Makaam a yiib n soabã

GOMD PISI LA A YEMBR N SOABÃ

MAKAAM A YIIB N SOABÃ

Yẽ gomda sũur bãas a nu tɩp-tɩ-rãmb a nu yelle:

بسم الله الرَّحْمَٰنِ الرَّحِيمِ

﴿وَقُلْ رَبِّ أَعُوذُ بِكَ مِنْ هَمَزَٰتِ الشَّيَٰطِينِ 

وَأَعُوذُ بِكَ رَبِّ أَن يَحْضُرُونِ﴾

(سورة المؤمنون: ٢٣/٩٧-٩٨)

Bɩsmillaahɩr rahmaanir rahɩɩm

“La f yeel tɩ yaa Fo m Soab a Wẽnnam, m kota gũudum ne Foog n yi zĩn-soԑtãambã yam-yuus-yuusã, la m kot gũudum ne Fo m Soab a Wẽnnaam tɩ b re wa m nengẽ ye”

(Sʋʋratʋl mu’minuuna: 23/ 97-98)

Yaa foo ned ning b sẽn zarb ne yam-yuus-yuusi, rĩnga fo mii fo yam-yuus-yuusã sẽn wẽnd bũmb ninga?

A yaa wala mosɩɩba, fo sã n rɩk a yellã n loe f zugẽ, la a sẽn wukd n lebg yel-bedre, la fo sã n maan wala f pa ne-a, la a sẽn lebgd kɩdg n wa tolg n menme. Fo sã n zɩsg-a la a sẽn zɩsgd a mengã, la fo sã n maan-a kɩdg la a sẽn lebgd kɩdga. Fo sã n maan rabeem ne-a, la a sẽn zɩsgd n lebg bãaga, la fo sã n pa maan rabeem ne-a, la a sẽn yԑԑsd n zoe n solge. La fo sã n pa bãng a yalɩ wã, la a sẽn kẽngd taoor n paam pãnga, la fo sã n bãng a yalɩ wã sɩd-sɩda, la a sẽn loogd zãnga.

Sã n yaa woto, mam na n kẽe yam-yuus-yuusã sẽn tar mosɩɩb-rãmba pʋgẽ, n yãk nens a nu sẽn maand wʋsg n kõ-vẽenem b zugu, tɩ tõe t’a yɩ tɩɩm n tɩbs maam ne foo, bal yam-yuus-yuusã yaa bũmb zɩɩlmã sẽn boond-a, tɩ bãngrã rigd-a, fo sã n pa mi-a la a sẽn wate, la fo sã n bãng-a la a sẽn loogde.

Pipi nengã (pipi bãagã)

Pipi, a soԑtãan rengd n loba sik sũurã pʋgẽ, sũurã sã n pa reeg-a, la a sẽn lebgd tʋʋre, n maan-a tagsã pʋgẽ t’a wẽnd bũmb sẽn yaa tʋʋre, sẽn be tags-rẽgdã sãnda la alhaal-yoodã pʋga, n yaa yԑl sẽn ka zemsd ne zʋgdã, n kɩt tɩ sũurã õosd n yetẽ: sũ-sãang be ne maam, n kẽes-a pãn-komsem pʋgẽ, tɩ yam-yuus-yuusã soab tẽed tɩ yẽ sũurã wẽngda a zʋgdã ne a Soaba, tɩ rabeem la yirbg sẽn tar pãng paam-a. La a sẽn na yɩl tɩlg a mengã n yi alhaal-kãngã pʋgẽ, a zãagda a mengã ne Wẽnnaam gũusgã yell tagsgo, la a rat n bõr yam-yaalyaalã pʋgẽ.

La bã-kãngã tɩɩmã la woto:

Yaa foog a yam-yuus-yuus soab sẽn yaa miskɩɩna, roog f neng n ges ka ! ra maan rabeem ye, bal bũmb ning sẽn wat fo yamẽ wã pa tʋʋr ye, ayo, yaa bʋgsgo, la wala d sẽn mi tɩ kɩflem bʋgsg pa kɩflga, ad woto bala, tʋʋr bʋgsg me pa tʋʋr ye, bal yam-bãngr pʋgẽ, bʋgsg pa bʋʋd ye, la tʋʋrã yaa bʋʋdo.

Rẽ poore, sẽn le paasde, yaa tɩ gom-yood kãnsã sẽn pa sakd kelgra, pa fo sũurã goam ye, bal sũ-sãams n paam fo sũurã, ad ya a soԑtãan yam-yuus-yuus[1] ning sẽn pẽ ne fo sũurã nengẽ la gom-kãnsã yita.

Ad yam-yuus-yuusã namsgã, yaa fo sẽn na n tagsd a naongã yelle, rat-n-yeel tɩ fo sã n tagsd t’a yaa bũmb sẽn namsde, la a sẽn sɩd namsd fo sũurã, bala a tagsdame, tɩ bʋgsg ning sẽn pa bʋʋda yaa hakɩɩka, rẽ n kɩt mosa, t’a rɩk a soԑtãan tʋʋmdã n rogla sũurã, n tẽed t’a soԑtãan goamã yita yẽ sũurẽ wã, n get-a t’a yaa bũmb sẽn tar naongo, tɩ yɩ sabab t’a kẽes a mengã naong pʋgẽ, la yaa yel-kãngã bal pay la a soԑtãan sẽn rag n ra rata.

[1] Waa Tɩrmiizɩ pʋgẽ tɩ nabiyaam yeelame, Wẽnnaam yolsg la tɩlgr be a yĩngã: {{Ad a soԑtãan tara pẽnegr ne ãdem-biigã, tɩ malԑkã me tar pẽnegr ne ãdem-biigã, ãmma a soԑtãan pẽnegrã, yẽ ya a sẽn pʋlemd ne wẽngã, la a sẽn yagsd sɩdã. Ãmmaa malԑkã pẽnegrã, yẽ yaa sẽn pʋlemd ne neerã, la a sẽn sɩdgd sɩdã, ned ning sẽn paama yel-kãngã (malԑkã pẽnegrã) bɩ a bãng tɩ yii Wẽnnaam nengẽ, la a pẽg Wẽnnaam, la ned ning sẽn paam a to wã (a soԑtãan pẽnegrã), bɩ a kos-gũudum ne Wẽnnaam tɩ ad ya a soԑtãan nengẽ la a yi, rẽ poorẽ t’a karem aaya-kãngã: “A soԑtãan yԑԑsda yãmb ne talemdo, la a sagend yãmb ne sãangã”}}

Neng a yiib n soabã : Yaa gom-biis maana sẽn wat n yi sũurẽ wã beell n kẽ tagsã pʋgẽ, n yaool n tɩ rɩk sʋʋrg beenẽ.

La yaa wala tagsã maanda sʋʋrg wakat fãa, n bĩng sabab-rãmba, n rɩkd yԑl nins a sẽn loe a zugẽ wã sʋʋrgã n basd sorã zugu, rẽ poorẽ tɩ maana ning sã n wa pɩʋʋg a zugu, bɩ a rɩk sʋʋrgã n yeelg-a, pa rẽ bɩ a rɩk- n yagl a zugu, pa rẽ bɩ a rɩk-a n tablg-a, maa t’a rɩk-a n lud-a.

La maana wã sã n yaa yɩleng n yaa sõma, tɩ sʋʋrgã yaool n yaa rẽgd n yaa yooko, a pa yeelgd-a ye, a rɩkd-a lame n sɩɩs-a.

Tɩ sɩɩsgã yãgem yam-yuus-yuusã soab yamã ne yel-gẽdem, tɩ nedã õosdẽ la a yetẽ : bũmb ka be sãang sẽn ta mam sũurã ye. La yõorã yaal-kãngã la a yalem-kãngã kɩtdame tɩ mam lebg ned b sẽn zãag ne yolsgo, t’a soԑtãasn me paam n tik wĩ-kԑgeng-kãngã n gad-a n sooge.

La bã-kãngã tɩɩmã la woto :

Yaa foo talg sẽn yaa miskɩɩna! kelg-m neere! Wala fo sẽn mi tɩ rẽgd ning sẽn be fo pʋ-roogẽ wã pa rẽgemd fo yĩngã yɩlemdã sẽn yaa pʋʋsgã manegr zʋgda, la a ka sãamd-a wã, ad woto bala, sʋʋr-yood ka tõe n sãam maana-yɩlemda ye.

Bilgri: fo sã n zĩ n tagsd Wẽnnaam aaya-rãmbã yelle, tɩ bãag pa rẽ bɩ rɩɩb yamleoogo, pa rẽ bɩ yell sẽn yikd zug wala baool paam foo zĩig pʋgẽ, sik ka be tɩ tagsã na n neame tɩ yaa tɩlԑ tɩ b tɩbs bãagã, la b pids tʋlsmã ye, la a bas n wẽnems n get-a, n zĩ n wat ne tags-yaals sẽn zemsd ne-a, wakat-kãnga, aaya-rãmbã na n pɩʋʋgda b zugu, la b ka sãamd b maana-rãmbã ye, b le ka rẽgemd-b me ye. La yell buug ba a yembr ka paamd-b ye. La yell sẽn be beenẽ, yaa fo sẽn na n tagsd rẽgdã yell bala, la f ning f yamẽ wã t’a tara yelle.

Neng a tãab n soabã: Yẽ yaa tɩ tõk-n-taar sẽn solg n be yԑlã ne taab sʋka, la hal ba yԑl nins yãmb sẽn pa tẽeda pʋga, tõk-n-taar wĩ n be b ne taab sʋka, maa tɩ bũmbã be a meng yĩnga, pa rẽ bɩ yaa fo tagsã n wa ne-a, ne yẽ me sẽn yã-a to-to, la a bao tõk-n-taar n ning b ne taab sʋka, la tõk-n-ta-kãngã hakɩɩk pʋgẽ, yaa tɩ sasa ninga, a tẽegd-f lame, tɩ f tõe n yãnd bõn-yɩleng ne bõn-rẽgd sababo, bala, “ad yõs-taab ning sẽn yɩt sabab n wat ne zãag-taab gesga pʋga, yɩta sabab n wa ne pẽnegr sʋʋrgã la tãgsgã pʋgẽ” wala sẽn yaa vẽeneg Ɩlmul Bayaana[1] pʋga.

Rat-n-yeel tɩ yaa tagsg tõk-n-taar la sabab tɩ b tõe n rɩk sʋʋrg ne a lidr n naag taaba, tɩ b boond tõk-n-ta-kãngã sẽn yɩ sabab n wa ne yell ninga tɩ “tadaa’ɩl afkaar”[2]

Bilgri: wakat ning fo sẽn wat n be pʋʋsgẽ wã, la wakat ning fo sẽn wat n be Alkaaba sԑԑg n gomd ne Wẽnnaama, la f tagsd aaya-rãmbã yella, zĩig pʋgẽ bal la tagsã sẽn wa n rɩk foog n kẽng yel-yaals sẽn ka pak foo pʋgẽ. B sã n zarb fo yamã ne tags-kãnsã buudu, bɩ f ra maan rabeem la yɩɩr ye, ayo, lebg n leb f yamẽ wã, la f ra kell n kẽng taoor n maan f mengã soagl ne pẽes-zulums n yetẽ tɩ: “Yaa bõe ned la woto, mam tudgrã buud ka tar to ye!” sẽn na yɩl tɩ fo pẽesgã ra yɩ sabab tɩ tõk-valeng-kãngã paam pãng ye, bal fo sã n bas t’a tall vũun fo zugu, tɩ fo ning f toog ne-a, la fo tags-valeng-kãngã sẽn lebgd mininga, n lebg tags-bãaga.

Ra yԑԑs t’a pa sũur-bãag ye, noor wʋsgo, yel-kãnsã yaa yԑl sẽn wat n lʋɩ fo sũurẽ wã, tɩ pa yɩ ne fo yam-yãkr ye, ayo, noor wʋsgo, b nong n paamda neb nins sũy sẽn yikd tʋʋl tɩ yell bilf fãa namsd-ba nengẽ, a soԑtãan me tũnugda yam-yuus-yuus-kãngã buuda n paamd yõod wʋsgo.

La bã-kãngã tɩɩmã: yaa tɩ tags-kãnsã, noor wʋsgo, ka fo yam-yãkr ye, a yellã ka pak foo ye, b le ka na n sʋk foog a yell ye. Rẽ poore, ad tags nins sẽn wat n lʋya tara pẽneg-n-taar la a ka tar sɩɩsg bɩ gẽdgr n taar ye, rẽ n kɩt tɩ tags-rãmbã ka kẽed taab la b le ka namsd taaba.

[1] Yaa gomd zu-raoog sẽn be Balaaga wã pʋgẽ

[2] Yaa fo sẽn na n tagsd bũmb yelle, tɩ tags-kãng yɩ sabab n tẽeg foo bũmb a to yelle, wala moos sẽn mi n yeel tɩ tags n wat ne tagsã.

Wala a soԑtãan ne ɩlhaamã malԑk sẽn tar pẽneg-n-taar sũurã pʋga, la wala nin-wẽnsã la nin-sõmsã sẽn be ne taaba, pa rẽ bɩ b sẽn vɩ ne taab zĩ-yԑngã sẽn pa tar yella, ad woto bala, tagsã sã n wa tɩ vu bʋgs-yood ning fo sẽn pa rata n wa fo nengẽ, tɩ bʋgs-yoodã wa kẽ n naag tags-yɩlmã, bɩ f bãng t’a pa tar yell ye, sã n pa wa n mikame tɩ yaa ne yam-yãkre, pa rẽ bɩ fo ninga f yamẽ wã, t’a yaa yell tɩ fo maan soagl wʋsg ne-a. La woto bala, sasa ninga, sũurã mi n yaame, n bas tagsã t’a tagsd yaar yԑl-sãndã zugu, n wa kẽes-a yõorã yamleoog pʋgb pʋgẽ, wakat-kãngã marsã, la a soԑtãan sẽn paamd sor n wʋkd yel-yoodã n wat n yadgd a taoorã.

Neng a naas n soabã: Yẽ yaa tʋʋmdã na yɩ sõma wã baoob pẽes-toogã sẽn wat ne yam-yuus-yuus ninga, bal wakat ning ninsaalã sẽn wat n kengd yell n tẽed tɩ yaa wẽn-zoԑԑga, la yellã sẽn lebgd kԑgeng a zugu, hal n wa tɩ ta daragԑ sẽn sek a lʋɩ haraamã pʋgẽ, tʋʋmdã na yɩ sõma wã baoob gẽesg pʋgẽ.

Sasa ninga, sũn[1] a yembr bao-toog tõe n yɩɩ sabab t’a bas waagɩba[2], t’a yetẽ: kato! Rẽ yĩnga mam tʋʋmdã manegame? Tɩ yɩ sabab t’a lebg n yɩlem a tʋʋmdã, rɩll yellã kẽngda taoor a woto, hal t’a wa tɩ lʋɩ pãn-koms-kԑgeng pʋgẽ, t’a soԑtãan me tũnug alhaal-kãngã n paam-a.

La bã-kãngã tara tɩp-tɩɩm a yiibu:

Pipi tɩɩmã: ad yam-yuusyuus kãnsã buuda segda ne mu’tazɩla wã rãmba, bal bãmb yetame: ad yԑlã la tʋʋmã b sẽn rogl tõnd laahrã baoob wԑԑngẽ wã, ĩmmaa tɩ tʋʋmdã yaa bõn-sõng a mengẽ, t’a sõmblmã yĩng kɩt tɩ b sagl tõnd tɩ d tʋm-a, pa rẽ bɩ yel-yook n be a pʋgẽ, tɩ yel-yook kãnga yĩng kɩt tɩ b gɩdg tõnd tɩ d ra tʋm-a ye.

 Sã n yaa woto, hakɩɩkã la laahrã baoob wԑԑngẽ, ad sõmblmã la yookã sẽn be yԑlã pʋga, yaa belem meng-menga, la ãmmaa Wẽnnaam sagellã la A gɩdgrã, yaa yԑl sẽn pʋgd sõmblmã la yookã. La wala sẽn be so-kãngã pʋga, ninsaalã sã n na n tʋm tʋʋmd buud fãa, yam-yuusyuus n paamd-a, wala sẽn wata:

[1] Yell sẽn pa tɩlԑ, la a maanegã tara yel-sõmde.

[2] Yaa yell sẽn yaa tɩlԑ dĩinã pʋgẽ, tɩ f sã n bas-a bɩ f paam zũnuubu.

[3] “Bũmbã mengã” (نفس الأمر) : gom-bi-kãngã gomda bũmb zaat sẽn ka tar bũmb ba a yembr sʋʋrg yelle: b mum la b boaga, b bãooneg la b bԑda, b mumd-mumd la b sẽn welse, zem tɩ yaa bũmb b sẽn ne vẽeneg ne nifu, pa rẽ bɩ yaa bũmb b sẽn mi. La “Bũmbã mengã: a maana le rat-n-yeelame tɩ bũmbã mengã zaata. « bũmbã » zĩ-kãngã rat-n-yeelame tɩ bũmbã meng-menga, bilgri, d sã n yeele: « bũmbã bee bũmbã mengã pʋgẽ » a maana rat-n-yeel tɩ bũmbã bee ne a menga zaata.  

Togs-m wԑ! rẽ yĩnga mam tʋʋmdã yɩɩ sõma wala sẽn be “bũmbã mengã”[1] pʋga?

Ãmmaa sɩdã rãmbã, sẽn yaa Ahlʋ-sũnna-wal-gԑmaa’a wã sorã pʋgẽ, bãmb yetame: “Sɩd-naab a Wẽnnaam n sagend tɩ b maan bũmbu, tɩ bũmbã lebg tʋʋm-sõngo, n gɩdg tɩ b ra maan bũmbu, tɩ bũmbã lebg yel-yooko.

Sã n yaa woto, tʋʋm-sõng yɩta ne Wẽnnaam sagelle, tɩ tʋʋm-yook yɩt ne Wẽnnaam gɩdgre. La sõngã ne yookã paoongã bee ne tʋʋmdã soab minma, n paam tabendg ne minim kãng sababo.

La sõngã la yookã pa a dũni wã wԑԑngẽ wã ye, ayo, ya a laahrã wԑԑngẽ wã,

Bilgri: Fo sã n pʋʋs pa rẽ bɩ f yõka koom, n mik tɩ “bũmb meng” n ra be fo tʋʋmdã wakat n tõe n yɩ sabab n sãam fo pʋʋsgã pa rẽ bɩ f koomã yõkrã, tɩ fo ka bãng ye, wakat kãnga, fo pʋʋsgã la f koomã yõkrã yaa bũmb sẽn manege.

La sã n yaa ne Mu’tazɩla wã rãmbã, bãmb yetame tɩ hakɩɩk pʋgẽ, fo pʋʋsgã la f koomã yõkrã yaa bũmb sẽn sãame, la b na n reeg-b lame, bal fo tara padeng tɩ bala fo ka bãng ye.

Sã n yaa woto bɩ f ra maan yam-yuusyuus ye, n wa yetẽ tɩ rẽ yĩnga mam tʋʋmd ning mam sẽn tʋma manegame? La yalla yaa tʋʋm kãngã n zemsd ne Ahlʋ-sũnna-wal-gԑmaa’a wã sorã bɩ? Fo segd n yeelame: Rẽ yĩnga b reega mam tʋʋmdã? La f ra maan belg-m-meng ye, fo tʋʋmdã me ra wa maan-f yel-solemd ye.

[1] “Bũmbã mengã” (نفس الأمر) : gom-bi-kãngã gomda bũmb zaat sẽn ka tar bũmb ba a yembr sʋʋrg yelle: b mum la b boaga, b bãooneg la b bԑda, b mumd-mumd la b sẽn welse, zem tɩ yaa bũmb b sẽn ne vẽeneg ne nifu, pa rẽ bɩ yaa bũmb b sẽn mi. La “Bũmbã mengã: a maana le rat-n-yeelame tɩ bũmbã mengã zaata. « bũmbã » zĩ-kãngã rat-n-yeelame tɩ bũmbã meng-menga, bilgri, d sã n yeele: « bũmbã bee bũmbã mengã pʋgẽ » a maana rat-n-yeel tɩ bũmbã bee ne a menga zaata.  

Tɩɩm a yiib n soabã la woto: “Weoogr ka be dĩinã pʋgẽ ye”

Sẽn mik tɩ mazhab-rãmb a naasã fãa gill yaa sɩda, la sẽn mik tɩ yam-yuus-yuusã soab sẽn gad t’a tʋʋmdã ka pida, tɩ na n yɩ sabab t’a kos yaafa wã la sõma n yɩɩd a sẽn gad t’a tʋʋmdã manegame tɩ tõe n yɩ sabab n wa ne belg-m-menga, rat-n-yeel tɩ yam-yuus-yuus soab wala nin-kãngã, sẽn na n ges t’a tʋʋmdã ka pida, tɩ yɩ sabab t’a kos yaafa wã la sõma n yɩɩd a sẽn na n ges t’a tʋʋmdã manegame, tɩ yɩ sabab t’a lʋɩ belg-m-mengã pʋga, sẽn mik tɩ yellã ya a woto wã, bɩ f bas yam-yuus-yuusã la f yeel a soԑtãan tɩ yel-kãngã yaa toogo, a hakɩɩkã bãngr me le yaa toogo, a yaa bũmb sẽn pa zemsd ne yolyol ning sẽn be tõnd dĩinã pʋga ye, la a yõsgd ne gom-zu-rao-kãnsã: “weoogr ka be dĩinã pʋgẽ ye”, “Dĩinã yaa yolyole”, la sik ka be tɩ mam sẽn tʋm m tʋʋmdã neng ninga zemsda ne mazhab a naasã yembr ye, rẽ yĩnga, woto seka maam, la sẽn le paasde, alhaal-kãngã yaa sabab n wat ne gãneg-m-meng la sik-m-menga, sẽn na yɩl n kos yaafa ne tʋʋmdã sẽn ka pida, la b sẽn sak n reeg mam tʋʋm-sãoogã, la m sak tɩ m yaa valeng n lebs m mengã Wẽnnaam yolsgã pʋgẽ ne yaafa kosg la sik-m-menga, ne mam sẽn ka tõog n yals ne tũudmã wala sẽn segda.

Neng a nu n soabã: yaa yam-yuus-yuus sẽn yaa wala yel-gẽdem n wat limaoongã masaala-rãmbã pʋgẽ, tɩ sasa ning bɩ bʋgsgã ne yamã gẽdgd taab yam-yuus-yuusã soab sẽn yaa miskɩɩnã zugu.

Rat-n-yeel t’a sãmdame tɩ yel-gẽdem ning sẽn kẽ a tagsã pʋga, yaa bũmb sẽn kẽ a yamã pʋgẽ, t’a ning a yamẽ t’a loԑԑgã sãamame. La woto bala, sasa ninga a tẽedame tɩ yel-gẽdem ning sẽn wa yẽ tagsẽ wã, yaa sik sẽn sãamd limaoongã, la woto bala, sasa ning me, a tẽedame tɩ yel-gẽdem ning a sẽn tagsda kẽe yamã sɩdgrã pʋgẽ. La woto bala, a le tẽedame tɩ kɩfend yell tagsg yaa kɩfendo.

A tẽedame tɩ yamã tags-toogã la a pẽes-toogã la a get yԑlã n vẽnegd menengã sabab-rãmbã yaa bũmb sẽn yõsgd ne liimaoongã, tɩ tẽ-kãnsã sẽn ya a soԑtãan yam-yuus-yuusã tagemsã kɩt t’a yԑԑs la a yirbi, n yetẽ tɩ yaa mam wɩɩbdo! Hakɩɩka mam sũurã sãamame, tɩ m loԑԑgã me sãame.

Sẽn mik tɩ yel-kãnsã noor wʋsga pa yɩ ne a yam-yãkrã yĩnga, la sẽn mik t’a yam-yãk-kɩdgã pa tõe n maneg-a wã, la sẽn yɩt sabab t’a lʋɩ pãn-komsem pʋgẽ.

La bã-kãngã tɩɩmã la woto:

Sẽn mik tɩ kɩfend yell bʋgsg pa kɩfenda, ad woto bala, kɩfendã yell tagsg pa kɩfend ye. La woto bala, sẽn mik tɩ menengã mamsg ka menenga, ad menengã yell tagsg pa meneng ye, sã n yaa woto, ad bʋgsgã la sãmbsã la mamsgã la tagsgã yaa bũmb sẽn yõsg ne yamã sɩdgrã, la sũurã loԑԑgã, b ka bũmb a yembr ye, la b fãa gill yaa bũmb sẽn yaa wala toor zalle. La noor wʋsgo, yam-yãk-kɩdgã pʋs n pa ning a toog ne-a ye, a pʋs n pa kɩlld n kelg-a me, b le ka kẽed dĩinã tʋʋmã pʋgẽ me wʋsg ye.

La ãmmaa sɩdgrã la sakrã, bãmb ka woto ye, bãmb yaa yԑl sẽn pʋgd miizaana.

Rẽ poore, ad bʋgsgã la sãmbsã la mamsgã la tagsgã, b sẽn pa sɩdgr la sakra yĩnga, b pa sõt-b tɩ b yaa yel-gẽdem la yam-yuus-yuus ye. La pẽes-toog yĩng sã n wa kɩt t’a yɩlemd wʋsgo, n lebg bũmb sẽn tabe, wakat-kãnga, a tõe n yɩɩ sabab n wa ne yel-gẽdem sɩd-sɩda.

La woto bala, n yeta a mengẽ : «mam na n yalsa tẽng-n-sʋgre, mam ka na n yãk zĩig a yembr n tabend ye » tɩ yɩ sabab t’a tabend yõsgrã zĩigẽ wakat fãa, hal n wa tɩ ta daragԑ ning a sẽn wat n tɩ tabend yõsgrã zĩigẽ tɩ pa yɩ ne yam-yãkr ye, wakat-kãng tɩ sɩdã sẽn yaa waagib ne-a wã lʋɩ, tɩ yel-kãngã yɩ sabab t’a lʋɩ halakr la mosɩɩb pʋgẽ, tɩ yell ning wa tabend a zugẽ wã, n kɩt t’a lebg bԑ wã la a soԑtãan sõngda.

La yam-yuus-yuus kãngã kõbg sẽn tar pãng n yɩɩda: Yaa sẽn-tõe-n-yɩ-vẽeneg-pʋga sẽn na n wa gẽdg ne sẽn-tõe-n-yɩ-tagsg-pʋga, yam-yuus-yuusã soab nengẽ.

Rat-n-yeele: a sã n yãnd bũmb sẽn tõe n yɩ vẽeneg pʋgẽ, n bʋgsdẽ t’a yaa bũmb sẽn tõe n yɩ tagsg pʋgẽ, la bũmb b sẽn maand sik a pʋgẽ. La goam-bãngr pʋgẽ, gom-bũnd n be beenẽ tɩ b yetẽ : ad sẽn-tõe-n-yɩ-vẽeneg-pʋga ka sãamd minim bãng-n-wãakã ye, a leb n ka gɩdgd tagsgã.

Bilgri: Mog-sablgã tõe n kʋya a meng yĩnga, tõnd sẽn yas wakat ning pʋga, la rẽ yaa bũmb b sẽn tẽed t’a tõe n yɩɩ vẽeneg pʋgẽ, la yellã yaa tɩ tõnd tara bãng-n-wãak la d mi vẽeneg tɩ mogrã be a zĩigẽ wã, tɩ sik ka be a pʋgẽ ye, la bũmb ning b sẽn mamsd tɩ tõe n yɩɩme wã, la bũmb ning sẽn tõe n yɩ vẽeneg pʋga, ka kẽesd tõnd sik pʋgẽ ye, b leb n ka wat ne sika, b le ka sãamd tõnd bãng-n-wãakã ye.

Bilgri: Wĩntoogã tõe a meng yĩng n ka lʋɩ rũndã ye, pa rẽ bɩ a ka puk beoog ye, la tõeem kãngã pa sãamd tõnd bãng-n-wãaka ye, a le pa wat ne sik me ye.

Bilg-kãnsã b yiibã bilgr yaa wala sãmbs ning sẽn be sẽn-tõe-n-yɩ-vẽeneg-pʋga zugu, sẽn kẽed ne dũni vɩɩmã wĩntoogã kõomã, la laahr vɩɩmã wĩntoogã pukrã, yԑl nins sẽn yaa liimaoongã hakɩɩk-rãmbã, zĩ-kãnsã pa sãamd liimaoong bãng-n-wãakã ye.

La woto bala, gom-yẽg n be Ʋsʋʋlʋdiinã[1] la Ʋsʋʋlʋlfɩkhɩ[2] wã pʋgẽ, tɩ b yet wakat fãa tɩ «Mamsg sẽn ka tar daliil ka  tikd ye» rat-n-yeel tɩ mamsg sẽn ka tar daliil n tik ka tar yõod baa-baa.

[1] Yaa bãngr sẽn gomd dĩinã yẽgã yelle.

[2] Yaa bãngr sẽn gomd fɩkhɩ wã yẽgã yelle.

Fo sã n yeel tɩ : yaa bõe hɩkma n be yam-yuus-yuus ning sẽn namsd muumin-dambã wʋsga, hal n tɩ ta alkadr kãnga wã sẽn paam tõndã pʋga?

Leokrã: ad yam-yuus-yuusã yaa sabab n nekd ninsaalã n yit a yam-yaalyaalã pʋgẽ, la a kɩtdẽ tɩ ninsaalã yikd n pẽesdẽ, n le yaa sabab t’a nidgd pãnga, la a saasd ninsaalã toog-kaalmã, la a zãagd-a ne yaal-m-mengã, tɩ sã n mik t’a ka ta maan-n-zʋʋk zĩigẽ, la a leb n ka wil ninsaalã ye. Yaa rẽ n so la Bʋʋd-minim-ka-tԑk-naaba rɩk yam-yuus-yuusã n kõ a soԑtãana, tɩ yaa pirsg rasaar ne tõndo, zarb-n-ges zakã la tʋm-n-põs-taabã zak[1] pʋga, t’a soԑtãan tar-a n zarbd nebã, a zarba wã sã n zab-a n nams-a wʋsgo, bɩ a bao sõngr Bʋʋd-minim-naaba la Yolsg-naaba nengẽ, la a yeel tɩ m kota gũudum ne Wẽnnaam n yi a soԑtãan sẽn rig-n-zãag yolsgã.

[1] dũnyã