Sabab a nu n soaba

Sabab a nu n soaba: Ad pa kãndgrã rãmb sẽn yaa valems yĩng la b sẽn yõs-taab la b ka zemsd taaba ye. La pa menemdbã me n tar pãng la b sẽn zemsd taaba ye. Ad kãndgrã rãmb zems-n-taarã kaalma, yita tikrã zĩig sẽn be liimaoongã pʋga, la pãng ning sẽn be tikrã zĩiga. La menemdbã la yam-yaalyaalã rãmb me zems-n-taarã, ya b valemsgã la b pãn-komsmã sababo, bal b ka tar tikr zĩig b sũya pʋgẽ ye. La nin-valemsã zemsda taab ne zems-n-taar sẽn tar pãnga, bal b tara tʋlsem ne zems-n-taarã. La pãngã rãmb me zemsda taab ne zems-n-taar sẽn yaa valenga, bal b ka ne tɩ b tara tʋls-kԑgeng ne zems-n-taarã ye. Wala rũm-muksã sãnda alhaal sẽn yaa to-to wã, wala bõyeesã la we-baasã, sẽn vɩ yembr-yembr b sẽn ka tar tʋlsem ne zems-n-taarã yĩnga, tɩ we-bʋʋsã yaool n kẽnd zãma-zãma sẽn na yɩl n paam n põs kata wã wẽnga. Rat n yeel tɩ nin-valemsã lagem-taabã sullã tara pãnga[1], tɩ pãnsã rãmb lagem-taabã sullã yaa valenga[2].

La tagems la masaal-zulung n be Alkʋr’aana aayarã pʋgẽ n wilgd yel-kãngã, ne aayarã sẽn yeel tɩ « Tɩ pagb sẽn be tẽngã pʋgẽ yeele ». (Yʋʋsʋf

﴿وَقَالَ نِسْوَةٌ فِي المَدِينَةِ﴾ (سورة يوسف: ٢١/30)

Bal aayarã goma pagbã koԑԑg ne raoolem gomde  ﴿قَالَ﴾(kaala) tɩ yaool n yaa pʋglem sẽn fão n yɩlem noor a yiibu, la a gom rapã yell ne pʋglem gomde  ﴿قَالَتْ﴾(kaalat). Woto yaa tagmes-kɩdg sẽn wilgd tɩ pagbã, ba ne b sẽn yaa valems tɩ b yĩnsã yaa faagã, b zãma wã pãnga la a keglma paasdame, hal tɩ b tõe n wa lebg wala rapa.

Rẽ n kɩt tɩ b gom a yellã ne raoolem gomda, tɩ aayarã sẽn yeel tɩ ﴿وَقَالَ نِسْوَةٌ﴾ (Wa kaala niswatʋn) wã, yaa gomd gãnegr sẽn tolg n be neere.

[1] Ad sull ning pagbã sẽn lugl Amerik tɩ get pagbã hakԑ-rãmbã la b soog-m-mengã yella sẽn tar pãng la keglem la vũun nebã zug n yɩɩd sul a taaba sẽn be Eroapa, tɩ yaool n yaa pagb la nin-valemsa, yaa bũmb sẽn kõt tõnd gomdã pãnga. La Armana ne b paood n le yaa valems ninbuiidã sʋka sula sẽn tar pãng ninga kengda tõnd gomdã. (walldã)

[2] B yembr fãa sẽn tar pãnga yĩng kɩtame tɩ b ka tar tʋlsem ne gãd-ta-kԑgeng ye, tɩ b sẽn ka gãd-taab kԑgenga yĩng kɩt tɩ b sullã ka tar pãng ye. (lebgdã).

Ãmmaa rapã, sẽn tɩ yɩɩda, b sã n yaa weoogẽ laarb-rãmba, b sẽn teeg b mensã pãng yĩnga, kɩtame tɩ b zãma wã ka tar pãng ye. La wakat fãa b sẽn yԑԑsd la b maand gũus-m-meng tɩ yaa wala b yaa pabga yĩnga, kɩtame tɩ b gom b yellã ne pʋglem gomd aayarã pʋgẽ, n yeel tɩ

﴿قَالَتِ الأَعْرَابُ﴾ (سورة الحجرات: ٤١/٤٩(

«Kaalat Al-a’araabʋ » (Weoogẽ laarb-rãmbã yeelame).

Tɩ woto yaa gomd gãnegr sẽn zems sõma.

Ad sɩdã rãmb bobl-m-mengã ne Wẽnnaama, la b rɩk-b-meng-n-kõ Wẽnnaama b sẽn paamd sɩd-kũunã ne Wẽnnaama pʋga yĩnga, bũmb ning sẽn yaa tikr-zĩig sẽn tar pãng tԑk-tԑka, kɩtame tɩ b ka rɩkd b yԑlã n wilg neb  tɩ b sõng-b ye, ba tɩ b sã n bao sõngr me, b ka tolgd n gãd-taab ne kʋ-m-meng ye.

Ãmmaa dũni wã rãmba, b sẽn bas tikrã zĩig sɩd-sɩda yĩnga, kɩtame tɩ b kẽ valemsg la pãn-komsg pʋgẽ, dũni wã yԑl pʋgẽ, tɩ b getẽ mosa, tɩ b tara tʋls-kԑgeng ne teendb la sõngdba, n zemsd taab ne zems-n-taar sɩd-sɩda, pa rẽ bɩ mi n wa ta kʋ-m-meng to yĩng zĩigẽ.

La sɩdã rãmba, b sẽn ka tagsd sɩdã pãng ning sẽn be zems-n-taarã pʋga yella yĩnga, la b ka baood-a wã, kɩtame tɩ b kẽed yõs-taab pʋgẽ, bũmb ning sẽn tar baas-wẽng n namsd nebã pʋgẽ.

La ãmmaa menemdbã sẽn ka tarb sɩda, b pãn-komsmã sabab sẽn kɩt tɩ b bãng pãng-soalgdgã sẽn be zems-n-taarã pʋga yĩnga, kɩtame tɩ b paamd zems-n-taar ning sẽn yaa bõn-baood-bԑdã paoonga sore.

Ad yõs-taab ning sẽn ka segdã bãag ning sẽn paam sɩdã rãmbã tɩɩmã, ya d sẽn na n rɩk nug-sõog kԑgengã sẽn be aaya-kãngã pʋga “La y ra zab-taab n wa kong tɩ y pãnga loog ye” (sʋʋrat Al-anfaal 8\46),

﴿وَلاَ تَنَازَعُوا فَتَفْشَلُوا وَتَذْهَبَ رِيحُكُمْ﴾ )سورة الانفال: ٨/٤٦(

La d rɩk Wẽnnaam sagellã sẽn bʋ-n-manegã, sẽn gomd zĩid-n-taarã vɩɩmã yella, sẽn be aaya-kãngã pʋga «La y sõng taab ne manegr la wẽn-zoԑԑga » (sʋʋrat Al-ma’ida)

﴿وَتَعَاوَنُوا عَلَى البِرِّ وَالتَّقْوَى﴾ )سورة المائدة: ٥/٢(

Ya d sẽn na n rɩk aaya-kãnsã n maan d tʋʋma nao-kẽndre, la d zoe ne valemsg la pãn-komsem tԑk-tԑk n tɩ naag sɩdã rãmba, ne sɩd la kʋ-m-menga. La d bãng tɩ yõs-taabã yaa bũmb sẽn namsd lislaoongã namsg meng-menga, n le yaa sabab tɩ menengã rãmb tõe n tũ n tõog sɩdã rãmb faa-faaga.

Bãagã tɩɩm sẽn paasde, ya d bas d mensã nonglmã la d yɩ pʋ-peelem rãmba, la d zãag d mens ne maan-tɩ-b-yã la ziri.