋr-rãmb ninsa, wala:

﴿إذا الشمس كورت﴾ (سورة التكوير 81/1)

(Wĩntoogã sã n wa sobge) (Takwɩɩr 81/1)

﴿إذا السماء انفطرت﴾ (سورة الانفطار 82/1)

(Saagã sã n wa pãrge) (infitaar 82/1)

﴿القارعة﴾ (سورة القارعة 101/1).

(Sũur-pemb daarã) (Alkaarɩ’a 101/1).

La a kõt kibar ne zãmaan sẽn watã ne sɩda, ne sẽn mik tɩ dũni wã zãmaan sẽn watã ka yɩ rɩlla wala wĩnto-walemr[2] a nengẽ.

[1] Yaa ãd-bedr yʋʋr b sẽn boond ne nansaaremd tɩ “jupiter”

[2] Sãnda boond-a lame tɩ wĩnto-namse.

Rẽ poore, ad a kõta zu-noog kibar ne sɩd menga, tɩ dũni zu-noogã fãa gill zu-no-kãnga taoore, a bilgr yaa wala sa-yãgr sẽn yaa loogda, wĩntoogã sẽn yaa ruumda taoore.

Ras’ha piig la a yembr n soaba: Ad sik la sãmbs ka be, tɩ yel-soalem wala woto n be yel-soalem dũni-kẽeng kãnga sẽn tar yel-soaandɩ la reemã ludgã tẽngr n kolled tõnd ye. Sã n yaa woto, yaa tɩlԑ tɩ ned-sẽn-ka-to sẽn yaa muugiza soab be n kõt tõnd kibar ne yel-soalem kãnsa bilgri.

Rẽ poore, ad nin-wagell kãnga alhaalã la a zʋgdã wilgdame t’a yãame, la a neẽ la a togsd bũmb ning a sẽn ne wã.

Rẽ poore, a karemd n wilgda tõnd ne no-kẽndr sẽn tar laafɩ n yaa soma n yetẽ: Yaa bõe la saasã la tẽngã soab ning sẽn kiigda A neema wã tõnd zuga rat tõnd nengẽ? La yaa bõe la A yarda?

La yaa bõe n paam nebã wʋsga tɩ b lebg wʋns la zoense, pa rẽ bɩ b pʋs n lebga gãeems n ka le ne sɩd-kãngã, la b ka kelgd hakɩɩk-kãnga, la b ka fasemd-a, tɩ yaool n da segdame tɩ b bas bũmb fãa gill la b pẽneg nin-kãnga soaba n yok b tʋb n kelg-a. Bal yaa yẽ la ned ning sẽn wilgd tõnd hakɩɩk-rãmb nins sẽn yaa darʋʋr sõma n paasd bao-n-bãngã nonglma, wala hakɩɩk-rãmba sẽn looga.

Ras’ha piig la yiib n soaba: ad nin-wagell kãnga, wala a sẽn yaa daliil-vẽeneg sẽn gomd n yaa sɩd-soaba, la daliil sẽn yaa sɩd wala bõn-naandsã naanda yemblmã sẽn yaa sɩd to-to wã, ad woto bala, a yaa Alkɩyaom yikrã la zu-no-ruumdgã daliil-kẽeng sẽn tar pãnga. Pa rẽ bal ye, wala nin-kãnga sẽn yaa zu-no-ruumdgã paoonga sababa, t’a kãndgrã yaa sabab tɩ b tõe n paam-a wã, ad woto, yaa a doaagã la a kosgã ne gãneg-m-mengã la zu-no-kãngã belmã la naanegã sababo.

D na n le bẽda ne zĩ-kãngã n tẽeg yel-soalgdg ning d sẽn da gom a yell Alkɩyaoom yikrã yella pʋga. Bɩ f gese, ad yãmb nin-kãnga soaba maanda doaag a pʋʋs-kẽenga pʋgẽ, tɩ yaa wala Mak soolmã pa rẽ bɩ tẽn-gõngã gill tũnugd-a lame n pʋʋsd a pʋʋs-kẽengã la b kot ne gãneg-m-menga.

La f gese, ad a bee zãma-kẽeng pʋgẽ n kotẽ la a fĩindẽ, tɩ yaa wala ãdem-biisã pʋgẽ nin-pitsã sẽn ya nuura rãmba, sẽn sɩng hal m yaaba Ãdem wakatẽ wã, tɩlgr be a yĩnga, n wa tãag tõnd rũnda zãmaana tũnusd-a lame n maandẽ, la b reegd a doaaga aamiina.

 La f gese, ad a kot n rata bõn-raab sẽn gũbgi, tɩ yaa wala ka tẽn-gõngã pʋgẽ rãmbã bal n lagem a kosgã la a fĩinigã pʋg ye, ayo, ad saasẽ dambã, pa rẽ bɩ bõn-naandsã fãa gill yetame tɩ yaa sɩda, ãamiina yaa rabbɩ, tõnd me kotame.

Rẽ poore, ad a fĩinda fĩinig sẽn pid ne kosg la sũ-sãang la nonglem-kԑgeng la gãneg-m-menga, n kɩt tɩ dũni-kẽengã gill lagem-a a doaagã pʋgẽ la a kʋmdẽ.

La f gese, ad a kota doaag bõn-raab yĩnga, sẽn na n zẽkd ninsaalã la dũni wã pa rẽ bɩ bõn-naandsã fãa gill daragԑ, n yi tẽngr rãmba fãa tẽngr la lʋɩɩsã la yel-yaalsã la reemã pʋgẽ n kẽng yĩngr rãmba yĩngri. Rat n yeel tɩ n kẽng zĩig sẽn tar waoor la ruumg zĩiga, la tʋʋm-bԑd zĩiga.

La f gese, ad a gãnegda a meng n kot ne kʋkʋm, n kot pãn-paasg la sõngre, la a maand doaag sẽn pid ne yolsg kosg la tẽebo, tɩ yaa wala bõn-naandsã la saasã la Al’arsa[1] fãa gill wʋmd-a lame, tɩ b nonglmã paasdẽ, la a kɩt tɩ b reegd a doaaga tɩ Ãamiina yaarabbɩ ãamiina.

La f gese, ad a kotame la a baood a tʋlsem-damb Tõog-naaba la Wʋmb-naaba la Kũun-naaba, la Minim-naaba la Nenem-naaba la Yolsg-naaba nengẽ, naab ning sẽn ne bõn-vɩɩg sẽn yɩɩda ne solgra tʋlsem la a kosg sẽn yɩɩd ne solgr ne seedgo, la A wʋmd-a la A reegd a kosga la A yolsd-a wã,  bala A kõt-a-la bũmb ning a sẽn kota –ba tɩ yaa ne alhaal zɩlemde- a kõt-a-la ne yalɩ sẽn pid ne hɩkma la tags-n-gesg la yolsgo, bala A ka tol n bas zĩig ba a yembr ned sẽn tõe n wa tik n maand-sãmbs ne wub-kãnga la kẽnes-kãnga yaa Wʋmb-naaba la Nenem-naaba la Kũun-naaba la Yolsg-naaba a yembr tãa tʋʋm ye.

Ras’ha piig la a tãab n soaba: Togs-m wԑ, yaa bõe la koat-kãnga soaba kot la a baoodẽ, ned ning sẽn yaa ãdem-biisã nin-zɩsga, la dũni-kẽengã la zãmaanã nin-bedra, la bõn-naandsã sẽn pugd ne-a soaba, t’a yaa sẽn yas tẽngã zug tɩ ãdem-biisa nin-bԑdã fãa tigim a poorẽ, t’a yaa sẽn zẽk a nus a yiib n tʋgd Al’ars-zɩsga?

[1] Yaa Wẽnnaam naamã zĩiga

Bɩ f ges la f kelge: Ad a kota zu-no-ruumdgã, la a baood kellgã la Wẽnnaam segbã la Arzãna. A kotame n lagem ne Wẽnnaam yʋ-yɩlmã fãa gilli, yʋy nins sẽn vẽnegd b bʋʋdã la b neermã bõn-naandsã minwoaar-rãmbẽ wã. Ba tɩ bõn-baoodg kãnga paoongã sabab-rãmb sã n ka be, wala yolsgã la gũubã la hɩkma wã la tẽeg-tɩrgã, nin-kãnga doaaga a yembra na yɩ sabab tɩ b me Arzãna, arzãn ning naaneg sẽn yaa faag ne tõnd Naanda tõoga, wala tõnd sig-noyã naanegã sẽn yaa faag to-to ne-A wã.

Yaa sɩda, wala nin-kãnga tẽn-tʋʋmdmã sẽn lebg sabab ne zarb-n-gesgã zak (dũniyã) pakra, ad woto bala, a Wẽnnaama tũudmã me yaa sabab ne Laahr zaka pakre.

Togs-m wԑ, yalla tũnug-kãngã sẽn tar pãng n yaa vẽeneg n kɩt tɩ yamã la bãng-vẽenegã rãmb yetẽ tɩ  (bũmb ka be sẽn tõe n naana pʋgẽ, sõmblem sẽn yɩɩd sẽn naana ye) [ليس في الإمكان أبدع مما كان]. La woto bala, yalla naan-sõng kãnga yõsgr sẽn ka be a pʋga, la bũmb ning sẽn vẽnegd yols-kãnga pʋga, woto bala, yalla sobendã neerem ning sẽn ka tara mak-n-taara, yalla woto fãa gill sakda yel-yook kãnga, la wẽnem-kãnga, la yaar-kãnga bilgri, tɩ yaa wala Sɩd-naaba sẽn yaa Na-wagella maagda a yĩng n kelgd tʋlsem-damb la koees yõod sẽn paood wʋsgo, n kõt-b b sẽn data, la A yaool n ka kelgd tʋls-bԑdã sẽn yaa darʋʋra, tɩ yaa wala b ka tar yõodo, tɩ le yaa wala A ka fasemd-ba, la A le ka kɩt tɩ b paam-a? Woto yaa bũmb sẽn ka tõe n yɩ. Rẽ poore, woto yaa bũmb sẽn ka tõe n yɩ noor tusri, ad neerem-kãngã buud ka sakd yel-yook kãngã buud ye, a menga me ka tõe n yɩ yook ye.

Yaa fo m zoa sẽn yaa tagsda, woto sekame. Bɩ d lebg n leb poore, tɩ ad sã n ka rẽ, ba tõnd sã n zĩnd yʋʋm koabg zãmaan-kãngã pʋgẽ, laarb-rãmbã zãmaanã pʋgẽ, tõnd kõn tol n tõog n gom n gũbg ba ya nin-wagell kãnga tʋʋma la a yel-soalma koabg pʋgẽ yembr ye, a gesgã me kõn tol n sek tõnd ye.

La mosa bɩ f wa: D ges sasa-rãmb nins fãa tõnd sẽn na n pɩʋʋg d lebgrã pʋga yembr yembre. La f ges sasa a yembr fãa sẽn widgd tɩ-puud to-to, ne fayd ning a sẽn mok wĩnto-kãngã kãndgrã pʋga, la a wom tɩ-biis minyõ-rãmba sẽn tar nuura, wala Imaam Abɩɩ Haniifa la Imaam Saafɩɩ, la Imaam Abɩɩ Yazɩɩd Albastoaamii, la Seyh Algԑylaanii, la Seyh Alnagsabãndɩ, la Imaam Algazaalɩ, la Imaam Al-rabbaani. La d na n yaoola bũmb ning d sẽn yã wã welsga n gũ daar a to, la d sall n kõ nin-kãnga sẽn yaa kãndgd n yaa muugiza-rãmb soaba, sallg ning sẽn wilgd a muugiza-sɩda sãnda wã.

عَلَى مَنْ أُنْزِلَ عَلَيْهِ الْفُرْقَانُ الْحَكِيمُ مِنَ الرَّحْمَنِ الرَّحِيمِ مِنَ الْعَرْشِ الْعَظِيمِ سَيِّدِنَا مُحَمَّدٍ أَلْفُ أَلْفِ صَلاَةٍ وَأَلْفُ أَلْفِ سَلاَمٍ بِعَدَدِ حَسَنَاتِ أُمَّتِهِ، وَعَلَى مَنْ بَشَّرَ بِرِسَالَتِهِ التَّوْرَاةُ وَالْإِنْجِيلُ وَالزَّبُورُ وَبَشَّرَتْ بِنُبُوَّتِهِ الْإِرْهَاصَاتُ وَهَوَاتِفُ الْجِنِّ وَأَوْلِيَاءُ الإِنْسِ وَكَوَاهِنُ الْبَشَرِ وَانْشَقَّ بِإِشَارَتِهِ الْقَمَرُ سَيِّدِنَا مُحَمَّدٍ أَلْفُ أَلْفِ صَلاَةٍ وَأَلْفُ أَلْفِ سَلاَمٍ بِعَدَدِ أَنْفَاسِ أُمَّتِهِ، وَعَلَى مَنْ جَاءَتْ لِدَعْوَتِهِ الشَّجَرَةُ وَنَزَلَ سُرْعَةً بِدُعَائِهِ الْمَطَرُ وَأَظَلَّتْهُ الْغَمَامَةُ مِنَ الْحَرِّ وَشَبِعَ مِنْ صَاعٍ مِنْ طَعَامِهِ مِئَاتٌ مِنَ الْبَشَرِ وَنَبَعَ الْمَاءُ مِنْ بَيْنِ أَصَابِعِهِ ثَلاَثَ مَرَّاتٍ كَالْكَوْثَرِ وَأَنْطَقَ الله لَهُ الضَّبَّ وَالظَّبْيَ وَالْجَذْعَ وَالذِّرَاعَ وَالْجَمَلَ وَالْجَبَلَ وَالْحَجَرَ وَالْمَدَرَ صَاحِبِ الْمِعْرَاجِ وَمَا زَاغَ الْبَصَرُ سَيِّدِنَا وَشَفِيعِنَا مُحَمَّدٍ أَلْفُ أَلْفِ صَلاَةٍ وَأَلْفُ أَلْفِ سَلاَمٍ بِعَدَدِ كُلِّ الْحُرُوفِ الْمُتَشَكِّلَةِ فِي الْكَلِمَاتِ الْمُتَمَثِّلَةِ بِإِذْنِ الرَّحْمَنِ فِي مَرَايَا تَمَوُّجَاتِ الْهَوَاءِ عِنْدَ قِرَاءَةِ كُلِّ كَلِمَةٍ مِنَ الْقُرْآنِ مِنْ كُلِّ قَارِئٍ مِنْ أَوَّلِ النُّزُولِ إِلىَ آخِرِ الزَّمَانِ وَاغْفِرْ لَنَا وَارْحَمْنَا يَا إِلَهَنَا بِكُلِّ صَلاَةٍ مِنْهَا... آمين

La hakɩɩka mam vẽnega a Mohammad nabiyaamdmã daliil-rãmb nins tõnd sẽn gom b yell mumd-mumd gomd-kãngã pʋga (Rat n yet tɩ masaal-kãnga) sẽn be masaall ning sẽn gʋls ne turkiyẽemd tɩ b boond tɩ “Nabiyaama bãngr sʋ-aa’aata” pʋga, la sẽn be “maktuub piig la a wԑ n soaba” pʋga. B le vẽnega Alkʋr’aana muugiza-rãmbã nems toor-toor a pʋgẽ mumd-mumdi. Sẽn le paasde, b le vẽnega masaall pʋgẽ sẽn gʋls ne turkiyẽemd tɩ b boond tɩ “Lam’aata”[1] la “gomd pisi la a nu n soaba” pʋgẽ, tɩ Alkʋr’aana tara muugiza-rãmb nems pis-naase. Mam tẽega nems-kãnsa yell masaal-kãnsa b yiibã pʋgẽ, la mam gʋlsa neng a yembr tãa sẽn yi nens pis-naasã pʋgẽ, la neng-kãng ya a goama gãnegra tũnugrã[2] wԑԑngẽ, seb-nens pis-naas pʋgẽ, tafsɩɩr ning mam sẽn gʋls ne Laarabiimd tɩ boond tɩ “Ɩsaaraatʋl ɩ’gԑԑza” pʋgẽ. Fo sã n tar tʋlsem ne-a f tõe n leba gaf kãnsã b tãabã pʋgẽ n tɩ ges-a.

Ras’ha piig la a naas n soaba: Ad Alkʋr-aana sẽn bʋ-n-manegã, gaf ning sẽn yaa muugiza-rãmbã magazẽ wã, la muugiza-kẽeng sẽn sɩdgd a Mohammad nabiyaamdmã la Wẽnnaam yemblmã ne sɩdgr sẽn tar pãnga, ne a sẽn ka bas bũmb sẽn le rat daliil a to wã. La tõnd me na n kõo vẽenem bilf a mengã zugu, la bõn-pɩndg a yembr bɩ yiib a muugiza-rãmbã zugu, bũmb ning sẽn lebga sãbsg zĩiga.

[1] bõn-pɩndse (yaa gaf yʋʋre)

[2] بلاغة القرآن

Ad Alkʋr’aana sẽn bʋ-n-manega, gaf ning sẽn wilgda tõnd d Soaba, yaa dũni-kẽenga gaf-kẽeng kãnga gaf-lebgdg sẽn yaa kʋdre, la a no-rԑԑs sẽn duumd ne a zɩlma wã sẽn karemd naanegã aaya-rãmba, la dũni soalgdgã la vẽenega gafã welsda, la yʋy nins sẽn solg tẽngã la saasã seb-vã-nensã pʋga sãnem-boyã vẽnegda, la hakɩɩk-rãmbã sẽn solg yԑlã pʋga kʋɩlen-biisi, la dũni soalgdgã no-rԑԑs sẽn be dũni vẽenega pʋgẽ, la Wẽnnaam yolsgã sẽn duumda magazẽ, la Wẽnnaam goama sẽn be dũni kãnga ludga poore, n yit dũni soalgdgã pʋgẽ n watẽ, la lislaoongã soolem wĩntoog la a yẽgr la a meoonga, la laahr dũni wã tiira, la koԑԑg sẽn welsda, la welsg sẽn yaa vẽenega, la daliil sẽn tar pãnga, la Wẽnnaam zaata la A yʋyã la A sɩf-rãmba la A yԑla no-rԑԑs sẽn tar ziiri, la nin-buiidã dũni wubda, la lislaoongã sẽn yaa nedengã meng-menga koom la a vẽenem, la ãdem-biisã hɩkma wã hakɩɩka, la nin-buiidã toagend sẽn yaa kãndgd hakɩɩka, ne a sẽn peegd-b n rabd zu-noogã pʋga.

Rẽ poore, ad ninsaalã tara lislaoongã sãri gafo, la hɩkma gafo, la doaag gafo, la tũudum gafo, la saglg la boolg gafo, la zɩkr gafo, la tagsg gafo. A yaa gaf-yɩleng a yembr sẽn tigim gaf-rãmb wʋsgo, tɩ nebã segd n leb beenẽ n bao b tʋls-solgdɩ wã fãa gilli.

A le yaa saasẽ gaf sẽn yaa gaf-rãmb ro-yɩlenga, n vẽnegd masaall n wilgd waliimbã la sɩdã rãmb la bãngdbã la sɩdgdbã fãa gill yẽga la b soyã toor-toora –ned fãa ne a rẽ- tɩ yaa masaall sẽn zemsd ne soy-kãnsã yembr fãa mokre, la a tar tõog sẽn na n nuur-ba, n le sakd soy-kãnsã yembr fãa tũubu, la a tar b sʋʋrgã tõogo.

Bɩ f ges muugiza wã sẽn be Alkʋr’aana aaya-rãmbã yɩlemga pʋga, yɩlemg ning neb sãnda sẽn tẽed t’a yaa sabab n wat ne zangra. Alkʋr’aana sẽn yaa zɩkr gaf la doaag gaf la boolg gafa yĩnga, ad yɩlemgã yaa bũmb sẽn segde, a pʋs n yaa darʋʋre, yɩlemgã meng pʋs n ya a zĩigẽ. A ka wala tudgdbã sẽn tẽeda ye. Bal zɩkrã nuurda ne yɩlemgo, la doaag me tabenda ne lebsgo, la saglg la boolg me kengda ne yɩlemgo.

La woto bala, sẽn mik tɩ nin-yԑng ka tõe n karem Alkʋr’aana fãa gill a yembr wakat a yembr pʋga, la a yaool n tõe n karem sʋʋr a yembr noor wʋsga, rẽ n so tɩ b kẽes Alkʋr’aana bõn-baoodsã sẽn yɩɩd ne yõoda sʋʋr-wogdã wʋsg fãa pʋgẽ, tɩ sʋʋra fãa lebg wala alkʋr’aana-bila. Rat n yeel tɩ bõn-baoodsã sãnda yɩlma a pʋgẽ, wala wẽn-yembgã la Alkɩyaoom yikrã la a nabi Musa yellã, tɩlgr be a yĩnga, sẽn na yɩl tɩ Alkʋr’aana ra mong ned ba yembr bũmb ye.

La woto bala, ad tʋls-solgdɩ wã yaa wʋsg wala tʋls-vẽenesã me sẽn yaa wʋsga, la ninsaalã tara tʋlsem ne sãnda vʋʋsem fãa pʋgẽ, wala yĩngã sẽn dat “pemsmã”, la yõorã sẽn dat “Huwa” wã. La a tar tʋlsem ne sãnda lԑԑr a yembr fãa pʋgẽ, wala “Bɩsmillaahɩ” wã. Woto bala, ad yaa tʋlsmã yɩlemgã n wat ne aaya-rãmbã yɩlemgã.

Rẽ yĩng n kɩt tɩ Alkʋr’aan-wagellã  yɩlemd aaya-rãmbã, sẽn wilgd tʋls-kãnga, sẽn na yɩl n nek ninsaalã la a kẽes-a nonglem ne yԑl nins sẽn yɩlemda, la sẽn na yɩl n paas nonglmã la yamleoogã ne-a.

La woto bala, ad Alkʋr’aana yaa yẽbgda, ad-a le yaa dĩin-vẽenegã yẽgre, n le yaa lislaoongã soolma yel-yẽgã, a le yaa nebã zĩid-n-taar vɩɩmã toeemda, la a yaa leokd ne sʋksg nins nebã sula toor-toora sẽn sʋksd n yɩlemdẽ wã. La sik ka be tɩ yaa tɩlԑ ne yẽbgda t’a yɩlem sẽn na yɩl tɩ tabend ye. Sik ka be tɩ yaa tɩlԑ ne-a me t’a yɩlemd n paasdẽ, sẽn na yɩl n keng yella ye, n le yaa tɩlԑ ne-a me t’a tabend la a sɩdg la a yɩlem sẽn na yɩl n paas yellã pãnga.

La woto bala, ad Alkʋr’aan-wagellã tẽegdame la a gomd masaala-bԑd la hakɩɩk-zulums yelle, rẽ n kɩt tɩ yaa tɩlԑ tɩ b yɩlem noor wʋsgo, la alhaal toor-toore, sẽn na yɩl n yõgen-a la a tabend-a sũyã fãa gill pʋgẽ. La ba ne rẽ fãa, ad-a yɩlemgã yaa ne sʋʋrg bala, ãmmaa hakɩɩk pʋgẽ: Aayar buud fãa tara maana rãmb wʋsgo, la yõod sẽn tigmi, la nems la daragԑ-rãmb wʋsgo, tɩ b tẽegd zĩig fãa pʋgẽ, sẽn na yɩl n vẽneg maana la yõod la bõn-baoodg a to sẽn yõsg ne a to wã.

La Alkʋr’aana gom-mumã la a gom-gilã masaal-rãmb sãnda sẽn be naanegã masaala-rãmbã pʋga, ad a yaa kãndgra muugiza wã bõn-pɩndga, la a ka tõe n yɩ bũmb sẽn na n tik n yet tɩ ka zems ye, wala wẽn-ka-be wã rãmb sẽn tẽed to-to wã ye, a le ka sabab n wat ne zang ye.

La fo sã n yeel tɩ yaa bõe yĩng tɩ Alkʋr’aana sẽn bʋ-n-manegã ka gomd bõn-naandsã yell wala filozofɩ wã sẽn gomda? La yaa bõe yĩng t’a gomd masaala sãnd mumd-mumdi, la a welsd sãnda ne vẽenegr sẽn yaa vẽeneg nebã fãa gill gesgẽ, la a ka namsd ned ba a yembr tagsga? 

Leokr sẽn be beenẽ, yaa tɩ filozofɩ wã menma hakɩɩkã sorã. La hakɩɩkã kaorengã la gom-biis nins sẽn loogã pʋgẽ, fo fasma sõma tɩ Alkʋr’aana sẽn bʋ-n-manegã gomda dũni-kẽengã yelle, sẽn na yɩl n wilg a mengã zaata la A sɩf-rãmbã la Wẽnnaam yʋyã. Rat n yeel tɩ yaa sẽn na yɩl n fasem nebã dũni-kẽengã gafã maana-rãmbã, la a wilg-b b Naanda sẽn yaa soaba. Sã n yaa woto, ad Alkʋr’aana ka get bõn-naandsã b menga yĩng ye, A get-b-la b Naanda yĩnga, la ba ne rẽ fãa, A gomda ne-b gilli.

La ãmmaa bãng-yaoogã la yam-bãngrã, yẽ geta bõn-naandsã bõn-naandsã yĩnga, sẽn le paasde, a gomda ne bãngdbã bala.

Sã n yaa woto, sẽn mik tɩ Alkʋr’aana sẽn bʋ-n-manegã kɩtdame tɩ bõn-naandsã lebg daliil-rãmb la daliil-vẽenesa, sik ka be tɩ yaa tɩlԑ tɩ daliil yɩ vẽeneg pay ye, la a yɩ bũmb sẽn sakd fasemg yolyol la nana-nana neba fãa gill nengẽ ye.

La sẽn mik tɩ Alkʋr’aana yaa kãndgd n gomd ne nebã sula fãa gilla, la sẽn mik tɩ nebã sull sẽn tɩ yɩɩd ne waooglem yaa sẽn pa-b nin-bԑda sulla, kãndgrã kɩtdame tɩ yaa tɩlԑ tɩ b nags teed nins sẽn tar yɩɩdlma ne gom-mumã, la b pẽneg yel-zulumsa ne bilg-rãmb wẽebo, la b ra tedg yԑl nins sẽn yaa vẽeneg b nin-gesgã pʋga ne nags-tood ye, sẽn na yɩl n da wa kẽes-b tudgr pʋgẽ ye.

Bilgri: A gomda wĩntooga yell n yetẽ: “Ad-a yaa fitl la lamp sẽn gilgdi”, a ka gomd wĩntooga yell wĩntoogã mengã la a yalɩ wã yĩng ye, ayo, a gomda a sẽn yaa bõn-gilg sẽn tar tũnugra, la sãntr sẽn tar nao-kẽndra yelle. Bal tũnugrã la nao-kẽndrã yaa minwoaar sẽn get n bãngd Naanda.

Yaa sɩda, a yetame tɩ: (la wĩntoogã zoetame) ﴿والشمس تجري﴾ a sẽn yeel tɩ (a zoetame) wã  ﴿تجري﴾  woto kɩtdame tɩ neba fasemd b Naanda zɩslma sẽn yaa to-to, ne a sẽn togs tõogã tʋʋmã kẽnesga sẽn tũnuga, sẽn be waoodã la tʋʋlgã la wĩndgã la yʋngã gilgra pʋga. Sã n yaa woto, ad zoe-kãnsã la gilg-kãnsã, ba ta hakɩɩka sẽn yaa soaba, a ka tõe n sãam tũnugr ning b sẽn data ye, a le ka tõe n sãam b sẽn naan-a to-to wã la b sẽn ne-a to-to wã ye.

La woto bala, a yetame tɩ: (La D naan wĩntoogã tɩ yaa fitla)  ﴿وجعلنا الشمس سراجا﴾  . A sẽn yeel tɩ (fitla) ﴿سراجا﴾  , woto sɩfda dũni wã wala etaase, tɩ bũmb ning sẽn be a pʋgẽ wã yaa nag-teed la rɩ-rãmb la teed sẽn yaa darʋʋre, sẽn segl n bĩng ninsaalã la bõn-vɩɩsã yĩnga, la a sɩfd wĩntoogã wala fɩtl b sẽn nome. Yaa ne woto la a kɩtd tɩ nebã fasemd b Naanda yolsgã la A maan-neerã.

Bɩ f ges mosa, yaa bõe la filozofɩ wã sẽn yaa gom-toog soaba yeta? Ad a yetame tɩ: Ad wĩntoogã yaa bõn-gilg sẽn bedem n tar bugum, n kɩt tɩ ãd-bԑdã sẽn yɩgdã gilgd a kɩrenga, la a wilgd t’a bedlma ya a woto, a yalɩ wã ya a woto la woto. A ka kõt ninsaalã bãngr sẽn pid ye, ayo, a kẽesd-a-la yԑԑsg la rabeem la yirbgu. A ka gomd a yell wala Alkʋr’aana sẽn gomda ye. D sã n na n rɩk makr ne woto, fo fasemdame tɩ filozofɩ wã masaala-rãmbã pʋgẽ wã yaa vɩʋʋgo, t’a yɩngã pid ne gom-zaalã, bɩ f gũus t’a sʋʋrgã sẽn nags tɩ be neera ra wa belg-f tɩ f wa tall zʋg-wẽng ne Alkʋr’aana muugiza ye.

Tẽegre: Ras’ha piig la a naas n soabã sẽn be Rasaa’ɩlʋn Nuura pʋga, b sẽn wall-a soab ne laarabiimda, tara masaala a yoobe, tɩ masaall a naas n soaba a yembra tar masaal-zulums a yoob sẽn vẽnegd muugiza-rãmb piig la a nu sẽn yi Alkʋr’aana sẽn bʋ-n-maneg muugiza-rãmbã sẽn ta kõbg pis-naasa pʋgẽ. D na n teka a woto, la d sek d mens ne sẽn be beenẽ wã. Fo sã n dat bɩ f leb beenẽ tɩ f na paam muugiza-rãmbã sãnem-boya.

D kota Foo Wẽnnaam tɩ F kɩt tɩ Alkʋr’aana yɩ d tɩp-tɩɩm bãasã fãa gill pʋgẽ, la d nen-yubsd d vɩɩmã pʋgẽ la d kũumã poore, la d tũud-n-taag dũni wã pʋgẽ, la d nen-yubsd yaoogã pʋgẽ, la d sugsd Alkɩyaoom daare, la nuura sɩraatã zugu, la gɩdgr ne bugmã, la d zĩid-n-taag Arzãna pʋgẽ, la d kãndgd la d taoor-soab yel-sõmsã fãa gill pʋgẽ, ne Fo yɩɩdlmã la F kũunã la F waoorã la F yolsgã, yaa Foo kõtbã fãa gill kõta, la yolsdbã fãa gill yolsda. Aamiin. D kota Foo Wẽnnaam tɩ F pʋʋs la F tɩlg ned ning b sẽn sik Akʋr’aana n kõ wã, la a zakã rãmb la a sahaabsã fãa gilli. Aamiin.

اَللَّهُمَّ اجْعَلِ الْقُرْآنَ شِفَاءً لَنَا مِنْ كُلِّ دَاءٍ وَمُؤْنِسًا لَنَا فِي حَيَاتِنَا وَبَعْدَ مَمَاتِنَا، وَفِي الدُّنْيَا قَرِينًا وَفِي الْقَبْرِ مُؤْنِسًا وَفِي الْقِيَامَةِ شَفِيعًا وَعَلَى الصِّرَاطِ نُورًا وَمِنَ النَّارِ سِتْرًا وَحِجَابًا وَفِي الْجَنَّةِ رَفِيقًا وَإِلىَ الْخَيْرَاتِ كُلِّهَا دَليِلا وَإِمَامًا بِفَضْلِكَ وَجُودِكَ وَكَرَمِكَ وَرَحْمَتِكَ يَا أَكْرَمَ الأَكْرَمِينَ وَيَا أَرْحَمَ الرَّاحِمِينَ آمين. اَللَّهُمَّ صَلِّ وَسَلِّمْ عَلَى مَنْ أُنْزِلَ عَلَيْهِ الْفُرْقَانُ الْحَكِيمُ وَعَلَى آلِهِ وَصَحْبِهِ أَجْمَعِينَ. آمين.

Sa’ɩɩd An-nuursi