Sabab a naas n soaba

Sabab a naas n soaba: Ad kãndgrã rãmb yõs-taaba ne bao-n-põs-taabã, pa wilgd tɩ b ka tagsd yaoolem-neerã yell ye, la ka wilgd tɩ b yaa tags-koԑԑg rãmb ye. La menemdbã me zems-taabã ne sɩda, pa wilgd tɩ b tara yãbeed ne yaoolem-neerã ye, la ka wilgd tɩ b tara tags-wok ye.

Sẽn ra sõmb ne kãndgrã rãmb tɩ b gũus tẽeg-tɩrgã la pʋ-peelmã, la b gãd sɩdã la hakɩɩkã, la b bas yõorã yamleoogã sẽn yaa zoangã pʋgba, la b pʋg sũurã la yamã sẽn getb beoog-neerã yell la b baood-a ne b sũura fãaga, mikdame tɩ b ka tõe rẽ ye, tɩ rẽ yɩ sabab tɩ b kong ziir-bedr ning b sẽn tara, tɩ yɩ sabab tɩ b kẽ yõs-taab pʋgẽ. Wakat-kãng tɩ menengã rãmb yõorã yamleoogã pʋgba yĩnga, la yalem-wʋm-no-zoangã sẽn pa neya baas-neerã, n ne rũndã dɩrham wʋm-noog n yɩɩd beoog wʋm-no-kẽenga pʋgba yĩnga, b zemsda taab sɩd-sɩda, la b gãt taab sõma, sẽn na yɩl n paam rũndã nafa wã la a wʋm-noogã.

Yaa sɩda, ad nin-valems nins yam sẽn ki tɩ b pʋgd yõorã yamleoogã, b zemsda taab la b gãt taab sɩd-sɩda, sẽn na yɩl n paam dũni wʋm-noogã la a nafa wã b sẽn ne vẽenega.

Ãmmaa kãndgrã rãmba, b sẽn pʋgd sũurã la yãmã nao-kẽnd-bedrã yĩnga, n baood Laahr tɩ-biisã beoog yel-bԑdã yĩnga, b ra tõe n yalsa ne tẽeg-tɩrg meng-menga, la pʋ-peelem tԑk-tԑka, la gãd-taab la zems-taab sɩd-sɩda, tɩ ned fãa nong a to n yɩɩd a mengã, la a kʋʋd a mengã a to wã yĩnga, la bʋko, b ka tõog n bas nong-m-mengã ye, tɩ rẽ yɩ sabab tɩ maan-n-koeeg la maan-n-zʋʋk paam sor n kẽ b sʋka, tɩ yɩ sabab tɩ b kong zems-n-taarã sẽn yaa pãn-kẽengã yẽgrã, tɩ pʋ-peelmã tũ rẽ n valemse, tɩ sãang kẽ Laahra tʋʋmã pʋgẽ, tɩ Wẽnnaam yardã paoong lebg toogo.

La bã-kԑgen-kãngã tɩɩmã la sẽn watã:

Ya d tall pʋ-peelem, la d pug ne neb nins sẽn be sɩdã sorã zuga tũud-n-taara, wala sẽn be gom-bũndã sẽn yeela « nong-taab Wẽnnaam yĩnga » "الحب في الله". La d pʋg nin-kãnsã la d bas taoorã ziirã n kõ-ba. La d bas nong-m-mengã, n ning d yamẽ tɩ tõe tɩ ned buud fãa sẽn dɩk sɩdã sorã yɩɩda tõnd ne sõmblem la yɩɩdlem, a sẽn wa n yaa ned ning fãa.

Rẽ poore, ad ninsaalã sã n bãng tɩ tʋʋm-kɩdg sẽn tʋm ne pʋ-peelem sõmblem yɩɩda tʋʋm ka-tԑk sẽn pa tʋm ne pʋ-peelem, la a bãng t’a sẽn na n be poorẽ n pʋgda n sõmb n yɩɩd taoorã sẽn tar zɩɩb la naonga, a sã n bãng woto, yɩta sabab t’a tɩlg n yi bã-kãngã, la a tũ rẽ n paam pʋ-peelem, t’a tõe n tʋm a Laahra tʋʋma.