 Masaall a nu n soaba

MASAALlà NU SOABA

Sik ka be tɩ rasãndã yaa loaagd ye, wala b sẽn vẽneg n wilg “kom-bɩɩs toagendã” pʋga, ad sik ka be tɩ rasãndã na n wa lebga nin-kẽoong la kũum ye, wala y sẽn ne vẽeneg tɩ tʋʋlg sasã sã n loog yaa tɩ-sʋʋgr la waood sasã n wata, la wĩntoog sã n loog yaa zaabr la yʋng n pʋgda.

La ad saasẽ gaf-rãmbã fãa gill kõta kibar tɩ bi-bɩɩg sã n yõk a meng n dɩk a rasãnda n tʋm neere, tẽeg-tɩrg pʋgẽ, a na n paama rasãnd-duumdg sẽn ka saabo.

La wala ned kʋʋb minit a yembr gẽeg sabab sẽn kẽesd ned bãns-roogã minit minyõ-rãmba, ad woto bala, bi-bɩɩg fãa sẽn tar yam kõta sɩd ne mams-n-gesgã, tɩ rasãndã reemã la a wʋm-noogã, zĩig ning sẽn ka segda pʋga, tara zablem a pʋgẽ tɩ yɩɩd a wʋm-noogã menga. Sẽn paasde, a na n yɩɩ sabab tɩ b sʋk-f Laahre, la a le yɩ sabab tɩ f paam yaoogã naongo, la a na n leems-a-la nims-maaneg naong ning sẽn be wʋm-noogã saabã poore, la a yɩt sabab t’a paam zũnuub-rãmb la dũni wã naongo, la woto n na n yɩ a soaba alhaala, t’a sã n dɩk-a n tʋm reemã la menengã pʋgẽ.

Bilgri: Ad yԑl wʋsg n be nonglem ning sẽn gɩdgã pʋgẽ, wala pʋg-taarã bɩ ra-tarã zablem la welgrã zablem la nonglmã segb ne a bilgrã kaalem zablema sẽn kɩtd tɩ wʋm-no-gɩrgã sẽn be nonglmã pʋga lebg wala sɩɩd sẽn ning zẽnem.

La fo sã n dat n bãng tɩ kom-bɩɩsã sẽn ka zãad b rasãndã sõma wã yɩta sabab tɩ b kẽed lokto-yiyã pʋgẽ ne bãase, tɩ b vɩ-yaarã sabab kɩt tɩ b kẽed bãns-rotã pʋgẽ, la b kẽed baar-dãmbã la reemã zĩis la yãnda kaalmã zĩĩsẽ la yaadã pʋgẽ ne weoogrã la keglmã sababo, b sũyã la b yõyã sẽn ka paamd rɩɩba yĩnga, la b sẽn ka tʋmd b tʋʋma yĩnga, bɩ f kẽng n tɩ sʋk lokto-yiyã la bãns-rotã la baar-dãmbã la yaadã, ad sik ka be tɩ noor wʋsgo, fo na wʋm wiisg la kʋkʋm-kԑlenga, la  nims-maaneg naong b sẽn pãbd-b pegs yĩnga, tɩ yaa namsg ne-ba, b rasãndã zã-wẽngã la b vɩ-yaarã la wʋm-noog ning sẽn ka segda maanegã yĩnga ye.

Ad saasẽ gaf-rãmbã fãa gilli, sẽn sɩng ne Alkʋr’aana ne a aaya-rãmba sẽn yaa wʋsg n yaa sɩda, b togsda tõnd la b noogd d sũyã, tɩ bi-bɩɩg sã n zĩnd tẽeg-tɩrgã pʋgẽ, a rasãndã lebgda Wẽnnaam neema a nengẽ ne lomsg la yɩlgemr tԑka, la yel-sõma roadg sẽn be neer n tar pãnga, la a na n kɩtame t’a paam rasãnd sẽn duumd Laahre.

La sẽn mik tɩ hakɩɩkã yaa woto wã, la sẽn mik tɩ halaalã zĩigã seka ne zu-noogã la wʋm-noogã la vɩ-noogã, la sẽn mik tɩ wakat a yembr wʋm-noog haraamã zĩigẽ yɩta sabab n wa ne namsgã ne yʋʋmd a yembr bɩ yʋʋm piig bãns-roog sasa ninga, sik ka be tɩ yaa tɩlԑ tɩ b rɩk rasãndã neema wã sẽn yaa noogã n tʋm ne yõk-m-meng la tẽeg-tɩrg ye, tɩ yaa Wẽnnaam bark-pʋʋsg ne rasãndã neema wã.