Barak-pʋʋsg masaalle

Yaa sɩda, sẽn mik tɩ Alkʋr’aana sẽn bʋ-n-manega vẽnegdame n wilgdẽ tɩ bark-pʋʋsgã n yaa naanegã tɩ-bila, ad woto bala, dũni-kẽeng kãnga sẽn yaa alkʋr’aan-bedra vẽnegdame n wilgdẽ tɩ dũni-kẽengã naanega tɩ-biis sẽn tɩ yɩɩd zu-loԑԑg yaa bark-pʋʋsgã, bal d sã n maag d yĩng n ges dũni-kẽengã pʋgẽ, d na maan kaset tɩ dũni-kẽengã nao-kẽndra yaa nao-kẽndr sẽn dɩgl ne sor sẽn wat ne bark-pʋʋsgo, tɩ bũmb fãa gill sẽn be a pʋgẽ togendame –ne a sore- n tʋgd bark-pʋʋgẽ wã, tɩ yaa wala naanegã tɩɩga tɩ-bil sẽn yɩɩd sõmblem yaa bark-pʋʋsgã, la dũni wã lozĩnda bõn-dɩkdsa sẽn yɩɩd sõmlem yaa bark-pʋʋsgã, bal tõnd nee vẽeneg dũni-kẽengã naaneg pʋgẽ, tɩ dũni wã bõn-naandsa tũnuga taab wala ro-gilga, n yaool n naan vɩɩmã tɩ yaa sãntr n be a sʋka, bal bõn-naandsã fãa gill togendame la b get n tʋgd vɩɩmã la b sõgend-a, la b wat ne vɩɩmã yel-tɩlԑ wã, rat-n-yeel tɩ soab ning sẽn naana dũni-kẽengã tũusa vɩ-kãnga n yi a pʋgẽ, rẽ poore, tõnd nee vẽeneg tɩ vɩɩm-dũni-rãmb  n yaa wala ro-gilga, tɩ b ning ninsaalã a tẽn-sʋkã, tɩ yaa wala bõn-baoods nins b sẽn dat bõn-vɩɩsã pʋga wa n tigma taab a pʋgẽ. La Naandã sẽn yaa Na-wagellã tigimda bõn-vɩɩsã fãa gill ninsaalã kɩrenga, la A nom-b n kõ-a tɩ b sõgend-a, la A maan tɩ ninsaalã ya b naaba, rat-n-yeel tɩ Naanda tũusa ninsaalã n yi bõn-vɩɩsã sʋka, la A rat-a la A tũus-a dũni wã pʋgẽ, rẽ poore, tõnd neame tɩ ninsaalã dũni wã, pa rẽ bɩ rũngã me dũni wã, b tũnugd-a-la bũmb sẽn yaa wala ro-gilg pʋgẽ, la b yaool n dɩgl rɩtlã tẽn-sʋkã, tɩ yaa wala A naana nebã fãa gilli, pa rẽ bɩ rũmsã, tɩ b yaa tʋls-kԑgeng damb ne rɩtlã, la A naan-b gill tɩ b yaa sõgen-damb la bõn-nomds a yĩnga, rɩll bũmb ning sẽn bʋʋd b zuga yaa rɩtlã, la A naan rɩtlã yԑs t’a yaa mangas-yaoleng sẽn pid n yaa kõbg toor-toore, bala a tigimda neema sẽn ka-tԑka, hal tɩ b tol n ning zɩlemdã masĩn a zug tɩ b boond tɩ lembg masĩn la baskɩl-rãmb sẽn tar noor sẽn solg ne rɩɩbã sõore, sẽn na yɩl n bãng kõbg fãa noosem sẽn yi rɩtlã kõbg wʋsga pʋgẽ, sã n yaa woto, ad hakɩɩk sẽn yɩɩd yel-solemd dũni wã pʋgẽ, la sẽn yɩɩd ne sekr la sõblem la tiging la manegr bee rɩtlã pʋgẽ.

La mosa tõnd neame tɩ wala bũmb fãa gill sẽn tigimd rɩtlã kɩreng la a togend a nengẽ wã, ad woto bala, rɩtlã ne a kõbga fãa gill yãsa ne bark-pʋʋsgo, a sẽn solg la sẽn vẽnege, la ne a sʋʋrg la a zɩlemde, la b paamd-a-la ne barka pʋʋsgo, la a wat ne bark-pʋʋsgo, la a teesd n tʋgd barka pʋʋsgo, bal rɩɩba yamleoogã la tʋlsma ne-a wã yaa rog-ne bark-pʋʋsg kõbgo, hal ba ne wʋm-noogã la lembgã yaa bark-pʋʋsg sẽn ka vẽenega, bal bark-pʋʋsg kãnga bee rũmsã fãa pʋgẽ, la ninsaalã menenga la a kɩflma yĩnga, a mi n tedga rog-ne bark-pʋʋsg kãnga yalɩ wã, n yi barka pʋʋsgẽ n lʋɩ lagem-n-taarã pʋgẽ, rẽ poore, ad foto-rãmba sẽn nags tɩ yaa neeb wʋsga, la yũ-noodã sẽn tar noosem tԑk-tԑka, la lembgã sẽn yaa nood wʋsga, sẽn be neema nins sẽn wat tõnd nengẽ ne rɩtl sʋʋrga, b yaa bark-pʋʋsgã boaandba, n boond bõn-vɩɩsã n tʋgd nonglem maanego, la a peegd-b ne nonglem n tʋgd maan-neerã la waoogrã, la a tusd-b n tʋgd bark-pʋʋsg sẽn solge, la a takd yamã rãmb gesg n tʋgd maag-m-meng n ges a pʋgẽ, la a kẽesd-b yamleoog ne maan-neerã, la a pirsd-b ne neema wã waoogre, la a kãndgd-b ne goam la tʋʋm n tʋgd barka pʋʋsgo, la a kɩt tɩ b pʋʋsd barka, la a lembd-b wʋm-noog la lembg sẽn yɩɩd sõmblem la noosem barka pʋʋsg pʋgẽ, rat n yeel tɩ rɩtl-yɩleng kãnga, la neema noog kãnga, n lagem ne b yiiba noosma sẽn yaa vẽeneg n yaa koԑԑg n tar tԑka, ne bark-pʋʋgã sababo, b paamda Rahmaan-naab gesg ning sẽn tar noosem sẽn yaa hakɩɩk n duumdẽ wã, la lembg sẽn yaa hakɩɩk sẽn ka tar tԑka, rat-n-yeel t’a peegda ninsaalã n tʋgd yolsgã mangasa Soaada sẽn yaa kõt-wagell soaba gesgã sẽn tar noosem-damb sẽn ka tar tԑka yell tagsgo, la a paamd Arzãna noosma sẽn duumda n lembdẽ, hal ba dũni-kãnga pʋgẽ.

Sã n yaa woto, ad rɩtlã, ba ne a sẽn yaa sãnem-baoor sẽn tigim n yaa sẽn pid n yaa sekda, n tar voalԑԑr sẽn bedem ne bark-pʋʋsgã sababa, ad a lʋɩta lʋɩɩs meng-meng ne bark-pʋʋsgã basbo.

La wala b sẽn vẽneg « gomd a yoob n soaba » pʋga, ad b sã n dɩk lembgã masĩnã sẽn be zɩlemdã pʋga n tʋm rɩtlã pʋgẽ Sɩd-naaba yĩnga, A naam zẽk yã, rat-n-yeel tɩ n dɩk-a n tʋm bark-pʋʋsg tʋʋm sẽn solge, ad lembgã masĩn-kãnga sẽn be zɩlemdã pʋga na n lebga wala Wẽnnaam yolsga sẽn ka-tԑka ragen-damb yel-gԑt sẽn yaa bark-pʋʋsd la pẽgda, n yaa alkadr-zɩsg soaba, la sã n yaa yõorã yamleoog yĩnga, rat-n-yeel tɩ b sã n dɩk-a tʋm rɩtlã pʋgẽ n ka tol n tags Neemda bark-pʋʋsg yelle, na n yɩɩ sabab tɩ lembgã masĩnã sẽn be zɩlemdã pʋga yi yel-gԑtã sẽn tar alkadr-zɩsga zĩiga n lʋɩ pʋgã gagdyẽ zĩigẽ, la pʋ-roogã gagdyẽ zĩiga, la wala rɩtlã sõgen-kãnga sẽn lʋɩt bark-pʋʋsgã kaalem yĩnga, woto bala, rɩtlã la a sõgendb a taaba fãa gill ziira na n lʋɩyame, b na n yii alkadr-zɩsg zĩigẽ n lʋɩ zĩ-yaalgẽ, pa rẽ bɩ a na n sigame n tʋg alhaal sẽn yõsgd ne Naanda naanegã hɩkma wã.

Ad bark-pʋʋsgã baskɩl yaa sek-m-mengã la kẽogsgã la yardã, la bark-pʋʋsgã kaalem baskɩl me yaa yãbeedã la maan-n-zʋʋkã, la neema wã paoogre, la rɩt bũmb fãa gill n ka tũusd a yaa halaal bɩ a yaa haraama. Yaa sɩda, wala yãbeedã maaneg sẽn yaa bark-pʋʋsgã basba, ad woto bala, yaa yẽ la rɩtlã mongra la yaalga sababo, la hal ba gũurã, sẽn tara zĩid-n-taar-vɩɩma, yaa wala a bee naowã tẽngr tɩ b tabd-a ne yãbeedã sabab, bala, ba ne ka-bԑԑl a wãn sẽn sekd-a yʋʋmd pʋga, a ka sekd a meng ye, a ket n nidgda pãng ne ki wã tigingu, tɩ  tõog sã n ket n beẽ, la ãmmaa sĩinfã, a sek-m-mengã yĩnga, a yɩkda nebã  zutẽ, la a kõt nebã sɩɩdã ne Wẽnnaam saglga, la a rɩlgd-b ne-a.

Yaa sɩda, ad Wẽnnaam yʋʋra « Arrahmaan[1] »  -yʋʋr ning sẽn yɩɩda ne zɩslem, « Allaahʋ » wã, sẽn yaa Wẽnnaam zaat-yɩlenga tabkaoor la a yʋ-zɩsga loogr poora-  togenda rɩtlã, la yʋ-kãnga lohorma tõe n paama ne bark-pʋʋs-soalgdgã sẽn be rɩtlã pʋga, rẽ poore, ad Wẽnnaam yʋʋr sẽn tɩ vẽnegd Arrahmaana maana n yɩɩd yaa Arrazzaaka[2], rẽ poore, ad bark-pʋʋsgã tara kõbg toor-toore, la kõbg-kãnsa fãa gill sẽn yɩɩd ne tiging la a buk sẽn gũbgi, yaa pʋʋsgã, rẽ poore, ad sɩd-kũun-yɩleng la wẽn-yemb-yɩleng n be bark-pʋʋsgã pʋgẽ, bal ned sẽn dɩt poam[3] la a yet tɩ Alhamdʋ lillaahɩ, a moondame n wilgd ne bark-pʋʋsg kãnga tɩ poamma yaa tẽegd sẽn yi tõogã nugẽ tɩrga, la kũun sẽn yi yolsgã mangas pʋgẽ tɩrga.

[1] Yolsg-naab

[2] Rɩlgr-naaba

[3] Tɩ-biisi

La nedã koe-kãnga la a loe-kãnga yĩnga, a rɩkda bũmb fãa gilli –zem t’a yaa bilf t’a yaa bedre- n sagend Wẽnnaam tõoga nugẽ, a naam zẽk yã, la a ne Wẽnnaam yolsgã bũmb fãa gill pʋgẽ, la a vẽnegd sɩd-kũun-yɩleng la wẽn-yemb-yɩleng ne bark-pʋʋsg kãnga.

D na n vẽnega neng a yembr tãa sẽn yi nems wʋsg pʋgẽ, sẽn wilgd ninsaalã sẽn yaa yam-yaal-yaal soaba sõm-zɩɩlma maanega ne neema wã sẽn yɩt sabab t’a lʋɩ bõnã pʋga sẽn ta to-to, la rẽ me yaa wala sẽn wata:

Ninsaalã sã n dɩ neema sẽn yaa noog la a pʋʋs barka, hakɩɩka bark-pʋʋsg kãnga yĩnga, neema kãng lebgda laahr nuura la tɩ-bil sẽn be Arzãna pʋgẽ.

La neema kãnga –ne noosem ning a sẽn kõ ninsaalã- kɩtdame tɩ ninsaalã tagsdẽ t’a yaa yolsgã tagems sẽn yi Sɩd-naaba nengẽ, A naam zẽk yã, la woto yĩng n kɩtd t’a paamd noosem sẽn yaa wʋsg n duumdẽ.

A sã n maan a woto, mikdame t’a zẽka neema wã zaata ziiri, t’a yĩn-nemsã sẽn yaa  tom-peglma la  pagda –rat-n-yeel tɩ b teed nins tʋʋm sẽn sa tɩ b ka le tar tʋlsem ne-ba- lebg te-basds sẽn na n lebg n leb a yẽgrẽ wã, rat n yeel tɩ n lebg biisi. La ninsaalã sã n ka pʋʋs bark ne neema kãnsa, neema wã wʋm-no-koԑԑg kãnga saaba na n basa zablem la sũ-sãang a zugu, la b lebg rẽgdo, rat-n-yeel tɩ neema kãnga sẽn yaa wala sãnem-pԑԑlga, a na n lebga wala sarvõ.

Ad bark-pʋʋsgã ne rɩtlã kũuna, kɩtdame tɩ rɩtl-satgã womd tɩ-biis la wʋm-nood sẽn ka sate, la bark-pʋʋsg sã n ka be, neema-kãns teemdame n lebg alhaal-yooko, la woto yaa tɩ bala rɩtlã baasga –yam-yaal-yaala soab yam-tagsg pʋgẽ- ya a sẽn na n lebg rẽgdo[1], wʋm-no-koԑԑg poore.

Yaa sɩda, ad rɩtlã tara yalɩ sẽn segd tɩ b maan-a nonglem, la yalɩ kãnga ka vẽnegd rɩlla ne bark-pʋʋsgo, la yam-yaal-yaalã la menengã rãmb nonglma ne rɩtlã yaa wala rũnga, bɩ f kell n mag yel-kãnga zug n ges menengã la yam-yaal-yaalã rãmb bõna sẽn ta to-to.

[1] bĩndu

Ad bõn-vɩɩsã sẽn tɩ tara tʋlsem ne rɩtlã kõbg toor-toor n tɩ yɩɩd yaa ninsaalã, la Sɩd-naaba, A naam zẽk yã, naana ninsaalã t’a ya A yʋya fãa gill minwoaare, la tõog yel-solemd sẽn tar masĩn-damb sẽn tõe n pẽes la b bãng A yolsga mangas-rãmba sẽn bĩng bũmb ninga, yẽ la tẽngã lԑdsd sẽn tar masĩn-damb sẽn tõe n pẽes n bãng Wẽnnaam yʋya maana-zulumsã la b sõmblma, rẽ n kɩt tɩ Wẽnnaam kõ-a tʋlsem sẽn ka tar tԑka, la A maan-a t’a tar tʋlsem ne rɩtlã toor-toor sẽn solg la sẽn vẽnege.

Ad roadg ning sẽn kɩt tɩ ninsaalã rʋ -sẽn zemsd ne tiging kãnga- ‘‘naaneg sẽn yɩɩd sõmblem’’ zĩig sẽn yɩɩd zẽkra, yaa bark-pʋʋsgã, la bark-pʋʋsgã sã n ka be, a na n leeb n lʋya ‘‘tẽngr rãmba tẽngre’’ wakat-kãng mikdame t’a tʋma wẽgd-tʋʋmd sẽn bedem.

Gilbu : Ad tũudmã la nonglmã sora sẽn yaa sor sẽn yɩɩd ne zẽkr la sõmblma yẽg a naasã sẽn tɩ yɩɩda ne bedlem yaa bark-pʋʋsgã, la b togsa yẽg-kãns b naasa wala sẽn wata:

در طريق عجز مندي لازم آمد چار چيز

عجز مطلق فقر مطلق شوق مطلق شكر مطلق أي عزيز

(yaa foo nin-sõngo, sak-n-deeg tɩ f yaa valeng Wẽnnaam taoora sor pʋga, A naam zẽk yã- ad valemsg sẽn ka-tԑkã, la talemd sẽn ka-tԑkã, la nonglem-kԑgeng sẽn ka-tԑkã, la bark-pʋʋsg sẽn ka-tԑkã maaneg yaa tɩlԑ)

اَللَّهُمَّ اجْعَلْنَا مِنَ الشَّاكِرِينَ بِرَحْمَتِكَ يَا أَرْحَمَ الرَّاحِمِينَ.

(D soab a Wẽnnaam, d kota Foo tɩ F lagem-d bark-pʋʋsdbã pʋgẽ ne F yolsgã, yaa Foo yolsdbã yolsda)

سُبْحَانَكَ لاَ عِلْمَ لَنَا إِلاَّ مَا عَلَّمْتَنا إِنَّكَ أَنْتَ الْعَليمُ الْحَكيم

(Yɩlemd be ne Foo Wẽnnaam, tõnd ka tar minim n zʋʋg bũmb ning Fo sẽn wilg tõnda ye, ad Foo Wẽnnaam la Minim-naab la Bʋʋd-mita)

اَللَّهُمَّ صَلِّ وَسَلِّمْ عَلَى سَيِّدِنَا مُحَمَّدٍ سَيِّدِ الشَّاكِرِينَ وَالْحَامِدِينَ

وَعَلَى آلِهِ وَصَحْبِهِ أَجْمَعِينَ. آمين

(D soaba Wẽnnaam, d kota Foo tɩ F pʋʋs la F tɩlg d zug-soab a Mohammad sẽn yaa bark-pʋʋsdbã la pẽgdbã taoor-soabã, la a zakã rãmb la a sahaabsã fãa gilli, Amiina

وآخِرُ دَعْوَاهُمْ أَنِ الْحَمْدُ للهِ رَبِّ الْعَالَمِينَ

(La b yaoolem doaag yaa tɩ pẽgr be ne Wẽnnaam sẽn yaa bõn-naandsã gʋʋndã)