Dũni-yikrã yõod a naas n soab sẽn tar tõkr ne ninsaalã zĩid-n-taarã vɩɩmã:

DŨNI-YIKRÃ YÕOD A NAAS N SOAB SẼN TAR TÕKR NE NINSAALÃ ZĨID-N-TAARÃ VƖƖMÃ:

Ad yõod kãngã gilb ning b sẽn vẽneg “Sʋ’aa’ a wԑ wã” pʋg sẽn be Rasaa’ɩlʋn Nuura pʋga la woto:

Ad kom-bõonesã sõor sẽn ta nebã pʋɩɩr a naas yemra ka tõe n vɩɩmd vɩɩm sẽn segd ne ninsaalã waoorã, la b le zã ninsaalã yalɩ pãngã, rɩlla ne sɩd-kũunã ne Laahrã, sã n ka rẽ, b na n vɩɩmda vɩɩm sẽn tar rabeem, la a na n reema ne a yãadra reem sẽn na yɩl n gũsg a menga, la a yĩm yɩɩr la rabeem zablem. Bala a wẽnd-n-taasã sẽn yaa kom-bõonegã kũuma a sԑԑgẽ wakat fãa wã, basda tagems a zu-faagã pʋgẽ, la a sũ-valengã sẽn zãada saag-wogda pʋgẽ, la a yõ-valengã sẽn ka tõe n reeg toga. La wakat ning tagems-kãngã sẽn wa n kɩt tɩ vɩɩmã la yamã lebg namsg la sɩbgr teoog nin-valeng kãngã yĩnga, zĩig pʋgẽ bal la sɩd-kũunã ne Laahrã kaorengã wa n kẽes-a sũ-noog la vʋʋsem, n ledg yɩɩrã la yԑԑsg ning sẽn solg a reemã poor sẽn na yɩl t’a ra yãnd-a wã zĩigẽ, la a yetẽ: ad mam ma-biigã bɩ m zoa wã maana kaalem n lebg Arzãn liula, n paamd n gilgd a pʋgẽ n reemdẽ la a wʋmd-noog n yɩɩd tõndo, la m ma wã me maana kaalem, la yaa Wẽnnaam yolsgẽ wã la a sẽn kẽnga, a na n le wa rɩka maam n mobg a yãoogẽ yԑsa, n le belg maam, m na n le yãnda m ma wã sẽn ya m noang la m ninbãan-zoԑta. Ad ya a woto la koambã tõe n vɩɩmd vɩɩm sẽn segd ne ninsaalã waoorã.

La woto bala, ad nin-kẽembã me sõor sẽn ta ninbuiidã pʋɩɩr a naas yembra ka paamd sũ-maagr b vɩɩmã sẽn wat n kolg saaba, la b yaadẽ kõom sẽn wat n kolga wakat ye, b leb n ka tõe n paam sũ-maagr b dũni-noogã saab wakat rɩlla ne sɩd-kũunã ne Laahra, sã n ka rẽ, ad saamb-kãnsã sẽn yaa ninbãan-zoԑt-b la neb sẽn tar waoora, la ma-rãmbã sẽn yaa ninbãan-zoԑt-bã sẽn kʋʋd b mensã b koambã yĩnga, na n paama namsg ne kʋkʋm sẽn yaa yõy kʋkʋm la sũy yɩɩr la b rigbu, n kɩt tɩ dũni wã lebg bãns-ro-sẽka, keellem la tẽeb-wãagr pʋgẽ, n le kɩt tɩ vɩɩmã lebg nams-kԑgeng b zugu.

La sɩd-kũunã ne Laahra yet-b lame “Ra yԑԑs-y ye, ad yãmb tara rasãn-duumdg sẽn wate, la vɩɩm sẽn be neer n ka tar saab n kolld yãmba, la y na n sega y koambã la y rog-pẽts nins sẽn deng yãmb taoora ne sũ-noogo, la y tʋʋm-sõmsã fãa gill bĩngame tɩ ketẽ, y na n paama a keoorã me”.

Yaa woto la sɩd-kũunã ne Laahra kõt-b sũ-maagr la yin-yõgenega, tɩ kɩt tɩ ba tɩ nin-kẽoong koabg sã n wa tɩ tigim b ned fãa zugu, b kõn tol n wãag b tẽeb ye.

La kom-bɩɩsã sẽn ya b ninbuiidã pʋɩɩr a tãab yembra, tɩ b zɩɩmã kԑԑda, tɩ b yõy yamleoog wind-ba, tɩ ka wakat fãa la b tʋmd ne b yamã, b sã n kong sɩd-kũunã ne Laahra, la b ka tẽegd Gԑhanma namsgã yelle, ad yõk-m-meng rãmba arzԑkã la b nedengã, la nin-kẽembã la nin-valemsã peemsgã la b ziirã, zãma wã sʋka, na n kẽe rebeem pʋga, bala b sãnda na n sãama zu-noog-zaks zu-noogo, minit a yembr wʋm-noog yĩng bala, tɩ tʋʋm-kãngã tõe n kẽes-a yʋʋm a naas bɩ nu bãns-roog namsgo, t’a lebg wala we-rũng sẽn yõgd neba.

La sɩd-kũunã ne Laahra sã n sõng-a, a na n lebg n leba a sɩda zug tao-tao, a na n le talla ninbãan-zoeer la waoogr ne neb nins a sẽn da rat ne wẽnga. A na n le yeelame: “Ad goosneema wã nina ka ne maam ye, la m tõeeme n solg t’a ka yãnd-m ye, la Pãng-naaba sẽn yaa Na-wagella sẽn tar bãns-ro-sẽk wala Gԑhanma malԑksã nee maam, la b gʋlsd mam tʋʋm-wẽna. Sã n ya a woto, mam ka so m mengã gill ye, ayo, ad mam yaa so-toagda, b sẽn dogl-a soab tʋʋma, la ma me na n wa lebga nin-kẽem la nin-valeng wala nin-kãnsã”.

D na n basa a woto koԑԑg-koԑԑga, ne a sẽn paam vẽnegr Rasaa’ɩlʋn Nuura pʋga ne a daliil-vẽenesã.

La woto bala, ad neb nins sẽn be ninbuiidã pʋg tɩ b sõor yaa wʋsga, wala bãad-dãmba la b sẽn wẽgd-b rãmba la tõnd bilgri, neb nins sẽn be mosɩɩb pʋga, la talsa, la bãns-roogã koambã, b sẽn bʋ neb nins zug ne namsg sẽn kegma, sɩd-kũunã ne Laahra sã n ka fãag-ba, ad kũumã sẽn yãsa b yembr fãa nen-taoorã wakat fãa wã, ne bãasã sẽn tẽegd-b kũumã yell wakat fãa wã, la b sẽn wẽg ned fãa t’a ka tõe n paam a hakԑ wã n deega, la wẽgd ning a sẽn ka tõe n zoe n põs-a wã, la tẽeb-wãagrã ne a koambã la a arzԑkã sẽn sãam mosɩɩb-bԑdã pʋga, la weoog-kԑgeng ning sẽn be yʋʋm a nu bɩ piig bãns-roog pʋga, tɩ yaa wʋm-noog sẽn pa yɩɩd minit wãn bɩ lԑԑr a yembr bɩ a yiib yĩnga, wala tõnd bãns-ro-kãngã naonga, sik ka be tɩ woto fãa na n wẽnemsa dũni wã tɩ lebg bãns-ro-sẽk ye, la a wẽnems vɩɩmã tɩ lebg nams-kԑgeng nin-valemsã zug ye.

La sɩd-kũuna ne Laahra sã n fãag-ba, b na n peemsame, tɩ b weoogrã la b tẽ-wãagrã la b yԑԑsgã sa, tɩ yaa wala b zoe n reega b hakԑ wã. La sasa ninga, mosɩɩb-kãnsã fãa gill sata zãnga, la bee ne ned fãa sɩd-kũuna tԑka.

Hal tɩ m tõe n yeel tɩ: “lat tɩ sɩd-kũunã ne Laahra sã n da ka fãag tõnd –maam la mam ma-biisã sãnda- d bãns-roog ning d sẽn kẽ-a soab tɩ ka yɩ ne sababa, la d mosɩɩb-kãngã sẽn tar rabeema pʋga, lat t’a raar a yembr tãa zãab na yɩ zɩsg tõnd zug wala kũumã zɩɩbã, la rẽ na tall tõnd tɩ d wa rat n yi n bas vɩɩmã.

La mam pẽgda Wẽnnaam pẽgr sẽn ka sate, bala, ba ne mam ma-biis nins mam sẽn nong n tɩ yɩɩda mosɩɩba sẽn namsd maama, la mam gaf-sõmsã sẽn maneg n nags ne sãnmã sẽn menma, la Rasaa’ɩlʋn Nuura tus ka-tԑk mam sẽn nong ne m sũura fãag n yɩɩd m nifrã sẽn menma, la ba ne hal pĩndã mam sẽn da ka tõe n maan sugr ne ned yaalg la a modgr baa bilfa, ad mam wẽendame n wilgd yãmb vẽeneg-vẽenega, tɩ sɩd-kũunã ne Laahra la a pãnga, b yiiba kõo maam sugr la tõog-m-meng la sũ-maagr la keglem, pa rẽ bɩ b kõ-m-la yamleoog la raab kԑgeng la yẽeslem, sẽn na yɩl tɩ m paam keo-bedrã, tɩ m yaa sẽn maand nidg-pãng zarb-n-gԑsg sẽn tar yõod pʋgẽ, bala, mam neeme tɩ mam bee kaoren-do-sõng sẽn yaa yɩleng n tar albark pʋgẽ, b sẽn segd n bool-a soab tɩ “Yʋʋsʋf kaoren-dooga”, wala m sẽn yeel masaal-kãnga sɩngrẽ wã, lat tɩ sã n ka bãasã sẽn mi n yõk maama, la nin-kẽoongã yaams yĩnga, m naan n gãneg m yam n lebs m kaorengã sõma noor wʋsgo, la sẽn wa n yaa neng ning fãa… ad yel-kãngã kɩtame tɩ tõnd yi n bas gomdã zu-rao-kãnga, rẽ yĩnga d kot-y-la sugri”.

La woto bala, ad ned buud fãa zak la a dũni-bila, pa rẽ bɩ a arzãn-bila, la ad sɩd-kũunã ne Laahra sã n ka gɩbl zakã zu-noogã, ad sũ-sãams la rabeem na paam ned buud fãa sẽn be zakã pʋga, t’a pãnga ta ned fãa ninbãan-zoeerã la a nonglmã la a tõk-n-taarã ne zakã rãmb pãng sẽn ta to-to wã. L  hakɩɩka, a arzãna na lebg gԑhanem, maa t’a kʋ a yamã ne reem la yalemd sẽn ka kaoosde, t’a bilgr lebg wala nameeng sẽn yã tãoos n mak wudgr bɩ yɩkr n konge, n rɩk a zugã n bus bĩisrẽ, tɩ tãoosã kõn yã-a ye. 

Ad woto bala, ned ning fãa sẽn be zak sẽn yaa vɩʋʋg tɩ sɩd-kũun ka be a pʋgẽ, ad a soab kẽesda a zug yam-yaal-yaalã pʋgẽ sẽn na yɩl tɩ kũumã la saabã la welgrã ra yãnd-a ye, rat n yeel t’a paamda yiib zĩig sẽn ka baasde, wala toog-kaalem maaneg la yĩn-wʋmdsã kiisgu, wakat bilf pʋgẽ, bal koamb ma bilgri, wakat ning fãag a sẽn wat n yãnd a koambã –a sẽn dɩkd a yõorã n kõ neb nins yĩnga- tɩ b be mosɩɩb pʋga, la rabeem sẽn yõkd-a t’a rigda, la woto bala, koambã me sẽn ka tõeb n tɩlg b roagdbã la b ma-biisã n yi ballaog-rãmba la mosɩɩb-rãmb nins sẽn ka wãagda, la sũ-sãang la yԑԑsg sẽn duumd sẽn yõkd-ba. La mak-kãnga yĩnga,  ad zak ning b sẽn tẽed t’a tara zu-noog dũni-kãngã sẽn tar rabeema vɩɩma pʋga, a na n konga a zu-noogã nems wʋsgo, ad vɩ-koԑԑg pʋgẽ zood la a rogem ka kõt zood sẽn yaa hakɩɩk ye, a leb n ka kõt pʋ-peelem sẽn tolg n pid ye, la nonglem la sõng-taabã sẽn yaa yɩleng ka zĩndid tɩ ka yɩ bũmb raab yĩng ye, tɩ rẽ sabab kɩt tɩ zʋg-sõmã wã boogdẽ, pa rẽ bɩ a sa, ne zems-tũnugdum.

La sɩd-kũunã ne Laahra sã n kẽ zakã pʋgẽ, a ningd-a-la nuura la a widg-a wakat-kãng pʋgẽ bala, la tõk-n-taarã la ninbãan-zoeerã la rogmã la nonglmã sẽn be zakã nebã ne taab sʋka, ka na n yɩ koԑԑg n zems wala b sẽn na n zĩnd ne taab dũni wã pʋga tԑk ye, ayo, ad ned fãa na n waooga a to waoogr sẽn yaa hakɩɩk waoogre, la a noang-a la a tar ninbãan-zoeer ne-a, la a maand wʋm-noog la a vẽnegd a zoodã ne-a, tõk-n-ta-kãngaã sẽn na n duum hal n tɩ tãag Laahra, la zu-noogã sẽn duumda yĩnga, la b yaafd-n-basd-a lame, n ka pẽesd a tʋʋm-tuutɩ wã n ges ye, ayo, b maand-a-la bas-tɩ-looge, la zẽng sẽn ka rẽ… La wakat-kãnga, zʋg-sõma wã zẽkdame tɩ sɩd-sɩd zu-noogã sɩng pukr zakã pʋgẽ. D na n koeeg-a-la woto, a sẽn da paam vẽnegr la a tar daliil-dãmb Rasaa’ɩlʋn Nuura pʋga yĩnga.

La woto bala, ad tẽng buud fãa yaa zak sẽn yalem n sek a zĩidba, la sɩd-kũunã ne Laahra sã n ka gɩbl zak-kẽeng kãngã nebã, lat tɩ alhaal-dãmb la manesem wẽns na sẽege, wala niyã wẽnsã, la nafa raabã, la wẽgdã la ziri wã la nin-mengrã la pʋyagbã, la maan-tɩ-b-yã wã la yam-raabã la zãmbã, n ledg pʋ-peelmã la sɩdã la yɩɩdlmã la nedengã la kʋʋm-m-meng-to-yĩngã la Laahra yel-sõmdã la Wẽnnaam yardã baoobã sẽn yaa zʋg-sõma wã yẽgrã zĩiga, la wakat-kãnga, rabeemã la yԑԑsgã yãmbda bas-m-yamã la nedengã zĩiga, tɩ tẽn-kãng vɩɩmã lebg zẽnem, tɩ kom-bõonesã sɩng yirbgu, tɩ kom-bɩɩsã rɩgsd teed n suuda, tɩ pãnsã rãmb wẽgda, tɩ nin-kẽembã kʋmdẽ.

La d sã n kell n pa yel-kãngã zugu, ad kõntɩna wã yaa zaka, tɩ tẽngã me yaa nebã zaka, la ne tʋʋlem pʋgẽ bala, ad sɩd-kũunã ne Laahra sã n deeg bʋʋdã zak-yalems kãnsã pʋgẽ, waoor-yɩlengã la sɩd nin-bãan-zoeerã, la nonglmã la sõng-taabã tɩ pa yɩ ne yam-raab yĩnga, la sõgnegã la zĩid-n-taar sẽn ka tar zãmba, la wẽnd-yĩng maan-neerã, la zɩslmã la yɩɩdlmã sẽn ka tar nin-mengra na n vẽnega zak-kãngã pʋgẽ, ne sɩd-kũunã ne Laahra sẽn yet kom-bõonesã: “Bas zʋg-wẽnsã tɩ arzãn n be”, n bɩɩsd-b la a wubd-b ne Alkʋr’aana kaorengo. La a yet kom-bɩɩsã: “bas-y rɩk-teed-n-su wã, tɩ ad Gԑhanem n be” n kɩt tɩ b lebg n tʋg b sɩda zugu. La a yet wẽgdã: “Ad nams-kԑgeng n be, fo na n tɩ paama pegs pãbre”, n kɩt t’a sulg a zug n sak tẽeg-tɩrgã. La a yet nin-kẽembã: “Ad laahr zu-no-ruumdg la rasãn-duumdg sẽn be neer t’a sõmblem yɩɩd fo zu-noog kõbg toor-toor ning fo sẽn konga  n be n kolld foo, bɩ f nidg pãng ne tʋʋma, sẽn na yɩl n paam-ba” tɩ rẽ sabab t’a kʋkʋmã lebg laado.

La d sã n kell n pa yel-kãngã zugu, ad sɩd-kũunã ne Laahra basda vũun-sõng ninbuiidã sull-bԑd la a sull-bõones fãa pʋgẽ, n ningd-a nuura la a kõt-a vẽenem. Sã n yaa woto bɩ zĩid-n-taar vɩɩmã bãngdbã la zʋgdã bãngdb nins sẽn tar nidg-pãng ne ninbuiidã zĩid-n-taar vɩɩmã yok b tʋbr n kelge.

B sã n geel sɩd-kũunã ne Laahra yõod tus-ka-tԑks a taaba bilg-rãmb a nu wã bɩ yoob nins tõnd sẽn wilga n gese, fo na fasem sɩd-sɩd tɩ zaksã a yiiba[1] la vɩɩmã a yiiba[2] zu-noogã zĩig yaa sɩd-kũunã bal tãa, ka bũmb a to ye.

La d na n wilga kaanẽ ne nug-tees-koԑԑg bala, yel-gẽdem bõones sẽn be sẽn kẽed ne nebã yikrã ne b yĩisã, tɩ d yaa sẽn sek d mens ne leok-rãmb sẽn tar pãnga sẽn be “gomd pisi la a ni n soabã” pʋga, la masaal-dãmb a taaba sẽn be “Rasaa’ɩlʋn Nuura” pʋga.

Ad nen-gԑtg sẽn vẽnegd Wẽnnaam yʋyã n yɩɩda bee yĩnsã pʋgẽ, la bõn-baoodg ning Wẽnnaam sẽn rat bõn-naandsã naanegã pʋga, la A naanegã pãnga bee yĩnsã pʋgẽ, la Wẽnnaam maan-neerã sẽn nagsã kõbg wʋsg fãa bee yĩnsã pʋgẽ, la doos nins nebã sẽn kos b Naanda ne b tʋlsmã zɩlma wã yõoda, la b bark-pʋʋsg ning b sẽn pʋʋsd b Naanda, yẽ me bee yĩnsã pʋgẽ, la dũni-solgdgã la yõy dũni wã tɩ-bil-yamdã wʋsg fãa bee yĩnsã pʋgẽ.

[1] Dũni wã la laahrã

[2] Dũni vɩɩmã la laahr vɩɩmã

La d sã n na n tik mak-kãngã zugu, sẽn mik tɩ hakɩɩk-rãmb kobsã sẽn yaa gilla tigimda yĩnsã pʋga, ad Naanda sẽn yaa Bʋ-mita, yeelgda bõn-naandsã belem –zãmaan fãa pʋgẽ- ne naaneg sẽn tʋʋl n le tar yel-solemd wʋsgo, sẽn na yɩl n wʋsg yĩisã tẽn-gõngã zugu, la sẽn na maan-a t’a yaa vẽnegr zĩig ne hakɩɩk-rãmbã b sẽn togsã, n tʋmsd-b tẽn-gõngã zugu, rẽ poorẽ t’A lebs-ba, la a tʋms neb a taab b zĩigẽ wã. La yaa woto tɩ bõn-naandsã naanegã losĩnd tʋmd wakat fãa, la a wʋgd yĩisi, la a maand tẽngã tɩ yaa wala Laahra la Arzãna koob zĩiga. Halɩ t’A wat ne rɩ-rãmb sẽn ya sõma wʋsgo, la neema-bԑd sẽn ka tar tԑka, la neema kõbg too-toor tus-kobse, n tar noosem kõbg toor-toor tusa, sẽn na yɩl tɩ ninsaalã pʋ-roogã sẽn yaa yĩnga raaba pidi, la A kelg la A reeg pʋ-roogã kosgã  ne a alhaal zɩlemda –ne ning-m-toog meng-menga- sẽn na yɩl t’a vɩɩmde, la sẽn na yɩl tɩ Wẽnnaam leok-a sɩd-sɩda, ad woto fãa gill wilgda vẽeneg-vẽeneg tɩ sik ka be, tɩ Arzãna wʋm-noogã wʋsg fãa gilli, la a kõbg wʋsg fãa gill Laahra zakã pʋgẽ, yaa bũmb sẽn tar yĩnga, la neema-rãmba sẽn tɩ yɩɩd sõmblem –ned buud fãa sẽn dat-a soaba la a yubsd a neng ne-a wã- zu-no-ruumdgã pʋga yaa bũmb sẽn tar yĩnga.

Togs-m wԑ nin-sõngo, yalla sakdame bɩ yalla tõeeme tɩ Tõog-naaba sẽn yaa Yolsg-naaba la Minim-naaba la Bʋ-mit-naaba reeg pʋ-ro-kãnga kosgã ne a alhaal zɩlemdã sẽn na yɩl t’a tõog n ruumi, la A noog a sũur ne rɩ-rãmb sẽn tar yĩng la a tar yel-soalem sẽn ka-tԑka, la A leokd-a sɩd-sɩd wakat fãa ne A menga yam-yãkr tɩ ka yaare, n yaool n ka reegd doos-bԑd nins sẽn gũbga, ninsaalã sẽn kos ne nedengã pʋ-ro-kẽenga zɩlemdã –tɩ yaool n yaa yẽ la naanegã yõod sẽn yɩɩd sõmblem, la Wẽnnaam ledsd tẽngã zugu, la yãmb Naanda bõn-naandg la a tũud sẽn tɩ yɩɩd ne sõmblem- sẽn na kõ-a kellg zakã pʋgẽ yĩns wʋm-noog ning a sẽn maand yamleoog wakat fãa n data, la a yubs a neng ne-a la a rat-a la a baood-a ne rog-ne wã? La yalla sakdame t’A bas a kosgã n ka reeg n ka yik a yĩnsã? La yalla sakdame t’A ka kõ ninsaalã sũ-noogr sẽn duumd abada? A sã n maan a woto, A yaa wala ned ning sẽn wʋmd zõaag rãamd n yaool n ka wʋmd sa-tãs rãamd ye, la wala ned ning sẽn nidgd-pãng ne soda-zaal bõn-baoods n yaool n ka nidgd-pãng ne sodaas sẽn yaa zab-zabdba yell ye. Woto me yaa bũmb sẽn yaa ziri n ka tõe n yɩ, koabg pʋgẽ fãa koabga gilli.

Yaa sɩda, ad ninsaalã, yaa wala aayarã nas sẽn togs vẽeneg-vẽenega :

﴿وَفِيهَا مَا تَشْتَهِيهِ الْأَنفُسُ وَتَلَذُّ الْأَعْيُنُ﴾ (سورة الزخرف: 43/71)

 (Bee Arzãna pʋgẽ bũmb ning fãa yõyã sẽn maand yamleoog n data, la ninã sẽn rat n gese), a na n yãndame la a lemb –lembg sẽn zemsd ne Arzãna- yĩis wʋm-nood  nins a sẽn minim n yubsd a neng ne-a soab n yɩɩd bũmb a to fãa gilla, la a ra zoe n lemb a bilgrã dũni wã pʋga. La b na n le kõ-a-la tũudmã keoor zalle, la a bark-pʋʋsg ning yĩn-wilã sẽn tʋm Wẽnnaam yĩnga, wala zɩlemdã la nifrã la tʋbrã, ne yĩis wʋm-noog sẽn yaa toor zall ne yĩn-wil-kãnsa. La Alkʋr’aana sẽn yaa muugiza-vẽenega vẽnegda yĩisa wʋm-no-kãnsã tɩ yaa vẽenega, ne sẽn mik tɩ sor ka be tɩ b tõe n yãk a maana wã tɩ ka maana vẽeneg nins Alkʋr’aana sẽn kõ wã ye.

Ad sɩd-kũunã ne Laahra tɩ-biisã la a yõodã wilgda bũmb nins sẽn wata:

Wala pʋ-roogã yalɩ sẽn yaa yĩn-will sẽn yi ninsaalã yĩn-wilã pʋga, la a tʋlsem-dãmba sẽn wilgd sɩd-sɩd tɩ rɩ-rãmb n be wã, woto bala, ad ninsaalã me yalɩ wã la a pidbã la tʋlsem-dãmbã a sẽn dog-ne wã, la a yamleoodã la a saag-rãmba sẽn duumdã, la sɩd-kũunã ne Laahra hakɩɩk-rãmba sẽn wilgd yõod la nafa-rãmb nins b sẽn togsã belma, la ninsaalã yalɩ pãnga, b fãa wilgda ne daliil sẽn tar pãnga, tɩ Laahra la Arzãna la yĩisa wʋm-noodã sẽn ruumdã beeme, la a maand kaset ne a waoongã la a sɩdgrã.

La woto bala, Rasaa’ɩlʋn Nuura pʋg me -sẽn tɩ yɩɩda “gomd piig n soabã”  la “gomd pisi la a ni n soabã” la “gomd pisi la a wԑ n soabã” pʋga, la “Sʋ’aa’ a wԑ n soabã” la “sõsg masaallã”[1]- b sɩdga ne daliil-dãmb la manesem sẽn yaa vẽeneg tɩ yel-gẽdem ka be a pʋgẽ, tɩ naanegã pidbã hakɩɩka la a tagemsã sẽn tar maana-zulumsa, la ãdem-biilmã hakɩɩk-rãmba fãa gill sẽn tar tõkr ne hakɩɩk-rãmb nins b sẽn togsã, b wilgdame la b maand kaset ne Laahr zakã belem la a sɩda, la tiging daarã waoongo, la Arzãna la Bugmã pakra. La d na n teka yẽos-wok-kãngã a woto, la d bas a vẽnegra ne Rasaa’ɩlʋn Nuura[2].

[1] رسالة المناجاة

[2] “gomd piig n soaba” la “gomd pisi la a ni n soaba” la “pisi la a wԑ soaba”, la “sʋ’aa’ a wԑ” wã, la “sõsg masaallã”