Sabab a yoob n soaba

Sabab a yoob n soaba: Wala sɩdã rãmb yõs-taaba sẽn pa burkĩnd kaalem yĩnga, la toog kaalem yĩnga, la ziir kaalem yĩnga, ad woto bala, dũni wã rãmb la menemdbã sẽn yaa yam-yaalyaala rãmb me sẽn zemsd taab sõma, dũni vɩɩmã yԑla pʋga, pa b burkĩnd la b ziir la b ning-toog yĩng ye. Ad sɩdã rãmb ziirã la b burkĩndã la b ning-toogã sẽega masaal-bԑdã wʋsg pʋgẽ, wakat fãa b sẽn tagsd Laahra nafa-rãmba tãa wã yĩnga.

La b sẽn ka rɩkd b wakatã sẽn yaa b ligd-zugã meng-menga n kẽes masaall a yembr pʋga yĩnga, kɩtame tɩ b zems-n-taara ne soy a taab sẽn wẽnd bãmba, sẽn be so-yԑngã pʋga, ka bũmb sẽn yaa tɩlԑ ye, bal masaala-rãmba yaa wʋsgo, tɩ zĩigã me yaa yaolengo.

Ãmmaa dũni wã rãmb sẽn yaa yam-yaalyaal rãmba, b sẽn pʋs n tagsd dũni vɩɩmã yell bala yĩnga, kɩtame tɩ b gat dũni wã yԑlã gadb sɩd-sɩda, ne b yĩn-wʋmdsã la b yõyã la b sũyã fãa gilli, la b gat ned ning sẽn sõngd-b yel-kãnsã pʋga gadb sɩd-sɩda, la b rɩkd wakatã fãa gill sẽn ta leera[1] kobs-nu wã, n kẽesd yel-kãnsã pʋgẽ, tɩ hakɩɩk pʋgẽ bɩ b yaool n ka yɩɩd tãm a nu ye, t’a yõoda me le ka ta tãma piig la a nu sɩdã rãmb nengẽ ye. A bilgr yaa wala Yahʋʋd gãeengã sẽn yaa sanem-pԑԑlg toandã, sẽn dɩk leera a nu n ra butel-pԑԑgã sẽn pa yɩɩd tãm a nu wã. Sik ka be, tɩ ned sã n dɩk ligd-bedr la a pãnga fãa n bao yel-kãnsã, hal ba ya ziri pʋgẽ, a ka tõe n ka paam-a ye, bal yaa wala b sɩd tara pʋ-peelem sɩd-sɩda, tɩ rẽ sabab kɩt tɩ b tõogd sɩdã rãmba, tɩ b sẽn tõog-ba yĩnga, kɩt tɩ b lʋɩt faagr la kong-pãng la ziri la maan-tɩ-b-yã pʋgẽ, tɩ b pʋ-peelmã tũ rẽ n sa, tɩ lebg tɩlԑ ne-b tɩ b pẽg dũni wã rãmba, neb nins sẽn ka tar burkĩnd la ning-toog la ziira.

Yaa yãmb a sɩdã rãmb la lislaoongã sãri wã rãmb la hakɩɩkã rãmb la sʋʋfɩɩmdã sorã rãmba, neb nins sẽn baoodb sɩdã ! Ra ges-y taab tudgr yõs-taabã bã-kԑgengã pʋgẽ ye, la y ra ges taab zãms ye. Zʋgl-y y mens ne Alkʋr’aana zʋgdã, wala a sẽn yeela: «B sã n pɩʋʋg reem, b pɩʋʋgdame tɩ b yaa neb sẽn tar waoore» (sʋʋrat Al-fʋrkaan 52\72).

﴿وَإِذَا مَرُّوا بِاللَّغْوِ مَرُّوا كِرَامًا﴾ (سورة الفرقان (52/72)  

[1] Yaa turki ligdã yʋʋre. Yaa gafã walldã sẽn yaa turkiyẽengã yĩng n kɩt t’a kell n rɩk makr ne bãmb ligdã. La a raabã yaa sẽn na n wilg bũmbã yõodã sẽn ta to-to.

La y bãng tɩ yãmb sẽn na n bas yãmb ne taab sʋka zabã, wakat ning yɩng-bԑԑbã sẽn wat n teegd yãmba, la yãmb sẽn na n tɩlg sɩdã rãmba, tɩ b põs lʋɩɩsã la yaalgã, yel-kãnsã b yiibã n yaa Laahra tʋʋmd-kẽeng pipi, yãmb sẽn segd n rɩk n loe y zugu, la y wɩsg y mens n tʋm y pãng tõog tԑka, bũmb ning aaya-rãmb la nabiyaam Hadiis-rãmb kobsa sẽn sagend yãmb ne ma-biirã la nonglmã la sõng-taabã. Sã n yaa woto bɩ y zems-y taab ne y ma-biisã sẽn be ne yãmb sorã la y dĩinã pʋga, ne y yĩn-wʋmdsã fãa gilli, ne zems-n-taar t’a keglem yɩɩd dũni wã rãmb zems-n-taarã. Rat n yeel tɩ y ra wa saag n kẽ yõs-taabã pʋgẽ ye.

La y ra wa baood n na n valems zems-n-taarã n yetẽ tɩ : « Mam na n rɩka m wakatã fãa gill sẽn yaa yel-bedrã n kẽes yel-bԑd pʋgẽ, wala Wẽnnaam yʋʋra tẽegrã la tagsgã, la m bas yel-bõonesã » ye, bal yãmb sẽn tẽed-a soab t’a yaa yel-kɩdga, daawa wã pʋga, tõeame n yaa yel-bedr sẽn yaa zu-loԑԑg yelle.

La wala sodaag sẽn na n yals lԑԑr a yembr zu-loԑԑg wakat pʋgẽ ne sard-damba, sẽn mi n tar yel-sõmd wala yʋʋmd tũudum sasa ninga. Ad woto bala, zãmaan ning pʋgẽ b sẽn tõog sɩdã rãmba, ad-y sã n rɩk raar a yembr n kẽes daawa wã masaall a yembr pʋgẽ, y tõe n paama daragԑ tusr yõodo, wala soda-kãngã lԑԑr a yembra yõoda, la y daar a yembrã tõe n lebga rasem tusri.

Sẽn mik tɩ yel-kãngã yaa Wẽnnaam yĩnga, b ka sõmb n ges a paoodlma bɩ a bedlma pa rẽ bɩ a yõoda la a yõoda kaalem ye, ad pʋ-peelmã la Wẽnnaam yard baoob sor pʋgẽ, zarat-bil lebgda wala ãdga. La d ka segd n ges sababã sẽn yaa to-to ye, ayo, d segd n gesa a yõodã. Sẽn mik tɩ yaa Wẽnnaam yardã la a yõoda, tɩ pʋ-peelmã la a tɩ-bila, ad sã n yaa woto, yellã ka yel-bil ye, a yaa yel-bedre.