Gom-lekds a yiib sẽn na n pids masaal piig n soabã

Gom-lekds a yiib sẽn na n pids masaal piig n soabã

Pipi gom-lekdgã: Hakɩka m da wʋma yʋʋm piig la a yiib sẽn looge, tɩ wẽnd-ka-be wã rãmb zut-rãmbã tika Alkʋr’aana lebgr n na n vẽneg b beemã ne-a, n gãneg yam-sɩlem n yeele: “d lebg Alkʋr’aana sẽn na yɩl tɩ b paam n bãng a yõoda, rat n yeele, sẽn na yɩl tɩ neba fãa yãnd a gom-n-yɩlmã sẽn ka tar yõoda[1], tɩ d paam tɩ nebã bas  Alkʋr’aana meng kaorengo, la b karem b sẽn lebga soaba”.

La daliil-kegems nins sẽn ka tõe n yika sẽn be “Rasaa’ɩlʋn Nuura” pʋga tabenda tabedg sẽn tar pãnga, tɩ Alkʋr’aana ka tõe n lebg ne buud-gomd a to tɩ tolg n zems ye, la buud-gomd ba a yembr me ka tõe n gũ Alkʋr’aana toor-zall sɩf-rãmbã, la a masaal-zulumsã n zʋʋg Laarabiimda ye, bala a yaa buud-gomd sẽn tar gom-wʋgb bãng-zulungu. La nebã yam-tagsgã lebgrã ka tõe n vẽneg muugiza-bԑd nins Alkʋr’aana gom-biisã sẽn tara ye, bal gʋls-bil a yembr fãa tara yel-sõmd sẽn sɩng ne piig n tɩ tãag tusri, la misa wã pʋgẽ me, b ka tõe n tall Alkʋr’aan sẽn lebg ne buud-gomd a to n pʋʋs tɩ ka Laarabiimda soab ye. Yɩɩ woto la Rasaa’ɩlʋn Nuura sãam sɩlem-wẽng kãngã, ba ne a sẽn ra sẽeg zĩig zãng fãaga, la mam tẽedame tɩ yaa mam sẽn wa n be wakat ning munaafɩksã sẽn wa n kẽnd n karemd sɩlem-wẽngã wẽnd-ka-be wã soab nengẽ wã, n yik n kẽnd yalemd la gãeemr kẽn n dat n fʋʋs Alkʋr’aana wĩntoog n kiis ne noor –wala kom-yalemsa- n sõng a Soԑtãana sũ-sãams la a rabeem pʋga, la b leems maam “masaal piig n soab” kãngã, la mam ka mi yellã hakɩɩk sẽn taẽ ye, bala m ra ka tõe n paam ned n sõs yellã zug ye.

Gom-lekdg a yiib n soaba: Tõnd sẽn yi “Denizli” bãns-roogã poore, raar a yembr la mam wa n zĩnd “Sahr” lotԑll-kẽengã etaasã zug n yãnd tɩ-neebã sẽn be sadĩng neer pʋgẽ, tɩ yaa wala b bee zɩkr zĩigẽ, tɩ b alhaal be neere, tɩ mam ma-biisã sẽn loog n bas maam m yembra sabab kɩt tɩ sebgã sẽn lengd tɩɩsã vãad la b wilã tɩ b zõondẽ la b roogd wala zɩkr-maandba kẽes maam sũ-sãamse, la zĩig pʋgẽ bal la mam sẽn tẽeg tɩ-sʋʋgrã la waoodã wakat yelle, tɩ mam yamã yɩ bii, tɩ tɩ-kãnsã la bõn-vɩɩs nins zɩkr noosem sẽn lengd-b rãmbã ninbãaneg yõk maam, hal tɩ mam nintãmã rʋʋge, tɩ mam sẽn tẽeg saabã la welgr ning dũni wã nagsgã sẽn luda yellã lebg sũ-sãams sẽn bedem wala dũni-kẽengã n naag taab mam zugu, la zĩig pʋgẽ bal la nuura ning a nabi Mohammad –yolsg la tɩlgr be a yĩnga- hakɩɩkemdã sẽn wa ne wã wa n tɩlg maam, n wẽnems yɩɩrã la sũ-sãangã sẽn ka-tԑka tɩ lebg sũ-noog la kɩdenga.

[1] La woto ka wilgd tɩ gom-n-yɩlem sẽn ka tar yõod n be Alkʋr’aana pʋgẽ ye, ayo, yaa niyã-wẽng ning Alkʋr’aana bԑԑbã sẽn ra tara la a rat n wilgi. (lebgdã)

Tɩ mam lebg mosa n be neema sẽn duumd pʋgẽ, ne a nabi Mohammd zaata, yolsg la tɩlgr be a yĩnga, nuura kãngã sẽn tɩlg maam n kõ maam sũ-maagra yĩnga, bal neemã kãngã yɩɩ wakat kãnga pʋgẽ bala –yẽ me yaa neema minyõ-rãmbã mam sẽn paamda yembre, wala a sẽn le yaa sɩd-kɩt buuda fãa neema wã- wala vẽnegr ning sẽn wata:

Yam-yaal-yaalã gesg wilgame, hal sɩngra wakato, tɩ tɩɩsã zɩkrã sẽn tar albarka, wakat n na n wa beẽ, tɩ b yas wala b ka tar tʋʋm la yõod ye, la a wilgdẽ tɩ b sẽn zõond la b roogdẽ wã, ka zɩkr noosem yĩng ye, ayo, yaa wala b lʋɩta kaalmã pʋgẽ, tɩ yaa kaalmã la welgrã rabeem n kɩt tɩ b rigda, la woto sãama mam sũur ning sẽn nong ruumgã la maan-neerã la rogem la vɩɩm ninbãan-zoeerã nonglma, hal tɩ ra naan n lebg wala Gԑhanem, tɩ yamã lebg bũmb sẽn namsde. La wakat-kãng la nuura ning a nabi Mohammad –yolsg la tɩlgr be a yĩnga- sẽn wa ne tɩ yaa kũun nebã yĩnga yãk likã, la a vẽneg n wilg tɩ tɩ-kãnsã tara hɩkma-rãmb la maana-rãmb waooglem sẽn ta b vãadã sõore, la ka kũum la kaalem la sãamg la reem la welgr yell n be ne-b ye. La a tara yõod la tʋʋm sẽn ta buks a tãabo, wala b sẽn sɩdg “Rasaa’ɩlʋn Nuura” pʋga:

Pipi bukã: yẽ tara tõkr ne Naaneg-naaba sẽn yaa Na-wagellã yʋyã, bilgri: Wala sẽn mik tɩ te-naand sã n naan masĩn sẽn be neere, nebã fãa gill wẽeda nug-poak a yĩnga, n yetẽ tɩ “maa saa’al laahʋ” la “baarakal laahʋ” wã, hal ba ne masĩnã meng pʋʋsda a maanda ne a zu-noog la a wẽed nug-poak a yĩng ne a alhaal zɩlemde, ne a sẽn tõog n vẽneg yõod ning b sẽn naan yẽnda a yĩnga, la bõn-vɩɩg fãa la bũmb buud fãa yaa masĩn wala yãanda, n pʋʋsd Naanda ne a tõogo, la a wẽed nug-poak a yĩnga.

Buk a yiib n soaba: hɩkma-rãmb sãnda yaa bõn-vɩɩsã la yamã rãmb la a togenda,  rẽ n kɩt t’a lebg bãmb kaoreng teoog la b bãngr gafa, n basd a maana-rãmba belmã tiira pʋgẽ yamã rãmb yamẽ wã, la a basd a sʋʋrgã b pʋtẽerẽ wã, la alwaahʋl misaalɩya[1] wã pʋgẽ, la dũni solgdgã sԑba pʋgẽ, t’a loog n bas dũni-vẽenega n tʋg dũni-solgdgẽ wã, rat n yeel t’a basda sʋʋrg belma, la a paam hakɩɩk belem noor ka-tԑk sẽn lilli.

[1] الألواح المثالية

Yaa sɩda, sẽn mik tɩ Wẽnnaam beeme wã, t’a bãngra me gũbga, sik ka be tɩ kaalmã la kʋʋbã la kũumã la yẽesgã la saabã ka le tar zĩig liimaoongã rãmb dũni pʋgẽ ye, sã n yaa ne hakɩɩk pʋgẽ, sik ka be me tɩ kɩfen-dãmbã me zĩig pida ne kaalmã la welgrã la kũumã la saabã ye, ad yel-bũnd sẽn be nebã fãa gill noyẽ tɩ b wilgd hakɩɩk kãnga n yetẽ:

“Ned ning sẽn paam Wẽnnaam paama bũmb fãa gilli, la ned ning sẽn konga Wẽnnaam konga bũmb fãa gilli”

Gilbu: sẽn mik tɩ liimaoongã tɩlgda ninsaalã n yi kũ-ruumdgã, ad woto bala, a tɩlgda ned buud fãa dũni n yi kũumã la kaalmã liksa. La ãmmaa kɩflmã –sẽn tɩ yɩɩda kɩflem sẽn ka-tԑka- a kʋʋda ninsaalã la a kʋ a dũni wã, n dɩk-a n lobg Gԑhanem vɩɩm liks pʋgẽ, n wẽnems a vɩ-noogã tɩ lebg zẽnem sẽn yaa toog liga.

Sã n yaa woto, bɩ neb nins sẽn tũus dũni vɩɩma n yɩɩd b laahra rãmb yok b tʋbr n kelg la b wa ne yel-kãngã tɩɩm, pa rẽ bɩ b wa kẽ liimaoongã pʋgẽ n paam tɩlgr n yi kongr a yiib kãnsã sẽn tar rabeema.

سبحانك لا علم لنا إلا ما علمتنا إنك أنت العليم الحكيم

(Yɩlemd be ne Foo Wẽnnaam, tõnd ka tar minim n zʋʋg bũmb ning Fo sẽn wilg tõnda ye, ad Foo Wẽnnaam la Minim-naaba, la Bʋʋd-minim-naaba)