Rẽenem gomdã
NAVIGATION
1. Page
Rẽenem gomdã
Bɩsmillaahɩ (بسم الله) yaa yel-sõmd buud fãa zu-raoogo. Rẽ n so tɩ tõnd me na n sɩng ne rẽ.
Yaa foo yõore, bãng tɩ gom-kãnga sẽn tar albaraka, a ka lɩslaoongã tagems bal ye, a yaa bõn-naandsã fãa gill wẽnd-yʋʋr-tẽegre, ne b alhaal zɩlemde.
F sã n dat n bãng tɩ (بسم الله) “bɩsmillaahɩ” wã yaa pãn-kẽeng sẽn ka sate, la albarak sẽn ka tar tɛka, bɩ f ges bilg-koԑԑg ning sẽn be yẽos-kãnga pʋga, la f yok f tʋbr n kelg-a.
Ned sã n dat n gõ laarb-rãmbã we-raadẽ wã, sẽn yaa puraagẽ dambã, yaa tɩlԑ ne-a t'a tõk ne tẽnga naaba, n bao koglg a nengẽ, bʋl yĩng t'a paam tɩlgr n yi so-gɩtba wẽnga, la a le paam a bõn-baoodse.
Sã n pa rẽ, a na n paa halakr la naong pʋgẽ, la a na n le yɩɩ zu-be-ned a bɛɛba taoore, a le ka na n paam a bõn-baoodsã sẽn ka tar tɛka me ye.
La gõob sẽn wẽnd woto, la rap a yiib yi n na n tɩ gilg we-raoogã pʋgẽ. B ned a yembra yaa gãneg-m-meng soaba, la a to wã yaa waoog-m-meng soaba. Gãneg-m-mengã soab tɩ baoa tẽng-naab n sigi, n bao tõkr ne-a. La waoog-m-mengã soab ka bao tẽng-naab n sig n bao tõkr ne-a ye.
Ned ning sẽn baoa tõkr ne naabã gilga ne laafɩ zĩig zãng fãa. so-gɩt buud fãa sã n yek-a la a sẽn yet-a: Ad mam gilgda ne tẽng-naab a zagl yʋʋr yĩnga. Tɩ rẽ yɩ sabab tɩ nin-wẽngã lak n bas-a, n ka maan-a wẽng ye. A sã n kẽ zãma buud fãa pʋgẽ a paamda waoogre, tẽngã naab zug maasem yĩnga.
La waoog-m-mengã soab namsa a gilgrã pʋgẽ, namsg kõbg toor-toor sẽn ka tõe n sɩfe. Tɩ yɛɛsg paam-a t'a rigda, t’a saad mosã n bõosdẽ, n lebg nin-yaalga sẽn ya valenga.
2. Page
Yaa foom yõor sẽn yaa belg-m-meng soaba, ad yaa foo la gilgdã, la we-raoogã yaa dũni-kãngã. Fo pãng-komsmã la f talemdã ka tar tɛk ye, fo bɛɛba, la f tʋlsem-rãmbã me ka tar saab ye.
Sã n mikame tɩ yaa woto, bɩ f tõk f mengã ne naab ning sẽn pa tar saaba, la bʋ-kʋdg soab ning sẽn soa we-rao-kãngã, sẽn na yɩl n tɩlg f meng n yi bõn-naandsã kosgo, la mosɩɩb buud fãa yɛɛsgo.
Yaa sɩda, ad gom-kãnga yaa sãnem-baoor sẽn tar albaraka. La fo pãn-komsmã la f talemdã sẽn ka tar tɛka tõkda foo ne tõog la yolsg sẽn ka tar tԑka. Tɩ gom-kãnga kɩtdẽ tɩ fo pãn-komsmã la f talemdã lebg sug-koatb a yiibu, b sẽn deegd b rãmb sugr kosgo, tõog la yolsg naab taoore.
Yaa sɩda, ad ned sẽn tʋmd ne gom-kãnga bilgr yaa wala rao sẽn kẽ sodaas zakẽ n tʋmd ne tẽnga yʋʋre, n pa yɛɛsd ned ba a yembre, a sẽn wa yaa ned ning fãa. Woto wilgdame, tɩ yaa ne tẽnga yʋʋre, la tẽnga nao-kẽndr yʋʋr yĩnga la a tõogd n tʋmd a tʋʋmã fãa, la a wind bũmb fãa gilli.
Hakɩɩka, tõnd da yeela goamã sɩngrẽ tɩ bõn-naandsã fãa gill yeta ne b alhaal zɩlma tɩ (بسم الله)"bɩsmillaahɩ" bɩ pa woto? Yaa woto.
Lat tɩ fo sã n yãnd ned t’a wa peeg tẽng rãmb zãng ne pãnga, n tɩ bas zĩige, la a mõdg-b tɩ b tʋm tʋʋmde, f na bãng n wãag tɩ nin-kãnga soaba ka tʋmd ne a meng yʋʋr ye, le ka ne a meng pãng me ye. Ad nin-kãnga soaba, yaa sodaag sẽn tʋmd ne tẽnga yʋʋre, la a tik tẽng-naab pãnga. Woto bala, ad bũmb fãa tʋmda ne Wẽnnam yʋʋre, hal n tɩ tãag tɩ-bil-yamre, la tɩ-bi-bãooneg sẽn yaa wa zarat bilgri, sẽn zɩt tɩ-bɛdã b zutẽ wã, la b zãad zɩɩb wala tãmsa. Sã n yaa woto, tɩɩg buud fãa yetame tɩ (بسم الله) "bɩsmillaahɩ" n pidsd a wila ne tɩ-biis sẽn yi yolsg-naab neema wã pʋgẽ n kõt tõndo, tɩ yaa wala raag-biig sẽn yɛdg a teed raagẽ n na n koose.
3. Page
Yãgr buud fãa me yetame tɩ (بسم الله) "bɩsmillaahɩ" n lebg rɩɩb rʋk sẽn yi Tõog-naab ragendã rɩɩb rʋgd pʋsẽ, b sẽn segend a soab pʋgẽ rɩ-nood kõbg toor-toor sẽn yaa wʋsg n ka tar tɛka.
La albarak rũmsã: wa la niigã, yʋgma wã, piisã la bʋʋsã, b fãa gill yetame tɩ (بسم الله) "bɩsmillaahɩ" n lebg bĩisim ko-nif sẽn yi yolsg-naab neema wã pʋgẽ. N kõt tõnd rɩɩb sẽn yɩɩd sõmblem la yɩlemde, wala vɩɩm koom, ne Rɩlgr-naaba yʋʋre.
Ad bõn-bundi wã yẽgã la tɩɩsã la mõodã la b yẽg-baoonesã sẽn yaa wala harɩɩrã[1], b yetame tɩ "bɩsmillaahɩ", tɩ yɩ sabab tɩ b tõogd n poogd kug-kɛgengã la tãn-koɛɛngã, n poogd n yita, n yetẽ tɩ بسم الله" " (ne wẽnnaam yʋʋre) la “بسم الرحمن” (ne Wẽnnaam yolsgo), tɩ rẽ yɩ sabab tɩ bũmb fãa tũud b raabã.
Yaa sɩda, ad tɩɩsã yẽga sẽn tẽed kug-kɛgengã la tãn-koɛɛnga pʋgẽ yolyola, la a womd tẽn-gõngã pʋga, wala wilsi wã me sẽn tẽegd ween-vɩʋʋga pʋgẽ n womd tɩ-biisã. Yaa woto bala, la vã-põmpõma me be wĩnto-kɛgenga pʋgẽ kiuus-saare. Woto fãa gill yagsda natiralɩst-rãmbã[2] yagsg sẽn tar pãnga, b neng taoore, n lut b nina – n kãabd-b tɩ Wẽnd na maan-y zoense- la a yetẽ tɩ hal ba ne keglmã la tʋʋlmã yãmb sẽn tika, b pa tʋmd rɩlla ne Wẽnnaam saglga. Ad tɩɩsa yẽg-bãoones nins sẽn yaa faas wala harɩɩra poogda kugã wala Nabi Musa rasaarã "Wẽnnam tɩlgr be a yĩngã" tɩ yaa tũub ne Wẽnnaam saglga sẽn yeel tɩ:
﴿اِضْرِبْ بِعَصَاكَ الحَجَرَ﴾ (سورة البقرة:٢ -٦٠)
“Wẽ kugra ne f rasaarã” (bakara 60).
[1] Harɩɩr: sʋlg gĩsi.
[2] Yaa bãngdb nins sẽn yete, tɩ bũmb fãa vɩɩ ne a meng pãnga.
4. Page
Ad vã-bʋgsã sẽn yaa faasa karemda Wẽnnam yʋʋrã, wala Nabi Ibraahɩm yĩn-wilã sẽn da karemda, b sẽn wa n lob-a bugma pʋga
﴿يٰنَارُ كُونِي بَرْدًا وَسَلَٰمًا﴾ (سورة الأنبياء: ٢١-٦٩)
“Yaa foom bugum yɩ maasg la tɩlgre, nabila Ibraahɩm yĩngã”. (Anbiya’ 69).
Sã n mikame tɩ bũmb fãa gill me yetame tɩ (بسم الله) "bɩsmillaahɩ" hakɩɩk pʋgẽ, tɩ rẽ yɩ sabab t'a takd Wẽnnam neema wã n kõt tõnd ne Wẽnnam yʋʋra, sã n yaa woto, yaa tɩlԑ ne tõnd me tɩ d yeel tɩ (بسم الله) "bɩsmillaahɩ" la d kõt ne Wẽnnaam yʋʋre, la d reegd ne Wẽnnaam yʋʋre. Sã n yaa woto, sõmba ne tõnd tɩ d ra wa reeg bũmb yam-yaal-yaal rãmb nins sẽn ka kõt ne Wẽnnaam yʋʋrã nengẽ ye.
Sʋkre: Tõnd yaooda neb nins tõnd sẽn raad teedã b nengẽ wã. Bɩ f togs-m wɛ! yaa bõe yaood la Wẽnnaam sẽn yaa teedã soaad hakɩɩka baood tõnd nengẽ?
Leokre: Ad yaood ning neema wã soab hakɩɩka sẽn dat tõnd nengẽ wã, sẽn zemsd ne neema ning a sẽn kõ tõnda, la laog ka-tɛk ning a sẽn kõ tõnda, yaa yɛl a tãabo:
Pipi soaba: yaa wẽnd-yʋʋr-tẽegre.
Yiib n soaba: yaa bark-pʋʋsgo.
Tãab n soaba: yaa tagsgo.
(بسم الله)"bɩsmillaahɩ"wã d sẽn yet sɩngrã wakata, yaa wẽnd-yʋʋr-tẽegre.
La (الحمد لله)"alhamdʋ lɩllaahɩ" wã d sẽn yet baasgã wakata, yaa bark-pʋʋsgo.
La tagsg n be b yiiba sʋka, tɩ ad neema-wagl-kãnsa sẽn ka tar to wã, yaa Tõog-naaba, Yemblem-naaba la Tikr-naaba yel-solemde, la a yolsgã kũuni, la wãnda fãa bãngra yaa tagsgo.
5. Page
Yaa wala nin-valeng sẽn na n wa fo nengẽ ne kũun-bedr sẽn yi naabã nengẽ, tɩ fo zoe n mok nin-valengã naoorã, n yaool n maan sõm-zɩɩlem ne kũuna soab sẽn yaa naaba. Ad yel-kãngã yaa yam-kaalg tɛk-tɛka. Ad pẽgr la nonglem maanego, ne sẽn kõtb yãmb neema wã vẽeneg-vẽenega, n yaool n yĩmd neema wã soab hakɩɩka, ad yẽ yam-kaalg yɩɩda nin-kãnga soab noor tusri.
Yaa foo yõore, f sã n ka rat n yɩ yalem wala nin-kãnga soaba:
bɩ f kõ ne Bɩsmillaahɩ,
la f reeg ne Bɩsmillaahɩ,
la f sɩng ne Bɩsmillaahɩ,
la f tʋm ne Bɩsmillaahɩ.
Wassalaam.