Lԑtr b sẽn gʋls ne Rasaa’ɩlʋn Nuura karem-biisa sẽn be Ɩsparta wã yʋʋr yĩnga

No-loeera kiuug taab-pʋʋsg Lԑtre

Sẽn gʋls ne Rasaa’ɩlʋn Nuura karem-biisã sẽn be Ɩsparta wã yʋʋr yĩnga, la b maneg-a lame n dɩgl ne fakra piig la a tãabo

باسمه سبحانه

وإن من شيء إلا يسبح بحمده

Bũmb ka be rɩllame t’a yɩlgd Wẽnnaam yʋʋra.

السلام عليكم ورحمة الله وبركاته أبدًا دائمًا

Asalaamu aleykũm wa rahmatʋl laahɩ wa barakaatuhuu, abadan daa’ɩman

Yaa fo d karen-saam-wagelle, la yaa fo d zug-soab sẽn tar waoore, yaa foo ned ning nin sẽn kiigd zɩɩm nintãm lisaoongã na paam laafɩ dũni la laahr yĩnga, ne Alkʋr’aana yõod la Rasaa’ɩlʋn Nuura la a karem-biisã sẽn yaa sɩd rãmba nidg-pãnga, la yaa foo ned ning yaoolem-zãmaan fɩtnã sẽn kɩt tɩ bãas la ballaog-rãmb paam-a wakat-kãnga sẽn tar rabeema pʋga, n yɩɩd d zug-soab a nabi Aayʋʋba –tɩlgr be a yĩnga-[1], la ned ning sẽn nidgd-pãng ne Alkʋr’aana nuura la Rasaa’ɩlʋn Nuura daliil-dãmbã nuura, la a karem-biisã nidg-pãnga n dat n tɩbs lislaoongã soolem bã-solgds la a bã-vẽenesã, wala a Lʋkmaan Alhakɩɩm.

La yaa foo ned ning sẽn sɩdg n wilg tɩ nuura masaala-rãmb nins sẽn be a albark-nusẽ wã yaa sɩd n yaa hakɩɩka! Yaa foo ned ning sẽn teegd neb nins sẽn datb foo ne wẽnga ne Alkʋr’aana hakɩɩka la Rasaa’ɩlʋn Nuura daliil-dãmbã, la ne Rasaa’ɩlʋn Nuura karem-biisã sɩda la b pʋ-peelma, la ne doos-sõmã kos n kõ-b la maan-neera b yĩnga, n maand ninbãan-zoeer ne-b n yɩɩd ned buud fãaga, hal n dɩk f mengã n kõ lislaoonga yĩnga, ba ne f sẽn yaa bãad n yaa kasem n yaa valenga fãaga, la ba ne f sẽn be alhaal sẽn sõmb tɩ b kʋm f ninbãanega fãa gilli.

[1] Sẽn na yɩl n paam vẽenem sõma yella zugu, Lebg n tɩ ges a Imaam Nursi sẽn gom a nabi Aayʋʋb yella “lam’a tãab n soaba” sẽn be “lam’aata” pʋga. (lebgda).

La yaa foo ned ning “Aaya-kẽengã” masaallã wẽ-n-yiisã sẽn yɩ sabab tɩ b pag-a ne a karem-biisã bãns-roogã, gaf ning sẽn ya a gaf-bԑdã a sẽn walla yembra! Yaa foo ned ning sẽn wẽnems bãns-rotã tɩ lebg nabi Yʋʋsʋf karen-dot la kaoreng-zĩig ne Alkʋr’aana la Rasaa’ɩlʋn Nuura la a karem-biisã nidg-pãng la b yẽeslem yĩnga, la ned ning sẽn tõog tɩ karem-bi-valemsã sẽn be tõnd pʋga taas Alkʋr’aana taoor tɩ b nan ka yi bãns-roogã!

La ned ning sẽn zẽk tõnd zɩɩba la d yaamsã n bas tõnd mosɩɩb kãnga pʋga, n dɩk n tʋk ne Alkʋr’aana pãn-kԑgeng la Rasaa’ɩlʋn Nuura sũ-maagra la a ma-biisã sẽn yals ne-a wã, ba ne a sẽn yaa kasem n yaa valenga fãa gilla!

La ned ning sẽn pak bãnsa ro-sẽksã rignoyã ne Tɩ-bil masaallã la masaala-rãmb nins a sẽn wall n na n sõng dĩina, la Alkʋr’aana sẽn yaa yel-soalem-vẽeneg soaba, la Rasaa’ɩlʋn Nuura daliil-kegemsã, la a karem-biisã pʋ-peelma, la Wẽnnaam raaba, t’a lebg sabab tɩ tõnd zãag d mens ne yel-wẽna, n kɩt t’a daara lebg wala tigr ne tõnd la lislaoongã soolmã tẽmsã!

La ned ning sẽn sɩdga sɩd-sɩd tɩ Rasaa’ɩlʋn Nuura yaa nuura sẽn be nuura zuga, n kɩt t’a paam kaoreng la gʋlsg soog-m-meng sẽn pid n na n tɩ tãag Alkɩyaoom daara, la a le tabend ne Alkʋr’aan-zɩsgã alfayda, la laahr yõod ning Rasaa’ɩlʋn Nuura sẽn kõta la a karem-biisã yamleooga n wilg tɩ lislaoongã soolma tara tʋls-kԑgeng ne nuura kãnsã, wala b sẽn tar tʋlsem ne koomã la burã[1] la pemsmã. La a le tabend n wilg tɩ neb nins sẽn karemdb la b gʋlsd nuura kãnsã tusa na n kẽe yaoogã ne liimaoongã!

La ned ning sẽn ka basd tɩ b wil a karem-biis nins sẽn tar tõkr ne-a wã, la ned ning sẽn kiisa tõnd sũyã bugum ne Alkʋr’aana la Rasaa’ɩlʋn Nuura waazʋ wã, la a karem-biisã pʋtẽera la b yama, la “masaall piig n soaba” la “masaall piig la a yembr n soaba” sẽn be “Tɩ-bil masaallã” pʋga, la a tɩ-puuda, la a masaal-rãmb nins sẽn tar albark wala vɩɩm koomã la Kaoosar kʋɩlgã, la a tɩ-puuda, bugum ning sẽn da yõogd tõnd yʋng la wĩntoog ne welgrã bugma, n peeg tõnd n tɩ kẽes kɩdeng la sũ-noog pʋga!

[1] Rat n yeel tɩ rɩɩbo

La yaa foo ned ning sẽn tɩlga kũumã –bũmb ning dũni wã fãa gill sẽn yԑԑsd n yɩɩd bũmb fãa gilla- n yi kʋʋb sẽn duumd liimaoongã rãmb nengẽ wã, n wẽnems-a t’a lebg tʋʋm-saab biye wã, ne Alkʋr’aan-zɩsgã pʋlem-sõma la a pʋlem-wẽnsa, la hakɩɩk nins Rasaa’ɩlʋn Nuura sẽn vẽnega, la a karem-biisã sẽn maan-kaalmã sẽn maan-kaseta, la yaadã yԑl sẽn vẽneg b rãmb nengẽ wã sẽn yã wã. La a le tabend n wilg tɩ kũumã yaa so-sõng sẽn dabd nuura dũni pʋgẽ, la a kõ-kibar t’a yaa kʋʋb sẽn duumd ne kɩfen-dãmbã la munaafɩgsã, la a tabend n wilg yԑs tɩ yaoogã sẽn yaa lik n tar rabeem n yaa sẽka, yaa Arzãn bãoog a yembr la a rignoor a yembr liimaoongã rãmb yĩnga, n le yaa Gԑhanem bok a yembr sẽn pid ne wag-kẽems la namse, kɩfen-dãmbã la munaafɩgsã la wẽn-ka-be wã rãmba yĩnga, ne Alkʋr’aana sẽn yaa yel-soalem-vẽeneg soaba sẽn kõ-kibar sẽn tar pãnga, kibar ning Alkʋr’aana muugiza-rãmbã nems pis-naasã sẽn sɩdgda, t’a nabi Mohammad –yolsg la tɩlgr be a yĩnga- muugiza-rãmb tusr sɩdgdẽ wã, tɩ daliil-vẽenes nins sẽn wil n ket n wind bԑԑbã wilb meng-menga, sẽn be Rasaa’ɩlʋn Nuura pʋga sẽn sɩdgd-a wã, la Nuur karem-biisã sẽn kõ-sɩd b sẽn yã tagemsã la pʋg-n-gesgã poora.

La ned ning sẽn kɩta tɩ malԑks a yiiba, a Munkar la Nakɩɩr, sẽn na n wab yaoogã pʋga, tɩ b lebg zo-rãmb a yiib sẽn yaa nen-yubsdb ne ned ning sẽn tũ wã sɩdã la hakɩɩkã rãmb sora.

La ned ning sẽn kẽesa Rasaa’ɩlʋn Nuur karem-biisã bãng-baoodb pʋga, la a vẽneg n wilg ne Alhaafɩz Alli sẽn yaa gihaad-zabdã kũuma sabab –Wẽnd na yols-a- tɩ b leokda malԑk a Munkar la a Nakɩɩr sʋksga ne Rasaa’ɩlʋn Nuura.

La ned ning sẽn ganegd a meng n kot Wẽnnaam yolsgã n kõt tõnd ned buud fãa sẽn ket vɩɩm pʋga, sẽn na yɩl tɩ tõnd me tõog n leok ne Rasaa’ɩlʋn Nuura.

La ned ning sẽn wilgd Alkʋr’aana la a sɩdgd n wilgd ne nao-kẽndr sẽn tar yel-solemd n be neere –ne b sẽn ka yãnd la b ka wʋm a buud sẽn deng taoora- tɩ Alkʋr’aanan-zɩsgã yaa Wẽnnaam sẽn yaa Sɩd-naaba goam, la saasẽ gaf-rãmbã fãa gill sẽn tɩ yɩɩda zɩslem la sõmblem, la a sɩdg n wilg tɩ alhamd tusa n be Alhamda pʋgẽ, tɩ kulhuwallaah-rãmb tusa be Kulhuwallaahʋ wã pʋga, la a sɩdg n wilg t’a gʋls-bil a yembr fãa tara yel-sõma piiga, tɩ sasa ninga bɩ tat yel-sõmã koabg bɩ tusr bɩ tusa, ne a sẽn vẽnegd Alkʋr’aan-zɩsgã muugiza-rãmbã kõbg a yembr wala sẽn be Alkʋr’aana muugiza kõbg pis-naasa yembr fãa pʋga,

la a sẽn yaa goam-kʋdg sẽn togl bõn-naandsã fãa gilla yĩnga, la ne masaala a yiiba “Alkʋr’aana yel-soalma” la “tagems a nii” wã sẽn be Rasaa’ɩlʋn Nuura sẽn yaa Alkʋr’aana welsga pʋga, la ne Masna’ɩl warda –sẽn yaa Rasaa’ɩlʋn Nuura- gʋlsdbã la a lebgdbã taoor-soaba sẽn gʋls Alkʋr’aana wala b sẽn gʋls-a Laohʋl Mahfʋʋz walga pʋg ne “gʋls” saglga, tɩ yaa sẽn togl a Hʋsrao ning sẽn yaa Rasaa’ɩlʋn Nuura lebgdba gãndaooga, ne a ma-biisã la a karem-biisã nidg-pãnga, ba ne ned ba a yembr sẽn ka tõog n gʋls-a hal zu-noog zãmaanẽ n wa tãag rũnda zãmaana, ne sʋʋrg sẽn be neer wala woto bilgra fãa gilla.

La ned ning sẽn tabenda n wilg tɩ Alkʋr’aan-zɩsgã tara muugiza-rãmb nens pis-naasa, ne a sẽn vẽneg Alkʋr’aana sẽn yaa yel-soalem-vẽeneg soaba sẽn ra sɩng n be hal yʋʋm tusr la kobs-tã sẽn looga muugiza wã, la Alkʋr’aana sẽn tõog n gɩdg a bԑԑbã, la Rasaa’ɩlʋn Nuura daliil-vẽenesã sẽn yaa wala b ne-ba ne nina, la Nuur karem-biisã sãnem-pԑԑlgã kaal-moodã, la Rasaa’ɩlʋn Nuur ning sẽn wilg dũni wã t’a ka tõe wã, la bũmb ning b sẽn ka yãnd a buud pĩnd n wa tãag rũnda wã, sẽn tɩ yɩɩd a “gomd pisi la a nu n soaba” la a pʋgds nins sẽn kɩt tɩ bԑԑbã ka le tõe n yet tɩ ba a fʋɩ wã.

La yaa foo ned ning sẽn sɩdg a nabi Mohammad muugiza-rãmb tusa sẽn wilgd tɩ tẽntʋʋmã yaa tẽntʋʋm sɩd-sɩd sɩdgr meng-meng ne masaall ning b sẽn boond tɩ “Muugizaatʋl Ahmadɩya”wã –yolsg la tɩlgr be a yĩnga- sẽn be Rasaa’ɩlʋn Nuura pʋga, la a le sɩdg n wilg tɩ yẽ la nabiyaam-dãmbã fãa gill sõor sẽn ta tus-koabg la pisi la a naasa sẽn yɩɩda ne sõmblem, yẽ n le ya b zug-soaba.

La ned ning sẽn vẽnega yõod-kẽeng ning sẽn be yãmb tẽntʋʋm-kãngã sũn-yɩlengã pʋgbã pʋga –yolsg la tɩlgr be a yĩnga- bal sũn-yɩlengã pʋgbã rũnda zãmaana pʋgẽ tara gihaad-zabdb koabg yel-sõmde, wala Alkʋr’aan-zɩsgã sẽn moon n wilg dũni-kẽengã fãa gill tɩ tẽntʋʋm-wagellã –yolsg la tɩlgr be a yĩnga- yaa yolsg ne bõn-naandsã, la Rasaa’ɩlʋn Nuura me gill sẽn sɩng a sɩngrẽ wã n tɩ tãag a baasgẽ wã sẽn tabend n wilg ne daliil-vẽenes tɩ tẽntʋʋmã –yolsg la tɩlgr be a yĩnga- yaa yolsg ne bõn-naandsã, la nebã fãa gill sẽn le yãnd –hal ba ne zoensã fãa- tɩ tẽntʋʋm kãngã tʋʋmã la a alhaal-dãmbã n yaa kãndgd sẽn sõmb ne tik n tʋma, n le yaa bõn-naandsã sẽn yɩɩda ne sõmblma, la Rasaa’ɩlʋn Nuura sẽegrã Anadool la galʋ-tẽms sãnda pʋga sẽn yɩ sabab tɩ ballaog-rãmbã sa wã, la b sẽn wa n rat n yals-a wã sẽn yɩ sabab tɩ ballaog-rãmbã le siga kaseta, ne Rasaa’ɩlʋn Nuur karem-biisã daawa wã tʋʋma sababa, la b sẽn gad daawa wã sõma wakat-kegems pʋga.

La ned ning sẽn sɩdga ne yã-vẽeneg n wilg tɩ Rasaa’ɩlʋn Nuura me tusda mosɩɩb-rãmba la ballaog-dãmbã sẽn be Anadool hal yʋʋm pisi wã n zãagdẽ wã, wala sãra maaneg sẽn tusd mosɩɩb-dãmb la ballaog-rãmb n zãagdẽ wã to-to.

Yaa fo d karen-saam-noanga, ad Rasaa’ɩlʋn Nuura sẽn paam a meng mosa wã peega yãmb pipi, la a peeg tõnd me sẽn yaa yãmb karem-bi-valemsã, la a peeg lislaoongã soolem gill n tɩ kẽes sũ-noog la zu-noog pʋga, n kɩt tɩ tõnd le maand tig-kẽeng a yiib n soaba. Rẽ n so tɩ tõnd pʋʋsd yãmb d karen-saam-noangã ne y taab tig-kẽeng kãngã yĩnga, la d le pʋʋsd-y no-loeera sẽn yaa tigr a tãab n soaba taab-pʋʋsgo, la d pʋʋsd-y kuidgã taab-pʋʋsgo, n kot Wẽnnaam t’A kõ-d a taab wʋsgo, la d kot Wẽnnaam d zũnuub-rãmbã yaafgo, la d ningd-y-la sallem, la d mokd y albark-nusã la y naoã, la d kot yãmb doosã sẽn tar albarka, yaa fo d karen-saamb la d zu-soaba!

Rasaa’ɩlʋn Nuur karem-biisã

Sẽn be Ɩsparta pʋga la a yagsa

Lԑt-wok kãngã ning Rasaa’ɩlʋn Nuur gʋlsda sẽn gʋls ne nebã fãa gill yʋʋra, mam toond-a-la yãmb nengẽ, tɩ m yaa sẽn paas-a fakra[1] piig la a tãabo, tɩ yaa bark pʋʋsg sẽn solge, la sẽn na tɩlg n yi belg-m-mengã la sõm-zɩɩlmã ne neema wã, bal sɩf-rãmb nins sẽn yɩɩd maam noor koabga sẽn be masaallã pʋga tõdgr gãneg-m-meng yĩnga, yaa sõm-zɩɩlem maaneg ne neema wã, la Rasaa’ɩlʋn Nuura karem-biisã tẽ-sõngã yaalgo, la sɩd sak n deeg tɩ bũmb ning sẽn be a pʋgẽ wã yaa woto wã me, yaa belg-m-meng la nin-mengre.

Mam toond-a-la yãmb nengẽ sẽn na yɩl tɩ y kẽes-a “Masaall piig la a yembr n soaba” sẽn be Tɩ-bil masaallã pʋga baasgẽ wã, ne gomd-zu-rao-kãngã: “Lԑtr sẽn yi Rasaa’ɩlʋn Nuur karem-biisã sẽn be Ɩsparta la a yagsa nengẽ”.

Y ma-biigã

Sa’ɩɩd Al-nursɩ

[1] paragarfe