Sabab a tãab n soaba

Sabab a tãab n soaba: Ad sɩdã rãmb yõs-taabã pa raab-kԑgeng kaalem la nin-yaalem yĩng ye, la menemdbã me zems-taabã pa b raab-kԑgeng yĩng ye.

Ad kãndgrã rãmb yõs-taabã sababa, ya b sẽn ka tʋmd sõma ne raab-kԑgengã yĩnga. la menengã rãmb me zems-taabã sababa, ya b valemsgã la b pãn-komsmã yĩnga, sẽn be b raab-kԑgengã kaalma pʋga. La bũmb ning sẽn kɩtd tɩ kãndgrã rãmb basd raab-kԑgengã n pa tʋmd ne-a sõma wã, tɩ yɩt sabab n wat ne yõs-taabã la bao-n-põs-taabã, yaa yel-sõmdã raaba wʋsg-wʋsga yĩnga –bũmb ning sẽn yaa yel-sõng Laahra baoob wԑԑngẽ wã- la sek-m-mengã kaalmã Laahra tʋʋm pʋga yĩnga. Rat n yeel tɩ wala ned sẽn na n yeel tɩ ‘‘Mam na n baoa yel-sõm-kãngã m yembre’’, ‘‘Mam na n kãnda nin-kãnsã m yembre’’, ‘‘B kelg maam m yembra goama’’, tɩ tags-kãnsã yɩ sabab t’a sɩng bao-n-põs-taab maaneg ne a ma-biigã meng-menga, ned ning yẽ sẽn tar tʋls-kԑgeng ne a sõngrã la a ma-biilmã la a nonglmã.

La a yetẽ: ‘‘Yaa bõe yĩng tɩ mam karen-biisa rabd a zagl nengẽ’’? ‘‘Yaa bõe yĩng tɩ mam karen-biisã sõor pa ta a zagl karen-biisã’’? tɩ yɩ sabab t’a nin-mengrã paam sẽk zĩ-kãnga, n peeg-a n kẽes ziirã nonglmã sẽn yaa zʋg-yooka pʋgẽ, tɩ yɩ sabab t’a kong pʋ-peelmã, tɩ maan-tɩ-b-yã rignoor pake.

Tũdg-kãngã la sãm-pog-kãngã la yõorã bã-kԑgen-kãngã tɩɩm la sẽn wata :

D segd n bãngame tɩ pa pʋgdbã waooglmã la paoongã la segl-sõngã waooglmã n tõe tɩ f paam Wẽnnaam yardã ye, ayo, yaa pʋ-peelmã n kɩtd tɩ f paamd Wẽnnaam yardã, A naam zẽk yã, bal pʋgdbã waooglma la segl-sõngã la paoongã bedrã bee Wẽnnaam nengẽ, A naam zẽk yã, a pa bũmb sẽn kot ye, yaa bũmb sẽn kõte, sasa sãnda pʋgẽ.

Yaa sɩda, ad gom-yԑng sasa ning yɩta sabab tɩ f paam tɩlgr la Wẽnnaam yarda, rẽ n so tɩ d pa segd n rɩk sõorã waooglmã n lʋɩɩs taoor wakat fãa ye. Bal sasa ninga, ned a yembr kãndgr yɩta sabab tɩ f paam Wẽnnaam yardã, A naam zẽk yã, wala neb tusr kãndgre.

Rẽ poore, ad pʋ-peelmã la sɩdã baooba ratame tɩ d lall zĩig ning sẽn yaa nafa ne lislaambã, a sẽn wa n yaa zĩig ning fãa, la a sẽn wa n yi ned ning nengẽ fãa. La ãmmaa tagsd n rat tɩ nebã fãa wa karem mam nengẽ tɩ mam paam yel-sõmdã, yaa yõorã la nong-m-mengã yam-wẽngã la b belgrã.

Yaa foo ned ning sẽn maand yã-beed ne yel-sõmdã, la foo ned ning sẽn ka tar sek-m-meng Laahra tʋʋm pʋga!

Sɩd la hakɩɩka tẽn-tʋʋmb n wa, tɩ neb ka pʋg-b n zʋʋg neb saar ye, tɩ b sõora yaa bilfu, la b reega b nabiyaamdmã tʋʋm-yɩlengã keoorã sẽn ka-tԑka. Sã n yaa woto, ad pa pʋgdbã waooglem n wilgd tɩ f tara minim ye, ayo, yaa Wẽnnaam yardã paoong n wilgd tɩ f tara minim.

Foo la ãnda n wa sek f bas f tʋʋmda, la f kẽes f meng Wẽnnaam yԑla kẽnesg pʋgẽ ne yã-beedo, n yetẽ tɩ: ‘‘Nebã fãa kelg maama’’.

Ad kɩt tɩ nebã sakd fo goamã, la b gubg fooga, yaa Wẽnnaam tʋʋmde, A naam zẽk yã. Sã n yaa woto bɩ f tʋm f tʋʋmdã, la f ra kẽes f toog Wẽnnaam yԑla la A yԑla kẽnesg pʋgẽ ye.

Rẽ poore, ad neb nins sẽn kelgd sɩdã la hakɩɩkã, la neb nins sẽn yaa sabab tɩ sɩdã goamdã paamd yel-sõmdã, pa tek ninsaalbã pʋgẽ bal ye, ayo, bõn-naandsã sẽn ya yĩn-wʋmds rãmba, la raohaani-rãmbã la Sɩd-naaba malԑksã pida dũni-kẽengã pʋgẽ, n be a ween-vɩɩsã fãa pʋgẽ.

La fo sẽn rat yel-sõmdã wʋsga yĩnga, bɩ f tall pʋ-peelmã, la f tags Wẽnnaam yardã yell tãa, A naam zẽk yã, sẽn na yɩl tɩ albark gom-biis nins sẽn yit fo noorẽ wã, n kẽed yĩn-wʋmds rãmb ka-tԑk tʋbẽ n nuurd-ba, paam n sẽeg la b vɩɩmd sebgã pʋgẽ ne pʋ-peelmã la niya-sõngã sababo, tɩ f paam yel-sõmde. Bal bilgri, fo sã n yeel tɩ « Alhamdʋ lillaahɩ » "Pẽgr be ne Wẽnnaam" b gʋlsd-a-la sebgã pʋgẽ, ne Wẽnnaam yardã, wala « Alhamdʋ lillaahɩ » rãmb minyõ-rãmba, b kɩds la b bԑda.

La sẽn mik tɩ Naanda sẽn yaa Bʋʋd-minim-naaba ka tʋmd yaar la A ka tʋmd ne maan-n-zʋʋka, sɩd la hakɩɩka A naana tʋb sẽn ka-tԑk sẽn sekd albark-gom-bi-kãnsa kelgre. Gom-kãnsa sẽn be sebgã pʋga sã n sẽeg tɩ vɩɩmã kẽ a pʋgẽ ne pʋ-peelmã la ne niya-sõngã sababo, b kẽeda raohaani-rãmbã tʋbã pʋgẽ wala koԑԑg sẽn yaa bʋgsgo. La Wẽnnaam yardã la pʋ-peelmã sã n ka tʋms vɩɩm gom-bi-kãnsa sẽn be sebgã pʋga, tɩ b ka paam kelgre, yel-sõmda na n teka gomdã sẽn yi noorẽ wã bala, bɩ karemdb nins koees sẽn pa noom tɩ b sũyã sãamd ne b sẽn ka paamd kelgdbã wʋsga rãmb tʋb wu.