Kaoreng a yiib n soabã, Rɩtlã baoob ne yãbeeda wata ne talemdo

Kaoreng a yiib n soabã

بسم الله الرحمن الرحيم

﴿إِنَّ اللهَ هُوَ الرَّزَّاقُ ذُو القُوَّةِ المَتِينُ﴾ (الذاريات:٥٨)

(Ad Wẽnnaam la Rɩlgr-naab la pãn-kԑgeng Soaba) (Al-Zaarɩyaat, 58)

﴿وَكَأَيِّنْ مِنْ دَابَّةٍ لاَ تَحْمِلُ رِزْقَهَا اللهُ يَرْزُقُهَا وَإِيَّاكُمْ وَهُوَ السَّمِيعُ العَلِيمُ﴾ (العنكبوت:٢٩)

(Ad bõn-yãnemdg buud fãa rɩtl ka be a nugẽ ye, yaa Wẽnnaam n rɩlgd bãmb ne yãmb fãa, ad Wẽnnaam yaa Wʋmb-naab la Minim-naaba) (Al-Ãnkabʋʋt, 29)

Yaa yãmb a liimaoongã rãmba! Kaoreng ning sẽn loogã pʋgẽ, yãmb bãnga beemã maanegã naongã sẽn ta to-to, sã n yaa woto, bɩ y le bãng tɩ yãbeedã, yẽ la bãasã fãa sẽn tɩ yɩɩd wẽng la naong n namsd lislaoongã pʋgẽ vɩɩmã. Ad yaa yãbeedã n yaa sabab n wat ne kongrã la zãmsã la yaalgã, la a wat ne mongrã la talemdã la vɩɩma kengrã.

Yaa sɩda, ad yaalgã la vɩ-kengrã sẽn paam Yahʋʋd-rãmbã, sẽn baoodb dũni wã ne yãbeed n yɩɩd zãma buud fãaga, yaa daliil-vẽeneg sẽn sɩdgd yel-kãngã.

Yaa sɩda, ad yãbeedã vẽnegda a vũun-wẽngã sẽn sɩng ne bõn-vɩɩsã dũni wã zĩ-yaoleng pʋgẽ, n tɩ tãag a zĩ-sẽk pʋgẽ.

Ãmmaa rɩtlã baoobã ne bobl-m-meng ne Wẽnnaama, yẽ yõsga ne woto, yẽ yaa vʋʋsem zĩiga, a vẽnegda a vʋʋn-sõngã zĩig fãa pʋgẽ.

Tɩɩsã la bõn-bundɩ wã sẽn womda, sẽn yaa bõn-vɩɩs n tar tʋlsem ne rɩtlã, b sẽn yas b zĩisẽ wã tɩ yaa wala b bobla b mensã ne Wẽnnaam ne sek-m-menga, n pa maand yãbeeda yĩnga, kɩtame tɩ b rɩtlã zoet n wat b nengẽ, tɩ b rɩlgd b koambã n yɩɩd rũmsã.

Ãmmaa rũmsã, b sẽn baood rɩtlã ne yãbeeda yĩnga, kɩtame tɩ b maand nin-bãaneg la naong wʋsgo, n yaool n tõog n paam b rɩtlã kɩdga.

Rẽ poore, ad halaalã rɩtl-sõng ning b sẽn yãkd yolsgã sãnem-boyã pʋgẽ, n kõt rũm-bõones nins sẽn bobend b mensã ne pãn-komsmã la valemsgã zɩlemda, la ad rɩtl-yook ning rũm-wẽnsã sẽn ka tũ sor n baood ne yãbeeda, n maand nin-bãaneg la naong wʋsg n yaool n paama, yaa daliil sẽn wilgd tɩ yãbeedã yaa sabab n wat ne mongrã, tɩ bobl-n-mengã la sek-n-mengã me ya sabab n wat ne yolsgã.

La ninbuiidã wԑԑngẽ, tõnd sẽn ne Yahuud-rãmbã zuga, sẽn gadb dũni wã ne yãbeeda, la sẽn nongb dũni vɩɩmã ne nonglem-kԑgeng n yɩɩd neb a taabã, tɩ b yãt faagr la nin-bãaneg la kʋʋb la yaalg b rɩbaagã argԑk-yookã sẽn ka tar yõod wʋsga paoonga pʋga, la arzԑk ning b sẽn ka tar-a n maand bũmb sã n ka bĩngr bala, yaa bũmb sẽn wilgd tɩ yãbeedã n yaa nin-yaalmã la kongrã yẽgre.

La yԑl wʋsg n maand n wilgdẽ tɩ yãbe-ned bee bõn pʋgẽ wakat fãa, hal tɩ gom-kãngã “yãbe-ned yaa koangd la bõn-soaba” lebg yel-bũndi, tɩ nebã fãa gill rɩk-a tɩ yaa nao-kẽndr sẽn gũbgi, n gũusd-a.

Sẽn mik tɩ yellã ya a woto wã, fo sã n yaa ned sẽn nong ligdã wʋsgo, bɩ f ra bao-a ne yãbeed ye, ayo, bao-a ne sek-n-menga, sẽn na yɩl tɩ f paam ligdã wʋsgo.

Ad sek-n-mẽngã rãmb la yãbeedã rãmba, yaa wala neb a yiib sẽn kẽ nin-bedr nengẽ, tɩ ned a yembra gomd a sũurẽ n yetẽ: “A sã n kõ maam sor bal tɩ m kẽ a nengẽ n paam n põs waoodã sẽn be yɩngã, hakɩɩka rẽ tԑk seka maam, la a sã n kõ-m sor tɩ m zĩnd ba ya kɩrenga, rẽ meng yaa yolsg sẽn yi a nengẽ”

La ned a to wã, yaa wala yẽ tara hakԑ neb a taabã zugu, la yaa wala yaa tɩlԑ tɩ b waoog-a, yẽ yeta ne waoog-n-mengã, tɩ yaa tɩlԑ tɩ nin-bedrã zĩnig maam zĩ-bedr pʋgẽ, n kẽ zĩigã pʋgẽ ne yãbe-kãngã, n lik n yãnd zĩ-bԑdã n rat n tɩ zĩnd beenẽ, tɩ zĩigã soab lebs-a, n kɩt t’a zĩnd kɩrenga, tɩ sẽn ra yaa waagib ne-a t’a pʋʋs-barka, a bas n gẽeda zĩigã soaba, n pa pʋʋsd-a bark ye, ayo, a pʋs n sãbgd-a lame,  t’a yellã namsd zĩigã soaba.

La pipi nedã, yẽ kẽe ne gãneg-n-menga, n rat n zĩnd ba ya zaoog ning sẽn be kɩrenga, t’a sek-n-men-kãngã yɩ sabab tɩ zĩigã soab sũura yɩ noog ne-a, t’a yeel-a: Wa zĩnd zao-bedrẽ wã. La zĩigã bedlem sã n paas fãaga, la nedã bark-pʋʋsã la a sũ-noogã sẽn paasde.

Woto bala, ad dũni wã yaa Rahmaan-naab sãan-zaka, tɩ tẽn-laagã ya yolsgã rɩɩb-taable, tɩ rɩtlã daragԑ-rãmba la neema wã daragԑ-rãmba ya wala zaoose, la ned buud fãa tõe n bãnga yãbeedã vũun-wẽnga, hal ba ya yel-bõonesã pʋgẽ. Bilgri, bõs-rãmb a yiib sã n wa bõosd bũmbu, bõs ning sẽn yaa yãbe-ned n bõsd n yɩlemdẽ wã yella namsda ned buud fãa, tɩ yaa sabab tɩ b ka kõt-a bũmb ye, la b yaool n maand nin-bãan-zoeer ne bõs ning sẽn ka gomda wʋsga, la b kõt-a a tʋlsma.

Bilgri: Gõeem-kaalem sã n paam foo yʋngo, fo sã n rat n tõog n gũs yaa fo sẽn na n ra maan soagl ne gõeem-kaalmã ye, fo sã n bao gõeemã ne yãbeed n yetẽ tɩ: Ges wԑ, yaa wakat bʋg la gõeemã na n yõk maama? Wakat bʋg la mam na n gũsi? Gõeemã ka na n tol n yõk foo ye.

Bilgri: Fo sã n kolld ned ne yãbeed n rat n maneg yel-bedre, n yetẽ tɩ: Yaa bõe yĩng t’a na n pa wa? Bõe yĩng t’a kaoosdẽ? Fo yãbeedã na n wa saasa fo sugrã, tɩ fo bas nedã kollg n yik n looge, tɩ nedã ledg n wa minit a yembr pʋgẽ bala, tɩ yell ning yãmb sẽn ra tẽed manegra sãame.

Ad yel-kãngã maana wã, la a yõodã rat n yeelame tɩ: Wala bur-gɩrg paoong sẽn yaa tɩlԑ tɩ pʋʋg la zԑԑg la masĩn-wԑrdg la bulãnzeeri zĩnda, ad woto bala, yԑlã ne taabã tũnugr rata maag-n-menga. La yãbe-nedã yãbeedã sẽn kɩt t’a ka tar maag-n-menga yĩnga, kɩtame t’a ka gũusd daragԑ-solgdsã sẽn be yԑl nins sẽn pʋgd taaba pʋga ye, wakat-kãnga, ĩmmaa t’a yɩk-n-gãng n tɩ lʋɩ, pa rẽ bɩ a bas daragԑ-kãnsã yembr saoogo, tɩ yɩ sabab t’a ka tõog n rʋ n ta a sẽn ratɩ wã ye.

Yaa yãmb m ma-biis nins rɩtlã yɩɩr sẽn kɩt tɩ b yirbi, la neb nins dũni wã yãbeed sẽn kɩt tɩ b yirbi, yaa wãn-wãn tɩ yãmb wa tɩ tʋmd yaalgã tʋʋm kõbg toor-toore, ba ne a sẽn yaa bũmb sẽn namsd ninsaal n yaa ballog ka-tԑka, la y reegd arzԑk buud fãag n ka baood n na n bãng a yaa halaal bɩ a yaa haraam, n rɩkd yԑl wʋsg sẽn yaa laahr vɩɩmã yԑl n kẽesd a pʋgẽ, hal tɩ yãbeedã yĩng mi n kɩt tɩ yãmb bas zakã sẽn yaa lislaoongã zeng-rao-kẽeng a yembra kũuni, tɩ zakã yaool n yaa sabab n wat ne barka, la a tusd ballog-rãmbã n zãagd ned buud fãa? La ned ning sẽn bas zakã yãkre, sik ka be tɩ arzԑk alkadr sẽn ta zakã la a na n kong ye, ĩmmaa t’a na n sãama yel-yaals pʋgẽ, ĩmmaa tɩ mosɩɩb paam-a tɩ arzԑkã tũ rẽ n yi.

B sʋka maam yel-solemd sẽn yaa hakɩɩk tagsg zãmsd pʋgẽ, la yɩɩ dũni gill zabrã loogr poor ne yʋʋm a nu: Yaa bõe sabab n wat ne komã la arzԑkã menengã la yĩisã bãasã sẽn paamd lislaambã?

Tɩ mam yeel zãmsdã pʋgẽ:

Ad arzԑk ning Wẽnnaam sẽn kõt tõnda, sãnda pʋgẽ, A ratame tɩ tõnd yãk arzԑkã sẽn pʋɩ piig yembr n kõ zaka. La sãnda pʋgẽ, A ratame tɩ d yãk sẽn pʋɩ pis-naas yembr n kõ zaka, sẽn na yɩl n paam talsã doose, la yɩ sabab t’A tus b beemã la b sũkiirã n zãag-do. La tõnd raaba wʋsga kɩtame tɩ tõnd ka yãkd zakã ye, tɩ Wẽnnaam yãk zakã tõnd sẽn bas tɩ naag taaba, pis-naas pʋgẽ pis-tã, la piig pʋgẽ nii.

Sẽn le paasde, A le kẽe yʋʋmd fãa pʋgẽ n yãk kiuug a yembr n yet tɩ d sõs kom sẽn tar yõod pis-yopoe. La tõnd zoe d yĩisã noosem n ka tõog n sõs kom-noogã sẽn yaa koԑԑgã ye, tɩ Sɩd-naab a Wẽnnaam rogl tõnd no-loeer kõbg a to, sẽn tar mosɩɩb kõbg toor-toor pis-yopoe, yʋʋm a nu pʋgẽ, sẽn na yɩl n sɩbg tõndo.

Sẽn le paasde, daar fãa lԑԑr pisi la a naasã pʋgẽ, A baoodame tɩ d yãk lԑԑr a yembr n tʋm Wẽnnaam tʋʋm-bԑd[1] sẽn yaa noog n yaa nuura n tar yõodo, tɩ tõnd maan kʋɩɩng n ka kɩs wakatã la tũudmã ye, n rɩk lԑԑr a yembrã n naag ne lԑԑr-rãmb nins sẽn kellã n yeebe, tɩ Sɩd-naab a Wẽnnaam rogl tõnd pʋʋsg kõbg a to sẽn tar tʋʋm-kegemse, yʋʋm a nu tõre, sẽn na yɩl n yaaf tõnd zũnuub-rãmbã.

Mam goma woto n kell n neke, tɩ mam tags yellã zugu, n bãng tɩ hakɩɩk-bedr n be tags-zãmsd kãngã pʋgẽ, wala b sẽn vẽneg la b sɩdg “Gomd pisi la a nu n soabã” pʋga, b sẽn wa n maan mak-n-taar nin-puk-paallã la Alkʋr’aana bʋʋdã sʋka, tɩ zʋg-wẽnsã fãa gill yẽgra la yõs-taabã sẽn be ninbuiidã zĩid-n-taar vɩɩmã pʋga fãa gilli, yaa gom-biis a yiibu sababo:

Pipi soaba: Mam sã n paam n rɩ n tɩge, ned a to kiid kom ka pak maam ye.

Yiib n soabã: Fo tʋm tɩ mam rɩ.

La bũmb ning sẽn kɩt tɩ gom-bi-kãnsã b yiibã ruumdẽ wã, yaa rɩbaagã rɩɩba la zakã basbã.

[1] Wakat a nũ wã pʋʋsgã

La tɩ-yԑng tãa ning sẽn tõe n tɩbs zĩid-n-taar vɩɩmã bã-wẽn-kãnsã b yiibã, ya b sẽn na n maan zakã kũun tɩ yaa waagiba, la b tʋm ne-a wala vɩɩm nao-kẽndr sẽn gũbgi, la b harem rɩbaagã.

Bal zakã yãkrã pa ninbuuidã yembr-yembra la sula vɩɩma zu-noogã zeng-rao-kẽeng bal ye, ayo, a yaa ninbuiidã vɩɩmã zu-noogã zeng-rao-kẽenga, pa rẽ bal ye, a pʋs n yaa nedengã vɩɩmã ruumg zeng-rao-kẽenga. Bal nin-buiidã tara buk a yiibu: Yaa nin-bԑdã sẽn yaa ra-kãtbã, la poorẽ rãmbã sẽn yaa talsã. La zakã n yaa sabab tɩ nin-bԑdã sẽn yaa ra-kãtbã yolsdẽ la b manegd poorẽ rabã sẽn yaa talsã, tɩ poorẽ rãmbã sẽn yaa talsã me waoogdẽ la b sakd n pʋgd nin-bԑdã sẽn yaa ra-kãtbã. Sã n pa rẽ, wẽgdã la maan-pãngã na n yii yĩngra n kiig talsã zugu, tɩ sũkiirã la kɩɩsgã me yi poorẽ rãmbẽ wã n rʋʋg ra-kãtbã nengẽ. Tɩ ninbuiidã sul a yiibã be alhaal zabr la yõs-taab pʋgẽ wakat fãa. Tɩ yellã kell n kẽng bilf-bilf a woto, hal tɩ sul a yiibã wa tɩ kẽ taab n teeg taab ne tʋʋm la arzԑk-zug zaba, wala sẽn maan Rusi wã.

Yaa yãmb a nin-wagla! La yaa yãmb a sũ-vɩɩs rãmba! La yaa yãmb a yoalsdb la a maan-neer rãmba! Ad maan-neerã sã n pa yɩ ne zakã sore, a tara naong a tãabo. Pa rẽ meng ye, sasa ninga a pʋs n ka na n tall yõod ye. Bal yam pʋgẽ, fo tãasda talgã sẽn yaa miskɩɩna, bal fo ka kõt-a Wẽnnaam yĩng ye, n ning-a tãasgã bãns-roog pʋgẽ, tɩ yɩ sabab tɩ fo me ka le tõe n paam a kos-tɩ-reeg-yɩlengã ye.

Sẽn le paasde, fo maanda sõm-zɩɩlem ne neema wã, bal fo ningda f yamẽ wã, tɩ yaa foo la arzԑkã soaba, la hakɩɩk pʋgẽ, fo pa yɩ rɩlla Sɩd-naab a Wẽnnaam arzԑkã pʋɩɩb tʋʋm-tʋmd A sẽn rɩk tɩ f pʋɩ A yembsã.

La fo sã n kõ ne zakã yʋʋre, fo paamda yel-sõmde, bal fo kõo Wẽnnaam sorã yĩnga, la f le pʋʋs bark ne neema wã. Ad ra ka segd tɩ nin-kãngã soaba bãng foo ye. Sã n yaa woto bɩ f ra sãam a ziira ye, sẽn na yɩl t’a doaagã a sẽn kot n kõt fooga yɩ doaag sẽn reegde.

Yaa sɩda, fo sẽn na n rɩk ligd alkadr sẽn ta zak pa rẽ bɩ maan-neere, pa rẽ bɩ sãra-rãmb a taab sẽn yɩɩd zakã, n bao mosɩɩb-rãmb wala maan-tɩ-b-yã wã la piuugã la tãasgã la yaalg bee yԑԑnẽ, n tõe rɩk n mak ne farid kũun ne maan-neer ne zakã yʋʋre? Pa rẽ bɩ a pʋs n tara bõe sẽn tõe n rɩk n mak ne faridã kũunã yel-sõmdã la a Wẽnnaam yĩngã la a doaagã sẽn reegda? Yel-kãnsã ka tõe n rɩk n mak taab ye!

سبحانك لا علم لنا إلا ما علمتنا إنك أنت العليم الحكيم

Yɩlemd be ne Foo Wẽnnaam, tõnd ka tar minim n zʋʋg bũmb ning Fo sẽn wilg tõnda ye, ad Foo Wẽnnaam la Minim-naab la Bʋʋd-mita.

اللهم صل وسلم على سيدنا محمد الذي قال: "المؤمن للمؤمن كالبنيان يشد بعضه بعضا" وقال: "القناعة كنز لا يفنى" وعلى آله وصحبه أجمعين، آمين.

D kota Wẽnnaam yolsg la tɩlgr n kõt d zug-soab a Mohammad, ned ning sẽn yeela tɩ “Muumi ne a to yaa wala meoongo, b sãndã kengda sãnda” n le yeel tɩ: “Sek-n-mengã yaa sãnem-baoor sẽn ka sate”, la d kot yolsg la tɩlgr n kõt a zakã rãmb la a sahaabsã fãa gilli, aamiina.

والحمد لله ربّ العالمين.

La pẽgr be ne Wẽnnaam sẽn yaa bõn-naandsã soabã.