Lam’a pisi soaba: Masaall sẽn gomd pʋ-peelem yelle

Lam’a pisi soaba

Masaall sẽn gomd pʋ-peelem yelle

Lam’a kãngã ra yaa “Masaall a yiib n soaba”  pipi masaal-bilã sẽn tar masaal-bõones a nu wã, sẽn be “Muzakɩra piig la a yopoe n soaba”  pʋga, sẽn be lam’a piig la a yopoe n soaba pʋga, la a nafa wã sẽn tar pãnga yĩnga, a lebga “Lam’a pisi soaba”.

Nekre: Ɩsparta[1] sẽn tar zu-noog la albark ninga tɩ d segd n pʋʋs Wẽnnaam bark a zugu, yaa tɩ d sã n na n rɩk-a n mak ne zĩis a taaba, wilgdame tɩ yõs-taab sẽn gẽdg ne zugund-baoob ka be wẽn-zoԑԑgã rãmb la sʋʋfɩɩmdã sorã rãmb la bãngrã rãmb sʋk ye, la yõs-taabã la zugund-baoob sẽn yɩt sabab n namsd neba me ka be beenẽ ye, ba tɩ sɩd-sɩd nonglem la zems-n-taar sẽn yaa darʋʋra sã n ka be b sʋka.

بسم الله الرحمن الرحيم

Ad aaya-kãngã:

﴿إنَّا أَنزَلْنَا إِلَيْكَ الْكِتَابَ بِالْحَقِّ فَاعْبُدِ اللهَ مُخْلِصًا لَهُ الدِّينَ أَلا لِلهِ الدِّينُ الْخَالِصُ﴾ )الزمر:٢-٣)

(Ad Tõnd sika gafã fo (nabiyaamã) nengẽ ne sɩda, bɩ f tũ Wẽnnaam n yɩlg f dĩinã Wẽnnaam yĩnga, ad dĩin sẽn yɩlg bee ne Wẽnnaam)

La Hadiis-kãngã:

"هَلَكَ النَّاسُ إِلاَّ العَالِمُونَ وَهَلَكَ العَالِمُونَ إِلاَّ العَامِلُونَ وَهَلَكَ العَامِلُونَ إِلاَّ المُخْلِصُونَ وَالمُخْلِصُونَ عَلَى خَطَرٍ عَظِيمٍ"

(Nebã fãa gill halakame, sã n pa bãngdbã. Bãngdbã me halakame, sã n pa tʋmdbã. Tʋmdbã me halakame, sã n pa pʋ-peelmã rãmba. La pʋ-peelmã rãmb me bee mosɩɩb-kaseng zugu).

Pa rẽ bɩ yaa wala nabiyaam sẽn yeele, Wẽnnaam yolsg la tɩlgr be a yĩnga.

Aaya-kãngã la hadiis-kãngã kengd n wilgdame tɩ pʋ-peelmã yaa yẽgr sẽn tar pãng lislaoongã pʋgẽ.

La d na n kẽe masaal-zulums ka-tԑk pʋgẽ, n vẽneg masaal a nu koԑԑg-koԑԑg sẽn gomd pʋ-peelmã yelle.

[1] Yaa tẽng sẽn be Turquie.

Pipi masaallã:

Sʋk-bedr sẽn tar pãnga: Yaa bõe yĩng tɩ dĩinã taoor-rãmb la bãngdbã la sʋʋfɩɩmdã[1] soya rãmba, neb nins sẽn yaa sɩdã la zems-taabã rãmbã, yõsd taab ne bao-n-põs-taaba, tɩ dũni wã rãmb la yam-yaalyaalã rãmba, pa rẽ bɩ hal ba ne menemdbã la munaafɩksã yaool n wʋmd taab tɩ zugund baoob ka be?

Tɩ zems-n-taarã yaool n ra yaa zems-taabã rãmb soolem, tɩ yõs-taabã me yaa bũmb sẽn yaa tɩlԑ ne munaafɩksã.

Yaa bõe n kɩt tɩ sɩdã ledg n kẽng munaafɩksã nengẽ, tɩ zɩlem-beedã ledg n wa sɩdã rãmb nengẽ?

[1] Yaa lislaoongã pʋgẽ sore, lislaamb sẽn tũudi, sẽn na yɩl n paam Wẽnnaam, ne nidg-pãng ne Wẽnnaam saglsã tũubu, la zãag-m-meng ne Wẽnnaam sẽn gɩdga, la yõorã wubri, la yɩlg sũurã n yi zʋg-wẽnse, la a zʋglg ne zʋg-sõmse. La sula sãnda n be sʋʋfɩɩmdã pʋgẽ sẽn lak n bas sɩdã n wat ne yԑl sẽn ka segd lislaoongã pʋgẽ, wala sẽn be lislaoongã sul a taabã fãa pʋga. La ka sʋʋfɩ-rãmbã fãa gill n tʋmd tʋʋm-kãnsã ye, neb nins sẽn pʋs n be sɩdã zuga yɩɩda sẽn kedgba noor wʋsgo, b sõorã pʋs n ka tõe n rɩk n mak taab ye. Rẽ yĩng kɩtame tɩ d sã n mi n na n gom sʋʋfɩɩmdã yel-kԑgã yelle, d ka segd n gom n gũbg ye, bal yel-kԑgã rãmb ka zem baa fʋɩ tẽeg-tɩrgã rãmb taoor ye. (lebgdã).

Leokr sẽn be beenẽ: D na n kẽe sabab-rãmb wʋsg pʋgẽ n vẽneg sabab-rãmb a yopoe sẽn wat ne yel-bed-kãngã sẽn zabd-sũura, la a yãbsd burkĩn-dambã n wilgi:

Pipi sababã: Ad sɩdã rãmb yõs-taaba ka wilgd tɩ b ka sɩd rãmb ye, la yam-yaalyaalã rãmb me zems-taaba ka wilgd tɩ b yaa sɩd rãmb ye. Ayo, ad dũni wã rãmb la polentikã rãmb la bãngrã rãmbã la rog-n-mikã rãmba, b zãma la b sull fãa tara a tʋʋm toor zall a sẽn tʋmde, la sõgeneg toor zall a sẽn sõgende, zĩid-n-taar vɩɩmã daragԑ-rãmbã pʋgẽ. Tɩ b keoorã b sẽn reegd b tʋʋmã pʋga, sẽn na tall n vɩɩmda me, yaa vẽeneg n le yaa toor-toore, tɩ ziirã la yʋʋrã la piuugã la nebã sakrã[1], b sẽn paamd b tʋʋmã pʋga me, yaa vẽeneg n le yaa toor-toore, gẽdg-taab ka be b ne taab sʋka, sẽn tõe n yɩ sabab n wa ne sẽk-taab la no-koeemr la bao-n-põs-taab ye, rẽ n kɩt tɩ b tõe n zems taaba, ba tɩ b sora sãang sẽn ta to-to.

La ãmmaa dĩinã rãmb la bãngdbã la sʋʋfɩɩmdã soya taoor-rãmba, ad b ned fãa tʋʋmd togenda nebã gilli, tɩ b kiuugã ligd me le ka yãk tԑk n yaa vẽeneg ye, tɩ b ziira zĩid-n-taarã pʋga, la nebã pʋgbã la nebã sakrã me, le ka yãk tԑk n yaa vẽeneg ye. Rẽ n so tɩ b fãa baood daragԑ a yembre, tɩ nus wʋsg me tõe n tẽegd n baood keoor la piuug a yembre, tɩ woto yɩ sabab n wa ne sẽk-taab la bao-n-põs-taabã yel-kãngã pʋgẽ, tɩ yɩ sabab tɩ zems-n-taarã lebg munaafɩklem, tɩ zems-taabã lebg yõs-taaba.

[1] Nekre: Ad nebã sakrã ka bũmb sẽn baood ye, a le ka bũmb sẽn maand yamleoog n baoodẽ ye, ayo, a yaa bũmb sẽn kõte. La b sã n kõ-f me, fo ka segd n maan yel-solemd bɩ sũ-noog ne-a ye. La ned sã n maan yel-solemd la sũ-noog ne-a, a pʋ-peelmã satame, t’a lʋɩ maan-tɩ-b-yã pʋgẽ. La zugundã la piuugã sẽn wat ne nebã sakrã la b toglgã, pa keoor ye, a le pa waoor-kũun ye, ayo, ad-a yaa pʋ-peelmã kaalmã sãbsg la namsgo. Yaa sɩda, sẽn mik tɩ nebã sakrã la b toglgã la piuugã la yʋʋrã rɩk n ledg pʋ-peelmã sẽn yaa tʋʋm-sõmsã vɩɩmã zĩigã, wata ne yel-wẽng wala yaoogã naongã, yaoogã kõom poora, wʋm-no-kɩdg sẽn sat yaoogã noor yĩnga, ad-a wilgdame tɩ d ka segd n bao nebã toglgã ye, ayo, d segd n zoe n zãag-a lame. Bɩ Piuugã baoodb la neb nins sẽn sesd n pʋgd yʋʋrã tʋb wu.