A tɩ-bilã yiib soaba la yõod sẽn yi a yõod-dãmb nins sẽn togl meng-vɩɩmã, la yõod a tãab n soab sẽn tar tõkr ne meng-vɩɩmã:

A TƖ-BILÃ YIIB SOABA LA YÕOD SẼN YI A YÕOD-DÃMB NINS SẼN TOGL MENG-VƖƖMÃ:

(Yõod sõng b sẽn vẽneg “Masaall a tãab n soaba” pʋgẽ, la mantaag sẽn yi “kom-bɩɩs toagendã” mantaasã pʋgẽ).

Yaa sɩda, ad yɩɩr sẽn tɩ yɩɩd ne yɩɩr n maand ninsaal buud fãa tags soagl wakat fãa yaa sor ning a sẽn na n tũ n ki wã, wala a zo-rãmbã la a rog-pẽts nins sẽn deng taoora sẽn kẽ yaoogã to-to.

Ad ninsaalã sẽn yaa valengã, sẽn dɩkd a yõor n kõ a noang a yembr yĩnga, wakat ning a sẽn wat n tagsd a zo-rãmb tusa, pa rẽ bɩ minyõ-rãmb la minyaar-dãmba kũumã sẽn be welg-ruumdgã pʋga, ad-a namsda nams-kԑgeng sẽn yaa Gԑhannam bugum namsgo, tags-kãnga sabab yĩnga. La zĩig pʋgẽ bal la sɩd-kũunã ne Laahrã sẽn wat a nengẽ, n wa pak a pʋtẽerã la a lak ludgã n bas-a, la a yeel-a:  “ges” t’a ges ne liimaoongã nuurã, tɩ zĩig pʋgẽ bal t’a wʋmd-noog ne yõor wʋm-noog sẽn yit Arzãna pʋgẽ, ne a sẽn maan kaset t’a zo-rãmba tɩlgame n yi kũ-ruumdgã la saabã, la b kolld-a ne sũ-noogo, dũni sẽn tar nuura pʋgẽ.

La d na n sek d mens ne alkadr kãnga, bala, yõod kãnga b vẽneg-a-la ne daliil-rãmb wʋsg Rasaa’ɩlʋn Nuura pʋgẽ.

YÕOD A TÃAB N SOAB SẼN TAR TÕKR NE MENG-VƖƖMÃ:

Ad ninsaalã sẽn yɩɩd bõn-vɩɩs taaba, la a ziirã zẽkrã la a daragԑ wã zẽkrã, ad ya a zʋg-sõma wã la a yalɩ pãngã sẽn gũbga, la a tũudmã sẽn yaa gilla, la a belmã zĩis sẽn yalma yĩnga. La bũmb sẽn be be yaa tɩ ninsaalã tara sɩf-rãmba, wala kisgrã la nonglmã la ma-biirã la nedengã, sẽn zems ne wakat koԑԑg ning a sẽn be a soab pʋga, b sẽn gɩdg-a soab t’a be wakat sẽn loogã la sẽn watã sʋka, b yiib nins sẽn yaa lik n yaa kɩɩng n pʋs n ka be wã.

Bilgri, ad a nongame la a sõgend a saambã la a ma-biigã la a pagã la a ma wã la a tẽngã, a sẽn da ka mi-b rãmba pĩnda, la a ka na n tol n tõog n le yãnd-b rãmba, a sẽn welg n bas-ba poora. Le paooda wʋsg a sẽn na n paam zood la pʋ-peelem sẽn pid ne-ba, tɩ rẽ sabab t’a zʋg-sõmsa la pidbã boogd ne zems-tũnugdum[1], bal zug na n lebg n lʋɩɩ nao tẽngre, t’a lebg nin-yaalg la valeng n yɩɩd rũngã, sẽn kẽed ne yamã wԑԑngẽ, a sẽn sõmb n da tall yɩɩdlem la waoor n yɩɩg-a wã pʋgẽ. La zĩig pʋgẽ bal la sɩd-kũunã ne Laahrã sẽn wat n tɩlg-a, n wẽnems a wakat sẽka sẽn yaa wa yaoogã tɩ lebg wakat-yaoleng wʋsg n gũbgd wakat sẽn loogã la sẽn watã, n wilg-a vɩɩm zĩig sẽn yaa yaoleng wala dũni wã yalma, ayo, a tẽegdame n yit zãmaan-kʋdg n tʋgd abada, la a nong a saambã a sẽn yaa saamb yĩnga, hal ba zu-noogã zakẽ la yõy dũni pʋgẽ, la a nong a ma-biigã b ma-biirã sẽn tẽeg n tʋgd abada wã yĩnga, la a nong a pagã, n loe a sũurẽ t’a yaa tũud-n-taag sẽn yɩɩd neer Arzãna pʋgẽ yԑsa, la a waoogd-b la a tar ninbãan-zoeer ne-ba, la a sõngd-b la a kengd-ba.

La a ka rɩkd sõgen-sõma kãnsã sẽn be belmã zĩisa la vɩ-kẽengã yĩnga n maan dũni wã te-yaalg ye, la bõn-daab la nafa-gɩrs yĩng ye, tɩ rẽ sabab t’a paamd segl-sõng ne zoodã sẽn yaa sɩdã, la pʋ-peelmã sẽn pidã, t’a pidbã la a zʋgdã sɩng zẽkre –ne zems-tũnugdum, la bũmb fãa yaa ne a daragԑ- t’a nedengã paasdẽ, tɩ nin-kãnga sẽn ka tõe n paam liul[2] zĩigẽ dũni wã wʋm-noog pʋga lebg sãan sẽn yɩɩd ne zu-noog la waoor bõn-naandsã pʋgẽ, la rũmsã fãa gill zugu, la a lebg yamb sẽn yɩɩd ne yɩɩdlem la nonglem bõn-naandsã Soaba nengẽ.

La m na n basa koԑԑg a woto tɩ d sek d meng ne yõod kãngã vẽnegrã yԑsa, ne a sẽn tar daliil-dãmb Rasaa’ɩlʋn Nuura pʋga.

[1] A yembr sã n paase yiib n soaba me paasdame, a sã n woog t’a wooge. (lebgdã)

[2] taampurgã